« 17–23 nō Tiunu : ‘E haere mai Iesu Mesia nō te fa’aora i tōna ra mau ta’ata.’ Alama 8–12 », Mai, pe’e mai—Nō te ’utuāfare ’e te fare purera’a : Buka a Moromona 2024 (2024)
« 17–23 nō Tiunu. Alama 8–12 », Mai, pe’e mai—Nō te ’utuāfare ’e te fare purera’a : 2024 (2024)
Teaching True Doctrine [Ha’api’i i te ha’api’ira’a tumu mau], nā Michael T. Malm
17–23 nō Tiunu : E haere mai Iesu Mesia nō te fa’aora i tōna ra mau ta’ata
Alama 8–12
E’ita te ’ohipa a te Atua e manuia ’ore. Terā rā, i te tahi taime, mai te huru ē, tē manuia ’ore ra tā tātou tauto’ora’a nō te tauturu i tāna ’ohipa—’aita paha tātou e ’ite ra i tei tīa’ihia ra i reira ra, terā a’e. Mai ia Alama ri’i paha tō tātou mana’o i te porora’a ’oia i te ’evanelia i tō Amoniha—’ua pāto’ihia, ’ua tūtuhahia ’e ’ua tīahihia ’oia. ’Āre’a rā, i te fa’auera’a te melahi iāna ’ia ho’i fa’ahou ’e ’ia tūtava ā, ’ua fa’aitoito ’o Alama ’e ’ua « ho’i ’oi’oi atu ra ’oia » (Alama 8:18), e ’ua fa’aineine te Atua i te ’ē’a i mua iāna. ’Aita ’oia i fa’afāna’o noa i te mā’a ’ia tāmā’a ’o Alama ’e i te vāhi e fa’aea ai ’oia, ’ua fa’aineine ato’a rā ’oia ia Amuleka, tei riro mai ’ei hoa tāvini nōna, ’ei pāruru pūai nō te ’evanelia ’e ’ei hoa ha’apa’o maita’i ho’i. ’Ia fa’aruru ana’e tātou i te mau taupupūra’a ’e te mau ha’aparuparura’a mana’o i te tāvinira’a i roto i te bāsileia o te Fatu, e nehenehe tātou e ha’amana’o ’ua nāhea te Atua i te turura’a ’e i te arata’ira’a ia Alama, ’e e nehenehe tātou e tu’u i tō tātou ti’aturi ē, e turu ato’a mai te Atua ’e e arata’i mai ’oia ia tātou, noa atu ā tō tātou mau fifi.
Mana’o nō te ’apo i te ha’api’ira’a i te ’utuāfare ’e i te fare purera’a
Tā’u mau tauto’ora’a nō te fa’a’ite i te ’evanelia a Iesu Mesia, e tītau te reira i te fa’a’oroma’i.
’Ua tāmata a’enei ’oe i te fa’a’ite i te ’evanelia a Iesu Mesia i te tahi ta’ata, terā rā ’ua pāto’ihia tā ’oe anira’a ? ’Ua fa’aruru ato’a ’o Alama i teie huru ’ohipa. E aha tā ’oe i ’apo mai, mai roto mai iāna, i roto i te Alama 8:13–16 nō ni’a i te fa’a’itera’a i te ’evanelia noa atu ā te mau fifi ’e te pāto’ira’a ? ’A tāmau noa i te tai’o i te mau ’īrava 17–32, ’e ’a ’imi i te mau parau ’o tei fa’auru ia ’oe ’ia tāmau noa i te fa’a’ite i te ’evanelia, noa atu ē, ’aitā ’oe e manuia ra.
