Fa’ahōho’ara’a nō Alama ’e ’o Amuleka tei fa’aorahia i te fare tāpe’ara’a, nā Andrew Bosley

24–30 nō Tiunu : « Tomo atu i roto i te fa’aeara’a o te Fatu »

Alama 13–16

E nehenehe e parau ē e orara’a maita’i tō Amuleka ’e tō Zeezeroma i Amoniha. E « ta’ata ro’o rahi » ’o Amuleka, « e rave rahi [tōna] fēti’i ’e mau hoa » ’e « ’ua fāri’i [’oia] i te mau tao’a rahi » (Alama 10:4). E auvaha ture ’aravihi Zeezeroma ’e e « ’ohipa rahi » tāna (Alama 10:31). Tae mai nei Alama i Amoniha ma te tītaura’a hanahana ’ia tātarahapa ’e ’ia « tomo atu i roto i te fa’aeara’a o te Fatu » (Alama 13:16). Nō Amuleka, nō Zeezeroma ’e nō te tahi mau pu’era’a, nō te fāri’i i teie anira’a, ’ua tītauhia te fa’atusiara’a ’e ’ua fa’aruru roa ato’a i te ’ati rahi fātata e’ita e nehenehe e amo.

’Aita rā te ’ā’amu e hope i reira. I roto i te Alama 13–16, tē ha’api’i nei tātou e aha tē tupu i te hope’a nō te feiā e ti’aturi i « te mana o te Mesia e tae atu ai i te fa’aorara’a » (Alama 15:6). I te tahi taime tē vai ra te fa’aorara’a, te tahi taime te ora mai te māuiui—’e i te tahi taime ’aita e maita’ira’a. Te mea tāmau rā, « e fāri’i mai te Fatu [i tōna mau ta’ata] iāna ra i roto i te hanahana » (Alama 14:11). E mea tāmau, e hōro’a tāmau noa te Fatu i te « mana ia [tātou], mai te au i tō [tātou] fa’aro’o i te Mesia » (Alama 14:28). ’E te mea tāmau, e hōro’a mai te reira fa’aro’o i « te ti’aturi e fāri’i [tātou] i te ora mure ’ore » (Alama 13:29). ’Ia tai’o ’oe i teie mau pene, e tāipu ’oe i te tāmāhanahanara’a i roto i teie mau parau fafau ’e e riro paha ’oe i te māramarama maita’i a’e i tā Alama i parau ’a parau ai ’oia nō te tomora’a i roto i te « fa’aeara’a o te Fatu. » (Alama 13:16).

Mana’o nō te ’apo i te ha’api’ira’a i te ’utuāfare ’e i te fare purera’a

Alama 13:1–19

Tē fa’atoro nei te mau ’ōro’a o te autahu’ara’a iā’u i ni’a ia Iesu Mesia nō te tāra’ehara.

Tē fa’a’ite mai nei te mau parau a Alama i roto i te Alama 13 i te mau parau mau pūai nō ni’a i te mana autahu’ara’a a te Atua ’e tō te reira ’ōpuara’a—nō te fa’aineine ia tātou ’ia tomo i roto i « te fa’aeara’a o te Fatu », ’oia ho’i te ora mure ore (Alama 13:16). Pēnei a’e e nehenehe ’oe e pāpa’i i te hō’ē a’e parau mau i roto i te ’īrava tāta’itahi o te Alama 13:1–9. Teie te tahi mau mana’o nō te ha’amata :

’Īrava 1.’Ua pi’i-ato’a-hia te autahu’ara’a « te fa’anahora’a a [te Tamaiti a te Atua] » (hi’o ato’a Te Ha’api’ira’a Tumu ’e te mau Fafaura’a 107:1–4

’Īrava 2.Tē fa’atōro’a nei te Atua i te mau tahu’a nō te tauturu i te mau ta’ata ’ia hi’o i ni’a i tāna Tamaiti nō te fa’aorara’a.

E aha atu ā tā ’oe e ’ite ra ? E aha tō ’oe mana’o nō ni’a i te autahu’ara’a ’ia feruri ’oe i teie mau parau mau ?

