Vaqaqacotaki ena Veisorovaki i Jisu Karisito

Mai vei Elder Dallin H. Oaks

Ena Kuoramu ni iApositolo Le Tinikarua

Ena vuku ni Nona Veisorovaki, sa tu vua na iVakabula na kaukauwa me vakaukauwataka—me vukea—na mosi kei na rarawa kecega ni bula oqo.

Ena bula oqo e vakadeitaki vei keda na mate kei na icolacola ni ivalavala ca. Na Veisorovaki i Jisu Karisito sa vakaseva ruarua na ka tudei ni bula oqo. Sega ni wili kina na mate kei na ivalavala ca, e levu tale tu na dredre ni da lakova na bula oqo. Ena vuku ni veisorovaki vata oqori, sa rawa kina vua na noda iVakabula me solia vei keda na kaukauwa eda gadreva me ulabaleta kina na veibolebole oqori ni bula oqo. Oqori na noqu ulutaga nikua.

I.

E vuqa na itukutuku vakaivolanikalou baleta na Veisorovaki e baleta na nona sereka na iVakabula na ivau ni mate ka vakararawataki ena vuku ni noda ivalavala ca. Ena nona ivunau ka volai ena iVola i Momani e vakavulica kina o Alama na veika taumada oqo. Ia a solia talega na noda veivakadeitaki matata duadua ena ivolanikalou ni a sotava talega na iVakabula na mosi kei na tauvimate kei na nodra malumalumu na Nona tamata.

E vakamacalataka vaoqo o Alama na tiki ni Nona Veisorovaki oqo na iVakabula: “Ia ena mai vunau voli ko Koya, ena vosota na ka rarawa, na veivakararawataki kei na veivakatovolei kecega; a sa yaco na veika oqo me vakayacori kina na vosa sa tukuni, ni na colata ko Koya na nodra rarawa kei na nodra ivalavala ca na nona tamata” (Alama 7:11; raica talega na 2 Nifai 9:21).

Vakasamataka mada! Ena nona Veisorovaki na iVakabula, a vosota ko Koya “na ka rarawa, na veivakararawataki kei na veivakatovolei kecega.” Me vaka e vakamacalataka o Peresitedi Boyd K. Packer: “E sega na dinau me sauma. E sega na nona cala. Ia, a sotava kecega na vakilai ni cala, na yaluma na rarawa, na mosi kei na veivakacacani, na veimataqali veivakararawataki kecega ni vakasama, ni yalo, kei na yago e kila rawa na tamata—e a vakila kece o Koya.”

Na cava me sotava kina o Koya na veibolebole ni bula oqo “ena kena veimataqali kecega”? E vakamacalataka o Alama, “Ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma” (Alama 7:12).

Me vakaoqo, a vunautaka na iApositolo o Paula me vaka “sa vosota na ka ca ko koya ni sa dauveretaki, sa qai rawata kina me vukei ira era sa dauveretaki” (Iperiu 2:18). E tautauvata kei na ivakavuvuli nei Peresitedi James E. Faust, “Me vaka ni sa vosota rawa na iVakabula na veika kecega eda na vakila se sotava, sa rawa kina Vua me vukei ira na malumalumu me ra kaukauwa cake.”

Na noda iVakabula a sotava ka vosota na taucoko ni veika dredre kece ni bula oqo “ena yago” me rawa kina Vua me kila “ena yago” na sala “me [vukei ira kina] na nona tamata me vaka na nodra dui malumalumu.” Sa kila tiko kina ko Koya na noda dredre, na mosi ni yalo, noda vakatovolei, kei na noda vakararawataki, ni sa sotava kece ko Koya ena lomasoli me vaka ni ra tiki ni Nona Veisorovaki. Ia ena vuku ni ka oqo, sa rawa kina Vua mai na Nona Veisorovaki me vakaukauwataki keda—me solia vei keda na kaukauwa me da vosota rawa na ka kecega.

II.

