Na Veiqaravi vua na Nomu Kalou, mai vei Walter Rane

29 ni Epereli–5 ni Me: “E Dua na Veisau Levu.”

Mosaia 4–6

O sa bau vakarogoca e dua me vosa ka o qai vakila na veivakauqeti mo veisautaka nomu bula? De o sa nanuma beka, baleta na veika o rogoca, me sa veisau vakalailai nomu bula—se veisau vakalevu sara. Na ivunau ni Tui o Penijamini e vaka na vunau o ya, kei na dina e vakavulica e vakatoka oya na kena mana vei ira na tamata era rogoca. E wasea vei ira na tamata na Tui o Penijamini e dua na ka e vakavulica vei koya na agilosi—ni vakavotukana na veivakalougatataki talei o ya ena “dra ni veisorovaki i Karisito” (Mosaia 4:2). Ena vuku ni Nona itukutuku, era sa veisautaka na nodra raici ira vakai ira (raica na Mosaia 4:2), sa veisautaka kina na Yalo na nodra gagadre (raica na Mosaia 5:2), ka ra sa veiyalayalati kei na Kalou ni ra na dau cakava na Nona lewa (raica na Mosaia 5:5). Oqo na sala a mana kina na vosa nei Tui Penijamini vei ira na nona tamata. Era na uqeti iko vakacava?

Vakasama eso ni Vuli ena iTikotiko kei na Lotu

Mosaia 4

Ena vuku i Jisu Karisito, au sa rawa ni ciqoma ka taqomaka tiko na vakabokoci ni noqu ivalavala ca.

Ena so na gauna, ena gauna saraga o vakila ni sa vosoti nomu ivalavala ca, o na sasaga dredre beka me tikoga kei iko na yalo oqori ka mo tudei tikoga ena sala ni ivalavala dodonu. E vakatavulici ira na nona tamata na Tui o Penijamini na sala me tiko ruarua na ciqomaka ka taqomaka tiko na vakabokoci ni ivalavala ca. Ni o vulica na wase 4 ni Mosaia, sa rawa mo taroga na taro vakaoqo:

Tikina e 1–8Na cava soti na ituvaki e solia kina na Kalou na vakabokoci ni nomu ivalavala ca? Na cava o vulica me baleti Koya ena veitikina oqo e vakauqeti iko mo veivutuni? O na kila vakacava ni ko sa veivutuni?

Tikina e 11-16.Ena veitikina oqo, na cava ena yaco ena noda bula kevaka eda vakayacora na veika oqo ena tikina 11? O sa bau sotava vakacava, se dua o lomana, na veisau oqo? Vakatauvatana na veisau oqo ki na veisau e vakamacalataki tiko ena Mosaia 3:19.

Tikina e 16–30Ena vukei iko vakacava na nomu wasea na veika sa tu vei iko vei ira eso mo taqomaka kina na vakabokoci ni nomu ivalavala ca? Ena rawa vakacava ni o bulataka na tikina 27 ki na nomu sasaga mo va-Karisito?

Ena sala cava beka eda tamata daukerekere kecega kina? Na cava e tukuna na veitikina oqo, me baleta na noda ivakarau vei ira kece na luveni Kalou? (raica na Mosaia 4:26). O cei ena gadreva na nomu veivuke?

Raica talega na Becky Craven, “Maroroya na Veisau,” Liaona, Nove. 2020, 58–60)

Mosaia 4:5–10

Au vakabauta ka nuitaka na Kalou.

Na veisureti nei Tui Penijamini meda vakadinata ka vakararavi vua na Kalou sa ka bibi sara nikua me vaka ga ena veigauna makawa. Ni o wilika na Mosaia 4:5–10, vaqara na dina me baleta na Kalou ka solia vei iko na vuna mo nuitaki Koya kina. Raica na veisureti e solia na Tui o Penijamini ena tikina e 10. Na cava na vuna ena vakarawarawataka kina na noda nuitaka na Kalou na veika e sureta na Tui o Penijamini?