’Ua feruri a’enei ’oe i te mau ’ōro’a o te ’autahu’ara’a ’ei hōro’a nō ’ō mai i te Atua ra, nō te tauturu ia ’oe ’ia « hi’o atu i tāna ra Tamaiti nō te fa’aorara’a » ? (’īrava 2 ; hi’o ato’a ’īrava 16). Pēnei a’e e nehenehe ’oe e fa’anaho mai i te hō’ē tāpura nō te mau ’ōro’a tā ’oe i fāri’i, mai te bāpetizora’a, te ha’amaura’a, te ’ōro’a mo’a, te fa’ata’ara’a nō te hō’ē pi’ira’a, te hō’ē ha’amaita’ira’a tāmāhanahana ’e ’aore rā nō te ma’i, te hō’ē ha’amaita’ira’a patereareha, ’e te mau ōro’a o te hiero. ’A feruri i tō ’oe ’itera’a nō ni’a i te mau ’ōro’a mai teie te huru. ’A feruri i te mau tāpa’o i roto i te reira, ’e te Nāhea teie mau ’ōro’a tāta’itahi i te fa’atoro ia ’oe i ni’a ia Iesu Mesia nō te tāra’ehara ?

Tē ti’aturi hape nei te tahi mau ta’ata ē te mau ’ōro’a—’e te ha’amanara’a autahu’ara’a nō te rave i te reira—e ’ere ïa i te mea faufa’a. Nāhea ’oe i te pāhono i teie mana’o ? Teie e piti a’ora’a nō te ’āmuira’a rahi e nehenehe e fa’aara i tō ’oe ferurira’a ; ’a ma’iti hō’ē, ’e ’a pāpa’i i te mau pāhonora’a ato’a e tae mai ia ’oe : Russell M. Nelson, « Te mau tao’a pae vārua », Liahona, Novema 2019, 76–79 ; Dale G. Renlund, « Te Autahu’ara’a ’e te mana tāra’ehara a te Fa’aora », Liahona, Novema 2017, 64–67.

Hi’o ato’a Te Ha’api’ira’a Tumu ’e te mau Fafaura’a 84:19–22.

Tē tauturu nei te mau ’ōro’a autahu’ara’a ia tātou ’ia hi’o i ni’a ia Iesu Mesia nō te tāra’ehara.

Alama 13

Tē ani nei te Fatu ia tātou ʼia tomo atu i roto i tōna faʼaearaʼa.

Tē fa’ahiti-pinepine-hia nei te ’anira’a « ’ia tomo atu i roto i te fa’aeara’a o te Fatu » (Alama 13:16) i roto i te Alama 13. Pēnei a’e e nehenehe ’oe e hi’o i te ’īrava tāta’itahi i reira te ta’o « fa’aeara’a » e fā mai ai ’e e feruri ai e aha tā te ’īrava tāta’itahi e ha’api’i nei ’ia ’oe nō ni’a i te aura’a o « te fa’aeara’a o te Fatu ». E aha te ta’a-’ē-ra’a ’e te fa’aeara’a pae tino ? E nāfea te reira i te noa’a mai ?

Hi’o ato’a Russell M. Nelson, « Upo’oti’a i ni’a i te ao nei ’e ’ia noa’a te ora », Liahona, Novema 2022, 95–98 ; « Haere mai ia Iesu », Te mau hīmene, N°56.

Alama 14

I te mau taime ʼati, ʼia tiʼaturi tātou i te Fatu e tiʼa ai.

E uiui paha tō ’oe mana’o mai te mau ta’ata e rave rahi ē, nō te aha te mau mea ri’ari’a e tupu ai i ni’a i te mau ta’ata e tāmata nei i te ora ma te parauti’a. E’ita paha te rahira’a ’o te mau pāhonora’a i teie uira’a fifi e ’itehia i roto i te Alama 14, teie rā e rave rahi ha’api’ira’a e ’apo mai i roto i tō Alama ’e ’o Amuleka pāhonora’a i te ’ati tā rāua i fa’aruru. E aha tā tā rāua mau parau ’e mau ’ohipa e ha’api’i nei ia ’oe nō ni’a i te tumu te Fatu e fa’ati’a ai i te tahi taime ’ia mamae te feiā parauti’a ? E aha te parau tā Alama ’e tā Amuleka e hōro’a mai ia tātou ’ia fa’aruru ana’e tātou i te mau tāmatara’a ’ino roa ?

