Na Vosa Vakaibalebale ni Vu ni Olive, mai vei Brad Teare

8–14 ni Epereli: Sa Cakacaka Vata kei Keda na Turaga

Jekope 5–7

E vuqa ka vuqa sara na tamata era sega ni se rogoca na kosipeli i Jisu Karisito. Kevaka o vakila ni sa veibikai na vakaitamera ni itavi ni kena vakumuni ira vata mai ki na Lotu ni Turaga, nai talanoa vakaibalebale ni vu ni olive ena Jekope 5 e tiko kina na veivakananumi veivakadeitaki: ni nona na Turaga na were-ni-vaini. Esa solia vei keda yadua o Koya e dua na tikina lailai meda veivuke ena Nona cakacaka—noda vuvale, o ira noda itokani, kei na veivanua eda rawa ni veivakauqeti kina. Ka so na gauna na imatai ni tamata eda rawa ni vakumuna sai keda saraga vakataki keda. Ia eda sega ni tu taudua ena cakacaka oqo, ni sa cakacaka tikivi ira na Nona tamata cakacaka na Turaga ni were-ni-vaini (raica na Jekope 5:72). E kilai ira na Luvena na Kalou ka lomani ira, ka na vakarautaka na sala o Koya me ra rogoca yadua na Nona kosipeli, o ira talega era cakitaki Koya ena veigauna sa oti (raica na Jekope 4:15–18). Ena gauna, sa caka oti kina na cakacaka, o ira kece “dou a cakacaka vagumatua vata kei [Koya] … dou na reki vata kei [Koya] ena vuku ni vua ni [Nona] were ni vaini” (Jekope 5:75).

Raica talega na “Jacob Teaches about the Gathering of Israel” (vidio), Gospel Library.

Vakasama eso ni Vuli ena iTikotiko kei na Lotu

Jekope 5

Na Turaga ni were ni vaini o Jisu Karisito.

Na Jekope 5 e dua na italanoa ka vakaibalebale kina na ivakatakarakara. E vakamacalataka na vunikau kei na vuana kei na tamata cakacaka, ia e baleta dina na veimaliwai ni Kalou kei ira na Nona tamata ena itukutuku taucoko ni veigauna. Ni o wilika na italanoa taumada, vakasamataka se na vakatakarakarataka beka eso na ka ena italanoa.

Me ivakaraitaki, kevaka e matataka na vuravura na were ni vaini, ka matataki Isireli na vu ni olive vinaka (se o ira era sa veiyalayalati kei na Kalou; raica na Jekope 5:3), na cava e rawa ni matataka na vu ni olive ni veikau? Na cava e matataka na vuanikau vinaka kei na kena ka ca? Na ivakatakarakara cava tale o sa raica?

E dina ga ni Jekope 5 e vakavulica na veika me baleta na veimatanitu kei na veisenitiuri ni itukutuku kei vuravura, e baleti iko talega kei na nomu bula. Na lesoni cava so o kunea e baleti iko ena Jekope 5

E rairai bibi duadua, na Jekope 5 e baleti Jisu Karisito. Vakasaqarai Koya ni o wiliwili tiko. Na cava o vulica me baleti Koya, me vakataka ena tikina e 40–41, 46–47?

Me baleta na ikuri ni rai titobu me baleta na Jekope 5, raica na daiqaramu ena mua ni ituvatuva oqo.

Jekope 5:61–75

Na Turaga sa sureti au meu cakacaka vata kei Koya ena Nona were ni vaini.

O ira e “so tale na tamata dauveiqaravi” (Jekope 5:70) era sa kacivi ki na were ni vaini ni Turaga era oka kina na tamata vakataki iko. Na dina cava eso o sa kunea ena Jekope 5, vakabibi na tikina e 61–62 kei na 70–75, me baleta na cakacaka ena were ni vaini ni Turaga? Na cava o sa vulica me baleti Koya ena nomu veivuke ena Nona cakacaka?

Ni o wilika na veika me baleta na “iotioti ni gauna” e cakacaka kina na Turaga ena Nona were ni vaini, na cava e vakauqeti iko kei na nomu vuvale mo qarava na Turaga “vagumatua”? (Jekope 5:71) Ena rawa beka ni o vakasamataka e dua na ka o sotava ka vakila kina na reki ni o qarava tiko na Turaga ni were ni vaini—me vakataka, na wasei ni kosipeli, veiqaravi ena valetabu, se vaqaqacotaki ira eso. E rawa talega ni o vakadikeva na ivakaraitaki a wasea o Elder Gary E. Stevenson ena nona itukutuku “Rawarawa ka Totoka—Totoka Qai Rawarawa” (Liaona, Nove. 2021, 47–50).

Me vaka a kaya o Peresitedi Nelson: “Na gauna o cakava kina e dua na ka e vukea kina e dua—ena yasa cava ga ni ilati—kalawa ki liu ka cakava nomu veiyalayalati kei na Kalou ka ciqoma nodra cakacaka vakalotu bibi ni papitaiso kei na valetabu, o sa vukea tiko me vakasokumuni o Isireli. E rawarawa sara ga vaka o ya” (“Hope of Israel” [worldwide youth devotional, June 3, 2018], ChurchofJesusChrist.org). Sa rawa mo vakarautaka na vakasama eso ni veika o rawa ni cakava me vukea na vakasokumuni o Isireli. Mai na veivakasama oqori na cava o nanuma e vinakata na Turaga mo cakava nikua ena Nona were ni vaini? Me vaka na tikina e 75, ena vakalougatataki keda vakacava na Turaga ni da veiqaravi ena Nona were ni vaini?