Na ivakavuvuli nei Alama ena ikavitu ni wase sai koya e matata duadua vei ira kece na ivolanikalou ena kaukauwa gadrevi oqo ni Veisorovaki, sa vakavuvulitaki talega ena loma taucoko ni ivolanikalou.

Ena itekivu ni Nona veiqaravi vakalotu, a vakamacalataka ko Jisu ni sa talai mai ko Koya “me vunautaka na sereki vei ira na bobula” (Luke 4:18). Dau tukuna wasoma vei keda na iVolatabu na nona vakabulai ira na Nona tamata mai na “nodra malumalumu” (Luke 5:15; 7:21). E volai ena iVola i Momani na Nona vakabulai ira mai na “veimataqali mate kecega” (3 Nifai 17:9). Na kosipeli i Maciu e vakamacalataka ni vakabulai ira na tamata o Jisu me “vakayacori kina na vosa sa tukuna ko Aisea na parofita, ka kaya, ko Koya ga sa kauta vua na noda malumalumu, ka colata na noda mate” (Maciu 8:17).

E vakavuvulitaka o Aisea ni na colata na Mesaia na noda “rarawa” kei na “rarawa ni lomada” (Aisea 53:4). E vakavuvulitaka talega o Aisea na Nona vakaukauwataki keda: “Kakua ni ko rere niu sa tiko vata kei iko: kakua ni ko taqaya niu sa nomu Kalou: kau na vakaukauwataki iko; io kau na vukei iko” (Aisea 41:10).

Eda dau lagata vaoqo:

Dou kua ni rere, se dou taqaya,
Sa na vukei keda na noda Kalou.
Tou sa na tuberi ka tokoni tu, …
E ligai matau, e ligai matau, ni noda Kalou.

Ni tukuna tiko eso na nona bolebole ena bula oqo a vola vaoqo na iApositolo ko Paula, “Au sa rawata na veika kecega oqo ena vukui Karisito ko koya sa vakaukauwataki au” (Filipai 4:13).

O koya eda sa raica ena vuku ni Nona Veisorovaki, sa tu vua na iVakabula na kaukauwa me vakaukauwataka—me vukea—na mosi kei na rarawa kecega ni bula oqo. Ena so na gauna e dau veivakaukauwataki se veivuke ena nona solia vei keda na kaukauwa se na yalovosota me da vorata kina na noda malumalumu.

III.

Na cava soti na mosi kei na veika rarawa kei na malumalumu ni bula oqo a sotava ka vakararawataki kina na iVakabula?

Eda sotava kece na mosi kei na veivakararawataki kei na malumalumu ena so na gauna. Mai na veika eda sotava ena vuku ni noda ivalavala ca, sa vakasinaiti tu na bula oqo ena veika dredre, na mosi ni yalo, kei na veivakararawataki ena veigauna eso.

Eda dau tauvimate o keda kei ira eda dau lomana. Ena so na gauna eda dau sotava na mosi bibi mai na mavoa se na veika dredre tale eso vakayago kei na vakasama. O keda kece eda dau rarawataka ka lolositaka na nona mate e dua eda dau lomana. Eda dau sotava na druka kece ena noda itavi yadua, ena isema ni bula vakamatavuvale, se ena noda cakacaka.

Ni sega ni ciqoma e dua na isa ni vakawati se dua na gone na ka eda kila ni dina ka lako tani mai na sala ni buladodonu, eda na vakila na mosi veivakararawataki, me vaka na tama ni gone cidroi ena italanoa vakaibalebale kilai levu nei Jisu (raica na Luke 15:11–32).

Me vaka e tukuna na Daunisame: “Sa levu na ka rarawa sa yaco vua na yalododonu; Io sa vakabulai koya ko Jiova mai na ka kecega” (Same 34:19).

E tu ena noda serenilotu na veivakadeitaki oqo: “Earth has no sorrow that heaven cannot cure.” (E sega na rarawa e vuravura ka sega ni rawa ni vakabula ko lomalagi).” E vakabulai keda na noda iVakabula kei na Nona Veisorovaki.

