Ol Antae-Nifae-Lihae Oli Berem Ol Tul blong Faet blong Olgeta, i kam long Jody Livingston

8–14 Julae: Oli “Neva Foldaon I Go Lus”

Alma 23–29

?Yu yu stap askem yuwan samtaem se ol pipol oli rili save jenis o no? Ating yu stap wari se yu save winim sam nogud joes we yu bin mekem, o sam nogud fasin we yu stap gat, o maet yu gat ol semmak wari abaot sam we yu lavem olgeta. Sapos i olsem, stori blong Ol Antae-Nifae-Lihae i save helpem yu. Olgeta pipol ia, oli ol bigfala enemi blong Ol Man blong Nifae. Taem ol boe blong Mosaea oli jusum blong prijim gospel long olgeta, Ol Man blong Nifae oli bin “jikim olgeta fulap.” I luk se blong kilimded Ol Man blong Leman i wan moa stret ansa, bitim blong jenisim laef blong olgeta. (Luk long Alma 26:23–25.)

Be Ol Man blong Leman oli bin jenisim laef blong olgeta—tru long paoa blong Jisas Kraes blong jenisim laef blong man. Long wan taem, oli bin save olgeta olsem “ol pipol we oli wael mo oli bin mekem hat blong olgeta i kam strong” (Alma 17:14), be oli kam blong “save olgeta from sapot blong olgeta long God” (Alma 27:27). Wanem i tru, i we oli “neva foldaon i go lus” (Alma 23:6

Ating yu gat sam tingting o aksen blong jenis o yu gat “ol tul blong … faet ” blong putum daon (Alma 23:7). O ating yu jes nidim blong yu kam strong moa long testemoni blong yu long God. Nomata wanem ol jenis yu nidim, Alma 23–29 i save givim yu hop tru long paoa blong Jisas Kraes, paoa ia we i pem praes, bae i wan jenis we i longfala mo i save stap, i posibol blong hapen.

Ol Aedia blong Stap Lanem Samting long Hom mo long Jos

Alma 23–25; 27

Taem mi jenisim laef blong mi i go long Jisas Kraes mo gospel blong Hem, bae hemia i jenisim laef blong mi.

Plante long olgeta oli no luk olsem se bae oli wantem kam wan we i save jenisim laef blong hem, be yet, plante long olgeta oli bin kasem ol bigfala merikel eksperiens blong jenis from Jisas Kraes. Ol Man blong Leman ia oli singaotem olgetawan olsem Ol Antae-Nifae-Lihae.

Blong stap ridim Alma 23–25; 27 i save givim insperesen long yu blong tingting hevi long taem yu bin jenisim laef blong yuwan. Lukaotem olsem wanem Ol Antae-Nifae-Lihae oli bin jenis—olsem wanem oli bin jenisim laef blong olgeta “long Lod” (Alma 23:6). Yu save stat wetem olgeta ves ia:

• Alma 23:6–7

• Alma 23:17–18

• Alma 24:15–21

• Alma 25:13–16

• Alma 27:26–30

?Long ol wanem wei nao Jisas Kraes mo gospel blong Hem i bin jenisim yu? ?Wetaem nao yu filim se yu stap kolosap long Hem? ?Long wanem wei nao yu save luksave se, yu stap jenisim laef blong yu i go long Jisas Kraes? ?Wanem nekis samting we Spirit i stap talem long yu blong mekem?

Luk tu long David A. Bednar, “Fasin blong jenisim laef i go long Lod,” Liahona, Nov. 2012, 106–9; Dale G. Renlund, “Komitmen we I No Muvmuv long Jisas Kraes,” Liahona, Novemba 2019, 22–25; Gospel Topik: “Stap Kam Olsem Jisas Kraes,” Gospel Laebri.

Alma 24:7–19; 26:17–22

From se God i gat sore, Hem i fogivim mi taem mi sakem sin.

