“17–23 Jun: ‘Bae Jisas Kraes I Kam blong Pemaot Ol Pipol blong Hem.’ Alma 8–12,” Kam Folem Mi—Blong Hom mo Jos: Buk blong Momon 2024 (2024)
“17–23 Jun. Alma 8–12,” Kam Folem Mi—Blong Hom mo Jos: 2024 (2024)
Stap Tijim Tru Doktrin, i kam long Michael T. Malm
17–23 Jun: Bae Jisas Kraes I Kam blong Pemaot Ol Pipol blong Hem
Alma 8–12
Wok blong God bambae i no foldaon. Be ol traehad blong yumi blong help wetem wok blong Hem, samtaem, yumi luk se i foldaon—o, yumi no stap luk kwiktaem ol risal we yumi stap hop long hem. Samtaem, yumi save filim lelebet olsem Alma taem hem i bin prijim gospel long Amonaeha—we oli no wantem hem, oli spet long hem, mo oli sakemaot hem. Be yet, wan enjel i bin talem long hem blong gobak, mo traem bakegen, mo Alma, wetem strong paoa long tingting, “i gobak kwiktaem” (Alma 8:18), mo God i bin mekem rere wan wei long fored blong hem. Hem i bin givim kaekae mo wan ples blong stap long Alma, be tu, Hem i bin mekem Amulek i rere, we i kam blong strong wokman, mo wan man we i strong blong difendem gospel, mo wan fetful fren. Taem yumi fesem ol taem we yumi stop smol mo tingting i harem nogud taem yumi stap wok long kingdom blong Lod, yumi save tingbaot olsem wanem God i bin sapotem mo lidim Alma, mo yumi save trastem se God bambae i sapotem mo lidim yumi tu, iven long ol situesen we oli had.
Ol tingting blong stap lan long Hom mo Jos
Traehad blong mi blong serem gospel blong Jisas Kraes i nidim fasin blong save wet longtaem.
?Yu bin traem blong serem gospel blong Jisas Kraes wetem wan man, be hem i no bin akseptem invitesen? Alma i bin eksperiensem hemia tu ?Wanem nao yu lanem aot long hem long Alma 8:13–16 blong stap serem gospel nomata ol jalenj mo ol fasin blong agens? Gohed blong stap rid long ol ves 17–32, mo lukaotem ol sentens we i givim yu insperesen blong gohed mo serem gospel iven sapos yu luk se yu no gat sakses.
Ol profet mo aposol oli ol spesel witnes blong Kraes, mekem se oli gat plante kaonsel wetem insperesen blong serem taem oli stap testifae abaot Hem. Luk wanem Elda Dieter F. Uchtdorf i talem long “?Be Olsem Wanem Sapos I Had?” (wan seksen long “Misinari Wok: Stap Serem Wanem I Stap long Hat blong Yu,” Liahona, Mei 2019, 18) o wanem Elda Gary E. Stevenson i bin serem long “Lavem, Serem, Invaetem,” (Liahona, Mei 2022, 84–87). ?Wanem nao yu faenem long riding ia we i save helpem wan we i filim daon abaot serem gospel?
?Hao nao bae yu putum long sot toktok evri samting we yu bin stadi long hem i go long wan o tu stetmen abaot serem gospel? Tingting blong mekem wan posta o wan foto fes we i save givim insperesen long yu (mo ol nara man) blong gohed mo traehad.
Luk tu long “Help Me Teach with Inspiration,” Hymns, no. 281; “Alma Is Commanded by an Angel to Return to Ammonihah” (vidio), Gospel Library; Gospel Topics, “Inviting All to Receive the Gospel of Jesus Christ,” Gospel Library.
Ol blesing blong God oli kam wetem bigfala responsabiliti.
Taem yu stap rid abaot wei we Ol Man blong Nifae long Amonaeha oli bin mekem long ol wokman blong Lod, hem i isi blong fogetem se, long wan taem, oli bin stap laef folem gospel, mo oli bin “wan pipol we Lod i sapotem olgeta bigwan” (Alma 9:20). Taem yu stap rid abaot ol bigfala blesing we God i givim long ol pipol blong Nifae (speseli luk long Alma 9:14–23), tingting hevi long ol bigfala blesing we Hem i bin givim long yu. ?Wanem nao ol responsabiliti we i kam wetem ol blesing ia? ?Wanem nao yu stap mekem blong stap tru long ol responsabiliti ia?
Luk tu long Doktrin mo Ol Kavenan 50:24; 82:3; 93:39.
Plan blong God hem i wan plan blong fasin blong pemaot man.
Long Alma 11–12, Alma mo Amulek oli tokbaot plan ia, se hem i plan blong fasin blong pemaot man. Taem yu stap ridim olgeta japta ia, tingting hevi se from wanem, toktok ia, fasin blong pemaot man oli yusum blong tokbaot plan ia. Yu save raetem tu wan sot toktok long wanem Alma mo Amulek i bin tijim abaot ol defren saed blong plan ia.
-
Foldaon blong Adam mo Iv long Sin
-
Ridima Ia
-
Fasin blong Sakem Sin
-
Ded
-
Laef Bakegen long Ded
-
Jajmen
Luk wanem nao ol toktok blong Amulek i mekem long tingting blong ol pipol (luk long Alma 11:46). ?Hao nao blong save abaot plan blong God i tajem yu?
Luk tu long Dallin H. Oaks, “Bigfala Plan,” Liahona, Mei 2020, 93–96; “Amulek Testifies of Jesus Christ” (vidio), Gospel Library.
