Alama tamaiti e ha’api’i ra i te ’ati Zorama

10–16 nō Tiunu : « ’Ua ’itea ānei ia ’outou teie tauira’a rahi i roto i tō ’outou na ’ā’au ? »

Alama 5–7

’Aita ’o Alama i ’ite i te tāpūra’a māfatu fa’aora ta’ata o teie tau, nō tē mono i te māfatu ’ino ’e ’aore rā te māfatu ma’ima’i i te hō’ē māfatu maita’i. ’Ua ’ite rā ’oia i te « tauira’a o [te] ’ā’au » fa’ahiahia atu ā (Alama 5:26)—e tauira’a i reira te Fa’aora e hōro’a mai ai i te tahi orara’a ’āpī i te pae vārua, mai te huru ra ē ’ua « fānau-fa’ahou-hia » (hi’o Alama 5:14, 49). ’Ua ti’a roa ia Alama i te ’ite ē, ’o te tauira’a ’ā’au teie e tītauhia ra i te mau ’āti Nephi e rave rahi. Te hō’ē pae e mau ta’ata tao’a rahi, ’e te tahi pae e mau ta’ata veve, te hō’ē pae e mea te’ote’o ’e te tahi pae e mea ha’eha’a, te hō’ē pae e hāmani ’ino ra ’e te tahi pae tei raro a’e i te hāmani-’ino-ra’a (hi’o Alama 4:6–15). ’Ua tītauhia rā ia rātou pā’āto’a ’ia haere mai ia Iesu Mesia ’ia fa’aorahia rātou—mai ia tātou pā’āto’a nei. Tē ’imi ra tātou i te upo’oti’a i ni’a i te te’ote’o ra, ’e ’aore rā tē fa’a’oroma’i ra tātou i te mau ’ati ra, hō’ē ā poro’i tā Alama : « ’A haere mai ’e ’eiaha e mata’u » (Alama 7:15). Vaiiho ana’e i te Fa’aora ’ia taui i te ’ā’au ’eta’eta ’e te hara rahi ’e ’aore rā te ’ā’au pēpē, ’ei ’ā’au ha’eha’a ’e te mā ’e te ’āpī.

Mana’o nō te ’apo i te ha’api’ira’a i te ’utuāfare ’e i te fare purera’a

Alama 5:14–33

Tītau-roa-hia ’ia ’ite au i te tahi tauira’a rahi o te ’ā’au—’e ’ia tāmau noa i te reira.

’Ua fa’ata’a te peresideni M. Russell Ballard : « E tītauhia iā’u ’ia rave tāmau māite i te taime nō te ui iā’u iho ē, ‘E aha tō’u huru ?’ […] Mai te hō’ē arata’i nō’u i roto i te reira hi’opo’ara’a ’ōmo’e nō’u iho, e mea au nā’u ’ia tai’o ’e ’ia feruri hōhonu i te mau parau ha’aferuri e ’itehia i roto i te pene pae a Alama » (« ’Ia ho’i ’e ’ia fāri’i », Liahona, Mē 2017, 64).

E tai’o i te Alama 5:14–33 mai te huru ra ē, tē uiui ra ’oe ia ’oe iho ’e tē hi’opo’a ra i tō ’oe iho ’ā’au. E hinaʼaro paha ʼoe e pāpa’i i tā ’oe mau pāhonora’a i teie mau uira’a. E aha te mea tā ’oe i ’apo mai nō ni’a ia ’oe iho ? E aha tā ’oe e mana’o ra e taui i roto i tō ’oe orara’a i muri iho i tā ’oe uiuira’a ?

Hi’o ato’a ia Dale G. Renlund, « Te tāpe’ara’a i te tauira’a pūai o te ’ā’au », Liahona, Nov. 2009, 97–99.

ʼIa fāriu anaʼe tātou i te Atua ra, e ’ite tātou i te tahi « tauiraʼa o te ʼāʼau. »

Alama 5:44–51

E ti’a iā’u ’ia noa’a tō’u iho ’itera’a pāpū nō te Fa’aora ’e nō tāna mau ha’api’ira’a nā roto i te Vārua Maita’i.

