Jacob and Enos [Jacob kag Enos], ni Scott Snow

Abril 15–21: “Nagahikot Sia sa Akon sa Paghimo Suno sa Iya Kabubut-on”

Enos–Mga Pulong ni Mormon

Bisan nga nagkadto si Enos sa kakahuyan para mangayam sang kasapatan agud masabat ang pisikal nga kagutom, nagtiner sia didto sang bilog nga adlaw hasta maggab-i tungod ang iya “kalag ginutom.” Ining kagutom nagtulod kay Enos nga “[ibayaw ang iya] tingug pataas sa bagay nga nakalambot ini sa mga langit.” Ginlaragway niya ining eksperiyensya nga pagpakigdumog sa atubang sang Dios (tan-awa sa Enos 1:2–4). Kay Enos matun-an naton nga ang pangamuyo isa ka sinsero nga pagpaninguha nga mas maglapit sa Dios kag paghandum nga mahibal-an ang Iya pagbuot. Kon magpangamuyo ka nga amo sini ang tinutuyo, laban-laban nga madiskubrehan mo, pareho kay Enos, nga ang Dios nagapamati sa imo kag matuod Sia nga nagaulikid sa imo, sa imo mga mahal sa kabuhi, kag bisan sa imo mga kaaway (tan-awa sa Enos 1:4–17). Kon nahibal-an mo ang Iya pagbuot, mas mahimo mo ang Iya kabubut-on. Pareho kay Mormon, mahimo nga “wala [mo] mahibal-i ang tanan nga mga butang; apang ang Ginuo nakahibalo sang tanan nga mga butang … ; gani, nagahikot sia sa [imo] sa paghimo suno sa iya kabubut-on” (Mga Pulong ni Mormon 1:7

Mga Ideya sa Pagtuon sa Puluy-an kag sa Simbahan

Enos 1:1–17

Pamatian kag sabton sang Dios ang akon mga pangamuyo.

Ang imo mga eksperiyensya sa pangamuyo mahimo nga indi amo sini ka ma-drama sang sa iya ni Enos, pero indi kinahanglan nga menos ini sa kahulugan. Ari ang pila ka mga pamangkot nga dapat hunahunaon samtang imo ginatun-an ang Enos 1:1–17:

• Ano nga mga tinaga ang nagalaragway sang pagpaninguha ni Enos samtang sia nagapangamuyo?

• Paano nagliwat ang mga pangamuyo ni Enos sa mga bersikulo 4 tubtob 11?

• Ano ang akon matun-an kay Enos nga makabulig sa akon nga mas pauswagon ang akon mga pangamuyo?

Pagbayluhanay sang mga pamangkot samtang nagahambalanay. Kon nagatudlo ka sa iban, pamensara nga ibutang ang mga pamangkot nga gusto mo hambalan sa isa ka dali makita nga lugar para sa tanan. Makabulig ini sa mga tawo nga binagbinagon ang mga pamangkot kag maghatag sang mas inspirado nga mga sabat.

Enos 1:1–4

Mabuligan ako sang Ginuo nga maimpluwensyahan ang akon pamilya sa kaayuhan.

Basi may isa sa imo pamilya nga gusto mo kuntani buligan nga magpalapit kay Cristo, pero nagapanumdom ka kon bala ang imo pagpaninguha may epekto man. Ano ang imo matun-an sa Enos 1:1–4 parte sa impluwensya ni Jacob sa anak niya nga si Enos? Halimbawa, ano para sa imo ang kahulugan sang “disiplina kag pagtudlo sang Ginuo”? Paano mo imbitahon ang Iya impluwensya sa inyo puluy-an?

Samtang ginahunahuna mo ang imo kaugalingon nga pamilya, pamensara ining mga pamangkot kag mga balasahon:

• Paano mo maimpluwensyahan ang imo pamilya sa positibo nga pamaagi? (tan-awa sa 1 Nefi 2:16–18; 3:15–21; 5:1–6; 7:20–21; Alma 36:17–20; “Ang Panimalay: Isa ka Proklamasyon sa Kalibutan”). Ano pwede mo himuon kon ang isa ka tawo daw indi gusto sang imo bulig ukon indi maayo sa imo?

• Ano nga mga prinsipyo ang imo makita sa masunod nga balaan nga mga kasulatan nga makagiya sa imo mga relasyon upod sa mga miyembro sang pamilya? Mateo 5:21–24, 38–44; 6:14; 7:1–5; 22:36–39; 3 Nefi 18:21; Moroni 7:33; Doktrina kag mga Kasugtanan 18:10–13.

Enos 1:1–18

Makabaton ako sang kapatawaran samtang ginagamit ko ang pagtuo kay Cristo.

Kon kaisa makapanghunahuna ka kon bala ang imo nga sala napatawad na, bisan pa nga ginhinulsulan mo na ina nga mga sala. Ano nga mga ihibalo ang imo maagom sa eksperiyensya ni Enos sa Enos 1:1–8? Paano ginpakita ni Enos ang iya pagtuo kay Jesucristo antes kag pagkatapos niya nga mabaton ang kapatawaran?

Jarom–Omni

Samtang ginatinguhaan ko nga tumanon ang Iya mga kasuguan, bugayan ako sang Dios.

Ang mga libro ni Jarom kag Omni pareho nga nagapakita sang kaangtanan sang pagkamatarong kag pagtin-ad. Ano ang imo matun-an sa Jarom 1:7–12; Omni 1:5–7, 12–18? Ano ang kinalain sang kalibutanon nga mga kahulugan sang katin-aran sa kahulugan sang Ginuo? Paano ginabuligan sang Ginuo ang Iya katawhan nga mag-uswag? (tan-awa sa Alma 37:13; 48:15–16).

