Na Qaravi ni iNaki Dodonu Eke
Mai vei Carol F. McConkie
Matai ni Daunivakasala ena Mataveiliutaki Raraba ni Goneyalewa
Meda sa qai digitaka meda qarava na inaki dodonu ni da sa italai qaqa ni Turaga o Jisu Karisito.
Au vakavinavinaka ni da mai soqoni vata kei ira na marama yalodina me vakataki Lisa—na tacida ena vidio—era yalo savasava, era lomana na Turaga ka qaravi Koya, ena gauna mada ga ni nodra vakatovolei. Na italanoa kei Lisa e vakavotuya ni dodonu meda veilomani vakai keda ka raica vei keda na totoka ni yalo ni tamata. E vakavulica na iVakabula, “Raica sa ka talei ena mata ni Kalou na tamata kecega.” Se da yabaki 8 se 108, oi keda yadua eda sa “ka talei e [Matana].” E lomani keda o Koya. Eda sa luvena yalewa na Kalou. Eda sa veitacini e Saioni. Eda sa vakaituvaki vakalou, ka sa tiko e dua na noda cakacaka lagilagi.
Ena vula ikatakata au a laki sikova e dua na tina gone vakaluveni yalewa. A wasea vei au o koya ni dodonu mera bula vakainaki na noda goneyalewa, me vukea nodra vakila ni ra sa yaga dina. E kila o koya ni da rawa ni raica na keda yaga yadua ka tawamudu ni da cakacaka ena inaki vakalou e vuravura. Ena bogi nikua, e ratou sa mai lagata na matasere totoka cecere oqo na vosa e vakavulica na keda inaki. Ena veivakatovolei kei na veika dredre, gauna mada ga ni rere kei na gauna ni veilecayaki, eda sa yalo qaqa tiko. Eda sa qaqa meda cakava na noda itavi. Eda mai tiko oqo meda qarava na inaki dodonu. Kemuni na taciqu, ena inaki oqo eda sa yaga dina. Eda sa gadrevi taucoko.
Na inaki dodonu eda sa qarava oqo sa inaki i Karisito. Sai koya na cakacaka ni veivakabulai. E vakavulica na Turaga, “Raica oqo na inaki kei na lagilagi ni noqu cakacaka—mera tucake tale mai na mate na tamata kecega, ka rawata na bula tawamudu.” Sai keda na inaki a mai vakararawataki kina o Jisu Karisito, tiri na dra ena buno kecega, ia ena Nona loloma uasivi a solia na Nona bula. Na Nona inaki sa itukutuku talei, “na itukutuku talei, … a lako mai ki vuravura ko koya, io ko Jisu, me mai vakoti ki na kauveilatai ena vukudra na kai vuravura, raica sa colata na nodra ivalavala ca na kai vuravura, a sa mai vakavouia na vuravura, ka vakasavasavataka mai na veika dukadukali kecega; era na vakabulai ena vukuna ko ira kecega.” Na noda iVakabula sa “mai dusimaka kivei au.” Au vakadinadinataka ni gauna eda vakatotomuria na Nona ivakaraitaki, lomana na Kalou, ka veiqaravi vakai keda ena yalovinaka kei na yalololoma, eda na tu ena savasava, “sega ni cala ena mata ni Kalou ena siga mai muri.” Eda sa digitaka meda qarava na Turaga ena Nona inaki dodonu meda sa yaco me duabau vata kei na Tamana kei na Luvena.
A vakaraitaka ena yaloqaqa o parofita Momani, “Raica sa tu na itavi me daru vakayacora ena bula oqo, me daru valuta na meca ni valavala dodonu kecega, ka rawata na vakacegu ena matanitu ni Kalou.” Era a gu ki liu o ira na iliuliu ni Lotu kei na painia taumada ena yaloqaqa vakatagane kei na gugumatua yalodina mera tauyavutaka na kosipeli vakalesui mai ka tara valetabu me caka kina na cakacaka vakalotu ni bula vakacerecerei. O ira na painia ni gauna oqo, o ya o iko kei au, daru sa gu talega ki liu ena vakabauta, “ka ia na cakacaka ena nona were ni vaini [na Turaga] me ra vakabulai kina na tamata.” Me vaka a vakavulica o Peresitedi Gordon B. Hinckley, “Sa na ka lagilagi na veisiga ni mataka ni sa vakayacora kina na Kalou Cecere na Nona cakacaka lagilagi … ena nodra [veiqaravi] solibula o ira era sa vakasinaiti tu na yalodra ena loloma vua na Dauveivueti kei vuravura.” Eda duabau kei ira na marama yalodina e liu, ena gauna oqo, kei ira na itabatamata tubu tiko mai ena cakacaka ni veivakabulai!