I roto i te Alama 5, ’a fa’ata’a ai ’o Alama e mea nāhea tōna ’itera’a pāpū i te noa’ara’a, nō ni’a i te Fa’aora, ’aita ’oia i fa’ahiti i tōna ’itera’a i te hō’ē melahi (hi’o Mosia 27:10–17). ’Ua nāhea Alama i te ’itera’a ’ōna iho i te parau mau ? Pēnei a’e e nehenehe ’oe e fa’a’ohipa i te mea i ’itehia i roto i te Alma 5:44–51 nō te pāpa’i i te hō’ē « fa’anahora’a » ’ia noa’a te ’itera’a pāpū nō Iesu Mesia ’e tāna mau ha’api’ira’a. E aha « te mau mea e ’āno’ihia » (te mau parau mau o te ’evanelia) ’e te mau « arata’ira’a » (te mau mea tā tātou e nehenehe e rave nō te ’imi i te parau mau) tā Alama i fa’a’ohipa ? E aha « te mau mea e ’āno’ihia » ʼe te mau « ʼarataʼiraʼa » tā ’oe e tuʼu atu ’ia au i tā ’oe iho mau ’ohipa i rave, ’aore rā tā te ta’ata i rave i roto i te mau pāpa’ira’a mo’a ?

Alama 7

« ’Ua ’ite ho’i au ē, tei ni’a ’outou i te e’a nō te parauti’a. »

I te tahi mau taime e au tātou mai te mau ta’ata i Zarahemela, tei tītauhia ’ia pi’i ’ia tātarahapa (hi’o Alama 5:32). I te tahi atu mau taime, e au tātou mai te nūna’a nō Gideona, ’o tei ’imi i te rāve’a ’ia haere nā ni’a i « te mau ’ē’a nō te parauti’a » (Alama 7:19). E aha tē ’itehia i roto i te poro’i a Alama i tō Gidona (i roto Alama 7) tei tū’ati i te poro’i tāna i hōro’a atu i Zarahemela (i roto Alama 5) ? E aha te mau ’ohipa ta’a ’ē tā ’oe e ’ite ra ? ’A ’imi i te mau mea tā Alama i ha’api’i tei nehenehe e tauturu ia ’oe ’ia vai noa i ni’a « i te ’ē’a e tae atu ai i te bāsileia o te Atua » (Alama 7:19).

Alama 7:7–16

’Ua rave te Fa’aora i ni’a iāna i tā’u mau hara, te mau māuiui ’e te mau ’ati.

’Ua māna’ona’o a’enei ’oe ē, ’aita te ta’ata e ta’a ra i tō ’oe mau fifi ’e ’aore rā tō ’oe mau tāfifira’a ? Mai te mea ē ’ē, e tauturu ïa te mau parau mau tā Alama i ha’api’i. ’A tai’o ai ’oe, ’a feruri e aha tā teie mau ’īrava e ha’api’i mai nei nō ni’a i te mau fā o te fa’atusiara’a a te Fa’aora. ’A hāmani i te hō’ē tāpura ’e te mau upo’o parau E aha tā te Fa’aora i mamae ’e Nō te aha ’oia i mamae ai ’e ’ia tāpura i te mea tā ’oe e ’ite ra i roto i te Alama 7:7–16 (hi’o ato’a Isaia 53:3–5). E ti’a ānei ia ’oe ’ia feruri i te tahi taime pāpū i te mamaera’a ’oia i teie mau mea nei ? Teie te tahi mau hi’ora’a nō roto mai i te pāpa’ira’a mo’a : Mataio 4:1–13 ; 26:55–56 ; 27:39–44 ; Mareto 14:43–46 ; Luka 9:58. E mea ānei tā ’oe e nehenehe e tu’u i ni’a i tā ’oe tāpura mai roto mai i teie mau ’īrava ?

