Receiving the Teachings of King Benjamin [Nagabaton sang mga Pinanudlo ni Haring Benjamin], ni Maria Alejandra Gil

Abril 22–28: “Puno sang Gugma tuhoy sa Dios kag sa Tanan nga mga Tawo”

Mosias 1–3

Kon mabatian mo ang tinaga nga hari, siguro ginapamensar mo ang mga korona, mga suluguon, kag mga trono. Sa Mosias 1–3, mabasahan mo ang parte sa lain nga klase sang hari. Imbes nga magpangabuhi sa kinabudlayan sang iya katawhan, si Haring Benjamin “nagpangabudlay paagi sa [iya] kaugalingon nga mga kamot” (Mosias 2:14). Imbes nga magpaserbisyo sa iban, ginserbisyuhan niya ang iya katawhan “sa bug-os nga ikasarang, kaisipan kag kusog nga [ginhatag] sang Ginuo sa [iya]” (Mosias 2:11). Indi gusto sining hari nga simbahon sia sang iya katawhan; kundi, gintudloan niya sila nga magsimba sa ila Langitnon nga Hari, nga si Jesucristo. Naintiendihan ni Haring Benjamin nga “ang Ginuo nga Makaako [amo ang] nagahari (Mosias 3:5), nga “[nag]panaog gikan sa langit” kag “[nag]lakat sa tunga sang mga tawo, … agud nga ang kaluwasan mahimo man nga magaabot sa mga anak sang tawo bisan paagi sa pagtuo sa iya ngalan” (Mosias 3:5, 9).

Mga Ideya sa Pagtuon sa Puluy-an kag sa Simbahan

Mosias 1:1–7

“Usisaa [ang balaan nga mga kasulatan] sing maukod.”

Sa sining mga bersikulo, tandai kon paano ginbugayan sang sagrado nga mga kasulatan ang katawhan ni Haring Benjamin. Paano nangin mas maayo ang imo kabuhi bangod may ara ka sang balaan nga mga kasulatan?

Mosias 2:10–26

Kon nagaserbisyo ako sa iban, nagaserbisyo man ako sa Dios.

Ano ayhan ang ihambal ni Haring Benjamin kon pamangkuton mo sia kon ngaa nagserbisyo sia upod ang tanan niya nga “ikasarang, kaisipan kag kusog”? (Mosias 2:11). Pamensara ini samtang imo ginabasa ang Mosias 2:10–26. Ano ang gintudlo ni Haring Benjamin nga nagainspirar sa imo nga magserbisyo sa iban sa mas makahulugan nga paagi? Halimbawa, ano ang kahulugan sa imo sang paghibalo nga kon nagaserbisyo ka sa iban, nagaserbisyo ka man sa Dios? (tan-awa sa Mosias 2:17). Magpangayo sang inspirasyon kon paano ka makaserbisyo sa isa ka tawo sini nga semana.

Bisan pa nga nahibal-an naton nga dapat kita magserbisyo sa iban, kon kaisa nagapangatubang kita sang mga kabudlayan. Isa pa ka paagi para tun-an ang Mosias 2:10–26 amo nga ilista ang mga kamatuoran nga gintudlo ni Haring Benjamin nga makabulig sa imo nga malampuwasan ang mga hangkat nga mahimo nagapugong sa imo sa pagserbisyo. Ano nga mga eksperiyensya ang nagpakita sa imo nga ang ginpanudlo ni Haring Benjamin matuod?

Si Pangulong Joy D. Jones nag-istorya sang isa ka mabaskog nga eksperiyensya nga nagbag-o sang iya panan-aw sa pagserbisyo sa iban. Basaha ini sa “Para sa Iya” (Ensign ukon Liahona, Nob. 2018, 50–52), kag hunahunaa ang mga oportunidad mo nga magserbisyo sa iban. Basi gani pwede mo ilista ang pila sini kag binagbinagon kon paano ang mensahe ni Pangulong Jones, upod ang Mosias 2:17, makaimpluwensya sa paagi nga ginaatubang mo ining mga oportunidad.  

Tan-awa man sa Mateo 25:40.

Kon nagaserbisyo ako sa iban, nagaserbisyo man ako sa Dios.

Mosias 2:38–41

Ang kalipayan nagahalin sa pagtuman sang mga kasuguan sang Dios.

Paano mo ilaragway ang kalipay nga nagahalin sa pagtuman sa Dios? May mga dinalan bala sa Mosias 2:38–41 nga makabulig sa imo sa pagpaathag kon ngaa ginatuman mo ang Iya mga kasuguan?

Mosias 3:1–20

Sarang ako nga mangin santos paagi sa Pagbayad-Sala ni Jesucristo.

Si Haring Benjamin, pareho sa tanan nga mga propeta, nagsaksi parte kay Jesucristo agud nga ang iya katawhan “mahimo nga makabaton sang kapatawaran sang ila mga sala, kag magakasadya sa tuman kadako nga kalipay” (Mosias 3:13 Ari ang pila ka mga pamangkot nga dapat pamensaron sang maayo samtang imo ginabasa ang panaksihon ni Haring Benjamin parte sa Manluluwas sa Mosias 3:1–20:

• Ano ang akon matun-an sa sining mga bersikulo parte sa Manluluwas kag sa Iya misyon?

• Ano ang matun-an ko sa Mosias 3:18–19 parte sa buot silingon sang mangin santos?

• Paano ako ginbuligan ni Jesucristo nga malampuwasan ang sala, bag-uhon ang akon kinaugali, kag mangin mas isa ka santos?

Mosias 3:5–21

“Ang Ginuo nga Makaako … magapanaog gikan sa langit.”