Jenis ia we Ol Antae-Nifae-Lihae oli bin kasem eksperiens long hem, i bitim blong jenisim ol nomol fasin nomo—hem i bin wan jenis blong hat we i bon tru fet long Jisas Kraes mo fasin blong sakem sin wetem tru hat. Bae yu save faenem wan trutok abaot fasin blong sakem sin long wanwan ves ia Alma 24:7–19. ?Wanem nao ol ves ia oli tijim abaot sore blong God we i go long olgeta we ol sakem sin? Wanem sam moa trutok we yu lanem long Alma 26:17–22?

Tingting hevi long olsem wanem God i bin soem sore blong Hem long laef blong yu. ?Long wanem wei nao yu save soem tangkyu blong yu long Hem?

Alma 26; 29

Blong stap serem gospel i givim glad long mi.

Toktok ia glad i kamaot 24 taem long Alma 23–29, we i mekem se ol japta ia oli ol gudfala ples blong lanem olsem wanem blong kasem glad taem yu stap laef folem—mo stap serem—gospel blong Sevya. Tingting blong stap stadi long Alma 26:12–22, 35–37; mo 29:1–17, blong stap lukaotem ol risen se, from wanem Amon, ol boe blong Mosaea, mo Alma oli bin glad tumas. ?Wanem nao yu lanem aot long ol sentens ia we i save lidim yumi blong kasem moa glad long laef blong yu?

Elda Marcus B. Nash i tijim se: “Blong stap serem gospel, i laetem glad mo hop long evri sol, blong tugeta, man we i givim mo man we i kasem gospel ia. … Blong stap serem gospel i blong glad folem glad, gat hop folem nara hop.” (“Leftemap Laet blong Yu,” Liahona, Nov. 2021, 71). ?Wanem ol eksperiens we yu bin gat taem yu stap serem gospel wetem ol narawan? ?Wanem ol jalenj we yu bin fesem taem yu stap lukaotem blong serem gospel? ?Long wanem wei nao Papa long Heven i save helpem yu blong winim ol jalenj ia?

Blong kasem ol instraksen blong profet abaot olsem wanem blong serem gospel—mo kasem glad taem yu stap mekem—tingting blong stadi long mesej blong Presiden Dallin H. Oak long “Sharing the Restored Gospel,” (Liahona, Nov. 2016, 57–60). ?Wanem sam tingting we yu faenem insaed long mesej blong hem?

Luk tu long “The Bush Family Story,” “Sharing Your Beliefs,” “Sharing the Gospel” (ol vidio), Gospel Laebri.

Tingting blong mekem wan lis blong ol samting, we yu wantem serem wetem wan fren abaot Buk blong Momon. Traem serem Buk blong Momon taem yu stap yusum Buk blong Momon app.

Lukaotem ol paten mo ol stamba toktok. Taem yu stap stadi long ol skripja, yumi save faenem ol impoten trutok taem yumi stap lukaotem ol toktok we oli stap ripripitim, ol paragraf o ol aedia. Ol aedia ia we oli stap ripriptim ia, oli save mekem kros refrens long olgeta o mekem i joen insaed long ol skripja blong yu blong mekem olgeta oli isi blong luksave.

Alma 26:5–7

Mi save faenem sefples long Jisas Kraes mo gospel blong Hem.

Long taem blong pikimap kaekae, oli stap fasem ol kaekae olsem wit long ol bandel, we oli singaotem bandel blong wit mo oli putum i go long ol haos, we samtaem oli singaotem ol stoahaos. Long Alma 26:5–7 tingting hevi long wanem ol bandel blong wit, ol stoahaos, mo ol strong win i save ripresentem long laef blong yu. ?Olsem wanem nao yu save faenem sefples long Jisas Kraes?

Luk tu long Russell M. Nelson, “Tempol mo Fandesen blong Yu long Saed blong Spirit,” Liahona, Novemba 2021, 93–96; David A. Bednar, “Honorably Hold a Name and a Standing,” Liahona, Mei 2009, 97–100; “Jesus, Lover of My Soul,” Hym, namba 102.