E mea maita’i ’ia ’ite ē ’ua mamae te Fa’aora nō ’oe. Terā rā, e nāhea pa’i tōna mamae i te fa’atupu i te hō’ē ta’a-’ē-ra’a i roto i tō ’oe orara’a i te mau mahana ato’a ? Teie te tahi mau ’īrava e fa’a’ite nei nāhea Iesu Mesia e nehenehe ai e tauturu ’e ’aore rā e « fa’aora » ia ’oe : Enosa 1:5–6 ; Mosia 16:7–8 ; 24:14–15 ; 3 Nephi 17:6–7 ; Etera 12:27–29 ; Te Ha’api’ira’a Tumu ’e te mau Fafaura’a 121:7–10. E aha te ha’api’ira’a tā ’oe i ’apo mai i roto i teie mau ’īrava ? E aha te tahi atu ā mau rāve’a ’oia e tauturu ai ia ’oe ? E aha te taime i ’ite ai ’oe i tāna tauturu ?

E nehenehe te hīmene mai teie « Hina’aro vau ia ’oe » ’e ’aore rā « ’Ua ’ite au tē ora nei tō’u Fatu » (Te mau hīmene, N°50, 69) e fa’ahōhonu i tō ’oe mauuruuru i te hōturu a te Fa’aora. E aha te mau ’īrava i roto i teie nā hīmene e fa’a’ite nei i tō ’oe mau mana’o nō ni’a iāna ?

Hi’o ato’a « His Grace [Tōna maita’i rahi] » (video), Vaira’a buka ’evanelia.

Parau pāpū nō Iesu Mesia. ’A feruri i te mau rāve’a e nehenehe ai ia ’oe ’ia fa’a’ite i tō ’oe ’itera’a pāpū nō te Fa’aora ’e tōna atuara’a, tōna maita’i rahi, ’e tōna here. E nehenehe ’oe e fa’aitoito i te feiā ’o tā ’oe e ha’api’i nei ’ia parau pāpū nōna ra nā roto i te uira’a ia rātou i te mau uira’a e tūra’i ia rātou ’ia fa’a’ite i tō rātou mana’o nō ni’a iāna.

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.

Mana’o nō te ha’api’i i te tamari’i

Alama 5:44–48

E roa’a tō’u iho ’itera’a pāpū nā roto i te Vārua Maita’i.

• Nō te tauturu i tā ’oe mau tamari’i i te fa’ahotu i tō rātou iho ’itera’a pāpū, ’a fa’a’ite ia rātou i te hōho’a i raro nei ’e ’a ui atu ia rātou e nāhea tātou i te tauturu i te mau fanau’a ’ānimara. I muri iho e ha’atū’ati i te reira i te ’atu’atura’a i tō tātou ’itera’a pāpū. E aha te ’atu’atura’a tei tītauhia nō tō tātou ’itera’a pāpū ? Nāhea tātou e ’ite ai ē, tē tupu ra i te rahi ?

  

  ’Ia fāri’i ana’e tātou i te ’evanelia, e au ïa mai te ha’amatara’a i te hō’ē orara’a ’āpī.

• Mea nāhea tō Alama fāri’ira’a i tōna ’itera’a pāpū pūai nō Iesu Mesia ? E nehenehe e tai’o i te Alama 5:44–46 ’e tā ’oe mau tamari’i nō te ’imi i te mau pāhonora’a i teie nei uira’a. Pēnei a’e e nehenehe tā ’oe mau tamari’i e pāpa’i i te tahi ’ōpuara’a e rave i te tahi mea i teie hepetoma nō te ha’apa’ari i tō rātou ’itera’a pāpū.

Te mau pou ’e te mau hihi

Tē ha’api’i nei Elder Dushku ia tātou ē, e mea varavara te mau ’ohipa fa’ahiahia i orahia i te pae vārua ’e e hōro’a mai iho ā te Fatu ia tātou i te hō’ē hihi māramarama i te hō’ē ā taime.

