“ເດືອນພຶດສະພາ 6–12: ‘ໂດຍໄດ້ຮັບກຳລັງຈາກພຣະຜູ້ເປັນເຈົ້າ.’ ໂມໄຊຢາ 7–10” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 6–12 ເດືອນພຶດສະພາ. ໂມໄຊຢາ 7–10,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
ມິເນີວາ ໄທເກີດ (1888–1976), Ammon before King Limhi [ອຳໂມນຢູ່ຕໍ່ໜ້າກະສັດລິມໄຮ], 1949–1951, ສີນ້ຳມັນ ເທິງແຜ່ນໄມ້ອັດ, 35 15/16 × 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969.
ເດືອນພຶດສະພາ 6–12: “ໂດຍໄດ້ຮັບກຳລັງຈາກພຣະຜູ້ເປັນເຈົ້າ”
ໂມໄຊຢາ 7–10
ຂະນະທີ່ຜູ້ຄົນຂອງກະສັດໂມໄຊຢາຊື່ນຊົມກັບ “ສັນຕິສຸກຕິດຕໍ່ກັນ” ຢູ່ໃນເມືອງເຊຣາເຮັມລາ (ໂມໄຊຢາ 7:1), ຄວາມຄິດຂອງເຂົາເຈົ້າໄດ້ຫັນໄປຫາຊາວນີໄຟອີກກຸ່ມໜຶ່ງ, ຜູ້ໄດ້ໜີໄປຫລາຍປີແລ້ວ ເພື່ອໄປຢູ່ໃນແຜ່ນດິນ ລີໄຮ–ນີໄຟ. ຫລາຍລຸ້ນຄົນໄດ້ຜ່ານໄປ, ແລະ ຜູ້ຄົນຂອງໂມໄຊຢາບໍ່ໄດ້ຍິນຫຍັງເລີຍຈາກພວກເຂົາ. ສະນັ້ນ, ໂມໄຊຢາຈຶ່ງໄດ້ຂໍໃຫ້ອຳໂມນນຳພາກຸ່ມຄົ້ນຫາກຸ່ມໜຶ່ງ ເພື່ອໄປຊອກຫາຊາວນີໄຟຜູ້ທີ່ໄດ້ໜີໄປ. ກຸ່ມຄົ້ນຫາໄດ້ພົບເຫັນວ່າ ຊາວນີໄຟເຫລົ່ານີ້, “ເພາະຄວາມຊົ່ວຮ້າຍ” (ໂມໄຊຢາ 7:24), ຈຶ່ງໄດ້ກາຍເປັນຊະເລີຍຂອງຊາວເລມັນ. ແຕ່ເມື່ອອຳໂມນ ແລະ ອ້າຍນ້ອງຂອງລາວໄດ້ໄປເຖິງ, ທັນໃດນັ້ນ ກໍມີຄວາມຫວັງທີ່ຈະໄດ້ຮັບການປົດປ່ອຍ.
ບາງເທື່ອເຮົາກໍເປັນເໝືອນດັ່ງຊາວນີໄຟທີ່ເປັນຊະເລີຍເຫລົ່ານີ້, ຮັບທຸກທໍລະມານເພາະບາບຂອງເຮົາ, ສົງໄສວ່າເມື່ອໃດເຮົາຈຶ່ງຈະມີສັນຕິສຸກຄືນອີກ. ບາງເທື່ອເຮົາກໍເປັນເໝືອນດັ່ງອຳໂມນ, ຮູ້ສຶກວ່າໄດ້ຖືກກະຕຸ້ນໃຫ້ເອື້ອມອອກໄປຫາຄົນອື່ນ ແລະ ໃນທີ່ສຸດພົບເຫັນວ່າຄວາມພະຍາຍາມຂອງເຮົາ ໄດ້ດົນໃຈເຂົາເຈົ້າໃຫ້ “ເງີຍໜ້າ [ຂອງເຂົາເຈົ້າ] ຂຶ້ນ, ແລະ ປິຕິຍິນດີ, ແລະ ໝັ້ນໃຈໃນພຣະເຈົ້າ” (ໂມໄຊຢາ 7:19). ບໍ່ວ່າສະຖານະການຂອງເຮົາຈະເປັນແນວໃດ, ເຮົາທຸກຄົນຕ້ອງກັບໃຈ ແລະ “ຫັນໜ້າມາຫາພຣະຜູ້ເປັນເຈົ້າດ້ວຍຈຸດປະສົງເຕັມທີ່ແຫ່ງໃຈ,” ດ້ວຍສັດທາ ວ່າ “ພຣະອົງຈະ … ປົດປ່ອຍ [ເຮົາ]” (ໂມໄຊຢາ 7:33).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະເຈົ້າມີອຳນາດທີ່ຈະປົດປ່ອຍເຮົາ.