E dau vakamosia vakalevu na yalodra na itabagone na nodra sega ni ciqomi, ni ra duavata vakaicaba ena veilasamaki kei na veimaliwai ka ra sega ni okati ira kina. Na veivakaduiduitaki vakawatamata talega e dau vakavuna na sega ni veiciqomi mosimosi vei ira na itabagone kei na qase. E levu tale tu na veibolebole ena bula, me vaka na sega ni cakacaka se na veicalati ni ituvatuva.

Au se tukuna tiko na malumalumu ni bula oqo ka sega ni vu mai na noda ivalavala ca. E so e vu mai na leqa vakayago se leqa ni vakasama ka vakavuna na nodra rarawa o ira kei na dredre ni bula vei ira era lomani ira ka dau qaravi ira. Vei ira e vuqa, na leqa ni yaluma ena vakasama e dau mosimosi se veivakamalumalumutaki. E dua tale na veivakararawataki mosimosi na bulagalili. O ira era sotava na ituvaki oqo e dodonu me ra nanuma tiko ni a sotava talega na iVakabula na mataqali mosi vakaoqo ia mai na Nona Veisorovaki, sa rawata kina na kaukauwa me vorata.

E vica wale na malumalumu era vakalokilokitaka vakalevu cake na noda bula vakayago se bula vakayalo mai na itovo veivakatotogani. Eso vei ira oqo, me vaka na veivakabobulataki ni iyaloyalo vakasisila se waigaga, e rawa ni ra vu mai na itovo ivalavala ca. Kevaka sara mada ga sa veivutunitaki, ena rawa ni tu ga na veivakatotogani. Na ivesu veivakamalumalumutaki oqori e rawa talega ni sereki mai na kaukauwa tudei e rawa mai vua na iVakabula. E vakakina ena bolebole dredre era sotava o ira era bala ki valeniveivesu ena basulawa. E dua na ivola a volai ena dua na gauna walega oqo e vakadinadinataka na kaukauwa e rawa ni yaco vua e dua ena itutu ni bula oya: “Au kila ni taubale tiko na iVakabula ena loma ni veivale oqo, kau sa dau vakila vakalevu na loloma i Karisito ena loma ni veilalaga ni valeniveivesu oqo.”

Au taleitaka na nona ivakadinadina na noda dauserekali ka itokani o Emma Lou Thayne. Ena veimalanivosa eda sa lagata tu oqo me serenilotu, a vola kina o koya:

Meu gole tu kivei?
Niu sa malumu tu
Dreve veika kece au saga?
Yalo sa mavoa cudru na vuvu,
Bula sa kavoro vaqaqara?
Va-qa-qa-ra

Na noqu vutugu
Na noqu tagi
Isa meu bau kila, na inuinui?
Ligana me tara tu na yaloqu?
Koya ga e kila?
Sai Koya ga.

IV.

O cei e rawa ni vakaukauwataki ka vaqaqacotaki mai na Veisorovaki i Jisu Karisito? E vakavuvulitaka o Alama ni na colata na iVakabula na nodra “rarawa kei na nodra ivalavala ca na nona tamata” ka “vakabulai ira nona tamata” (Alama 7:11, 12; vakaikuritaki). O cei na “nona tamata” ena yalayala oqo? O ira kece beka era sa mai bula eke—o ira kece era sa marautaka na dina ni tucake tale mai na Veisorovaki? Se o ira ga na italai digitaki era sa vakadonui mai na cakacaka vakalotu kei na veiyalayalati? Au vakabauta ni lailai mai na tamata kecega e mai bula ia e levu cake mai na ilawalawa lailai, ka digitaki.

Na vosa tamata e levu na kena ibalebale ena ivolanikalou. Na kena ibalebale e ganita vakavinaka duadua na ivakavuvuli ni na vakabulai ira “nona tamata” na iVakabula sai koya na kena ibalebale e vakayagataka o Alama ena nona qai vakavuvulitaka e muri ni “sa lomani ira na tamata kecega na Kalou, ena veivanua era sa tu kina” (Alma 26:37). Oqori talega na ka era nanuma na agilosi ena nodra kacivaka na nona sucu na gone ko Karisito: “na itukutuku vinaka mo dou reki vakalevu kina, kei ira kecega na tamata” (Luke 2:10).

