Loloma i Jisu
Mai vei Elder Ronald A. Rasband
Ena Kuoramu ni iApositolo Le Tinikarua
Na noqu ivakadinadina baleti Jisu Karisito sa tarai cake sara ena levu ni ka duatani e sa sotavi kau a kila mai kina na Nona loloma levu me baleti keda yadudua.
Kemuni na taciqu kei na ganequ ena veiyasai vuravura, au vakavinavinaka vakalevu vei iratou na Mataveiliutaki Taumada ena nodratou sureti au meu wasea na noqu ivakadinadina ena Siga ni Vakacecegu edaidai. Na qaqa ni dua na serenilotu ni Yalododonu Edaidai e vakamacalataka na veika au sa vakila tu oqo:
Ena vica na siga sa oti au kalougata niu a laki sotavi iratou na Mataveiliutaki Taumada ka ciqoma na veikacivi oqo mai vua na noda parofita lomani, o Peresitedi Thomas S. Monson. Au vakadinadinataka vei kemuni na qaqaco kei na loloma e tu vei Peresitedi Monson ena nona kaya mai vei au, “Na veikacivi oqo e lako mai vua na Turaga o Jisu Karisito.”
Au sa vakadrukai kau sa yavalati sara ga mai loma ena noqu vakasamataka na ibalebale kei na bibi ni vosa ka a cavuta mai vakamalua vei au na noda parofita yalololoma. Peresitedi Monson, Peresitedi Eyring, Peresitedi Uchtdorf, au lomani kemudou kece kau na veiqaravi vua na Turaga vakakina vei kemudou ena yaloqu taucoko ena noqu vakasama kei na noqu kaukauwa kecega.
Isa, na noqu dau lomani Peresitedi Boyd K. Packer kei Elder L. Tom Perry kei Elder Richard G. Scott. Sa ka levu saraga na noqu dau nanumi ratou. Au kalougata niu a tuberi ka vakavulici ena ruku ni yavadratou na Veitacini oqo. Au na sega sara ga ni rawa ni laki daramaka na nodratou ivava, ia, au kalougata ni rawa meu tucake ena tabadratou ka tomana na veivakalotutaki ni Turaga.
Niu vakasamataki ira era sa vukei au meu mai vaka tu oqo edaidai, au nanuma taumada na noqu daulomani ka itokani tawamudu, o Melanie. Ena veiyabaki sa oti, sa veivuke ni moici au o koya me vaka na tete ena liga ni dautuli kuro ki na dua na tisaipeli yalodina i Jisu Karisito. Na nona loloma kei na veitokoni, kei ira na lima na luvei keirau, ira na watidra, kei na 24 na makubui keirau, era tokoni au. Ki na noqu matavuvale talei, au lomani kemuni.
Me vakai Nifai ena gauna makawa, au a sucu mai na itubutubu vinaka ena kosipeli kei ira mai na itubutubu vinaka ena ono na itabatamata ki muri. O ira na tubuqu sara eliu ka curuma na Lotu a lako mai Igiladi kei Denmark. O ira na ivuvu makawa oqo a solia kece na nodra igu ki na kosipeli i Jisu Karisito ka laiva tu mai e dua na ivotavota kivei ira na nodra kawa mera vakamuria. Au vakavinavinaka ki na dua na matavuvale matatamata Yalododonu Edaidai, kau kila ni oqo e sa dua na takete yaga meda na sasagataka taucoko.
Vuqa tale era a vakaitavi ena vakarautaki ni noqu bula ki na veikacivi oqo. Era oka kina na noqu itokani vagone kei na nodra matavuvale, iliuliu makawa, qasenivuli, kei na dau ivakaraitaki vinaka tudei. Meu okati ira talega mai na gauna makawa ni noqu kaulotu ki na veivanua ena tokalau kei ira na noda daukaulotu lomani mai na Tabana ni Kaulotu ena Vualiku kei New York. Kivei ira e vuqa ka vakayarayarataka ka moica na noqu bula, au sa vakavinavinaka vakalevu.
Au sa vakamareqeta na noqu veiqaravi vata voli kei ira na Veitacini ena Vitusagavulu. Au sa mai tiko ena dua vei ira na kuoramu cecere kei na mataveitacini taleitaki ena Lotu me 15 na yabaki. Vinaka vakalevu, kemudou na noqu itokani dauveiqaravi. Oqo au sa vakanamata ni lewena e dua na kuoramu vou. Peresitedi Russell M. Nelson, sa ka levu na noqu lomani kemuni kei ira yadua na lewe ni Kuoramu ni iApositolo Le Tinikarua.
Au sa kalougata vata kei Sisita Rasband me keirau sikovi ira na lewenilotu ena qaravitavi e so ki na veitabanilotu kei na tabana ni kaulotu ena veiyasai vuravura. Keirau taleitaki ira na Yalododonu Edaidai ena veivanua kecega! Sa mai vakatorocaketaka na neirau vakabauta na nomuni vakabauta; sa mai taraicake na neirau ivakadinadina ena nomuni ivakadinadina.
Oqo, kevaka e rawa la niu biuta koto e dua na itukutuku lailai vei kemuni, sa ikoya oqo: e sa kaya na Turaga, “Dou veilomani; me vaka au sa lomani kemudou.” Sa dei na lomaqu ni sa sega na digidigi, ivalavala ca, se cakacala ko na cakava se dua tani tale me na veisautaka na Nona loloma kivei iko se kivei ira. Sega ni kena ibalebale o ya ni vakatara se vakalaiva o Koya na itovo cati—au kila ni sega ni rawa Vua—ia sa kena ibalebale ga meda dodoliga yani kivei ira na tacida ena yalololoma mera sureti, vakayarayarataki, qaravi, ka vueti mai. O Jisu Karisito a rai baleta na itovo ni bula ni tamata, itutu, kei na ituvaki me rawa ni vakavulici ira kina ena dina momona oqo.
Au sa dau vakatarogi wasoma ena gauna cava au a ciqoma kina na noqu ivakadinadina.
Au sega ni nanuma rawa na tawaveivakabauti kivua na Tamada Vakalomalagi kei Jisu Karisito. Au sa dau lomani Rau mai na gauna au a vulici Rau kina ena duru ni yavai tinaqu na agilosi, ni wilika voli na ivolanikalou kei na italanoa vakosipeli eso. Na vakabauta makawa o ya e sa tubu ki na kilaka ka sa ivakadinadina totoka me baleta na Tamada Vakalomalagi, ka sa dau rogoca ka sauma na noda masu. Na noqu ivakadinadina me baleti Jisu Karisito e sa taraicake mai na vuqa na veika vakasakiti a sotavi kau sa mai kila kina na Nona loloma levu me baleti keda yadua.
Au vakavinavinakataka na Veisorovaki ni noda iVakabula ka gadreva me vakai Alama meu tabalaka na domoqu kei na davui ni Kalou. Au kila o Josefa Simici e sa parofita ni Kalou ni Veivakalesuimai ka sa vosa ni Kalou na iVola i Momani. Kau kila ni sa italai dina ni Kalou o Peresitedi Thomas S. Monson ka parofita ena vuravura edaidai.
Ni da muria na noda parofita, au masuta me na tiko e lomada na loloma cecere kivei ira na tani ka yaco me da na ivakadinadina bula sara ni “loloma i Jisu sa talei vei [keda].” Ia, me sa qai “talei tu vei [iko kei] au.” Ena yaca i Jisu Karisito, emeni.