ການໄດ້ພົບກັບອຳໂມນໄດ້ເຮັດໃຫ້ກະສັດລິມໄຮມີຄວາມຫວັງ, ແລະ ເພິ່ນຢາກສົ່ງຕໍ່ຄວາມຫວັງນັ້ນໄປໃຫ້ຜູ້ຄົນຂອງເພິ່ນ. ບາງທີຖ້ອຍຄຳຂອງເພິ່ນອາດຈະສາມາດໃຫ້ຄວາມຫວັງແກ່ທ່ານເຊັ່ນກັນ. ສຳລັບເບື້ອງຫລັງ, ໃຫ້ຄິດທີ່ຈະທົບທວນສະຖານະການຂອງຜູ້ຄົນຂອງລິມໄຮໃນ ໂມໄຊຢາ 7:20–25. ແລ້ວໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານ ໂມໄຊຢາ 7:14–33:
-
ລິມໄຮໄດ້ເຮັດຫຍັງເພື່ອເພີ່ມຄວາມເຂັ້ມແຂງໃຫ້ແກ່ສັດທາ ແລະ ຄວາມຫວັງຂອງຜູ້ຄົນຂອງເພິ່ນໃນພຣະຄຣິດ?
-
ວະລີໃດແດ່ທີ່ຊ່ວຍໃຫ້ທ່ານຮູ້ສຶກມີຄວາມຫວັງ? (ເບິ່ງ ຂໍ້ທີ 19, 33).
-
ປະສົບການໃດແດ່ທີ່ຊ່ວຍໃຫ້ທ່ານໄວ້ວາງໃຈວ່າພຣະເຈົ້າສາມາດ ແລະ ຈະປົດປ່ອຍທ່ານ?
ເບິ່ງ “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5 ນຳອີກ.
ເຮົາໄດ້ຖືກສ້າງ “ຕາມຮູບລັກສະນະຂອງພຣະເຈົ້າ.”
ໃນ ໂມໄຊຢາ 7:26–27, ລິມໄຮໄດ້ອະທິບາຍຄວາມຈິງບາງຢ່າງທີ່ສິດສອນໂດຍອະບີນາໄດ. ຄວາມຈິງໃດແດ່ທີ່ທ່ານສາມາດລະບຸໃນຂໍ້ເຫລົ່ານີ້? ຄວາມຈິງເຫລົ່ານີ້ມີຜົນກະທົບຕໍ່ວິທີທີ່ທ່ານເຫັນພຣະເຈົ້າ ແລະ ຕົວທ່ານເອງແນວໃດ?
ເບິ່ງ Russell M. Nelson, “Your Body: A Magnificent Gift to Cherish,” Liahona, Aug. 2019, 50–55 ນຳອີກ.
ພຣະຜູ້ເປັນເຈົ້າໄດ້ຈັດໃຫ້ມີສາດສະດາ, ຜູ້ພະຍາກອນ, ແລະ ຜູ້ເປີດເຜີຍໄວ້ ເພື່ອຜົນປະໂຫຍດຂອງມວນມະນຸດ.