E mau ’ite ta’a ’ē te mau peropheta ’e te mau ’āpōsetolo nō te Mesia, nō reira e rave rahi parau a’o fa’auru tā rātou nō ni’a i te parau-pāpū-ra’a nōna. ’A hi’o e aha tā Elder Dieter F. Uchtdorf i parau i roto i te « Terā rā, ’āhiri ē, e mea ’ohipa rahi ? » (e tuha’a i roto « ’Ohipa misionare : Fa’a’itera’a i te mea i roto i tō ’outou ’ā’au », Liahona, Mē 2019, 18) ’e ’aore rā tā Elder Gary E. Stevenson i fa’a’ite mai i roto « Here, fa’a’ite, ani manihini », (Liahona, Mē 2022, 84–87). E aha tā ’oe e ’ite ra i reira ’o tē nehenehe e tauturu i te ta’ata e ha’amata ra i te paruparu nō ni’a i te fa’a’itera’a i te ’evanelia ?
Nāhea ’oe e ha’apotopoto ai i te mau mea ato’a tā ’oe i tuatāpapa i’ō nei nā roto i te hō’ē ’e ’aore rā e piti parau fa’aitoitora’a nō ni’a i te fa’a’itera’a i te ’evanelia ? E hamani i te tahi hōho’a pia ’e ’aore rā i te tahi hōho’a « meme » ’o tē fa’auru ia ’oe (’e vetahi ’ē) ’ia fa’aitoito i te tūtavara’a.
Hi’o ato’a « Tauturu mai na iā’u nei », Te mau hīmene, N°131 ; « Alma Is Commanded by an Angel to Return to Ammonihah [’Ua fa’auehia ’o Alama e te hō’ē melahi ē ’ia ho’i i Amoniha] » (video), Vaira’a buka ’evanelia.
Te mau haʼamaitaʼiraʼa a te Atua, e tae mai ïa ma te hōpoi’a rahi.
’Ia tai’ohia te huru o te mau ’āti Nephi nō Amoniha i ni’a i te mau tāvini a te Fatu, e mea ’ōhie roa ’ia ha’amo’e ē, e feiā ha’apa’o rātou i te ’evanelia i muta’a ra, « e feiā ha’amaita’i-rahi-hia e te Fatu » (Alama 9:20). ’Ia tai’o ’oe i te mau ha’amaita’ira’a rahi tā te Atua i hōro’a i te nūna’a o Nephi (hi’o ta’a ’ē i te Alama 9:14–23), ’a feruri i te mau ha’amaita’ira’a rahi tāna i hōro’a nā ’oe. E aha te mau hōpoi’a tei tuea i teie mau ha’amaita’ira’a ? E aha tā ’oe e rave ra ’ia mau pāpū noa ’oe i teie mau ha’amaita’ira’a ?
Hi’o ato’a Te Ha’api’ira’aTumu ’e te mau Fafaura’a 50:24 ; 82:3 ; 93:39.
Te ’ōpuara’a a te Atua, e ’ōpuara’a ïa nō te fa’aorara’a.
I roto i te Alama 11–12, ’ua fa’ahiti Alama rāua ’o Amuleka i te fa’anahora’a a te Atua ’ei ’ōpuara’a nō te fa’aorara’a. ’Ia tai’o ’oe i teie mau pene, ’a feruri nō te aha te ta’o ora i fa’a’ohipahia ai nō te fa’anaho i te parau nō te rāve’a fa’aorara’a a te Atua. E pāpa’i i te tahi pū’ohura’a parau nō tā Alama rāua ’o Amuleka i ha’api’i nō ni’a i te mau tuha’a o te ’ōpuara’a :
-
Te Hi’ara’a
-
Te Tāra’ehara
-
Tātarahapara’a
-
Pohe
-
Ti’afa’ahoura’a
-
Ha’avāra’a
’A hi’o na i tā te mau parau a Amuleka i fa’atupu i ni’a i te ta’ata (hi’o Alama 11:46). E aha te ’ohipa i ni’a ia ’oe, te ’itera’a i te ’ōpuara’a a te Atua ?
Hi’o ato’a Dallin H. Oaks, « Te fa’anahora’a rahi », Liahona, Mē 2020, 93–96 ; « Amulek Testifies of Jesus Christ [Tē fa’a’ite pāpū nei Amuleka nō Iesu Mesia] » (video), Vaira’a buka ’evanelia.