Ni bera ni da sucu mai, eda a ciqoma oti kina na ituvatuva nei Tamada Vakalomalagi “me [da] na mai vakayago oi keda na Luvena ka vuli e vuravura me rawa ni [da] tubu yani ki na bula e uasivi sara ka me qai kena ilutua na [noda] kila na vanua meda na yacova ena tawamudu sai koya na noda tikina ena bula tawamudu.” Mai na veiyalayalati ni bula taumada oqo, e kaya kina o Elder John A. Widtsoe: “Eda a vakadonuya, ena gauna sara ga o ya, meda mai sega walega ni vakabulai keda ga ia meda … nodra ivakabula na matavuvale ni kawatamata taucoko. Eda sa cakacaka vata kina oqo kei na Turaga. Na kena cakacakataki na ituvatuva a sega walega ni nona cakacaka na Tamada, ka cakacaka ni iVakabula, ia sa noda cakacaka talega. Oi keda yadua, sa yalomalumalumu sara, eda sa veidinadinatitaka kei na Kalou sa Cecere me rawati na inaki ni ituvatuva ni veivakabulai tawamudu oqo.”
Ena bula oqo eda sa mai veiyalayalatitaka tale meda na qarava na iVakabula ena cakacaka ni veivakabulai. Ena noda vakaitavi ena cakacaka tabu ni matabete, eda sa yalataka ni da na cakava na veiqaravi ni Kalou ena yaloda, kaukauwa, vakasama, kei na qaqa. Eda sa ciqoma na Yalo Tabu ka kerea na Nona veivakauqeti me dusimaka na noda sasaga. Na ivalavala dodonu ena teteva yani na vuravura oqo ni da sa kila vinaka na veika e gadreva na Kalou meda cakava ka da cakava sara.
Au kila e dua na gone ena Lalai a kaya vei nona itokani ni tucake tu ena ikelekele ni basi, “E dodonu me daru na gole vata ki lotu ka vulica na veika baleti Jisu!”
Au sa raici ira na goneyalewa ena kalasi ni Goneyalewa era veitauri liga ka yalataka vata mera veiqaravi vakai ira ka tuvanaka na sala e dodonu mera vukea kina e dua na goneyalewa a vakatotogani tu.
Au sa raici ira na marama tina gone era solia nodra gauna, nodra taledi, kei na kaukauwa mera veivakavulici ka bulataka na ivakavuvuli ni kosipeli me rawa vei ira na luvedra, me vakataki iratou na luvei Ilamani, mera tu vakayaloqaqa ka yalodina ena gauna ni veivakatovolei, kei na veisaqasaqa.
E lokumi sara na yaloqu niu rogoca e dua na goneyalewa ena tabagone qasecake ni cauraka vakayaloqaqa nona ivakadinadina savasava ni cakacaka bibi duadua eda rawa ni cakava, o ya meda vakavakarau ki na vakamau kei na matavuvale. E dina ga ni sega ni se cakava o koya, ia e kila, ni matavuvale sai koya na iusutu ni cakacaka ni veivakabulai. “Ena vuku ni ituvatuva vakalou ni bula marau sa na rawa kina me cabeta bula yani na tai kadua ni ibulubulu na isema vakamatavuvale.” Eda doka na ituvatuva nei Tamada ka vakalagilagia na Kalou ni da vaqaqacotaka ka laveta cake na veimaliwai oqori ena veiyalayalati vou tawamudu ni vakamau. Eda sa digitaka meda bula savasava ka dodonu baleta ni yaco mai na madigi, eda sa tu vakarau meda maroroya na veiyalayalati tabu o ya ena vale ni Turaga ka maroroya me tawamudu.
Eda sotava taucoko na veigauna kei na draki duidui ena noda bula. Ia se da vuli tiko, cakacaka, ena itikotiko raraba, vakabibi ena noda vuvale, eda sa matataka na Turaga ka da sa Nona italai.