ເມື່ອລິມໄຮໄດ້ຍິນປະຈັກພະຍານຂອງອຳໂມນ ວ່າພຣະຜູ້ເປັນເຈົ້າໄດ້ຍົກຜູ້ໜຶ່ງຂຶ້ນເປັນຜູ້ພະຍາກອນ, ລິມໄຮ “ກໍປິຕິຍິນດີຢ່າງຍິ່ງ, ແລະ ຖວາຍຄວາມຂອບພຣະຄຸນແດ່ພຣະເຈົ້າ” (ໂມໄຊຢາ 8:19). ທ່ານຄິດວ່າເປັນຫຍັງເພິ່ນຈຶ່ງຮູ້ສຶກເຊັ່ນນັ້ນ? ທ່ານຮຽນຮູ້ຫຍັງແດ່ກ່ຽວກັບຜູ້ພະຍາກອນ ຈາກຖ້ອຍຄຳຂອງອຳໂມນ ຢູ່ໃນ ໂມໄຊຢາ 8:13–19?
ທຸກວັນນີ້, ເຮົາສະໜັບສະໜູນຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ວ່າເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ. ພວກເພິ່ນເປັນ “ປະໂຫຍດອັນຍິ່ງໃຫຍ່” ຕໍ່ທ່ານແນວໃດ? (ໂມໄຊຢາ 8:18). ພວກເພິ່ນໄດ້ສິດສອນທ່ານຫຍັງແດ່ກ່ຽວກັບພຣະເຢຊູຄຣິດ?
ທ່ານຈະສາມາດ, ເໝືອນດັ່ງອຳໂມນ, ກ່າວຢ່າງກ້າຫານກ່ຽວກັບຄວາມຈຳເປັນຕ້ອງມີສາດສະດາ, ຜູ້ພະຍາກອນ, ແລະ ຜູ້ເປີດເຜີຍແນວໃດ? (ເບິ່ງ ໂມໄຊຢາ 8:13–18). ຍົກຕົວຢ່າງ, ທ່ານສາມາດແບ່ງປັນຫຍັງແດ່ກັບຄອບຄົວຂອງທ່ານ ຫລື ກັບສື່ສັງຄົມກ່ຽວກັບ:
-
ຄວາມຈິງທີ່ໄດ້ຖືກຟື້ນຟູໃນວັນເວລາຂອງເຮົາໂດຍໂຈເຊັບ ສະມິດ ແລະ ສາດສະດາຄົນອື່ນໆຂອງພຣະຜູ້ເປັນເຈົ້າ (ດັ່ງເຊັ່ນ ລັກສະນະຂອງພຣະເຈົ້າ, ເອກກະລັກແຫ່ງສະຫວັນຂອງເຮົາ, ຫລື ລັກສະນະນິລັນດອນຂອງຄອບຄົວ). ການທົບທວນ “ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ” ຫລື “ຄອບຄົວ: ການປະກາດຕໍ່ໂລກ” (ຫ້ອງສະໝຸດພຣະກິດຕິຄຸນ) ອາດຊ່ວຍໃຫ້ທ່ານຄິດກ່ຽວກັບຄວາມຈິງບາງຢ່າງເຫລົ່ານີ້.
-
ພອນຂອງພຣະບັນຍັດ ຫລື ພິທີການ (ດັ່ງເຊັ່ນ ກົດພຣະວາຈາແຫ່ງປັນຍາ, ກົດພົມມະຈັນ, ຫລື ການຜະນຶກຄອບຄົວ).
ເດືອນແລ້ວນີ້, ພວກເຮົາໄດ້ຍິນຈາກສາດສະດາ, ຜູ້ພະຍາກອນ, ແລະ ຜູ້ເປີດເຜີຍຢູ່ໃນກອງປະຊຸມໃຫຍ່ສາມັນ. ຂ່າວສານໃດແດ່ທີ່ດົນໃຈທ່ານ? ທ່ານຈະເຮັດຫຍັງແຕກຕ່າງອີງຕາມສິ່ງທີ່ທ່ານໄດ້ຮຽນຮູ້? ຜູ້ພະຍາກອນຂອງພຣະຜູ້ເປັນເຈົ້າໄດ້ກ່າວຫຍັງກ່ຽວກັບ “ສິ່ງທີ່ຈະມາເຖິງ”? (ໂມໄຊຢາ 8:17).
