Na Kalou sa Veiliutaki Voli
Mai vei Elder M. Russell Ballard
Ena Kuoramu ni iApositolo Le Tinikarua
Na ivakaro kei na veiyalayalati era sa dina yaga sara ka ivunau era kune ena Waqa Makawa o Saioni, ka sa veiliutaki kina na Kalou.
Ena koniferedi raraba ni Okotova sa oti, au a sureta eso na dauvakarorogo mera muria na ivakasala nei Brigham Young mera tiko ga ena Waqa Makawa o Saioni, oya na Lotu i Jisu Karisito ni Yalododonu Edaidai, ka tautauri ena ligamu ruarua. Mai na gauna oya, au sa marau ni kila ni so vei ira na noqu matavuvale kei na so tale a vakarorogo voli ka sa tarogi au vakaoqo: “Na cava e tiko ena Waqa Makawa o Saioni ka sa dodonu meda kukube kina?” Au a vakananumi ira ena ka a tukuna o Peresitedi Brigham Young: “Eda sa tiko oqo ena waqa makawa o Saioni. … Na [Kalou] sa veiliutaki ka na vaka tu kina. … O Koya e vakatulewa, veituberi ka veidusimaki. Kevaka era na yalodei vakataucoko na tamata vua na nodra Kalou, sega ni vakawalena na nodra veiyalayalati se na nodra Kalou, ena tuberi keda vakadodonu o Koya.”
Vakamatata, e sa vakarautaka tu na Tamada Vakalomalagi kei na Turaga o Jisu Karisito na Waqa Makawa o Saioni ena veidina matata tawamudu ka na vukei keda ni tomana voli na itosotoso ena wai veilecayaki ni bula vakayago. Oqo e vica ga.
Na Lotu i Jisu Karisito e sa dau liutaki tu ga mai vei ira na parofita kei na iapositolo bula voli. Dina ga ni ra vakayago ka tu talega na nodra malumalumu vakatamata, era sa vakauqeti na italai ni Turaga mera vukei keda ni levea na dredre eso ka sa vakavuleqa ki na bula vakayalo ka mera vukei keda ni lako curuma vinaka na bula vakayago ki na noda icavacava, vakaoti, mai lomalagi.
Donuya volekata na 40 na yabaki na noqu veimaliwai voleka voli, au sa mai dua na ivakadinadina ni veivakauqeti malua kei na vakatakila momona sa mai vatuka ni ka era qarava tu na parofita kei na iapositolo, ira na Vakaitutu Raraba, kei na iliuliu ni mataisoqosoqo. Ni ra sa sega ni vinaka sara se tawacala, era sa mai soli ira vakavinaka sara na turaga kei na marama oqo ena liutaki vakadodonu ni cakacaka ni Turaga me vaka a dusimaka.
Ia kakua sara ni nanuma cala: na Turaga e dusimaka na Nona Lotu mai vei ira na parofita kei na iapositolo bula voli. E sa dau cakava tu ga o Koya na Nona cakacaka ena sala oqo. Vakakina, a vakatavulica na iVakabula, “E dina, e dina, au sa kaya vei kemudou, o koya sa vakacegui ira yadua ka’u sa tala sa vakacegui au.” Eda sega ni rawa ni wasei Karisito tani mai vei ira na Nona italai. Ke sega o ira na imatai ni Nona iApositolo, ena sega ni tiko vei keda na itukutuku vakadinati ena mata me baleta e vuqa na Nona ivakavuvuli, Nona ilesilesi, Nona vakararawataki ena Were o Kecisemani, kei na Nona mate ena kauveilatai. Ke sega na nodra ivakadinadina, ena sega ni tiko vei keda e dua na vakadinadina vakaiapositolo me baleta na ibulubulu lala kei na Tucaketale.
A vakaroti ira na imatai ni iApositolo oya o Koya:
“O koya mo dou qai lako ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu:
“Vakavulici ira mera vakabauta na ka kece ka’u a vosa kina vei kemudou.”
Na ilesilesi oqo a vakavoutaki ena noda gauna ni a kacivi Josefa Simici na Turaga me vakalesuya mai na Lotu, vata kei ira na iApositolo lumuti mera vakatetea na Nona kosipeli ena iotioti ni gauna ni bera na Nona lako tale mai.
