Jekope kei Inosi, mai vei Scott Snow

15–21 ni Epereli: “O Koya sa Cakacaka Yaco kina Vei Au Meu Kitaka me Vaka na Nona Lewa”

Inosi–Na Vosa i Momani

E dina ga ni a lako o Inosi ki na veikau me vakasasa manumanu me vakaceguya na viakana vakayago, sa mai tu kina ena siga taucoko kei na bogi baleta ni sa “waloloi na yalona” Na waloloi oqo a muataki Inosi me “tabalaka cake tikoga na [domona] me yaco ki lomalagi.” A vakamacalataka na ka a sotava oqo ni sa dua na sasaga kaukauwa ena mata ni Kalou (raica na Inosi 1:2–4). Eda vulica mai vei Inosi ni masu e dua na sasaga vakaidina meda toro voleka vua na Kalou ka segata me kila na Lomana. Ni dina vakaoqo na nomu masu, o na raica kina me vakataki Inosi ni na dau rogoci iko na Kalou ka sa kauwaitaki iko dina, o ira na nomu daulomani, ka vakakina o ira na nomu meca (raica na Inosi 1:4–17). Ni ko sa kila na Lomana, ko sa na rawata vakavinaka cake mo cakava na Lomana. Me vakataki Momani ga, o na “sega ni kila na veika kecega; ia sa kila na Turaga na veika kecega … ; [ka] sa cakacaka yaco kina vei [iko mo] kitaka me vaka na nona lewa” (Vosa i Momani 1:7).

Vakasama eso ni Vuli ena iTikotiko kei na Lotu

Inosi 1:1–17

Na Kalou ena rogoca ka sauma mai na noqu masu.

Ena sega soti beka ni veivakurabuitaki na nomu masu me vakataki Inosi, ia e sega ni gadrevi me sega soti ni vakaibalebale. Oqo eso na taro me vakasamataki ena nomu vulica na Inosi 1:1–17:

• Na cava eso na vosa e vakamacalataka na sasaga nei Inosi ena nona masu?

• A veisau vakacava na masu nei Inosi mai na tikina e 4 ki na 11?

• Na cava au sa vulica mai vei Inosi e rawa ni vukei au meu vakatorocaketaka na noqu masu?

Raica talega na “Enos Prays Mightily” (vidio), Gospel Library; “Sweet Hour of Prayer,” Sere ni Lotu, naba 142

Wasei ni taro ni veivosaki. Kevaka o vakavulici ira tiko eso tale, sa rawa mo biuta na taro o na via veivosakitaka ena dua na vanua bibi me rawa ni ra raici ira kece na tamata. Oqo ena vukei ira na tamata mera vakasamataka vakatitobu na taro ka solia na isaunitaro e veivakauqeti vakalevu cake.

Inosi 1:1–4

Na Turaga e rawa ni vukei au meu vakauqeta na noqu matavuvale ena caka vinaka.

Ena rairai tiko beka e dua ena nomu matavuvale o gadreva mo vukea me lako mai vei Karisito, ia o vakataroga tiko se sa vakayaco veisau vakacava na nomu sasaga. Na cava o rawa ni vulica mai na Inosi 1:1–4 me baleta na veivakauqeti nei Jekope vua na luvena o Inosi? Me kena ivakaraitaki, na cava na ibalebale ni malanivosa “na veisusugi kei na veivunauci ni Turaga” vei iko? Ena rawa vakacava mo sureta na Nona veivakauqeti ena nomu itikotiko?

Ni o vakasamataka na nomu matavuvale, vakasamataka na veitaro kei na ivurevure eso oqo:

• O na vakauqeta vakacava na nomu matavuvale ena sala dodonu? (raica na 1 Nifai 2:16–18; 3:15–21; 5:1–6; 7:20–21; Alama 36:17–20; “Na Matavuvale: Ai Vakaro ki Vuravura Raraba”). Na cava o rawa ni cakava kevaka e dua e sega ni vinakata na nomu veivuke se yaloca vei iko?