ເບິ່ງ Gospel Topics, “Prophets,” ຫ້ອງສະໝຸດພຣະກິດຕິຄຸນ ນຳອີກ.
ເຮົາສາມາດປະເຊີນໜ້າກັບການທ້າທາຍຂອງເຮົາ “ໂດຍໄດ້ຮັບກຳລັງຈາກພຣະຜູ້ເປັນເຈົ້າ.”
ຊີນິບໄດ້ຍອມຮັບວ່າຄວາມຜິດພາດຂອງລາວໄດ້ເຮັດໃຫ້ຜູ້ຄົນຂອງລາວຕົກຢູ່ໃນສະຖານະການລຳບາກ. ແຕ່ຕໍ່ມາ, ລະຫວ່າງການເຮັດສົງຄາມກັບຊາວເລມັນ, ລາວໄດ້ຊ່ວຍໃຫ້ຜູ້ຄົນຂອງລາວປະເຊີນໜ້າກັບການທ້າທາຍຂອງພວກເຂົາດ້ວຍສັດທາໃນພຣະຜູ້ເປັນເຈົ້າ. ຂະນະທີ່ທ່ານອ່ານ ໂມໄຊຢາ 9–10, ໃຫ້ຊອກຫາສິ່ງທີ່ຜູ້ຄົນຂອງຊີນິບໄດ້ເຮັດ ເພື່ອສະແດງອອກເຖິງສັດທາຂອງພວກເຂົາ. ພຣະເຈົ້າໄດ້ເຮັດໃຫ້ພວກເຂົາເຂັ້ມແຂງແນວໃດ? ພຣະອົງໄດ້ເຮັດໃຫ້ທ່ານເຂັ້ມແຂງແນວໃດ? ມັນໝາຍຄວາມວ່າແນວໃດຕໍ່ທ່ານ ທີ່ທ່ານໄດ້ອອກໄປ “ໂດຍໄດ້ຮັບກຳລັງຈາກພຣະຜູ້ເປັນເຈົ້າ” (ໂມໄຊຢາ 9:17; 10:10–11).
ການເລືອກຂອງເຮົາສາມາດເປັນອິດທິພົນໃຫ້ຫລາຍລຸ້ນຄົນ.
ຂະນະທີ່ທ່ານອ່ານ ໂມໄຊຢາ 10:11–17, ໃຫ້ລະບຸວິທີທີ່ການກະທຳ ແລະ ທັດສະນະຂອງຄົນລຸ້ນຜ່ານມາຂອງຊາວເລມັນ ມີຜົນກະທົບຕໍ່ຄົນລຸ້ນຫລັງແນວໃດ. ສິ່ງນີ້ແນະນຳແນວໃດວ່າ ການເລືອກຂອງທ່ານອາດມີຜົນກະທົບຕໍ່ຄົນອື່ນ—ໃນທາງດີ ຫລື ບໍ່ດີ—ລວມທັງຜູ້ຄົນທີ່ຍັງບໍ່ໄດ້ເກີດເທື່ອ?
ໃຊ້ບົດຮຽນທີ່ໃຊ້ສິ່ງຂອງ. ບົດຮຽນທີ່ໃຊ້ສິ່ງຂອງເຮັດໃຫ້ການຮຽນຮູ້ສະໜຸກສະໜານ ແລະ ໜ້າຊົງຈຳ. ບາງທີການລຽງໂດມິໂນສາມາດສະແດງໃຫ້ເຫັນວ່າ ການເລືອກຂອງຜູ້ຄົນສາມາດສົ່ງຜົນກະທົບຕໍ່ລູກຫລານຂອງພວກເຂົາແນວໃດ (ເບິ່ງ ໂມໄຊຢາ 10:11–17).
ແນວຄິດສຳລັບການສິດສອນເດັກນ້ອຍ
ພຣະເຈົ້າໄດ້ຊ່ວຍຜູ້ຄົນໃນພຣະຄຳພີ, ແລະ ພຣະອົງສາມາດຊ່ວຍເຮົາເຊັ່ນກັນ.