E sa dau dua tu ga na bolebole ki na vuravura me vakadonui ira na parofita kei na iapositolo bula voli, ia e sa veiganiti sara me vakakina me rawa ni da kila vakaoti na Veisorovaki kei na ivakavuvuli i Jisu Karisito ka meda ciqoma vakataucoko na veivakalougatataki ni matabete sa soli vei ira e sa kaciva o Koya.
Vuqa sara na tamata era nanuma ni sa dodonu mera vinaka sara se voleka ni vinaka sara o ira na iliuliu ni Lotu kei na lewenilotu. Era guilecava ni Nona loloma na Turaga e sa veirauti me vakacavari kina na Nona cakacaka mai vei ira na bula vakayago. Sa tiko vei ira na noda iliuliu na inakinaki vinaka sara, ia so na gauna eda cakacala. Oqo e sega ni vakarau vinaka ki na veimaliwai ena Lotu, ni sa yaco vakakina na ka oqo ena noda veimaliwai kei ira na itokani, veiwekani, tamata cakacaka ka vakakina ena bula vakaveiwatini kei na matavuvale.
Na vakaraici ni malumalumu vakatamata ki na so tale e sa dau rawarawa. Ia, eda vakacala vakabibi na siqemi walega ni ivakarau vakatamata ni dua tale ka qai calata ni raica na liga ni Kalou ni cakacaka voli kivei ira e sa kaciva o Koya.
Na raici voli ni iwalewale e vakauqeti ira kina na Nona iliuliu digitaki na Turaga kei na iwalewale e vakauqeti ira kina na Yalododonu mera cakava na veika daumaka ka vakasakiti mai na nodra ivakarau vakatamata e sa dua na sala eda tautauri kina ki na kosipeli i Jisu Karisito ka tiko vakacegu voli ena loma ni Waqa Makawa o Saioni.
Ai karua ni dina oya na ivunau me baleta na ituvatuva ni veivakabulai. Mai vua na Parofita o Josefa Simici, a solia na Kalou na iVola i Momani, na Vunau kei na Veiyalayalati, kei na vuqa na ikuri ni ivakavuvuli ni Lotu. Oqo e oka kina e dua na kilaka me baleta na ituvatuva ni veivakabulai, ka sa dua na mape ni vanua eda a lako mai kina, na noda inaki eke e vuravura, kei na vanua eda sa lako tiko kina ni da sa mate. E vakarautaka talega vei keda na ituvatuva e dua na rai vakamareqeti, ka tawamudu ni da sa luvena vakayalo na Kalou. Mai na noda kila vakamatata na Tamada Vakalomalagi kei na noda isema ki Vua kei na Luvena Daulomani, o Jisu Karisito, eda na vakadonuya na Nodrau ivunau ka caka veiyalayalati vata kei Rau ka na muataki keda lesu ki na Nodrau itikotiko tawamudu.
Ena veigauna au keveta kina e dua na gone sucuvou, au dau vakanananu voli: “O cei o iko, gone lailai? Na cava o na vakataka mai na Veisorovaki i Karisito?”
Eda taroga vakatautauvata na veitaro oqo ni mate e dua eda lomana: “Sa evei o ira? Na cava era sa raica voli ka sotava tiko? E tomani li na bula? Na cava ena ivakarau ni noda veimaliwai vakamareqeti duadua ena vuravura levu ni yalo ni tamata mate?”
Ena vuravura oya, na neitou matavuvale e tiko kina e rua na makubui keirau yalewa, o Sara kei Emily, kei na dua na makubui keirau tagane, o Nathan. Mai na takali yani na makubui keirau yadua, keitou a tautauri toka ga vakamatavuvale ki na veidina ni kosipeli ena liga ruarua. A saumi vakavinaka ka vakadodonu na neitou vakatataro mai na Veisorovaki ni iVakabula. Dina ga ni keirau calati ira na makubui keirau, keirau kila ni ra bula tiko, ka keirau kila ni keitou na veisotari tale. Keirau vakavinavinakataka na kena kilai matata vakayalo na ka oqo ena gauna drakidrakita ni noda bula kei na bula vakamatavuvale.