Alama 7:10–13

’Ua rave te Fa’aora i ni’a iāna iho i tā’u mau hara, tō’u mau māuiui ’e tō’u mau ’ati.

• E nāhea ’oe e tauturu i tā ’oe mau tamari’i i te hāro’aro’a i te Alama 7:10–13 ’ia ’ite rātou ē, tē māna’ona’o nei Iesu Mesia ia rātou ’e e nehenehe ’oia e tauturu ia rātou ? Pēnei a’e e nehenehe e ani i te mau tamari’i ’ia fa’a’ite mai i te hō’ē taime ’ua ma’ihia rātou ’e ’aore rā, ’ua māuiui ai ’e ’aore rā, ’ua fa’aruru i te tahi fifi tei fa’atupu i tō rātou ’oto. ’Ua nāhea vetahi ’ē i te tauturura’a ia rātou ’ia maita’i ā ? ’A fa’a’ite i tō ’oe ’itera’a pāpū ē, ’ua mamae ato’a te Fa’aora i teie mau mea, ’e ’a fa’ati’a i te hō’ē taime ’ua tāmāhanahana ’e ’ua tauturu ho’i ’oia ia ’oe.

• ’Ia tai’o ’oe e te mau tamari’i i te Alama 7:11–13, ’a ’imi i te mau mea tā Iesu Mesia i mamae nō tātou. ’A ani i tā ’oe mau tamari’i ’ia fa’a’ohipa i te mau ta’o ’e te mau parau tei ’itehia e rātou nō te fa’aī i teie parau : « ’Ua mamae ’o Iesu i ’ia ti’a iāna ’ia tauturu mai iā’u. » Tē nāhea ra te reira i te tauturu ia tātou ’ia ’ite ē ’ua ta’a ia Iesu tō tātou mau fifi ? E nāhea tātou i te fari’i i tāna tauturu ? ’A fa’a’ite i tō ’oe ’itera’a pāpū nō Iesu Mesia.

Alama 5:14 ; 7:19–20

Maoti tō’u pe’era’a ia Iesu Mesia e vai noa ai au i ni’a i te ’ē’a ’āfaro nō te ho’i i te Metua i te ao ra.

• ’A vaiiho i tā ’oe mau tamari’i ’ia māta’ita’i i roto i te hi’o ’a tai’o ai ’oe i te Alama 5:14 (hi’o ato’a i te ’api fa’a’ana’anataera’a nō teie hepetoma). E aha te aura’a ’ia noa’a te hōho’a o te Fa’aora i roto i tō ’oe na mata ?

• Nāhea ’oe e fa’a’ohipa ai i te fa’a’itera’a a Alama nō te ’ē’a ho’ira’a i te Metua i te ao ra, nō te tauturu i te mau tamari’i ’ia ha’api’i ia rātou i te rave i te mau mā’itira’a maitata’i ? E nehenehe ’oe e tai’o i te Alama 7:19–20 ia rātou ’e ’ia vaiiho ia rātou ’ia ha’uti ta’ata ora i te haerera’a « nā te mau ’ē’a pi’o » ’e te haerera’a nā ni’a i te hō’ē ’ē’a ’āfaro. ’A tauturu ia rātou ’ia feruri i te mau mā’itira’a ’o tē tauturu ia tātou ’ia fa’aea i ni’a i te ’ē’a, ’e te tahi atu ā ’o tē fa’ahahi ’ē ia tātou i te ’ē’a. E nehenehe ato’a e hi’o ’āmui i te mau hōho’a nō Iesu ’e ’ia paraparau nō ni’a i te mau mea tāna i rave nō te fa’a’ite ia tātou i te ’ē’a nō te ho’i atu i te Metua i te ao ra. E hōro’a mai te hō’ē hīmene mai ia « Jésus Christ est mon modèle » (Chants pour les enfants, 40–41) i te tahi mau mana’o.

Nō te tahi atu ā mana’o, ’a hi’o i te ve’a Hoa nō teie nei ’āva’e.

Our Advocate [Tō tātou pāruru], nā Jay Bryant Ward