-
ເມື່ອຜູ້ຄົນຂອງເພິ່ນມີບັນຫາ, ກະສັດລິມໄຮໄດ້ແບ່ງປັນຂໍ້ພຣະຄຳພີເພື່ອເສີມສ້າງສັດທາຂອງພວກເຂົາ. ຖາມລູກໆຂອງທ່ານກ່ຽວກັບເລື່ອງລາວ ຫລື ຜູ້ຄົນໃນພຣະຄຳພີ ທີ່ຊ່ວຍໃຫ້ພວກເຂົາມີສັດທາ. ແລ້ວທ່ານສາມາດອ່ານ ໂມໄຊຢາ 7:19 ເພື່ອເຕືອນພວກເຂົາ ແລະ ທົບທວນເລື່ອງລາວທີ່ກ່າວເຖິງຢູ່ໃນຂໍ້ນີ້ (ເບິ່ງ “ງານປັດສະຄາ” ແລະ “ຊາວອິດສະຣາເອນໃນຖິ່ນແຫ້ງແລ້ງກັນດານ” ໃນ ເລື່ອງພຣະຄຳພີເດີມ, 70–76). ບາງທີລູກໆຂອງທ່ານອາດຢາກສະແດງຕາມເລື່ອງ. ພຣະຜູ້ເປັນເຈົ້າຊ່ວຍຜູ້ຄົນໃນເລື່ອງເຫລົ່ານີ້ແນວໃດ? ພຣະອົງຊ່ວຍເຮົາແນວໃດ?
-
ສຳລັບຕົວຢ່າງເພີ່ມເຕີມເຖິງວິທີທີ່ພຣະຜູ້ເປັນເຈົ້າຊ່ວຍເຫລືອເຮົາ, ໃຫ້ເລືອກບາງຂໍ້ໃນ “ເລື່ອງພຣະຄຳພີມໍມອນ” ຫລື “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ເພື່ອຮ້ອງກັບລູກໆຂອງທ່ານ. ຊ່ວຍພວກເຂົາໃຫ້ລະບຸວິທີທີ່ພຣະຜູ້ເປັນເຈົ້າໄດ້ຊ່ວຍຜູ້ຄົນໃນພຣະຄຳພີມໍມອນ—ແລະ ວິທີທີ່ພຣະອົງສາມາດຊ່ວຍເຫລືອເຮົາແນວໃດ.
ພຣະເຈົ້າໄດ້ມອບສາດສະດາ, ຜູ້ພະຍາກອນ, ແລະ ຜູ້ເປີດເຜີຍໃຫ້ແກ່ເຮົາ.
-
ວິທີໜຶ່ງທີ່ຈະສິດສອນກ່ຽວກັບຜູ້ພະຍາກອນຄືການປຽບທຽບພວກເພິ່ນໃສ່ກັບສິ່ງທີ່ຊ່ວຍໃຫ້ເຮົາເຫັນແຈ້ງກວ່າເກົ່າ, ເຊັ່ນແວ່ນຕາ, ກ້ອງສ່ອງທາງໄກ, ຫລື ກ້ອງຈຸລະທັດ. ແລ້ວຂະນະທີ່ທ່ານອ່ານ ໂມໄຊຢາ 8:17 ໃຫ້ລູກໆຂອງທ່ານຟັງ, ພວກເຂົາສາມາດຍົກມືຂຶ້ນກວມຕາແບບສ່ອງກ້ອງທາງໄກ ທຸກເທື່ອທີ່ພວກເຂົາໄດ້ຍິນຄຳວ່າ “ຜູ້ພະຍາກອນ” (ເບິ່ງ ໂມເຊ 6:35–36 ນຳອີກ). ເວົ້າລົມນຳພວກເຂົາກ່ຽວກັບສິ່ງທີ່ພຣະຜູ້ເປັນເຈົ້າຊ່ວຍໃຫ້ສາດສະດາ “ເຫັນ” ສິ່ງທີ່ເຮົາບໍ່ສາມາດຫລຽວເຫັນ. ສາດສະດາ ຫລື ຜູ້ພະຍາກອນຂອງເຮົາ, ດັ່ງເຊັ່ນ ໂຈເຊັບ ສະມິດ, ໄດ້ເປີດເຜີຍຫຍັງແດ່ກັບເຮົາ?
