Forgiven [Pinatawad], ni Greg K. Olsen. Gingamit nga may pahanugot. www.GregOlsen.com

Abril 1–7: Magpakig-uli sa Dios Paagi sa Pagpasag-uli ni Cristo

Jacob 1–4

Ginkabig sang mga Nefinhon si Nefi nga ila “dako nga manug-amlig” (tan-awa sa Jacob 1:10). Gin-amligan man niya sila batok sa espirituhanon nga mga katalagman, nga ginapaandaman sila batok sa sala kag ginapaisog sila nga magpalapit kay Cristo. Karon ining buluhaton nagkadto na kay Jacob, nga ginkonsagrar ni Nefi para mangin pari kag titser (tan-awa sa Jacob 1:18). Nabatyagan ni Jacob ang responsibilidad nga maisog nga paandaman ang mga “nagasugod sa pagpangabudlay sa sala” samtang ginapaumpawan ang “napilasan nga kalag” sang mga nasakitan tungod sang mga sala sang iban (tan-awa sa Jacob 2:5–9). Paano niya himuon ining duha? Itudlo niya sila kay Jesucristo—kay kinahanglan sang duha ka grupo ang pagpaayo sang Manluluwas (tan-awa sa Jacob 4). Pareho sang mensahe ni Nefi antes sa iya, ang testimonya ni Jacob isa ka panawagan nga “makig-uli sa [Dios] paagi sa pagpasag-uli ni Cristo” (Jacob 4:11

Mga Ideya sa Pagtuon sa Puluy-an kag sa Simbahan

Jacob 1:6–8, 15–19; 2:1–11

May “tulumanon [ako] gikan sa Ginuo.”

Para kay Jacob, ang pagtudlo sang pulong sang Dios isa ka “tulumanon gikan sa Ginuo” gani mapisan sia nga nagpangabudlay agud “padakuon ang [iya] palangakuan” (Jacob 1:17, 19). Ano ang kahulugan para sa imo sining mga dinalan nga gingamit ni Jacob? Hunahunaa kon ano ang ginaobra sang lente (magnifying glass). Nakahatag bala ina sa imo sang mga ideya? Samtang ginabinagbinag mo ang Jacob 1:6–8, 15–19 kag 2:1–11, hunahunaa ang mga tulumanon nga posible ginatigana sang Ginuo para sa imo. Ano ang ginapabatyag sa imo nga imo himuon para “padakuon” ang mga ini?

Jacob 2:12–21

“Indi pag-itugot nga gub-on sining bugal sang inyo mga tagipusuon ang inyo mga kalag!”

Ang mga Nefinhon may problema sa bugal kag sa pagtutok sa manggad (tan-awa sa Jacob 2:13), kag ang ina nga problema indi pinasahi sa ila ukon sa ila panahon. Paano ginaduso sang kaaway ang gugma sa manggad sa karon nga panahon? Pagkatapos nga basahon ang Jacob 2:12–21, ilaragway sa kaugalingon mo nga pulong kon ano ang gusto sang Dios nga pagtan-aw mo sa materyal nga manggad.   Ano ang ginapabatyag sa imo nga imo himuon parte sa imo natun-an?

Jacob 2:22–35; 3:10–12

Ang Dios nagakalipay sa kaputli.

Samtang imo ginabasa ang Jacob 2:22–35; 3:10–12, ano ang imo nakita nga nagabulig sa imo sa pag-intiendi kon ngaa importante kaayo sa Dios ang kaputli? Ano ang pila sa negatibo nga mga konsikwensya sang imoralidad—sang panahon ni Jacob kag sa aton panahon? Ano ang mga bugay sang pagpangabuhi nga putli?

Si Elder David A. Bednar nagtudlo nga nagapangabuhi kita “sa kalibutan nga nagadako ang pagyaguta sa kasagrado sang pagpamata” (“We Believe in Being Chaste,” Liahona, Mayo 2013, 41– 41). Paano mo buligan ang iban nga maintiendihan kon ngaa ginatuman mo ang layi sang kaputli? Isa ka maayo nga panugod amo ang pagpaathag sang mga talaksan sang Dios parte sa sekswal nga mga balatyagon kag relasyon sa “Ang imo lawas sagrado” sa Para sa Kusog sang mga Lamharon: Giya sa Paghimo sang mga Pagpili (mga pahina 22–29). Ano pa ang makita mo sa sinang balasahon nga makabulig sa imo sa pagpaathag kon ngaa ginapangabuhi mo ang layi sang kaputli?

Paano nangin lain ang talaksan sang Dios parte sa sekswal nga katinlo sa iban pa nga mga mensahe nga pwede mo masalapoan? Ano ang mga bugay sang pagpangabuhi nga putli?

Jacob 4

Pwede ako magpakig-uli sa Dios paagi sa Pagbayad-Sala ni Jesucristo.

Si Jacob nagpangabay sa iya katawhan nga “makig-uli sa [Dios] paagi sa pagbayad-sala ni Cristo” (Jacob 4:11).   Samtang ginabinagbinag mo ang imo kaugalingon nga kabuhi, hunahunaa ang panahon nga pamatyag mo malayo ka sa Amay nga Langitnon. Paano ka ginabuligan sang Manluluwas nga mabalik ini nga kaangtanan? Ano nga laygay ang makita mo sa sining kapitulo nga nagabulig sa imo nga makig-uli sa Dios? (tan-awa sa mga bersikulo 4–14).