Sapos mi no stap mekem hat blong mi i strong tumas, bae mi save kasem moa long toktok blong God.
Sam pipol oli save askem olgetawan from wanem Papa long Heven i no talemaot evri samting long yumi. Long Alma 12:9–14, Alma i eksplenem wan risen we i save wok. Olgeta kwestin ia oli save helpem yu blong tingting hevi long wanem hem i bin tijim:
-
?Long yu, hem i minim wanem blong mekem hat i kam strong? Wanem ol risal blong gat wan hat we i strong tumas? (Luk tu long Alma 8:9–11; 9:5, 30–31; mo 10:6, 25).
-
Wanem nao yu save mekem blong tanem hat blong yu i go long God? (Luk tu long Jeremaea 24:7; Alma 16:16; Hileman 3:35).
-
?Wanem nao yu save mekem blong mekemsua se toktok blong God, oli save “faenem insaed long [yu]”? (Alma 12:13). Taem yu gat toktok blong God insaed long yu, ?wanem nao bae toktok blong God i mekem long ol “toktok, “wok,” mo “tingting” blong yu? (Alma 12:14).
?Wanem nao eksperiens blong Amulek i tijim abaot ol blesing blong stap gat wan sopsop hat? (Luk long Alma 10:1–11).
Luk tu long “Alma Warns Zeezrom” (vidio), Gospel Library.
Blong moa tingting, luk long namba blong manis ia long Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Mi save serem gospel blong Jisas Kraes.
-
Aktiviti pej blong wik ia i save helpem yu mekem i sot ol taem ia long Alma 8–10 blong ol pikinini blong yu. Maet yu wantem helpem olgeta blong faenem ol prinsipol we i bin mekem Alma mo Amulek oli kam ol gud misinari. Eksampol, oli no bin givap (luk long Alma 8:8–13), oli testifae abaot Kraes (luk long Alma 9:26–27), mo oli bin wok tugea (luk long Alma 10:12).
-
Wan singsing abaot misinari wok, olsem “I Want to Be a Missionary Now” (Children’s Songbook, 168) i save givim long ol pikinini blong yu sam tingting abaot ol wei blong serem gospel wetem ol fren blong olgeta. Invaetem olgeta blong mekem wan lis blong wanem oli faenem mo ol pipol we oli save serem gospel wetem olgeta. Maet yu wantem oli rolplei long wanem oli wantem talem o mekem.
Leftemap tingting blong olgeta blong tekpat. “Taem yu stap rere blong tij, blong mekem plan long ol samting blong talem, askem yuwan, ‘?Wanem nao ol pikinini bae oli mekem blong stap lan?” Ol pikinini bae oli lanem samting i moa gud mo bae oli tingbaot gud taem oli stap tekpat gud long hem.
Plan blong God hem i wan plan blong fasin blong pemaot man.
-
Ating ol pikinini blong yu i save droem wan pikja we i ripresentem ol prinsipol blong plan blong fasin blong pemaot man, olsem Foldaon blong Adam mo Iv, Atonmen blong Jisas Kraes, fasin blong sakem sin, ded, laef bakegen long ded, mo jajmen. Afta yu save helpem olgeta blong majem ol pikja blong olgeta wetem ol ves ia long Alma 11–12 we i tij abaot ol prinsipol ia.
Mi save stap olsem wan gud fren.
-
Yu save invaetem wan pikinini blong priten se hem i Amulek mo wan narawan blong priten se hem i Alma taem yu stap talem stori long Alma 8:18–22 ?Olsem wanem nao Amulek i stap olsem wan gud fren long Alma? Afta ol pikinini blong yu i save serem hao wan man i bin stap wan fren long olgeta mo oli filim olsem wanem long eksperiens ia.
-
Ating yu save mekem wan pasel blong wan frensip: faenemaot o droem wan pikja we i ripresentem fasin blong mekem fren mo katkatemaot i go smosmol olsem ol pis blong pasel. Biaen long wanwan pis blong pasel gem ia, raetem wan samting we Alma mo Amulek i bin mekem blong stap olsem ol gud fren o ol samting we yumi save mekem blong stap olsem ol gud fren. Invaetem ol pikinini blong gat ol janis blong jusum wan pis mo ademap i go long pasel gem ia taem yu stap ridim wanem we oli raetem biaen long hem. ?Huia i nidim seves blong yumi?
Yumi save stap olsem ol gud fren long ol narafalawan.
Hem i from Jisas Kraes, bambae mi laef bakegen long ded.
-
Tingting long wan lesen tul olsem hemia blong tij abaot Laef Bakegen long ded: han blong yu i save ripresentem spirit blong yu, mo wan hanglav we i save ripresentem bodi blong yu. Tekemaot han blong yu long hanglav ia blong soem se ol spirit mo bodi blong yumi bae i wanwan taem yumi ded. Afta putum han blong yu i gobak insaed long hanglav blong soem se spirit mo bodi bae i kambak joen tugeta bakegen long taem ia blong Laef Bakegen long Ded. Letem ol pikinini i gat janis blong werem hanglav ia mo tekemaot bakegen taem yu stap rid long Alma 11:43 i go long olgeta. Soem wan pikja blong Meri mo Jisas Kraes we i Laef Bakegen long Ded (luk long Gospel Art Book, no. 59), se Jisas Kraes i bin mekem i posibol blong evri man i save laef bakegen long ded.
Blong moa tingting, luk long namba blong manis ia long Fren magasin.
Pikja blong Alma i stap kakae wetem Amulek, i kam long Dan Burr