E Yaga!
Mai Vei Peresitedi Dieter F. Uchtdorf
Karua ni Daunivakasala ena Mataveiliutaki Taumada
Au masuta me da na vakanamata ki na “rawarawa e tu vei Karisito” ka laiva na Nona loloma soliwale me laveti keda ka colati keda.
Kemuni na taciqu kei na ganequ lomani, kemuni na noqu itokani lomani, sa ka rekitaki na tiko vata kei kemuni nikua. Eda rarawataka na idabedabe lala e tolu ena tavata oqo. Eda nanumi Peresitedi Packer, Elder Perry, kei Elder Scott. Eda lomani iratou ka masuta nodra tiko vinaka na nodratou matavuvale.
Ena muanimacawa ni koniferedi oqo, sa na ka dokai vei keda me da tokona e tolu eratou sa kacivi mai vua na Turaga me ratou sosomitaki ratou ena Kuoramu ni iApositolo Le Tinikarua.
Na noda masu ena vukudratou ena vaqaqacotaki ratou ni ratou sa taura na itutu bibi vakaiapositolo.
Sa Yaga Tiko Beka Vei Iko na Kosipeli?
Ena dua na gauna lekaleka sa oti au a raica e dua na malanivosa ka vakavuna meu tu vakadua ka vakasama. E vakaoqo: “Tukuna vua e dua na tamata ni milioni vakamilioni na kalokalo e tu e maliwalala, ka na vakabauti iko. Tukuna vua ni se suasua tiko na iboro ni lalaga, ena tāra me vakadinadinataka.”
E sega beka ni da dau vaka kece oya ena so na sala lalai? Ni oti e dua na veiqaravi vakavuniwai ena dua na gauna wale toka ga oqo, era vakamacalataka na noqu vuniwai nuitaki na veika meu cakava meu bula cake kina vakavinaka. Ia meu na vulica tale mada e dua na ka me baleti au ka dodonu meu sa kila tu: vaka e dua na tauvimate, au sega soti ni dauvosota.
Niu vaqori au sa mani nanuma meu vakatotolotaka na noqu bula cake ena noqu vaqaqara vakataki au ena initaneti. E vaka niu namaka meu raica eso na dina era sega tu ni se kila na noqu vuniwai se ra tovolea beka me ra vunitaka vei au.
E taura toka e dua na gauna meu qai vakila na ibalebale ni ka au cakava tiko. E dina, na noda vakadidiketaka eso na ka me baleti keda e sega ni ka ca. Ia au sa vakawalena tiko eso na dina e rawa niu vakararavi kina ka kunei au niu sa vagolei tiko ki na itukutuku dau lasu ena vuqa na gauna ena initaneti.
Ena so na gauna, sa rui dau vakadodonu na dina, matata, ka rawarawa me da marautaka vakavinaka na kena yaga cecere. O koya eda dau biuta kina vakatikitiki na veika eda sa sotava ka kila ni dina ena noda vaqara na iwali tawakilai ka dredre eso. Ena yaco me da kila ni da vaqara na veika e sega ni dina, eda sa vaqara tiko na ka e lailai na kena yaga.
Me baleta na dina vakayalo, eda na kila vakacava ni sa donu tiko noda toso?
Dua na kena sala me da taroga na taro donu—na kena ena vukei keda me vakasamataka vakatitobu na noda itosotoso ka dikeva na kena yaga vei keda na veika eso. Na taro vaqo:
“E vakaibalebale beka na noqu bula?”
“Au vakabauta li na Kalou?”
“Au vakabauta beka ni kilai au ka lomani au na Kalou?”
“Au vakabauta beka ni dau rogoca ka sauma mai na noqu masu na Kalou?”
“Au marau dina tiko li?”
“Sa liutaki au tiko beka ki na noqu inakinaki cecere vakayalo kei na veika yaga ni bula na noqu sasaga?”
Na taro bibi me baleta na inaki ni bula sa dau liutaki ira na tamata kei na veimatavuvale e vuravura taucoko me ra vaqara na dina. E vakavuqa ni vaqaqara oqori e dau kauti ira ki na Lotu i Jisu Karisito ni Yalododonu Edaidai kei na kosipeli vakalesui mai.