Navuca mo vakasaqara eso na ikuri ni ivolanikalou oqo me volai kina na ivakarau ni Kalou: Jeremaia 32:17; 1 Joni 4:8; 2 Nifai 9:17; Alama 32:22; Momani 9:9; Ica 3:12; Vunau kei na Veiyalayalati 19:1–3; 88:41 (raica talega na vidio “Christlike Attributes,” Gospel Library). E rawa ni o vakayagataka na nomu lisi mo lako vata mai kei na veisala eso me vakacavari kina e dua na yatuvosa vakaoqo: “Baleta ga niu kila na Kalou ni , Au sa nuitaki Koya me .”

Ena torocake na noda nuitaka na Kalou ni da sotava na veika e baleti Koya. Ena Mosaia 4:1–3, na cava a vukei ira na tamata i Tui Penijamini mera “kila na vinaka ni Kalou”? (tikina e 6). Vakananuma mada na veika o sa sotava vata kei na Kalou. Na cava e vakavulica vei iko baleti Koya ena nomu sotava na veika oqori? Na ikalawa cava soti o sa taura (se rawa ni o taura) me vakatitobutaka na nomu vakabauta se vakararavi vua na Kalou?

Raica talega na Jeffrey R. Holland, “Na Lagilagi ni Kalou,” Liaona, Nove. 2003, 70–73; Gospel Topics “God the Father,” Gospel Library; “I Know My Father Lives,” Serenilotu, naba 302.

Wasei ni veika tabu e sotavi. Eso na veika sotavi sa rui ka tabu se ka ni tamata yadua me wasei. Ni ra sureta eso tale me ra wasea na veika era sotava, kakua ni dau vakasaurarataki ira me ra wasea kevaka era sega ni vinakata.

Mosaia 4:29–30

Meu qarauna na noqu vakasama, vosa, kei na ivalavala.

E sega ni solia vei keda na Kalou e dua na lisi ni ivalavala ca kecega e rawa. Ena Mosaia 4:29–30, na cava e cakava o Koya me isosomi? Vakasamataka vakatitobu na sala ena vakayaco-ka kina vei iko kei ira tale eso na nomu vakanananu, vosa, kei na ivalavala. Era vakayaco-ka vakacava na nomu veiwekani kei na Tamada Vakalomalagi? O na “qarauni iko beka vakacava”?

Mosaia 5:1–5

Na Yalo ni Turaga e rawa ni vakavuna e dua na veisau levu e yaloqu.

Sa matau tu vei ira na tamata mera kaya, “Au sega ni rawa ni veisau. Au sa na vakatu ga oqo.” Ni vakatauvatani, ena veika era sotava nona tamata na Tui o Penijamini, e vakaraitaka vei keda na sala ena rawa ni cakacaka kina na Yalo ni Turaga me veisautaka dina sara na yaloda. Ni o wilika na Mosaia 5:1–5, vakasamataka na “veisau levu” e rawa ni yaco ka na veimuataki ki na saumaki dina e yaco—se rawa ni yaco—ena nomu bula. Vakasamataka mada na veisau matata, vakamalua ka vakakina na veika “levu” e sotavi Ena vukei iko vakacava na veika sotavi oqo ena gauna o sotava kina na veitemaki?

Raica talega na Isikeli 36:26–27; Alama 5:14; “A Change of Heart,” “The People of King Benjamin Make a Covenant” (vidio), Gospel Library.

Na Liga Veivakabulai, mai vei Adam Abram

Mosaia 5: 5–15

Au sa taura vei au na yaca i Karisito ena gauna au vakayacora kina na veiyalayalati kei Koya.

Na cava o vulica mai na Mosaia 5:7–9 me baleta na ibalebale ni ko taura vei iko na yaca i Karisito? Na cava e vakavulica na masu ni sakaramede (raica na Moronai 4–5) me baleta na ka oqo? Ena rawa vakacava ni da vakaraitaka ni da sa “nona” na iVakabula?