Mai te peu e’ita vau e fa’a’eta’eta i tō’u ’ā’au, e ti’a ïa iā’u ’ia fāri’i hau atu ā i te parau a te Atua.
E uiui vetahi ē, nō te aha ’aita te Metua i te ao ra e fa’a’ite ia tātou i te mau mea ato’a. I roto i te Alama 12:9–14, ’ua fa’ata’a ’o Alama i te tahi tumu. E nehenehe teie mau uira’a e tauturu ia ’oe ’ia feruri i te mea tāna i ha’api’i :
-
E aha te aura’a e fa’a’eta’eta i tō tātou ’ā’au ? E aha te mau fa’ahope’ara’a nō te fa’a’eta’etara’a i te ’ā’au ? (hi’o ato’a Alama 8:9–11 ; 9:5, 30–31 ; ’e 10:6, 25).
-
E aha tā ’oe e nehenehe e rave nō te fa’afāriu i tō ’oe ’ā’au i ni’a i te Atua ? (hi’o Ieremia 24:7 ; Alama 16:16 ; Helamana 33:35).
-
E aha tā ’oe e nehenehe e rave nō te ha’apāpū ē e ’itehia te parau a te Atua i roto ia ’oe ? (Alama 12:13). Mai te peu tei roto ia ’oe te parau a te Atua, e aha te hope’ara’a i ni’a i tā ’oe « mau parau », « mau ’ohipa », ’e « mau mana’o » ? (Alama 12:14).
E aha tā te ’ohipa i tupu nō Amuleka e ha’api’i nei ia ’oe nō ni’a i te mau ha’amaita’ira’a nō te vaira’a te ’ā’au marū ? (hi’o Alama 10:1–11).
Hi’o ato’a « Alma Warns Zeezrom [Te a’o ra ’o Alama ia Zeezeroma] » (video), Vaira’a buka ’evanelia.
Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.
Mana’o nō te ha’api’i i te tamari’i
E ti’a iā’u ’ia fa’a’ite i te ’evanelia a Iesu Mesia.
-
E nehenehe te ’api fa’a’ana’anataera’a nō teie hepetoma e tauturu ia ’oe ’ia ha’apoto i te mau ’ohipa i tupu i roto i te Alama 8–10 nō tā ’oe mau tamari’i. ’A tauturu ia rātou ’ia ’imi i te mau parau tumu tē fa’ariro ia Alama raua o Amuleka ’ei misiōnare maita’i roa. ’Ei hi’ora’a, ’aita rāua i fa’aru’e (hi’o Alama 8:8–13), ’ua fa’a’ite pāpū rāua nō te Mesia (hi’o Alama 9:26–27), ’e ’ua ’ohipa ’āmui rāua (hi’o Alama 10:12).
-
Pēnei a’e i te tahi hīmene nō ni’a i te ’ohipa misiōnare, mai « Je voudrais déjà partir en mission » (Chants pour les enfants, 90), e noa’a i tā ’oe mau tamari’i te tahi mau rāve’a nō te fa’a’ite i te ’evanelia i tō rātou mau hoa. E ani ia rātou ’ia tāpura i te mau mana’o tei noa’a mai ia rātou, nā reira ato’a te mau ta’ata tei nehenehe ia rātou ’ia fa’a’ite atu i te ’evanelia. E vaiiho ia rātou ’ia ha’uti ta’ata ora i te mea tā rātou e parau atu ’e ’aore ra ’o tā rātou e rave atu.
Fa’aitoito ia rātou ’ia fa’aō mai i roto i te ha’api’ira’a. ’A fa’aineine ai ’oe nō te ha’api’i, ’eiaha e fa’aineine i te mau mea e parau, ’a ui rā ia ’oe iho : « E aha tā te mau tamari’i e rave nō te ’apo mai i te ha’api’ira’a ? » E ha’api’i maita’i roa atu te mau tamari’i ’e e ha’amana’o maoro a’e rātou, ’ia fa’aō pāpū mai rātou i roto i te ha’api’ira’a.