Dua tale na itakele dina ni Lotu oya ni a buli Atama kei Ivi na Tamada Vakalomalagi ena dua na inaki vakalou. A nodrau ilesilesi—ka, vakakina, na ilesilesi ni nodra kawa—mera bulia na yago vakatamata me luvena vakayalo na Kalou me rawa ni ra vakatovolea na bula vakayago. Ena ituvatuva oqo, sa talai ira mai kina na luvena vakayalo na Tamada Vakalomalagi ki vuravura mera vuli ka tubu mai na veika era sotava ena bula ni vuravura. Baleta ni lomani ira na luvena, sa tala mai kina na Kalou na italai vakalomalagi eso kei na iapositolo mera vakatavulici ira me baleta na itavi cecere nei Jisu Karisito me noda iVakabula.
Mai na veitabayabaki sa oti, era sa vakayacora na nodra itavi na parofita ni ra sa vakarota na tamata ena veika rerevaki sa wavoliti ira tu. Sa nodra ilesilesi na iApositolo ni Turaga mera wadrava, veivakaroti, ka toro yani me vukei ira na vakasaqaqara iwali voli ena taro ni bula eso.
Ena ruasagavulu na yabaki sa oti, a vakaraitaka kina na Mataveiliutaki Taumada kei na Kuoramu ni iApositolo Le Tinikarua “Na Matavuvale: Ai Vakaro ki Vuravura Raraba.” Ena itukutuku veivakauqeti oya, keitou a vakacavara ena vosa oqo: “Keitou na vunauci kemuni kina o ni dau beca na veiyalayalati ni bula savasava, ka veivakatotogani tiko vei watimuni se luvemuni, se o ni sega ni dau qarava na nomuni tavi e vale, ni o ni na tarogi kina mai vua na Kalou. Me keitou dusimaka kina, ni sa na lutuki keda ena noda bula yadua, ena bula vakaitikotiko, se vakavanua, na isamu ni dawa mai na kavoro ni veimatavuvale, ni da na sotava na veileqa bibi era sa vunautaka tu na parofita mai liu, kei ira talega edaidai.”
Vakai ira na iapositolo, keitou sa vakadeitaka tale na ivakaro bibi oqo nikua. Yalovinaka nanuma na ivakaro kei na veiyalayalati era sa dina yaga sara ka ivunau era kune ena Waqa Makawa o Saioni, ka sa veiliutaki kina na Kalou.
Dua tale na vunau bibi e dodonu meda kukube kina oya na vakatabui ni siga ni Vakacecegu. Oqo e vukea me kakua ni tauvi keda kina na duka vakavuravura, vakarautaka na vakacegu vakayago, ka solia vei keda yadua na veivakavoui vakayalo ni sokalou kivua na Tamada kei na Luvena ena vei-Sigatabu. Ni da marautaka na siga ni Vakacecegu, oya sa ivakaraitaki ni noda loloma kivei Rau.
Me tiki ni noda sasaga ni marautaka na siga ni Vakacecegu, keitou sa kerei ira na iliuliu kei na lewe ni Lotu mera nanuma ni soqoni ni sakaramede e sa nona na Turaga ka sa dodonu me na tutaki vakabibi sara ena Nona ivakavuvuli. Na vakayacori ni cakacaka tabu vakalotu ni sakaramede sa gauna meda vakavouia kina na noda veiyalayalati ka vakadeitaka tale na noda loloma me baleta na iVakabula ka vakananuma na Nona solibula kei na Nona Veisorovaki.
Na yalo vata ga oqo ni sokalou sa dodonu me vakatawana na noda soqoni vakavula ni lolo kei na tukuniyalo. Na soqoni ni sakaramede oqo e sa baleti ira na lewenilotu mera vakatakila vakacaca na loloma kei na vakavinavinaka vua na Tamada Vakalomalagi, o Jisu Karisito, kei na kosipeli vakalesui mai ka wasea na nodra ivakadinadina ena veika oqo. Na soqoni ni lolo kei na tukuniyalo e sa dua na gauna meda wasea kina vakacaca na vakasama veivakauqeti eso ka tukuna na ivakadinadina momona. E sa sega ni gauna ni vosa vakabalavu.