Ena cakacaka ni veivakabulai, e sega kina na veivakaduiduitaki, veivakasewasewani, se veivakacacani. E sega ni ka ni yabaki ni bula, kila, se ka meda dokai kina. Na cakacaka tabu oqo sai koya na kena tarai cake na yaloraramusumusu, yalobibivoro, kei na gagadre meda vakayagataka na noda isolisoli vakalou kei na taledi uasivi meda cakava na cakacaka ni Turaga ena Nona sala. Sai koya na yalomalumalumu meda tekiduru sobu ena duruda ka kaya, “I Tamaqu … kakua ga ni vaka na noqu lewa, me vaka ga na nomu lewa.”
Ena kaukauwa ni Turaga, eda sa rawa “ni kitaka na ka kecega.” Eda na vakasaqara tikoga na Nona veidusimaki ena masu, ena ivolanikalou, kei na vosamalua ni Yalo Tabu. E dua na sisita, a sotava e dua na itavi cecere ka vola vakaoqo, “Eso na gauna au dau vakasamataki ira na marama ena gauna e liu ni Lotu, era a sega ni vakataki keda, mera vakotora na uludra ena ilokoloko ena bogi ka masu, ‘Se cava ga e kauta mai na siga ni mataka, ena rawa beka Turaga mo ni vukei au kina?’” A qai vola o koya, “Dua vei ira na veivakalougatataki [o ya] ni da sa duabau tiko ka da sa lomavata tiko kina!” Se cava sara na keda ituvaki, se na vanua eda sa yaco tiko kina ena sala ni veivakabulai, eda sa duavata tiko ena noda dina tiko vua na iVakabula. Eda sa veitokoni tiko vakai keda ena Nona veiqaravi.
Dua na gauna sa oti, ko ni sa rairai wilika na itukutuku baleti Sisita Ella Hoskins, ni sa yabaki 100 a kacivi me vukei ira na goneyalewa ena nona tabanalevu ena Torocake Yadudua. Ni oti toka e rua na yabaki, ni sa yabaki 102, a rawata kina o Sisita Hoskins na nona icocovi ni Vakacaucautaki ni Goneyalewa. Era a soqoni vata mai na goneyalewa, kei na mataveiliutaki ni Goneyalewa kei na iSoqosoqo ni Veivukei ni tabanalevu kei na iteki, kei na lewe ni veimatavuvale mera marautaka vata na nona rawa ka oqo. Na yalani ni yabaki, mataisoqosoqo, vakamau se sega e seavu ena veiqaravi yalodina vakaoqo. Era vakavinavinaka na goneyalewa vei Sisita Hoskins, ena nona veivakavulici, kei na nona ivakaraitaki bula dodonu. Era sa gadreva mera vakataki koya. Ni oti o ya, au a tarogi Sisita Hoskins, “O a cakava vakacava?”
A sauma totolo mai, “Au veivutuni ga e veisiga.”
Mai vua e dua na marama yalomalua, vakasinaiti tu ena Yalo ni Turaga a ramase ena rarama savasava, ka vakavotuya vei au ni gadrevi meda ramase ena totoka ni bula savasava, ka tu vata kei na iVakabula ka vakalougatataki ira na tamata, sa dodonu meda bula savasava. E rawa na savasava mai na loloma soliwale i Karisito ni da cata sara na ivalavala ca ka digitaka meda lomana na Kalou ena noda kaukauwa, vakasama, kei na qaqa. A vakavulica o Paula na iApositolo, “Mo dro tani mai na … gagadre ca vakacauravou: … muria na yalododonu, na vakabauta, na loloma, na veivinakati, kei ira sa masuta na Turaga ena yalosavasava.” E sega ni dua na savasava vakataucoko. Eda sa caka cala kecega. Ia eda veivutuni meda vinaka cake kina ka “nanuma dei tiko ga [e yaloda] na [yaca i Karisito].” Ni da veiqaravi ena yaca ni Turaga, ena yaloda savasava, eda sa vakaraitaka tiko na loloma ni iVakabula ka solia vei ira tale eso na irairai kei lomalagi.
Meda sa qai digitaka meda qarava na inaki dodonu ni da sa italai qaqa ni Turaga o Jisu Karisito. Meda tu vata ena “sere e loma ni [yaloda] ka toso ki liu, ena bulataki ni kosipeli, lomana na Turaga, ka taracake na [Nona] matanitu.” Au vakadinadinataka ni cakacaka lagilagi oqo, eda na kila kina na loloma uasivi ni Kalou. Eda na ciqoma na reki dina ka taukena na lagilagi tawamudu taucoko. E na yaca tabu i Jisu Karisito, emeni.