-
ຫລັງຈາກການອ່ານ ໂມໄຊຢາ 8:16–18 ກັບລູກໆຂອງທ່ານ, ທ່ານສາມາດຊ່ວຍໃຫ້ພວກເຂົາຄິດຫາທາງທີ່ຈະປະກອບປະໂຫຍກໃຫ້ສົມບູນ ເຊັ່ນ ຜູ້ພະຍາກອນເປັນເໝືອນ … ຜູ້ຊ່ວຍເຮົາ … . ຍົກຕົວຢ່າງ, ຜູ້ພະຍາກອນເປັນເໝືອນປ້າຍທາງ ຜູ້ຊີ້ບອກເຮົາໄປຫາພຣະເຢຊູ.
-
ພວກທ່ານກໍສາມາດເຮັດເຈ້ຍຮອຍຕີນນຳອີກ ແລະ ເຊື້ອເຊີນລູກໆຂອງທ່ານໃຫ້ແຕ້ມຮູບໃສ່ໃນຮອຍຕີນເຫລົ່ານັ້ນ ເຖິງສິ່ງທີ່ສາດສະດາ, ຜູ້ພະຍາກອນ, ແລະ ຜູ້ເປີດເຜີຍໄດ້ແນະນຳເຮົາໃຫ້ເຮັດ. ວາງຮອຍຕີນເປັນເສັ້ນທາງຢູ່ຕາມຫ້ອງ, ແລະ ປ່ອຍໃຫ້ລູກໆຂອງທ່ານຍ່າງໄປຕາມຮອຍຕີນເຫລົ່ານັ້ນ. ຜູ້ພະຍາກອນສາມາດເປັນ “ປະໂຫຍດອັນຍິ່ງໃຫຍ່” ຕໍ່ເຮົາແນວໃດ? (ເບິ່ງ ໂມໄຊຢາ 8:17–18).
ເມື່ອເຮົາອ່ອນແອ, ພຣະຜູ້ເປັນເຈົ້າສາມາດເພີ່ມຄວາມເຂັ້ມແຂງໃຫ້ແກ່ເຮົາ.
-
ເມື່ອເດັກນ້ອຍປະເຊີນກັບການທ້າທາຍ, ບາງຄັ້ງພວກເຂົາຮູ້ສຶກອ່ອນແອ ແລະ ໝົດຫົນທາງ. ທ່ານຈະຊ່ວຍລູກໆຂອງທ່ານໃຫ້ເພິ່ງອາໄສພະລັງຂອງພຣະຜູ້ເປັນເຈົ້າແນວໃດ? ທ່ານສາມາດຖາມພວກເຂົາວ່າ ເຮົາເຮັດຫຍັງແດ່ເພື່ອຈະໄດ້ເຂັ້ມແຂງທາງຮ່າງກາຍ. ຄຳວ່າ “ກຳລັງຂອງມະນຸດ” ໝາຍຄວາມວ່າແນວໃດ? (ເບິ່ງ ໂມໄຊຢາ 10:11). ການມີ “ພະລັງຂອງພຣະຜູ້ເປັນເຈົ້າ” ໝາຍຄວາມວ່າແນວໃດ? (ເບິ່ງ ໂມໄຊຢາ 9:17–18; 10:10). ເຮົາຈະໄດ້ຮັບພະລັງຂອງພຣະຜູ້ເປັນເຈົ້າແນວໃດ? ລູກໆຂອງທ່ານສາມາດແຕ້ມຮູບກ່ຽວກັບສິ່ງທີ່ຊ່ວຍໃຫ້ພວກເຂົາໄດ້ຮັບພະລັງຂອງພຣະຜູ້ເປັນເຈົ້າ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Vision to Joseph Smith [ພາບນິມິດຕໍ່ໂຈເຊັບ ສະມິດ], ໂດຍ ຄະລາກ ແຄວລີ ພຣາຍສ໌