Ano ang ikasarang nga ginahatag sa imo sang kuryente? Ano ang mangin kinalain sang imo kabuhi kon wala ini? Ini nga mga pamangkot makabulig sa imo nga binagbinagon ang mas dako nga gahum nga pwede dalhon sang Manluluwas sa imo kabuhi.

Ang anghel nga nagpakita kay Haring Benjamin nagtawag kay Jesucristo nga “Ginuo nga Makaako,” ang titulo nga buot silingon ara sa Iya ang tanan nga gahum. Ano ang imo matun-an sa Mosias 3:5–21 kon paano ginagamit sang Manluluwas ina nga gahum? Paano mo nakita ang gahum sang Manluluwas sa imo kabuhi kag sa mga kabuhi sang mga tawo nga ara sa imo palibot? Ano ang ginahatag sang Iya gahum sa imo nga ikasarang sa paghimo kag pag-mangin? Ano ang mangin kinalain sang imo kabuhi kon wala ini?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Mosias 2:11–18

Kon magserbisyo ako sa iban, nagaserbisyo ako sa Dios.

• Ang pahina para sa kahiwatan sini nga semana may simple nga korona nga pwede himuon sang imo kabataan. Basi pwede sila magbulos-bulos sa pagtindog sa bangko ukon stool kag kuno abi sila si Haring Benjamin samtang ginahambal mo ang pila ka mga butang nga gintudlo ni Haring Benjamin sa iya katawhan, nga makita sa Mosias 2–3.  

• Basi maayo nga bersikulo ang Mosias 2:17 nga matun-an sang imo kabataan. Pwede mo sila buligan nga suliton sing amat-amat ang pila sini ka mga tinaga. Ukon pwede mo isulat ang bersikulo, nga wala ang iban nga importante nga mga tinaga, kag pangabaya ang imo kabataan nga pangitaon ang nadula nga mga tinaga. Dayon pwede ninyo hambalan sang imo kabataan kon ngaa gusto sang Dios nga magserbisyo kita sa isa kag isa.

• Pwede mo buligan ang imo kabataan nga usisaon ang Mosias 2:11–18 para mahibal-an kon ano ang ginhimo ni Haring Benjamin para magserbisyo sa iban. Dayon pwede nga isulat sang imo kabataan sa ginunting nga mga papel ang pila ka paagi nga pwede nila serbisyuhan ang mga miyembro sang pamilya. Ibutang ang mga papel sa suludlan, pareho sang bag ukon garapon, para magkuha lang ang imo kabataan sang isa kada adlaw kag himuon ina nga buhat sang pagserbisyo sa iban.

Ang mga kabataan nagabenepisyo sa pagsulit-sulit. Indi mahadlok nga sulit-suliton ang mga aktibidades sing pila ka beses, ilabi na gid sa mas magagmay nga kabataan. Ang pagsulit-sulit makabulig sa mga kabataan nga madumduman ang ila natun-an.

Si Haring Benjamin nagtudlo nga pwede kita magserbisyo sa Dios paagi sa pagserbisyo sa iban.

Mosias 2:19–25

Ang tanan ko nga bugay naghalin sa Amay nga Langitnon.

• Ang serbisyo ni Haring Benjamin sa iya katawhan naghalin sa iya dako kaayo nga kapasalamatan sa Dios. Paano mo papagsikon ang pareho nga mga balatyagon sa imo kabataan? Pwede ninyo basahon ang Mosias 2:21 sing ululupod kag magsugod sa paglista sang mga bugay nga ginhatag sang Amay nga Langitnon sa aton. Dayon basi pwede ninyo idugang sa listahan ang iban pa nga mga bugay nga madumduman sang kabataan.

• Ari ang isa ka hampang nga pwede ninyo obrahon para buligan ang imo kabataan nga makilala ang mga bugay sang Amay nga Langitnon. Pwede nga ipasa-pasa sang kabataan ang litrato sang Manluluwas samtang nagakanta sila ukon nagapamati sa kanta nga parte sa pagpasalamat. Mag-untat kanta ukon untata ang musika sing panalagsa, kag agdaha ang natup-an sang litrato nga mag-istorya parte sa isa ka bugay nga ginapasalamatan nila. Suno sa Mosias 2:22–24, paano naton ipakita nga nagapasalamat kita sa aton mga bugay?

Mosias 3:5–10, 19

Buligan ako ni Jesucristo nga mangin mas pareho sa Iya.

• Ginhambal sang isa ka anghel kay Haring Benjamin ang importante nga mga kamatuoran parte sa kabuhi kag pag-alagad ni Jesucristo. Basi pwede mo kag sang imo kabataan nga pangitaon ang mga litrato sang pila sa mga hitabo nga ginmitlang sa Mosias 3:5–10 (tan-awa halimbawa, sa Libro sang mga Larawan nga Pang-Ebanghelyo, num. 30, 41, 42, 57, 59). Samtang imo ginabasa ang Mosias 3:5–10, pwede nga ipataas sang imo kabataan ang ila mga kamot kon mabatian nila ang isa ka bagay sa mga dinalan nga makita sa isa sang mga litrato.

• Nakabulig na bala ang imo kabataan sa paghanda sang pagkaon gamit ang isa ka recipe? Basi pwede ninyo hambalan ina nga eksperiyensya kag gamiton ang Mosias 3:19 para maghimo sang “recipe” kon paano kita mangin pareho kay Jesucristo. Paano kita ginabuligan ni Jesus nga mangin mas pareho sa Iya?

Para sa dugang nga mga ideya, tan-awa sa isyu sang Abyan nga magasin sini nga bulan.

King Benjamin’s Address [Pamulong-pulong ni Haring Benjamin], ni Jeremy Winborg