Era sa Kalougata ka Marau Ko Ira sa Maroroya na iVakaro ni Kalou
Mai vei Elder Von G. Keetch
Ena Vitusagavulu
Na itatarovi e tauyavutaka na Turaga e bulia vei keda e dua na toba veitaqomaki mai na ca kei na veivakayarayarataki ni veivakarusai.
Dua na gauna sa oti au a gole ki Ositerelia, kau laki rai sara ki na toba veimama totoka e kilai ena vakasisisi e dela ni ua. Niu taubale toka e baravi, e vakauqeti au na ua lelevu, era caroba e bati ni toba ka ra vakauaua mai vakamalua ki baravi na ka lalai.
Niu sa taubale tiko, au sotava sara e so na dauvakasisisi e dela ni ua ni Amerika. E vaka me ratou cudruvaka tiko e dua na ka, veivosaki e cake ka dusi tiko i wasawasa. Niu taroga se cava beka na leqa, ratou a dusi ga ki na toba era caroba tiko kina na ua lelevu.
“Raica o ya,” e dua a kaya cudrucudru mai. “O raica rawa na itatarovi?” Niu rai yani vakavinaka, au raica dina sara e dua na itatarovi sa dodo balavu tu ena gusu taucoko ni toba, era caroba tiko kina na ua lelevu, era veisureti tiko mai. Na itatarovi qo e caka tu ena bai lawalawa bibi ka tokoni tu ena vutovuto me vude toka kina e dela ni wai. Era kaya na dauvakasisisi e dela ni ua, ni yaco titobu sara e botoni wai e ra.
A kaya tale o dauvakasisisi e dela ni ua ni Amerika, “Oqo na gauna keimami lako mai kina vakavudua me keimami vakasisisi e dela ni ua lelevu eke. E rawa ni keimami vakasisisi e dela ni ua ena ka lalai ena loma ni toba, ia na itatarovi oqo e vakadredretaka me keimami vakasisisi ena ka lelevu. Keimami sega ni kila na vuna e tiko kina na itatarovi oqo. Keimami kila ga ni sa mai vakacacana sara ga na neimami gole mai.”
Ni sa toso cake tiko na nodratou cudru, au sa mani raica sara e dua na dauvakasisisi e dela ni ua e toka voleka e kea—e qase ka vaka me itaukei e kea. Sa vaka me cata mai na vakarogoci iratou tiko na cudruvaka tiko na itatarovi o ya.
Sa mani tu yani ka gole vei iratou na ilawalawa oqo. Sega tale ni kaya e dua na ka, taura mai na nona vakadodorairai mai na nona katodreketi ka solia vei iratou, ka dusi yani ki na itatarovi. E ratou a vakadodorairai yadua na dauvakasisisi e dela ni ua. Ni gauna meu sa rai kina, ena veivuke ni vakadodorairai, au raica rawa e dua na ka au a sega ni raica e liu: na tukitukitoa ni qio—ira na qio lelevu era vakakana tu e kea e cakau ena tai kadua ni itatarovi.
E ratou sa malumu sobu sara na ilawalawa oqo. A taura tale na qase oqo na nona vakadodorairai ka sa gole yani. Ni sa gole, a mani kaya mai na ka au na sega vakadua ni guilecava: “Kakua ni cudruva na itatarovi,” a kaya. “Oqori duadua ga na ka ena tarova nomu tilomi.”
Keimami sa duri tu ena baravi totoka, sa mai veisau vakasauri na neimami nanuma. Na itatarovi kaukauwa ka vakalatilati o ya—a vaka me tarova na marau kei na ue ni vodo ua lelevu—sa mai yaco me dua na ka duatani sara. Ni keitou sa mai kila oqo na veika rerevaki era lako tu ena boto ni wai, sa mai yaco na itatarovi me veitaqomaki, veivakabulai, ka veivakacegui.
Ni da lakova tu na salatu ni bula oqo ka sasaga yani ki na noda tatadra, na ivakaro kei na ivakatagedegede ni Kalou—me vakataka na itatarovi—sa dau yaco ena so na gauna me dredre na kena kilai vinaka. Era na rairai kaukauwa ka sega ni veinanumi, vakataotaka na sala ni marau kei na veika talei ka ra muria yani e vuqa na tamata. Me vaka a vakamacalataka o Paula, “Eda sa raica me vaka na titiro ena iloilo buawa,” ena lailai ni ka eda raica, ka da dau sega ni kila vinaka na veika rerevaki sa toka vuni e botoni wai.
Ia o Koya sa “kila na ka kece ga” e kila vinaka tu na vanua ni veika rerevaki oqori. E dau dusimaki keda vakalou, mai na Nona ivakaro kei na veidusimaki loloma, me rawa ni da gole tani mai na veika rerevaki oqori—me rawa ni da tuva sala ena noda bula sa taqomaki mai na veika vakatani vakayalo kei na galegale lelevu ni valavala ca me tilomi keda vakaumauma.
Eda vakaraitaka ni da lomana na Kalou—ka vakabauti Koya—ena noda cakava noda vinaka taucoko ena veisiga meda muria na sala sa vakadavora vei keda ka maroroya na ivunau sa solia vei keda o Koya. Eda vakaraitaka dina na vakabauta kei na loloma oqo ena gauna eda sega ni kila vakataucoko tu kina na vuna e vakaroti keda kina na Kalou se na sala digitaki sa tukuna mai meda na taura. E rawarawa sara meda digitaka meda muria na sala ena loma ni itatarovi ni gauna eda kila kina ni ra tiko na veika vakatani e gata na batidra era veilakoyaki tu e yasana kadua. Ena dredre sara meda muria tikoga na noda sala ena loma ni itatarovi ni ka ga eda raica tiko na ua lelevu totoka veivakauqeti ena yasana kadua. Ia ena veigauna vakaoqori—na gauna meda vakabauta kina, ka nuitaka ga na Kalou, ka vakaraitaka ni da lomani Koya—eda na tubu ka rawa-ka vakalevu.