Au vakataroga tiko, vakaivei o keda, ni da lewe ni Lotu, ena yaga beka kevaka eda tarogi keda kina ena veigauna eso: “Sa yaga tiko beka vei au na veika au sa vakila ena Lotu? Sa kauti au vakavoleka tiko beka vei Karisito? Sa vakalougatataki au tiko beka kei na noqu matavuvale ena vakacegu kei na marau me vaka e yalataki tu ena kosipeli?”
A taroga o Alama na taro vata oqori vei ira na lewe ni lotu mai Saraemala ena nona taroga: “Sa uqeti li kina na yalomudou mo dou veivutuni? … [Ka] a cava dou sa nanuma [kina] ena gauna oqo?” Na mataqali vakanananu vakaoqori ena vukei keda me da vakanamatataki keda tale se vakataudonutaka tale noda sasaga e veisiga ki na ituvatuva vakalou ni veivakabulai.
E vuqa na lewenilotu era na sauma ena marau ni sa yaga tiko vakalevu vei ira na veika era sa vakila tiko ena nodra lewena na Lotu. Era na vakadinadinataka ni ena gauna ni draudravua se sautu, ena gauna ni marau se rarawa, era raica ni vakaibalebale vakalevu, na vakacegu kei na reki ena bula baleta na nodra yalodina vua na Turaga kei na nodra veiqaravi gugumatua ena Lotu. Ena veisiga au dau sotavi ira na lewe ni Lotu era vakasinaiti tu ena reki ka ra vakaraitaka ena nodra vosa kei na ivalavala ni sa vakayautaki tu vakalevu mai na kosipeli vakalesui mai i Jisu Karisito na nodra bula.
Ia au raica talega ni ra tu eso ka sega soti ni veivakasinaiti na veika era vakila—era vakila ni sega soti ni vaka na ka era namaka mai na nodra lewena na Lotu.
Dau vakamosia na yaloqu, baleta niu kila vakavinaka tu ni rawa ni vakabulabulataka ka vakavouya na yalona e dua na kosipeli—ni rawa ni vakasinaita na yaloda ena inuinui kei na noda vakasama ena rarama. Au kila ni rawa ni veisautaka na bula na vua ni kosipeli i Jisu Karisito mai na rawarawa kei na dragali ki na vakasakiti ka cecere.
Ia na cava na vuna e yaga vakavinaka cake kina vei ira na so mai vei ira tale eso? Na cava na duidui vei ira sa vakasinaita na yalodra na loloma era sa vakabulai kina na veika era sa mai sotava ena Lotu kei ira era vakila ni yali tiko e dua na ka?
Niu vakasamataka na taro eso oqo, sa yaco mai vakayauyau ki na noqu vakasama eso na vakanananu. Nikua au vinakata meu wasea e rua.
Vakarawarawataka
Taumada: eda vakadredretaka tiko beka na noda bula vakatisaipeli?
Na kosipeli totoka oqo sa rui rawarawa ka rawa ni taura e dua na gonelailai, ia sa rui rabailevu ka matailalai ena taura na gauna ni bula taucoko—io na tawamudu—ni vuli kei na vakadidike me da ciqoma taucoko.
Ia ena so na gauna eda taura na senilili totoka ni dina ni Kalou ka ukutaka veitabei ena vakasama vivinaka, na parokaramu, kei na nanamaki vakatamata. O ira yadua, vakataki ira, era na veivuke ka kilikili beka ena dua na gauna kei na dua na ituvaki, ia ni ra veitaqataqai, e rawa ni ra bulia e dua na ulunivanua ivovonika ka na yaco me vavaku ka bibi ka na rawa ni da sega ni raica kina na senikau talei eda a taleitaka vakalevu ena dua na gauna.
O koya gona, ni da iliuliu sa dodonu me da taqomaka vakaukauwa sara na Lotu kei na kosipeli ena kena savasava kei na kena matata ka kakua ni vakaicolacolataki ira vakatawadodonu na noda lewenilotu.
O keda kece, ni da lewe ni Lotu eda gadreva me da sasaga vagumatua me da solia na noda igu kei na gauna ki na veika e vakabetena, ni da laveti ira cake na wekada ka tara na matanitu ni Kalou.