• Na ivakavuvuli cava soti o kunea ena ivolanikalou eso oqo e rawa ni dusimaka na nomu veimaliwai kei ira na lewe ni matavuvale? Maciu 5:21–24, 38–44; 6:14; 7:1–5; 22:36–39; 3 Nifai 18:21; Moronai 7:33; Vunau kei na Veiyalayalati 18:10–13.

A wasea o Elder Dieter F. Uchtdorf na ivakasala veivukei me baleta na matavuvale ena “Veivakacaucautaki Vei Ira era Veivakabulai” (Ensign se Liaona, Me 2016, 77–80). Na cava e vakauqeti iko kina na nona itukutuku mo cakava mo vaqaqacotaka kina na nomu matavuvale? (raica vakabibi na iwasewase ka kena ulutaga na “Vakabulai ni Noda Matavuvale”).

Raica talega na Ulutaga ni Kosipeli, “Family,” Gospel Library; “Home and Family—Through Small Things” (vidio), Gospel Library.

Inosi 1:1–18

Au rawa ni ciqoma na veivosoti niu cakacakataka na vakabauti Karisito.

Eso na gauna o na vakataroga beka ke sa vosoti na nomu ivalavala ca, ni oti mada ga nomu veivutunitaka na ivalavala ca oqori. Na veivakararamataki cava o sa rawata mai na veika a sotava o Inosi ena Inosi 1:1–8? A vakaraitaka vakacava o Inosi na nona vakabauti Jisu Karisito ni bera kei na gauna sa ciqoma oti kina na veivosoti?

Jeromi–Omanai

Niu segata meu muria na Nona ivakaro, ena vakalougatataki au na Kalou.

Na ivola i Jeromi kei Omanai erau vakamacalataka ruarua na veiwekani ni buladodonu kei na sautu. Na cava o vulica mai na Jeromi 1:7–12; Omanai 1:5–7, 12–18? E duidui vakacava na ivakamacala vakavuravura ni sautu mai na nona ivakamacala na Turaga? E dau vukei ira vakacava na Nona tamata na Turaga mera kune vinaka? (raica na Alama 37:13; 48:15–16).

Omanai 1:25–26

“Lako mai vua na Karisito, o koya na Yalo Savasava ni Isireli.”

Na veisureti “Lako mai vua na Karisito” e kunei vakawasoma ena iVola i Momani. Na ka dina, e dua vei ira na inaki bibi ni ivola o ya me vakatetei na veisureti oqo ki na tamata kecega. Ni o wilika na Omanai 1:25–26, na vosa se malanivosa cava o raica e vakamacalataka na sala me lako mai kina vei Karisito? Na cava o na cakava mo lako mai kina Vua vakataucoko?

Sa Biuta Vata o Momani na Peleti, mai vei Jorge Cocco

Vosa i Momani 1:1–8

Ena cakacaka maivei au na Kalou kevaka au muria na Nona veidusimaki.

E dua na vuna a vakauqeti Momani kina na Turaga me okata na peleti lalai i Nifai ena iVola i Momani baleta ni sa kila tu na Kalou ni imatai ni 116 na draunipepa vakadewataki era na yali (raica na Vunau kei na Veiyalayalati 10; Yalododonu, voliumu 1, wase 5). Na cava na vuna o vakavinavinakataka kina ni a muria o Momani na ivakasala ni Turaga me okati kina na volavola oqo (ka tiko kina na 1 Nifai ki na Omanai)? Na cava na vuna a solia kina o Momani me okati ira kina? (raica na Vosa i Momani 1:3–7). Ena gauna cava o raica kina na Kalou ni cakava na Nona cakacaka mai vei iko se o ira eso?

Me baleta na vakasama tale eso, raica na ilavelave ni vula oqo ni Liaona kei na mekasini ni Me iSakisaki ni iTabagone.

Vakasama ni Nodra Tuberi na Gonelalai

Inosi 1:1–5

Au sa rawa ni vosa vua na Tamada Vakalomalagi ena masu.