Raica talega na “Isireli Bau Rogoca,” Serenilotu, naba 6; “Old Testament Olive Vineyard” (vidio), Gospel Library; Ulutaga ni Kosipeli, “Vakasokumuni o Isireli,” “Sureta na Tamata Kecega mera Ciqoma na Kosipeli i Jisu Karisito,” “Vakaitavi ena Cakacaka ni Valetabu kei na Tuva Kawa,” Gospel Library.

Veiyalayalati Makawa Veivaini ni Olive

(Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Vakavulica na ivunau Raica me vakanamata na nomuni veivosaki ena yavu ni ivunau ena ivolanikalou. E rawa ni o cakava oqo ena nomuni wilika vata na ivolanikalou ka qai veiwaseitaka vakai kemuni na dina o ni kunea, ka vakakina na veika o ni sotava ena bulataki ni dina oqori.

Jekope 6:4-5

Na Turaga sa dau nanumi ira na Nona tamata ena loloma kei na loloma veivueti.

Dua na ibalebale ni vosa tautauri matua o ya mo vakarogoca vakamatua se ququmi vakaukauwa ki na dua na ka, ka sega ni yavalati rawa. E vakayaco-ka vakacava na veibalebale oqori ena sala mo kila vinaka kina na Jekope 6:4–5? Ena italanoa ni vu ni olive, a dodoka vakacava na Turaga ni were ni vaini na “liga ni nona loloma cecere”? (raica, me vakataka na Jekope 5:47, 51, 60–61, 71–72). E sa vakayacora beka vakacava vei iko o Koya na veika oqo?

Jekope 7:1-23

Au sa rawa ni tudei tikoga ena gauna era bolea kina eso na tamata na noqu vakabauta.

Na veika era sotava na Nifaiti kei Seremi e sa tokaruataki tiko nikua: era sa saga tiko na tamata mera vakarusa na vakabauti Karisito. E sauma vakacava o Jekope ena gauna e ravuti kina na nona vakabauta? Na cava o vulica mai na veika qai cakava o koya? Na cava o rawa ni cakava ena gauna oqo mo vakavakarau ki na veigauna ena bolei kina na nomu vakabauta na iVakabula?

Raica talega na Jeffrey R. Holland, “Na iSau—kei na Veivakalougatataki—ni Bula Vakatisaipeli,” Ensign se Liaona, Me 2014, 6–9; “Sherem Denies Christ” (vidio), Gospel Library.

Me ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

Jekope 5

Sa kauwaitaki ira na Nona tamata na Turaga.

• O na wasea vakacava na italanoa ni vu ni veiolive ena ivakarau me ra kila vinaka kina na luvemu?. E dua na sala o ya na taubale e tautuba mo raica e dua na vunikau ka railesuva vakalekaleka na veitikina bibi ni italanoa. Na cava e cakava na Turaga ni were ni vaini ki na Nona veivunikau? Eda na vakataki ira vakacava na liganicakacaka ena italanoa ka vukei ira na tamata me ra vakila na loloma ni iVakabula?

• A wasea o Jekope na italanoa ni vu ni veiolive me vukea nodra sureti nona tamata me ra lako mai vei Karisito. E rawa ni yaco vakakina vei iko. E rawa beka ni o vakalekalekataka na italanoa ena veitikina me vaka na Jekope 5:3–4, 28–29, 47, kei na 70–72 (raica talega na “Old Testament Olive Vineyard” [vidio], Gospel Library). O iko se ira na luvemu mo ni wilika na Jekope 5:11, 41,47, kei na 72me ra vaqara na veika e vakaraitaka na levu ni nona kauwaitaka na Turaga ni loga ni olive (o Jisu Karisito) na veivunikau. Na cava e cakava na iVakabula me vakaraitaka kina Nona kauwaitaki keda?

Veiyalayalati Makawa Veivaini ni Olive

(Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Jekope 6:4-5

E lomani au na Tamada Vakalomalagi ka na vosoti au niu veivutuni.

• Na Jekope 6:4–5 e tiko kina e dua na itukutuku bibi me baleti keda ni da digidigi cala. E rawa beka ni o vukei ira na luvemu me ra kunea. Na vosa cava ena veitikina oqo e solia vei keda na inuinui ena loloma veivueti ni Kalou? Ena rawa ni veivuke na italanoa nei Elder Allen D. Haynie baleta na vakadukaduka ena dua na ikeli soso, ena nona itukutuku “Nanumi Koya Eda sa Dauvakanuinui Kina” (Liaona, Nove. 2015, 121–22). Na cava e vakavulica vei keda na italanoa oqo kei na Jekope 6:4–5 baleta na veika eda gadreva me da cakava me rawa ni da vakabulai kina ena matanitu ni Kalou?

Jekope 7:1–23

Au rawa ni tutaka na veika au kila ni dina.

• Mo uqeti ira beka vakacava na gone me ra tutaka na dina me vakataki Jekope? E rawa ni ra sarava na luvemu na vidio “Wase 10: Jekope kei Seremi” (Gospel Library) ka matanataka na nodrau veimaliwai o Jekope kei Seremi, ena kena vakayagataki na Jekope 7:1–23 me idusidusi. A tutaka vakacava o Jekope na veika e kila ni dina? Sureti ira na luvemu me ra wasea na veika era sotava ni ra tutaka na dina, se wasea na nomu. Sa rawa talega mera lagata e dua na sere e vakaraitaka na yaloqaqa me vakataki Jekope, me vaka na “Stand for the Right,” Nodra Sere na Lalai, 159.

Me ikuri ni vakasama, raica na ilavelave ni vula oqo ena iTokani ena kena mekasini. .