Ena Veiyalayalati Vou, a sega ni kila rawa o Ananaiasa na ivakaro ni Turaga me vakasaqarai Saula ka vakalougatataki koya—e dua sa vakadonui me vesuki ira na vakabauti Karisito. Ia ena vuku ni nona muria na ivakaro ni Kalou, a yaga sara o Ananaiasa ena nona sucu vou vakayalo o Paula na iApositolo.
Ni da vakararavi vua na Turaga, cakacaka ena vakabauta, muria Nona ivakaro, ka muria na sala sa dusimaka vei keda o Koya, eda na yacova na mataqali tamata sa vinakata na Turaga meda vakataka. Na “tamata yaco” vakaoqo—na saumaki mai ni yalo—sa ka bibi taucoko. Me vaka a vakavulica vei keda o Elder Dallin H. Oaks: “E sega ni rauta me dua e vakayacora tu ga na veika me caka. Na ivakaro, cakacaka vakalotu, kei na veiyalayalati ni kosipeli era sega ni lisi ni iyau me ra laki maroroi tu vakavinaka vakalomalagi. Na kosipeli i Jisu Karisito sa ituvatuva e vakatakila vei keda meda tamata yaco vakacava me vaka sa vinakata vei keda na Tamada Vakalomalagi.”
O koya gona, na talairawarawa dina, o ya meda soli keda Vua ka vakadonui Koya me dusimaka na noda sala ena wasawasa maravu kei na kena e voravora, ka kilai Koya vinaka ni sa rawa me vakavinakataki keda vakalevu cake mai na kena eda na cakava vakai keda.
Ni da sa soli keda ki na Nona lewa, sa na levu cake noda vakacegu kei na marau. E vakavulica o Tui Penijamini ni o ira era muria na ivakaro ni Kalou era na “kalougata ka marau … ena veika vakayago kei na veika vakayalo.” E vinakata na Kalou meda marau. E vinakata o Koya meda tiko vakacegu. E vinakata meda rawa-ka. E vinakata o Koya meda tiko vinaka ka taqomaki mai na veivakauqeti ni vuravura sa voliti keda tu.
Dua tale na kena sala, na ivakaro ni Turaga e sega ni so na itatarovi bibi e ruku ni wai meda na vulica ka vakasaurarataki keda ena noda bula me rawa kina ni da vakacerecerei ena bula e tarava. Ia, na itatarovi e tauyavutaka na Turaga e bulia vei keda e dua na toba veitaqomaki mai na ca kei na veivakayarayarataki ni veivakarusai ka rawa ni kauti keda sobu ki na veilecayaki butobuto. Sa soli mai na ivakaro ni Turaga ena loloma kei na veikauwaitaki; sa kena inaki meda reki ena bula oqo me vaka ga sa nakiti meda laki bula reki ka vakacerecerei ena bula tarava. Era vakatakila na sala meda cakacaka kina—ka vakabibi, era ramasetaka na keda ituvaki meda tamata yaco.
Ena veika taucoko sa vinaka ka dina, sai Jisu Karisito ga na ivakaraitaki uasivi duadua. Na cakacaka cecere duadua ni talairawarawa ena veigauna tawamudu o ya na Nona soli Koya na Luvena ki na lewa nei Tamana. Vakamamasu ena yalomalumalumu titobu me vagalalataki na bilo—me goleva e dua tale na sala mai na kena sa tuvanaki tu Vua—a soli Koya na Karisito ki na sala sa vinakata o Tamana me taura. Sai koya na sala ki Kecisemani kei Kolikoca, na vanua a sotava kina na mosi kei na rarawa tawa vakamacalataki rawa ka yaco me biu me tu vakataki koya ka gole tani mai Vua na Yalo iTamana. Ia na usutu ni sala oqo a yaco ena bulubulu sa lala ena ikatolu ni siga, ena kena voqataki “Sa tu cake tale!” ka ra rogoca ka vakila o ira era sa dau lomani Koya. E oka kina na marau kei na vakacegu sega ni vakamacalataki rawa ni oqo na Nona Veisorovaki vei ira taucoko na luvena na Kalou ki na veigauna tawamudu. Ena Nona lewa ga me sa kovuti ena lewa nei Tamana—ena Nona muria na ivakaro nei Tamana—sa solia kina vei keda o Karisito na madigi ni vakacegu tawamudu, reki tawamudu, kei na bula tawamudu.
Au vakadinadinataka ni da sa luvena na Kalou sa dauloloma. Au vakadinadinataka ni gadreva o Koya meda bula marau ka taqomaki ka vakalougatataki. Ena inaki oqori, sa tuvanaka vei keda e dua na sala meda lesu Vua, ka sa tauyavutaka o Koya na itatarovi ka na taqomaki keda ni da lako tu. Ni da cakava noda vinaka taucoko meda muria na sala oqo, eda na kunea na veitaqomaki, marau, kei na vakacegu e dina. Ni da soli keda ki na Nona lewa, eda na yaco me vakataka sa vinakata vei keda o Koya. Ena yaca i Jisu Karisito, emeni.