Nanumi Koya Eda sa Dau Vakanuinui Kina
Mai vei Elder Allen D. Haynie
Ena Vitusagavulu
Na noda inuinui ni laki bulavata tale kei na Tamada ena vakatau mai na Veisorovaki nei Jisu Karisito.
Ena gauna au a yabaki ciwa kina, e a mai tiko voli kei keitou o buqu na tinai tinaqu ka sa sikavula tu na uluna ka va na fiti tinikadua na idi (1.5m) na kena balavu. Ena nona tiko voli mai vale keitou nanuma sara kei rau na tuakaqu me keitou kelia e dua na qara ena vanua lala veibasai kei na neitou vale. Au sega ni kila na vuna keitou cakava kina. Era dau taleitaka beka ga na tagane na keli qara. E a duka na keitou irairai ia e sega ni na vakaleqai keitou. E so tale na tagane ena yasa ni neitou itikotiko era raica na lasa ni keli qara ka ra lako mai ka mai veivuke. Keimami sa qai mai dukavakalevu vata tu yani. Sa bau kaukauwa dina na qele, ka keimami sa qai dreta mai e dua na osipaipo me kauta mai e so na wai ka sova yani kina loma ni qara me vakamalumutaka na qele. Sa kabiti keimami na soso ena neimami kelikeli tiko, ka sa titobu sara yani na qara.
E dua na lewe ni neitou ilawalawa e nanuma me keitou sa vukica me dua na tobu ni sisili, ka keitou sa qai vakasinaita ena wai. Me vaka niu a gone taudua ka gadreva voli meu ciqomi, au sa qai vakayarayarataki meu rika ki loma me tovolei mada. Au sa qai duka ga vakalevu. Au a sega ni namaka meu mai boro soso tu, ia o ya na ka au sa mai tini tu kina.
Ni sa tekivu liliwa mai, au sa takoso yani e gaunisala ka namaka meu na laki curu ki neitou vale. E a tavaki au o buqu ena mata ni katuba ka sega sara ga ni vakacurumi au ki loma. E a kaya vei au kevaka me vakatara meu curu ki loma ni vale, au na kauta taucoko ki loma ni vale e sa qai samaka oti o koya na soso. Au sa qai cakava na ka ena cakava e dua ga na yabaki ciwa ena noqu sa ciciva na katuba ki muri, ia e totolo sara o buqu, niu qai yaco yani sa tu mai kina. Au sa yalo ca sara ga, ka vakabutubutu ka vakarota me vakacurumi au yani ki loma, ia na katuba e sogo tu ga.
Au sa suasua, soso, batabata, kau sa vakasamataka mai me vaka e dua na gone niu sa na mate ena daku ni neitou itikotiko. Oti au sa qai tarogi koya se cava meu cakava meu rawa ni curu kina ki loma ni vale. Bera niu qai kilai au mai, au sa tucake tu ena daku ni neitou itikotiko ka sa savati au tiko o buqu ena dua na osipaipo. Ni oti edua na gauna balavu, sa qai tukuna o buqu, niu sa savasava, ka sa qai vakacurumi au ki loma ni vale. A katakata vinaka na loma ni vale, kau sa qai laki dara na isulu e mamaca, ka savasava.
Ena dua na vosa vakatautauvata ni ka dina e yaco ena bula oqo ni qai vakasamataka na ka e a kaya o Jisu Karisito: “Ia, sa sega na ka tawa savasava sa curu rawa kina nona matanitu; ia sa sega e dua sa curu rawa kina nona ivakavakacegu, ko ira ga sa sava na nodra isulu ena noqu dra, ni ra sa vakabauta ka veivutunitaka na nodra ivalavala ca ka vosota me yacova na ivakataotioti.”
Niu tucake tu e tautuba ni neitou vale ka savati au tiko o buqu ena osipaipo sa bau logaloga ca sara ga ka sega ni ka e namaki. Ni sa cakitaki na laki curu ka bula vata kei na Tamada Vakalomalagi baleta ni da digataka meda dukadukali tikoga ena ivalavala ca sa na kani rarawa tawamudu. Meda kakua ni vakacalai keda ena ka meda na cakava meda na lesu rawa kina ka laki bula vata kei na Tamada Vakalomalagi. Meda na savasava tiko.