E dua na marama, qasenivuli ena iSoqosoqo ni Veivukei, dau kilai ni dau vakarautaka na lesoni sega ni vakamelei rawa. Ena dua na gauna, a nanuma me cula e dua na lacadrau me yavu ni nona ulutaga ni lesoni. Ia a levu na osooso—me ra lai kau mai na gonevuli, dua na itokani me vukei ena tokitoki, tauvi matetaka na watina, kei na dua na itokani galili. Sa yaco mai na siga ni lesoni, se bera tu ni oti na lacadrau. Qai tinia, ena bogi ni bera na lesoni, a sega ni moce vakalevu ni cula tiko na lacadrau ena bogi taucoko.
Ena siga ka tarava sa oca vakalevu ka voleka ni sega ni tuvalaka rawa nona vakasama, ia a tu ena yaloqaqa ka solia nona lesoni.
E vakasakiti na lacadrau—e uasivi na kena icula, serau na rokana, matailalai ka totoka na kena iculacula. Ena kena lomadonu e dua na vosa ka vakavoqataka na ulutaga ni lesoni: “Vakarawarawataka.”
Kemuni na taciqu kei na ganequ, na bulataki ni kosipeli e sega ni gadrevi me dredre.
E vakadodonu sara tu ga. E rawa ni vakamacalataki ga vaqo:
-
Ni rogoci na vosa ni Kalou ena inaki gumatua ena vakavuna noda vakabauta na Kalou ka nuitaka na Nona yalayala.
-
Na levu ga ni noda vakanuinui vua na Kalou, na levu ni kena vakasinaiti na yaloda ena loloma ena vukuna kei keda.
-
Ena vuku ni noda lomana na Kalou, eda gadreva me da muri Koya ka veitaudonuitaka na noda ivalavala kei na Nona vosa.
-
Baleta ni da lomana na Kalou, eda vinakata me da qaravi Koya; eda vinakata me da vakalougatataka na nodra bula na tani ka vukei ira na dravudravua kei na vakaleqai.
-
Na levu ni noda lakova na sala ni bula vakatisaipeli oqo, na levu ni noda gadreva me da vulica na vosa ni Kalou.
Ka na vaka tiko oya, na ikalawa yadua e kauti keda ki na kena e tarava ka vakasinaiti keda ena vakabauta vakalevutaki tikoga, inuinui, kei na loloma cecere.
E totoka na kena rawarawa, ka totoka na kena yaga.
Kemuni na taciqu kei na ganequ, kevaka o na nanuma ena dua na gauna ni sega ni yaga vei iko na kosipeli, au sureti iko mo tu vakasuka, raica na nomu bula mai na dua na vanua cecere, ka vakarawarawataka na nomu ivakarau ni raica na bula vakatisaipeli. Vakanamata ki na ivunau, ivakavuvuli, kei na ivakavakayagataki taumada ni kosipeli. Au yalataka ni na tuberi iko ka vakalougatataki iko na Kalou ena nomu sala ki na bula vakasinaiti, ka na yaga vakavinaka cake vei iko na kosipeli.
Tekivu ena Vanua o Tu Kina Qo
Na ikarua ni noqu vakatutu mo: tekivu ena vanua o tu kina.
Ena so na gauna eda yalolailai baleta ni da sega ni “levu” ena so na ka—vakayalo, rokovi, vuku, bulabula, vutuniyau, se rawa ka, vakalevu. E sega ni dua na leqa ni da via vinaka cake. A buli keda na Kalou me da tubu ka toso. Ia nanuma tiko, na noda malumalumu e rawa ni vukei keda me da yalomalumalumu ka gole vei Karisito, o koya ena “vakaukauwataki keda ena veika eda malumalumu kina.” O Setani, ena yasana kadua, ena vakayagataka na noda malumalumu me yacova ni da sa yalolailai ka soro mai.
Au sa vulica ena noqu bula ni da sega ni gadreva me da “levu cake” ena dua na ka me da yacova kina na tamata e nakita na Kalou me da vaka.
Ena tauri iko na Kalou ena kemu ituvaki ena gauna sara ga oqo ka tekivu cakacaka vata kei iko. Na ka ga o gadreva na yalo sa tuvakarau, na gagadre mo vakabauta, ka vakanuinui vua na Turaga.