Raica talega na D. Todd Christofferson, “Na Cava na Vuna me Salatu kina ni Veiyalayalati,” Liaona, Me 2019, 116–19.

Vakasama ni Nodra Tuberi na Gonelalai

Mosaia 4:1–3, 10

Na veivutuni ena kauta mai na reki.

• Ni gadrevi me vakavulici na rekitaki ni veivutuni, sa rawa mo laivi ira na luvemu me ra cakava na ligadra me dregadregata se duka ka raica na veika era vakila ni ra sa savata oti na ligadra. Oti mo qai vakatauvatana oqori ena sala era vakila kina na tamata ena Mosaia 4:1–3 ni se bera ka ni sa oti na vosoti ni nodra ivalavala ca. Wasea na nomu ivakadinadina me baleta na kaukauwa ni iVakabula me vakasavasavataki keda vakayalo.

• Era sa kila tiko beka na luvemu na sala mera veivutuni vakaidina ka vakataucoko kina? Vukei ira mera raica na veika era a cakava na tamata i Penijamini ena Mosaia 4:1–3, 10. E rawa talega ni ra raicalesu na “Veivutuni, Veivutunitaka” ena iDusidusi ki na iVolanikalou. E vakavuna vakacava o Jisu Karisito me rawa na veivutuni?

Mosaia 4:12–26

E uqeti au na kosipeli i Jisu Karisito meu qaravi ira eso ena loloma kei na yalovinaka.

• Na qaravi ira eso ena vakalomavinakataki keda. Sa rawa vei ira na luvemu mera wasea e dua na gauna era a lomana ka veiqaravi kina ena vukuna e dua kei na ivakarau ni yalo cava era a sotava kina. Na cava na vuna era na sega beka ni vinakata eso mera qaravi ira eso? Na cava eda rawa ni kaya vua e dua me sureti ira me ra vukei ira na vakaleqai tu? Vakaraica na vakasama eso ena Mosaia 4:16–26.

• E vakavuvulitaka na Tui o Penijamini ni da lako mai vei Karisito ka rawata na vakabokoci ni noda ivalavala ca, eda sa “vakasinaiti ena loloma ni Kalou” (Mosaia 4:12). Oqo ena muataki keda meda dauloloma ka yalovinaka vei ira eso. Sa rawa vei iko kei ira na luvemu mo ni vakasaqara ena Mosaia 4:13–16, 26 (se dua na sere me vaka na “I’ll Walk with You,” Nodra Sere na Lalai, 140–41) ka raica na malanivosa e vakamacalataka na sala eda rawa ni qaravi ira kina eso. Mera qai matanataka na veika oqo se droinitaka na kedra iyaloyalo ka vakilakila na veimalanivosa yadua. Me da vakaraitaka vakacava na loloma kei na yalovinaka e vale, e koronivuli, se ena lotu?

E vakavulici keda o Jisu Karisito me da yalovinaka vei ira eso.

Mosaia 5:5–15

Niu veiyalayalati kei na Kalou, au taura vei au na yaca i Karisito.

• Era na marautaka na luvemu me ra caka beji ka tokara kina na yaca i “Jisu Karisito” ka daramaka e delani yalodra (raica na tabana ni itaviqaravi ni macawa oqo). Ni ra vakayacora vakakina, sa rawa mo wilika vei ira na Mosaia 5:12 ka veivosakitaka na sala ni gauna e caka kina na veiyalayalati, se yalayala, vata kei na Kalou sa vaka “me sa volai tu ga e [lomada]” na yaca i Karisito.

Me ikuri ni vakasama tale eso, raica na ilavelave ni vula oqo ena iTokani ena kena mekasini.

Ena Nona Dauveikaroni, mai vei Greg K. Olsen