Te ’ōpuara’a a te Atua, e ’ōpuara’a ïa nō te fa’aorara’a.
-
Pēnei a’e e nehenehe tā ’oe mau tamari’i e pāpa’i i te tahi hōho’a e fa’ahōho’a ra i te mau parau tumu o te fa’anahora’a nō te fa’aorara’a, mai te hi’ara’a o Adamu rāua ’o Eva, te tāra’ehara a Iesu Mesia, te tātarahapara’a, te pohe, te ti’afa’ahoura’a, ’e te ha’avāra’a. I reira e nehenehe ’outou e tauturu atu ia rātou i te ha’atueara’a i tā rātou mau hōho’a i te mau ’īrava i roto ia Alama 11–12 tei ha’api’i mai i teie mau parau tumu.
E nehenehe au e riro ʼei hoa maita’i.
-
’A ani i te hō’ē tamari’i ’ia fa’ahua ē ’o Amuleka ’oia, ’e te tahi fa’ahou tamari’i ’ia fa’ahua ē ’o Alama ’oia, ’a fa’ati’a ai i te ’ā’amu i roto ia Alama 8:18–22. Mai te aha te huru e hoa maita’i ’o Amuleka nō Alama ? I muri mai e nehenehe tā ’oe mau tamari’i e fa’a’ite mai e mea nāhea te hō’ē ta’ata i te rirora’a mai ’ei hoa nō rātou, ’e e aha tā te reira i fa’atupu i roto ia rātou.
-
Pēnei a’e e nehenehe ’oe e hāmani i te hō’ē piriapu nō te auhoara’a : e ’imi ’e ’aore rā e pāpa’i i te tahi hōho’a nō te fa’ahōho’a i te auhoara’a ’e e tāpūpū i te reira ’ei tuha’a piriapu. I muri i te tuha’a tāta’itahi, e pāpa’i i te hō’ē mea tā tātou e nehenehe ’ia rave ’e ’ia riro ’ei hoa maita’i, mai te mau mea tā Alama raua ’o Amuleka i rave. E ani i tā ’oe mau tamari’i, te tahi i muri mai i te tahi, ’ia mā’iti i te hō’ē tuha’a, ’e ’ia tu’u atu i te reira i roto i te piriapu ’a tai’o ai ’oe i te mea i pāpa’ihia i muri. ’O vai tei hina’aro i tō’u fa’ahoara’a ?
E nehenehe tātou e riro ’ei hoa maita’i nō vetahi ’ē.
Maoti Iesu Mesia, e ti’afa’ahou ā vau.
-
’A feruri i te hō’ē ha’api’ira’a tao’a mai teie te huru, nō te ha’api’i nō ni’a i te Ti’afa’ahoura’a : e nehenehe te rima e fa’ahōho’a i te vārua, ’e te hō’ē rimarima, te tino. ’A tātara i te rima i rāpae i te rimarima nō te fa’a’ite i te mau tamari’i ē, e fa’ata’a-’ē-hia tō tātou vārua ’e tō tātou tino i te pohera’a. I muri iho e tu’u fa’ahou i tō ’oe rima i roto i te rimarima nō te fa’a’ite ē, e ’āmui-fa’ahou-hia tō tātou vārua ’e tō tātou tino i te Ti’afa’ahoura’a. Vaiiho i te mau tamari’i, te tahi i muri mai i te tahi, ’ia ’ō’omo i te rimarima ’e ’ia tātara, ’a tai’o ai ’oe i te Alama 11:43 ia rātou. Fa’a’ite i te hōho’a o te Fa’aora tei ti’afa’ahou (hi’o Buka hōho’a nō te ’evanelia, n°59), ’e parau pāpū ē, ’aua’a a’e Iesu Mesia e nehenehe ai te mau ta’ata ato’a ’ia ti’afa’ahou.
Nō te tahi atu ā mana’o, ’a hi’o i te ve’a Hoa nō teie nei ’āva’e.
Fa’ahōho’ara’a nō te tāmā’ara’a Alama ia Amuleka ra, nā Dan Burr