Ni bera ni da lako mai ki vuravura, eda a vakaitavi ena dua na matabose levu oi keda na luvena tagane kei na yalewa vakayalo na Kalou. Eda a vakarorogo kece tiko ka sega ni dua e moce. E a vakaraitaka kina na Tamada Vakalomalagi ena matabose o ya, e dua na ituvatuva. E taqomaki ena ituvatuva o ya na noda galala ni digidigi ka gadrevi kina meda vuli mai na veika eda na sotava ka segai e na ka e sotava o Koya, ni kila o Koya ni da na mai temaki meda cakacala. E kila talega o Koya ni ivalavala ca ena vakavuna meda dukadukali ka na vakadredretaka na noda lesu kina Nona iserau, baleta na nona itikotiko sa savasava sara ga mai na loma ni vale e a samaka tu o buqu.
Me vaka ni lomani keda kece na Tamada Vakalomalagi ka tiko na Nona ituvatuva “[meda] tucake tale mai na mate na tamata kecega ka rawata na bula tawamudu.” Tiki ni Nona ituvatuva na itavi ni iVakabula—e dua me na vukei keda, meda na savasava se mani vakacava sara na noda dukadukali. Ni sa vakaraitaka na Tamada Vakalomalagi na kena gadrevi e dua na iVakabula, au vakabauta ni o keda kece eda a rai vei Jisu Karisito, na iSevu ni sucu mai Vaka-Yalo, ni o Koya sa toso sara kina vanua me sa laki veiucui kei na Tamana. Au vakabauta ni o keda kece eda kila ni dodonu ga me o Koya, ni na sega ni rawa me dua vei keda ena rawata me na cakava na veika o ya, ni o Koya ena rawa ni cakava, ka na cakava vakaidina.
Mai na Were o Kecisemani kei na kauveilatai mai Kolikoca, e a vakararawataki kina vakayago ka vakayalo o Jisu Karisito, e sautaninini baleta na mosi, turu nona dra me vaka na buno, ka kereya na Tamana me kauta laivi na bilo mai Vua, ia e qai taura ga o Koya. Na cava e cakava kina o Koya? E a kaya kina, ni gadreva ma vakalagilagia na Tamana ka vakaotia na Nona “itavi vei ira na luve ni tamata.” E gadreva dina me maroroya na Nona veiyalayalati ka vakadeitaka na noda na lesu tale ki vale. Na cava e gadreva meda cakava lesu? E kerea ga o Koya meda vakatusa na noda ivalavala ca ka veivutuni me rawa kina nida na sega ni vakararawataki me vakataki Koya. E sureti keda o Koya meda vakasavasavataki keda me rawa ni da na sega ni biu tu kina e tautuba ni vale nei Tamada Vakalomalagi.
Dina ni gadrevi na iwalewale ni bula e levei kina ivalavala ca ena bula oqo, ia na ilutua ni nona mai Veisorovaki o Jisu Karisito ena sega soti ni dua na ka na ivalavala ca o sa cakava oti se vakacava sara na titobu ni nomu lutu ena qara ni ivalavala ca. Ena sega ni dua na ka kevaka meda sa madua se vakamaduawataki ia me vaka ga na ka e kaya o Nifai, “ka’u sa tao rawarawa kina.” E na sega soti ni dua na ka kevaka mo a sa volitaka ena dua na gauna na nomu itutu ni ulumatua ena dua na kuro rourou.
Na ka ena bibi sa ikoya ni o Jisu Karisito, na Luve ni Kalou e a vakararawataki ena “mosi kei na veivakararawataki kei na veivakatovolei kecega” me na rawa kina vua “ia sa mai bula vakatamata ka vakabulai ira ena nona tamata.” Na ka e bibi ni rawa vua me sirova sobu mai, ki vuravura ka vakalolovirataki koya, “ki ra sara” ka rawata “na kaukauwa levu sara mai na dua tale na tamata. Na ka e bibi ni o Karisito sa vakatakekere tiko Vua na Tamada ena noda kisi, ena “Nona kaya: Tamaqu mo ni nanuma na nona rarawa ka vakamatei ko koya sa tawacala io, ko ni sa daulomani koya vakalevu; … Ia Tamaqu mo ni lomani ira na wekaqu oqo, ka ra sa vakabauta na yacaqu, io mera lako mai vei au ka rawata na bula tawamudu.” O ya na ka e bibi ka dodonu me solia vei keda kece sara na vakavoui ni vakanuinui kei na vakanamata meda tovolea tale mada vakadua, baleta ni o Koya e se sega ni guilecavi keda.