O Kitione e kunei koya ni dua na dauteitei dravudravua, ka lailai duadua ena vale nei tamana. Ia na Kalou e raici koya ni dua na tamata ni valu qaqa.
Ni digitaki Saula ko Samuela me tui, a tovolea ko Saula me vakauqeta me kua. O Saula e lako mai na dua na mataqali lailai duadua ena yavusa i Isireli. E rawa vakacava me tui o koya? Ia a raici koya na Kalou ni “cauravou totoka ka vatuka vinaka.”
Na parofita cecere mada ga o Mosese a vakadrukai ka yalolailai ena dua na gauna sa vinakata me soro ka mate yani. Ia a sega ni laivi Mosese na Kalou.
Kemuni na taciqu kei na ganequ, kevaka eda raici keda ena matada ga vakayago, eda na sega beka ni raica ni da veiganiti kaya. Ia na Tamada Vakalomalagi e raici keda ena keda ituvaki dina kei na ituvaki e rawa ni da yaco me vaka. E raici keda o Koya ni da luvena tagane ka luvena yalewa, ni da kabuli ena rarama tawamudu, tawamudu na keda yaga ka vakalou na noda icavacava.
Na nona isoro na iVakabula sa dolava na katuba ni veivakabulai vei keda kece me da lesu tale vua na Kalou. Na Nona “loloma sa rauti ira kecega sa vakamalumalumutaki ira vua na [Kalou].” Na Nona loloma soliwale sai koya na kaukauwa ka na rawa kina ni da curu yani ki na matanitu ni veivakabulai ni Kalou. Ena vuku ni Nona loloma soliwale, eda na vakaturi cake kece mai na mate ka vakabulai ena dua na matanitu vakalagilagi.
Ena matanitu vakalagilagi duadua sara e ra—na matanitu telesitieli, “sa uasivia na ka kecega,” ka sega ni wiliki rawa o ira era na rawata na veivakabulai oqo.
Ia na loloma soliwale ni iVakabula ena rawata e levu cake tale na ka vei keda. Ni da lewena Na Lotu i Jisu Karisito ni Yalododonu Edaidai, eda sa segata tiko e dua na ka sega ni vakasamataki rawa na kena cecere. Sai koya na bula vakacerecerei ena matanitu selesitieli. Sai koya na bula tawamudu ena iserau ni Tamada mai Lomalagi. Sai koya na isolisoli cecere duadua ni Kalou. Ena matanitu vakaselesitieli, eda na rawata na “Nona lagilagi kei na Nona iukuuku.” Io na ka kecega sa tu vei Tamada ena soli vei keda.
Na noda takete na bula vakacerecerei; na bula vakatisaipeli na noda ilakolako.
Ni o cakacakataka e dua na vakabauta lailai ka tekivuna na nomu ilakolako vakatisaipeli ni noda Turaga o Jisu Karisito, ena veisau na yalomu. E rawa ni vakasinaiti ena rarama na yagomu taucoko.
Ena vukei iko na Kalou mo cakava vei iko e dua na ka e cecere cake sara mai na ka o rawa ni vakasamataka ni rawa ni yaco. Ko na qai kila ni sa cakacaka dina tiko ena nomu bula na kosipeli i Jisu Karisito. Ena yaga.
E Yaga!
Kemuni na taciqu kei na ganequ, itokani lomani, au masuta me da na vakanamata ena “rawarawa e tu vei Karisito” ka laiva na Nona loloma soliwale me laveti keda ka kauti keda tiko ena noda ilakolako mai na vanua eda tu kina ki na noda icavacava lagilagi ena iserau nei Tamada.
Ni da vakayacora vakakina, ni dua e taroga, “E yaga tiko li vei iko na lewena na Lotu i Jisu Karisito ni Yalododonu Edaidai?” ena rawa me da tukuna ena qaqa kei na marau cecere, “E vakasakiti na kena yaga. Vinaka vakalevu na taroga. O vinakata beka mo kila eso tale na ka?”
Oqo na noqu vakanuinui, na noqu masu, ka noqu ivakadinadina ena yaca i Jisu Karisito, emeni.