Omni 1:25–26

“Magkari kay Cristo, nga amo ang Balaan sang Israel.”

Ang imbitasyon nga “Magkari kay Cristo” masami nga makita sa Libro ni Mormon. Ang matuod, isa sa mayor nga mga katuyuan sang libro amo nga ipalab-ot ini nga imbitasyon sa tanan. Samtang imo ginabasa ang Omni 1:25–26, ano ang nakita mo nga mga tinaga ukon mga dinalan nga nagalaragway kon paano magkari kay Cristo? Ano ang imo himuon para mas lubos nga magpalapit sa Iya?

Mormon Compiling the Plates [Si Mormon nga Nagasulat sa mga Lamina], ni Jorge Cocco

Mga Pulong ni Mormon 1:1–8

Ang Dios magahikot paagi sa akon samtang ginasunod ko ang Iya nga paggiya.

Isa ka rason nga gin-inspirar sang Ginuo si Mormon nga ilakip ang diutay nga mga lamina ni Nefi sa Libro ni Mormon amo nga nahibal-an sang Dios nga ang una nga 116 nga ginlubad nga mga pahina madula (tan-awa sa Doktrina kag mga Kasugtanan 10. Ngaa nagapasalamat ka nga ginsunod ni Mormon ang instruksyon sang Ginuo nga ilakip ining mga sinulatan (nga nagaunod sang 1 Nefi tubtob Omni)? Ano ang mga rason nga ginhatag ni Mormon sa paglakip sang mga ini (tan-awa sa Mga Pulong ni Mormon 1:3–7). Sang san-o mo nakita ang Dios nga nagahikot paagi sa imo ukon sa iban?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Enos 1:1–5

Makasugilanon ako sa Amay nga Langitnon paagi sa pangamuyo.

• Paano mo buligan ang imo kabataan nga himuon ang ila mga pangamuyo nga mas makahulugan? Pamensara ang pagpakita sa ila sang litrato ni Enos nga nagapangamuyo; tugoti sila nga ilaragway ang ila nakita. Dayon pwede sila magpiyong kag hunahunaon nga nagaistorya sila sa Amay nga Langitnon nga atubangay. Ano ang gusto nila nga hambalan? Ano ayhan ang Iya ihambal sa ila?

• Samtang ginabasa mo sing matunog ang Enos 1:1–5, ang mas magagmay nga kabataan pwede nga magpakuno-kuno nga sila si Enos nga nagapangayam, nagaluhod sa pagpangamuyo, kag madamo pa. Ang mas dalagko nga kabataan pwede nga magpamati sa tinaga ukon dinalan nga nagalaragway sa mga pangamuyo ni Enos. Ano ang ginasiling sa aton sining mga tinaga parte sa mga pangamuyo ni Enos? Mag-istorya sang eksperiyensya sang ang imo kalag “ginutom” kag “nagtuaw” sa Ginuo (Enos 1:4).

Bilang mga anak sang Dios, sarang kita magpangamuyo sa aton Amay nga Langitnon.

Enos 1:2–16

Ang Amay nga Langitnon nagapamati kag nagasabat sang akon mga pangamuyo.

• Paano mo buligan ang imo kabataan nga maintiendihan nga pamatian kag sabton sang Amay nga Langitnon ang ila mga pangamuyo? Pamensara nga hagaron sila nga ilista ang pila ka mga butang nga masami nila ginapangamuyo. Dayon pwede mo sila buligan nga pangitaon kon ano ang ginpangamuyo ni Enos sa Enos 1:2, 9, 13–14, kag 16.

  Ano ang mga resulta sang mga pangamuyo ni Enos? (tan-awa sa mga bersikulo 6, 9, 11).

  Ano ang aton matun-an sa eksperiyensya ni Enos parte sa pagpauswag sang aton mga pangamuyo?

•   Basi pwede nga alsahon sang imo kabataan ang ila mga kamot tagsa nga mabatian nila ang tinaga nga “magpangamuyo” ukon “pangamuyo” ukon lain pa gid nga tinaga nga ginasulit-sulit. Sugiri ang imo kabataan parte sa pila ka pamaagi nga ginsabat sang Amay nga Langitnon ang imo mga pangamuyo.

Mga Pulong ni Mormon 1:3–8

Sarang ko bugayan ang iban kon magpamati ako sa Balaan nga Espiritu.

• Ginsunod ni Mormon ang giya sang Balaan nga Espiritu nga ilakip ang magagmay nga mga lamina ni Nefi sa Libro ni Mormon. Ang tanan nga gintun-an naton sa Libro ni Mormon sa sini nga tuig nag-abot sa aton tungod ginpili ni Mormon nga magpamati sa Espiritu. Paano mo buligan ang imo kabataan nga makatuon parte sa pagpamati sa Espiritu? Hagara sila nga magbulos-bulos sa pagbasa sang mga bersikulo sang Mga Pulong ni Mormon 1:3–8. Pwede ninyo hambalan kon ano ang ila natun-an sa tagsa ka bersikulo. Ang imo kabataan pwede dayon:

  • Mag-istorya sang ila natun-an sa mga sugilanon sa Libro ni Mormon sini nga tuig (ang mga litrato halin sa Dali, Magsunod sa Akon makabulig sa pagpadumdom sa ila).

  • Istoryahi ang mga eksperiyensya nga gingiyahan sila sang Espiritu nga himuon ang isa ka butang nga nagbugay sa lain nga tawo.

Para sa dugang nga mga ideya, tan-awa sa isyu sang Abyan nga magasin sini nga bulan.

Enos Praying [Si Enos nga Nagapangamuyo], ni Robert T. Barrett