Hi’o ato’a Roma 8:35–39 ; 1 Petero 4:12–14 ; Te Ha’api’ira’a Tumu ’e te mau Fafaura’a 122:5–9 ; Dale G. Renlund, « ’Ohipa tano ’ore e fa’atupu i te riri », Liahona, Mē 2021, 41–45.

’Ia vai ineine noa. Mai te feti’a pao te mau taime ha’api’ira’a, nō reira ’a haru mai i te reira ’ia tupu ana’e mai. ’Ei hi’ora’a, e nehenehe te hō’ē ’ati i roto i te ao e riro ’ei rāve’a nō te fa’a’ite i te mau parau tumu i roto i te Alama 14 nō ni’a i te tumu te Fatu e fa’ati’a ai i te tahi taime ’ia mamae te feiā hara ’ore.

Te mau mea ato’a ’ei maita’i nō tātou

Tē pūpū nei Elder Gong i te ha’apāpūra’a ē, i roto i te fa’anahora’a a tō tātou Metua it e ao ra, e nehenehe roa te mau ’ati ’e te tahi atu mau fifi ’ia riro ’ei maita’i nō tātou.

Alama 15:16, 18

E tītau te ti’ara’a pipi i te fa’atusiara’a.

E mea maita’i ’ia fa’ati’a i te hō’ē tāpura nō te mau mea tā Amuleka i vaiiho nō te fāri’i i te ’evanelia (hi’o Alama 10:4–5 ; 15:16) ’ei reira e fa’aau atu ai i te tāpura nō te mau mea tāna i ’āpī mai (hi’o Alama 15:18 ; 16:13–15 ; 34:8). E aha tā ’oe i ineine nō te fa’atusia, ’ia riro ’ei pipi hau atu ā te ha’apa’o maita’i nā Iesu Mesia ?

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.

Mana’o nō te ha’api’i i te tamari’i

Nō te mea teie sābati ’o te pae ïa o te sābati o te ’āva’e, tē fa’aitoitohia nei te mau ’orometua ha’api’i o te Paraimere ’ia fa’a’ohipa te ’ohipara’a ha’api’ipi’ira’a i roto te Parau hi’u B : Fa’aineinera’a i te mau tamari’i nō te hō’ē orara’a tā’āto’a i ni’a i te ’ē’a nō te fafaura’a a te Atua ».

Alama 13:1–2, 16

E tauturu mai te mana nō te ’autahu’ara’a iā’u ’ia ha’afātata atu ā i te Mesia.

• Hō’ē rāve’a nō te tauturu i tā ’oe mau tamari’i ’ia ’ite e nāhea te mana o te autahu’ara’a i te fa’atoro ia tātou i ni’a i te Mesia, ’o te fa’a’itera’a ïa ia rātou i te mau hōho’a nō te mau fa’a’ohipara’a i te mana o te autahu’ara’a (hi’o Buka hōho’a o te ’evanelia, n°103–110). E nehenehe tā ’oe mau tamari’i e tauturu ’ia ’oe ’ia feruri i te mau rāve’a ’ua fa’a’ohipa Iesu i tōna mana (hi’o, ’ei hi’ora’a, Mataio 26:26–28 ; Mareko 5:22–24, 35–43 ; Buka hōho’a nō te ’evanelia, n°38–41). I muri iho e tai’o ’āmui i te Alama 13:2 ’e ’ia paraparau e nāhea te mana o te autahu’ara’a i te tauturu ia tātou ’ia « hi’o atu i [te Tamaiti a te Atua] » ’e ’ia riro hau atu mai iāna ra te huru.