• O na vukei ira vakacava na luvemu me vakaibalebale cake kina na nodra masu? Sa rawa mo vakaraitaka vei ira e dua na iyaloyalo kei Inosi ni masu tiko; ka me ra vakamacalataka na ka era raica. Sa rawa mera qai bobo na matadra ka ra raitayalotaka ni ra sa veivosaki tiko e matana votu kei na Tamada Vakalomalagi. Na cava beka era vinakata me ra veivosakitaka? Na cava beka ena vinakata o Koya me tukuna vei ira?

• Ni o wilika e cake na Inosi 1:1–5, sa rawa vei ira na gone mera dramataka ni o ira o Inosi ena nodra matanataka na vakasasa, tekiduru me masu, kei na so tale. O ira na gone qase cake e rawa ni ra vakarogoca e dua na vosa se malanivosa e vakamacalataka na masu nei Inosi. Na cava e vakavulica vei keda na veivosa eso oqo me baleta na masu nei Inosi? Wasea e dua na gauna a “waloloi” kina na yalomu ka “o tagi” kina vua na Turaga (Inosi 1:4

Ni da luve ni Kalou, e rawa ni da masu vei Tamada Vakalomalagi.

Inosi 1:2–16

Na Tamada Vakalomalagi sa dau rogoca ka sauma na noqu masu.

• O na vukei ira vakacava na luvemu me ra kila vinaka ni na rogoca ka sauma na nodra masu na Tamada Vakalomalagi? Sa rawa mo sureti ira me ra vola eso na ka era dau masulaka. Oti mo qai vukei ira me ra raica na veika a masulaka o Inosi ena Inosi 1:2, 9, 13–14, kei na 16 (raica talega na “Wase 11: Inosi,” Book of Mormon Stories, 30–31).

  Na cava a qai yaco ena masu nei Inosi? (raica na tikina 6, 9, 11

  Na cava eda vulica mai na veika a sotava o Inosi me baleta na kena vakavinakataki na noda masu?

• Lagata vata e dua na sere baleta na masu, me vaka na “A Child’s Prayer” (Nodra Sere na Lalai, 12-13). Sa rawa vei ira na luvemu me ra laveta na ligadra ena veigauna era rogoca kina na “masu” se “na masu” se dua tale na vosa tokaruataki. Tukuna vei ira na luvemu me baleta eso na sala sa sauma kina na Tamada Vakalomalagi na nomu masu.

Vosa i Momani 1:3–8

Au rawa niu vakalougatataki ira eso tale niu vakarogoca na Yalo Tabu.

• A muria o Momani na veituberi ni Yalo Tabu me okati kina na peleti lalai i Nifai ena iVola i Momani. Na veika kece eda sa vulica ena iVola i Momani sa yaco mai vei keda ena yabaki oqo baleta ni sa digitaka o Momani me vakarorogo ki na Yalotabu. O na vukei ira vakacava na luvemu me ra vulica na vakarorogo ki na Yalotabu? Sureti ira me ra veivukevuke na wilika na veitikina mai na Vosa i Momani 1:3–8. Sa rawa mo veivosakitaka na veika era sa vulica mai na veitikina yadua. E rawa mera qai cakava oqo na luvemuni:

  • Wasea na veika era sa vulica mai na italanoa ena iVola i Momani ena yabaki oqo (na iyaloyalo mai na Lako Mai, Mo Muri Au ena rawa ni vukei ira me ra nanuma).

  • Lagata vata e dua na sere baleta na Yalo Tabu, me vaka na “The Still Small Voice” (Nodra Sere na Lalai, 106-7).

  • Veivosakitaka na veika era sa sotava era a dusimaki kina mai vua na Yalotabu me ra cakava e dua na ka e vakalougatataka e dua tale.

Me ikuri ni vakasama, raica na ilavelave ni vula oqo ena iTokani ena kena mekasini.

Masu o Inosi, mai vei Robert T. Barrett