Ena veika sa mai sotava ena Nona veisorovaki ena bula oqo, sa rawa kina vua na noda iVakabula me vakaceguya, vakabula, ka vaqaqacotaka na tagane kei na yalewa ena veivanua kecega, ia au vakabauta ni na vakayacora ga vakakina vei ira era vakasaqarai Koya ka kerea na Nona veivuke. E vakavuvulitaka na iApositolo o Jemesa: “Dou vakamalumalumutaki kemudou ena mata ni Turaga, ka na laveti kemudou cake ko koya” (Jemesa 4:10). Eda na vakadonui ki na veivakalougatataki oya ni da vakabauti Koya ka masuta na Nona veivuke.

E milioni vakamilioni na tamata dau rerevaka na Kalou era masuta na Kalou me ra laveti tani mai na nodra vakararawataki. Na noda iVakabula sa vakatakila mai ni sa “lako sobu mai ki ra sara” (V&V 88:6). Me vaka e vakavuvulitaka o Elder Neal A. Maxwell, “Ni sa ‘lako sobu mai ki ra sara,’ Sa kila kina vakavinaka sara vakataki koya, na taucoko ni rarawa vakatamata.” E rawa beka ni da kaya ni sa lako sobu mai ki ra sara, sa toka kina o Koya ena dua na itutu vinaka me laveti keda kece ka solia vei keda na kaukauwa eda gadreva me da vosota kina na noda vakararawataki. Me da kerea ga.

Ena vuqa na gauna ena ivakatakila ni gauna oqo, sa tukuna kina na Turaga, “Na veika kecega dou sa kerea vei au ena soli vei kemudou; kevaka dou sa tukituki ena dolavi vei kemudou” (me kena ivakaraitaki, V&V 6:5; 11:5; raica talega na Maciu 7:7). Sa dina sara, ena rabailevu ni Nodrau loloma, erau dau rogoca ka sauma kina vakavinaka na Tamada Vakalomalagi kei na Luvena lomani o Jisu Karisito na nodra masu o ira kece era vakasaqarai rau ena vakabauta. Me vaka e vola na iApositolo ko Paula, “Keitou sa vakararavi ki na Kalou bula, na iVakabula ni tamata kecega, vakabibi vei ira era vakabauta” (1 Timoci 4:10).

Au kila ni dina na veika oqo. Na nona Veisorovaki na noda iVakabula e sega walega ni vakadeitaka vei keda na bula tawamate rawa ena tucaketale raraba ka vakarautaka vei keda na madigi me da savai mai na ivalavala ca ena veivutuni kei na papitaiso. Sa solia talega vei keda na Nona Veisorovaki na madigi me da masuti Koya sa sotava oti na noda veimalumalumu kece sara ni bula oqo me vakabulai keda ka solia vei keda na kaukauwa me da sotava rawa na icolacola ni bula oqo. E kila o Koya na noda yaluma, ka sa tuvakarau ena vukuda. Me vaka na kai Samaria dauloloma ni kunei keda ena tutu ni sala, ena vadretitaka na noda mavoa ka qaravi keda (raica na Luke 10:34). Na mana ni veivakabulai kei na veivaqaqacotaki ni Veisorovaki nei Jisu Karisito e baleti keda kece. Au vakadinadinataka oya kau vakadinadinataka talega na noda iVakabula, o koya sa rawata kece vei keda.

Ena dua na siga na icolacola kece ni bula oqo ena yali yani ka na sega tale na mosi (raica Ai Vakatakila 21:4). Au masuta me da kila kece na inuinui kei na kaukauwa ni nona Veisorovaki na noda iVakabula: na veivakadeitaki ni tawamate rawa, na madigi ni bula tawamudu, kei na kaukauwa veitokoni eda rawa ni ciqoma kevaka walega me da kerea, ena yaca i Jisu Karisito, emeni.