Sa dodonu mera vakatovotovotaka na gonelalai na wasei ni nodra ivakadinadina ena soqoni ni Lalai ka vakakina kei na nodra itubutubu ena lotu vakamatavuvale me yacova ni ra sa kila vakamatata na inaki bibi ni dua na ivakadinadina.
Na inakinaki wale tikoga oqo ni kena sagai me marautaki na siga ni Vakacecegu e sa vatuka saraga ni dua na veivakauqeti mai vua na Turaga kivei ira na iliuliu ni Lotu. Na lewe ni matabose ni tabanalevu sa dodonu me vukea taumada na matabisopi me vica vata na macawa ena talevi ni sere kei na ulutaga eso e sa vakaturi me baleta na soqoni vakayadua ni sakaramede.
Eda sa vakalougatataki taucoko ni sa vakatawani na siga ni Vakacecegu ena loloma me baleta na Turaga ena itikotiko kei na valenilotu. Ni ra sa vakatavulici na luveda ena sala ni Turaga, era sa vulica mera vakila ka malele ki na Nona Yalotabu. Eda na gadreva taucoko ni tiko ena Sigatabu yadua ka vakayagataka na sakaramede ni da vakila na Yalo ni Turaga. Kei ira taucoko, na gone kei na qase, ka tubera voli na icolacola bibi ena vakila na veivuke vakayalo kei na vakacegu e yaco mai ena dua na siga ni Vakacecegu e vakatabakiduataki vua na Tamada Vakalomalagi kei na Turaga o Jisu Karisito.
Eda vakavinavinaka, ni dau voleka tu ga o Karisito, ka wawa voli me vukei keda ni da sa lomasoli meda veivutuni ka lako mai ki Vua.
Oqo, ni da vakananuma na dina e vica walega oqo era tiko voli ena Waqa Makawa o Saioni, meda sa tiko ga eloma ka nanuma ni, mai na kena ivakamacala, waqa e sa dua na lori, ka sa inaki ni lori me na kauti keda ki na dua na vanua.
Na icavacava ni noda soko sa ikoya na taucoko ni veivakalougatataki ni kosipeli, na matanitu vakalomalagi, na lagilagi vakasilesitieli, kei na itikotiko ni Kalou!
Na ituvatuva ni Kalou e sa virikotori tu. E sa veiliutaki tiko o Koya, ka sa soko voli na Nona waqa levu ka kaukauwa ki na vanua ni bula kei na veivakacerecerei. Nanuma ni da na sega ni rawa ni yaco ekea ena lade tani mai na waqa ka tovolea voli ni qalo kina vakaikeda.
Na bula veivakacerecerei e sa takete ni ilakolako vakayago oqo, ka sega ni dua e yaco ekea ke sega na ivotavota ni kosipeli i Jisu Karisito: Nona Veisorovaki, na veicakacaka tabu vakalotu, kei na ivakavuvuli veituberi eso sa kune ena Lotu.
Ena Lotu eda vulica kina na veicakacaka ni Kalou ka ciqoma na loloma ni Turaga o Jisu Karisito e sa vakabulai keda. Ena loma ni Lotu eda vakaduria kina na noda veidinadinati kei na veiyalayalati ni matavuvale tawamudu ka sa yaco me noda ivolatara ki na bula veivakacerecerei. Sai koya na Lotu e vakaukauwataki mai na matabete me kauti keda yani mai na wai tawamacala eso ni bula vakayago.
Meda sa vakavinavinakataka na Waqa Makawa totoka o Saioni, ni ke a sega eda na ciri voli ga vakaikeda ka malumalumu, veisuayaki toka ni sega na iuli kei na ivoce, ka vakacawiri voli ena cagi kei na ua kaukauwa eso ni vunica.
Tautauri matua, na taciqu kei na ganequ, ka soko voli ena loma ni waqa lagilagi, Na Lotu i Jisu Karisito ni Yalododonu Edaidai, ka da na yacova na noda icavacava tawamudu. Oqo na noqu ivakadinadina kei na masu me baleti keda taucoko ena yaca i Koya e sa vakayacani kina na Waqa Makawa o Saioni, na noda Turaga ka iVakabula, o Jisu Karisito, emeni.