Au vakadinadinataka na iVakabula ena sega vakadua ni na vukitani mai vei keda, ni da sa vakasaqarai Koya ena yalomalumu ena noda via veivutuni; ka na sega vakadua ni nanuma ni da sa yali vakadua, ena sega vakadua ni kaya, “Oilei se baci o iko tale”; ena sega vakadua ni tawasei keda tani baleta na noda sega ni kila rawa na dredre ni noda sasagataka meda drovaka na ivalavala ca. E kila vakavinaka sara tu ga vakakina na kilai ni rarawa, madua, kei na yalo nuiqawaqawa ni sai koya oqo na revurevu ni ivalavala ca.
Na veivutuni e ka dina ka na vakavotukana. E sega ni ka e bulia na tamata se dua na revurevu ni “vakasama sesewa.” E tiko kina na kaukauwa me laveta na icolacola ka sosomitaka ena vakanuinui. Ena rawa ni veimuataki yani kina veisau levu ni yalo, ka na vakavuna meda na “biuta tani na gagadre ca ka via kitaka tikoga na ivalavala dodonu.” Na veivutuni, dina, ena sega soti ni rawarawa. Sa vakakina na veika e tawamudu. Ia na vuana e na vei sosomitaki vinaka sara. Me vaka e a vakadinadinataka o Peresitedi Boyd K. Packer ena iotioti ni nona vosa vei ira na Le Vitusagavulu ni Lotu: “Oqo na vakasama: ena sega na mawe ni Veisorovaki, sega na kena revurevu. Na ka ena vakavinakataka ena vinaka. … Na Veisorovaki e sega ni vakamawe, sega na revurevu. Ena veivakabulai ga, ia na ka e sa vakabula ena vakabulai tu ga.”
Sa vakakina na noda inuinui ni laki bulavata tale kei na Tamada ena vakatau mai na Veisorovaki nei Jisu Karisito, mai na nona vakatara o koya e sega na nona ivalavala ca ka sa taura vei Koya na ivalavala ca kecega ena vakatautauvatataki ni lewa dodonu, na veisemati ni ivalavala ca ni tamata kecega, wili kina na ivalavala ca era cakava e so na luvena na Kalou ka ra nanuma mera na lako curuma duadua vakataki ira.
Ni da lewe ni Lotu i Jisu Karisito ni Yalododonu Edaidai, eda na vakararavitaka vakalevu na kaukauwa ni Veisorovaki ni iVakabula mai vei ira tale e so na tamata baleta ni da kila ni da sa ia na veiyalayalati, ka veivutuni tikoga, ka vosota vakadede, o Koya ena vota vei keda meda na laki wili vata kei Koya me vakataki Koya eda na ciqoma na veika kece e taukena na Tamada. O ya na ivakavuvuli ena yavalati vuravura, io e vakadina kina. Na Veisorovaki i Jisu Karisito e vakavuna na veisureti ni iVakabula ni a kaya “mo dou qai vinaka sara, me vaka sa vinaka sara na Tamamudou sa tiko mai lomalagi” ena rawa vakataucoko ka sega ni sa vakalaboci na kena rawati.
E vakavulica na ivolanikalou ni tamata yadua me “na lewai ena Nona lewa dodonu na Kalou.” Ena siga o ya ena sega kina na veivuni se na veidusi ni veibilitaki baleta na noda dukadukali. Eda vakavinavinaka, ni ivolanikalou e vakatavuvulitaka ni o Jisu Karisito o Koya ka a mate baleta na noda ivalavala ca o Koya ka na semati keda lesu Vua na Tamada, o koya e kaya ni da Nona itokani, ena lomani keda tiko me yacova na ivakataotioti, nio Koya ga ena laki noda turaganilewa. Dua na veivakalougatataki e dau raikalawaci ni Veisorovaki i Jisu Karisito sai koya oqo, “na Tamana … sa lesia na Luvena me ia na lewa kecega.”
Taciqu kei na ganequ, kevaka mo sa vakayalolailaitaki se o vakananuma tiko ni sa sega ni rawa ni dro tani mai na qara vakayalo o sa kelia tiko oqori, ni yalo vinaka sara ka nanumi koya “sa tu me colata na isau ni lewa dodonu, a sa lomani ira sara na luve ni tamata,” ka sa taura vei Koya “na nodra cakacala kei na talaidredre” a sa “sauma na ka sa yalataki tu ena lewa dodonu.” Me vaka ga e a vakayacora o Nifai ena gauna ni nona loma tarotaro, me da nanuma tikoga, “au sa kilai koya kau sa vakararavi vua,” sa i Jisu Karisito, qai veivutuni ka tovolea tale na, “veivutuni ka toso ki liu ka tudei ena vakanuinui taucoko sara.” Ena yaca i Jisu Karisito, emeni.