  
  

• Nō te aha te Atua i hōro’a mai ai i te mau ’ōro’a o te autahu’ara’a ? ’A tauturu i te mau tamari’i ’ia ’imi i te hō’ē pāhonora’a i roto i te Alama 13:16. Mai te peu e hina’aro rātou i te tauturu nō te ’ite e aha te hō’ē ’ōro’a, tē vai ra te mau tāpura i roto te Buka arata’i rahi18.1 ’e 18.2. Pēnei a’e e nehenehe ’outou tā ’oe mau tamari’i e paraparau nō ni’a i tō ’outou fāri’ira’a i teie mau ’ōro’a. Nāhea teie mau ’ōro’a i te tauturu ia tātou « ’ia hi’o atu ia [Iesu Mesia] nō te ha’amatarara’a i tā [tātou] mau hara » ? E nehenehe te hō’ē hīmene mai « Le jour de mon baptême » (Chants pour les enfants, 53) e tauturu i tā ’oe mau tamari’i ’ia feruri i te tahi atu mau tumu nō te ha’amāuruuru nō te mau ’ōro’a o te autahu’ara’a.

Alama 13:10–12

E nehenehe ’o Iesu Mesia e tāmā iā’u.

• I muri a’e i te tai’o-’āmui-ra’a i teie mau ’īrava, ’a feruri i te mau rāve’a nō te tauturu i tā ’oe mau tamari’i ’ia hi’o mana’o i te mea tā rātou i ha’api’i. Pēnei a’e e nehenehe ’outou e horoi ’āmui i te tahi tao’a. E aha te mana’o ’ia repo ana’e tātou ? E aha te mana’o ’ia mā fa’ahou ana’e tātou ? E aha te tū’atira’a o teie mau mana’o ’e te mau mana’o nō te harara’a ’e i muri iho nō te tātarahapara’a ’e nō te tāmāra’a ia tātou nā roto i te tāra’ehara a te Fa’aora ?

Alama 14:18–29

E ha’apūai te Metua i te ao ra iā’u ’ia vai ana’e tō’u fa’aro’o ia Iesu Mesia.

• E nehenehe te ’api fa’a’ana’anataera’a nō teie hepetoma e tauturu ia ’oe—’e ’aore rā i tā ’oe mau tamari’i—’ia fa’ati’a i te ’ā’amu i roto i te Alama 14:18–29 (hi’o ato’a « Pene 22 : Te misiōni a Alama i Amoniha », Te mau ā’amu o te Buka a Moromona, 58–63). ’A tūra’i i te parau ē, ’ua hōro’ahia ia Alama ’e ia Amuleka te pūai nō tō rāua « fa’aro’o i te Mesia » (Alama 14:26). E nehenehe ato’a ’oe e paraparau nō ni’a i te hō’ē taime ’a hōro’a mai ai te Atua ’ia ’oe i te pūai « mai te au i [tō ’oe] fa’aro’o. » Nāhea tātou e riro ai ’ei ta’ata ha’apa’o maita’i mai ia Alama ’e ia Amuleka ?

  Chapter 22: Alma’s Mission to Ammonihah

Alama 15:3–12

E taui Iesu Mesia i te ’ā’au.

• E mea fa’auru te tauira’a o te ’ā’au o Zeezeroma i tupu nā roto ia Iesu Mesia. E hi’o ’e tā ’oe mau tamari’i e aha tā rātou i ’apo mai i te hepetoma i ma’iri a’enei nō ni’a ia Zeezeroma. I muri iho e tai’o ’āmui i te Alama 15:3–12 nō te hi’o ’ua nāhea ’oia i te tauira’a. E aha tā tātou i ’apo mai nā roto mai i te ’ohipa i tupu nō Zeezeroma nō ni’a i te mana o te Fatu ? (hi’o « Zeezrom Is Healed and Baptized [’Ua fa’aorahia ’e ’ua bāpetizohia ’o Zeezeroma] [video], Vaira’a buka ’evanelia).

  Zeezrom Is Healed and Baptized | Alma 15

  Zeezrom escapes from the leaders of Ammonihah and becomes very sick. Zeezrom thinks Alma the younger and Amulek have died because of his wickedness. Alma and Amulek heal Zeezrom, and he is baptized.

Nō te tahi atu ā mana’o, ’a hi’o i te ve’a Hoa nō teie nei ’āva’e.

Alma and Amulek in Prison [Alama ’e Amuleka i roto i te fare tāpe’ara’a], nā Gary L. Kapp