Ano ang dugang nga mga ideya ang imo makuha sa Mateo 5:23–24? Paano makabulig sa imo ang Manluluwas nga makig-uli sa Dios—kag sa iban?

Tan-awa man sa 2 Nefi 10:24.

Jacob 4:8–18

Sarang ako maglikaw sa espirituhanon nga pagkabulag paagi sa pagtutok sa Manluluwas.

Sa pagpangabudlay ni Jacob nga lisuon ang iya katawhan sing mas lubos sa Ginuo, ginpaandaman niya sila nga indi magmangin bulag sa espirituhanon kag indi pagpakanubuon ang “mga pulong sang kaathagan” sang ebanghelyo (tan-awa sa Jacob 4:13–14). Suno sa Jacob 4:8–18, ano ang pwede naton himuon agud malikawan ang espirituhanon nga pagkabulag?

Kon magtudlo Sia, nagagamit ang Manluluwas sang mga pagpaanggid sa adlaw-adlaw nga kabuhi. Ang mga paanggid ni Jesus nakabulig sa mga tawo nga makita ang espirituhanon nga mga kamatuoran sa ila komon nga mga eksperiyensya. Tilawi nga himuon man ini sa imo pagpanudlo. Halimbawa, sa pagtudlo sang Jacob 4:8–18, pwede mo pamangkuton ang mga nagatuon kon bala nakapatan-aw na sila sang ila mata sa doktor. Paano gin-usisa sang doktor ang ila pisikal nga panan-awan? Paano naton usisaon ang aton espirituhanon nga panan-awan?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Jacob 2:8

Ang Dios nagapaayo sang napilasan nga kalag.

• Para buligan ang imo kabataan nga maintiendihan kon paano paayuhon ang “napilasan nga kalag”, pwede ninyo hambalan sing ululupod kon paano nagakapilasan ang aton lawas kag kon paano naton ini ginabuligan nga mag-ayo. Basi pwede nga iistorya sang imo kabataan ang mga tinion nga napilasan sila kag kon ano ang nagbulig sa ila nga mag-ayo. Pwede ka man gani magpakita sa ila sang mga bendahe ukon bulong bilang parte sini nga paghinambalanay. Basi pwede ka man mag-istorya sa ila kon paano ka ginbuligan sang Manluluwas sang nagakinahanglan ang imo espiritu sang pagpaayo.

Jacob 2:17–19

Mabuligan ko ang iban nga nagakinahanglan kon maghatag ako sa ila.

• Ang iban nga mga tawo sang panahon ni Jacob tama ka manggaranon, pero indi nila gusto nga magpanghatag sa iban. Samtang ginabasa mo sa ila ang mga pinanudlo ni Jacob sa Jacob 2:17–19, pwede mo hatagan ang imo kabataan sang mga litrato ukon mga bagay nga kaptan nga nagabagay sa mga tinaga ukon mga dinalan sa sining mga bersikulo. Pwede mo ipaathag nga ginahatag mo ining mga butang sa ila, dayon basi pwede mo sila hagaron nga ihatag ang mga bagay sa imo ukon sa kada isa. Hambali kon ano ang imo nabatyagan kon magpanghatag ka? Ano pa ang pwede naton ipanghatag sa iban para mabuligan sila nga makabatyag sang kalipay?

• Pagkatapos nga basahon sing ululupod ang Jacob 2:17, basi pwede nga lawagon sang imo kabataan ang pila sa mga bugay nga ginhatag sang Amay nga Langitnon sa ila. Ngaa gusto Niya nga maghatagay kita sa kada isa?

Jacob 4:6, 10–11

Mapabaskog ko ang akon pagtuo kay Jesucristo.

• Ang pagtuo ni Jacob kay Cristo tama kabaskog nga indi ini mauyog. Para tudloan ang imo kabataan kon paano magpatubo sang amo sina nga pagtuo, pwede mo sila pamangkuton sang mga butang nga ginahimo naton para magbaskog ang aton mga lawas. Ano ang pwede naton himuon para mas pabaskugon ang aton pagtuo kay Jesucristo? Basaha ang Jacob 4:6 sing ululupod para buligan ang mga kabataan nga madiskubrehan kon ano ang ginhimo ni Jacob kag sang iya katawhan para “indi mauyog” ang ila pagtuo.

• Isa pa ka paagi agud buligan ang imo kabataan nga maintiendihan kon ano ang buot silingon sang mangin “di-mauyog” sa ila pagtuo amo ang magpangita sang dako nga kahoy kag pangabayon sila nga uyugon ang tagsa ka sanga. Dayon hambala sila nga uyugon ang puno. Ngaa mas mabudlay nga uyugon ang puno? Ano nga mga dinalan sa Jacob 4:6, 10–11 ang nagalaragway sang pwede naton himuon para mangin indi mauyog ang aton pagtuo kay Jesucristo?

  

  Pareho sang puno sang kahoy, ang aton pagtuo pwede mangin “di-mauyog.”

• Para sa iban pa nga paanggid agud tudloan ang imo kabataan parte sa indi mauyog nga pagtuo kay Jesucristo, tan-awa man sa Mateo 7:24–27).

Para sa dugang nga mga ideya, tan-awa sa isyu sang Abyan nga magasin sini nga bulan.

I Will Send Their Words Forth (Jacob the Teacher) [Ipadala Ko ang Ila Mga Pulong Pa-gwa (Si Jacob nga Manunudlo), ni Elspeth Caitlin Young