Blong kasem mo aedia, luk long magasin blong manis ia Liahona mo Blong Ol Yut Oli Kam Strong .

Sam Aedia blong Tijim Ol Pikinini

Alma 24:6–24

Lod i blesem mi taem mi traehad blong kipim ol promes blong mi long Hem.

• Ating bae oli pikinini blong yu bae oli save glad blong stap berem ol “tul blong faet” blong olgeta olsem Ol Antae-Nifae-Lihae. Yu save ridim sam ves long Alma 24:6–24 blong tijim ol pikinini abaot ol promes we Ol Antae-Nifae-Lihae oli bin mekem blong folem Sevya. Afta long hemia, bae oli save tingting long wan samting we bae oli jenisim blong folem Hem, raetem long aktiviti pej blong wik ia, mo aktem se yu stap digim wan hol mo berem ol tul blong faet blong olgeta.

• Ol pikinini blong yu bae oli save ridim Alma 24:15–19, mo lukaotem wanem Ol Antae-Nifae-Lihae oli bin mekem “olsem wan testemoni long God.” Afta, yu save toktok wetem olgeta abaot olsem wanem ol kavenan oli save stap olsem “wan testemoni long God” (ves 18). Letem ol pikinini blong yu oli tokbaot olsem wanem bae oli save soem long God se oli wantem blong folem Hem. Singsing wan singsing olsem “I Want to Live the Gospel” (Children’s Songbook, 148) bae i save givim insperesen long olgeta.

Alma 24:7–10; 26:23–34; 27:27–30

Mi save sakem sin.

• Blong helpem ol pikinini blong yu blong oli luksave olsem wanem Jisas Kraes i helpem yumi blong jenis taem yumi sakem sin, yu save tijim olgeta abaot Ol Antae-Nifae-Lihae. Blong mekem olsem, bae yu save makem tu bolglas long toktok ia “bifo” mo “afta.” Afta, ol pikinini blong yu oli save ridim Alma 17:14–15 mo 27:27–30, raetemdaon wanem Ol Man blong Leman oli bin stap mekem bifo mo afta we oli bin sakem sin, mo putum olgeta long stret bolglas. Folem wanem we i stap long Alma 24:7–10, wanem nao i helpem olgeta blong jenisim laef blong olgeta? Olsem wanem nao yumi save soem ol tangkyu blong yumi long God from sore blong Hem long yumi?

Alma 26; 29

Jisas Kraes i givim glad long mi, mo mi save serem glad ia.

• Ating yu mo ol pikinini blong yu i save glad blong stap droem ol pikja blong ol samting insaed long gospel blong Jisas Kraes. Serem pikja blong yu wetem ol pikinini blong yu, mo leftemap tingting blong olgeta blong serem pikja blong olgeta wetem wan nara man blong helpem hem i filim glad tu.

• Helpem ol pikinini blong yu blong faenem ol toktok ia glad mo stap glad insaed long Alma 26 mo 29. ?Wanem nao i givim glad long Amon mo Alma o mekem tufala i stap glad? Kwestin ia i save lidim evriwan blong toktok raon long glad ia we i kam taem yumi stap laef folem o stap serem gospel blong Jisas Kraes.

Alma 27:20–30

Mi save helpem ol fren blong mi blong laef folem gospel blong Jisas Kraes.

• Ol pikinini blong yu bae oli save ridim Alma 27:22–23, mo stap lukaotem wanem Ol Man blong Nifae oli bin mekem blong helpem Ol Antae-Nifae-Lihae blong kipim promes blong olgeta blong neva faet bakegen. ?Olsem wanem nao yumi save helpem ol fren blong yumi blong oli kipim ol promes blong olgeta? Ol pikinini blong yu oli save mekem drama blong ol defren situesen. Eksampol: ?Wanem nao yumi save talem long wan fren we i wantem giaman o i wantem mekem nogud long wan narawan?

Blong kasem moa aedia, luk long magasin blong manis ia Friend magasin.

Droing blong Ol Antae-Nifae-Lihae we oli stap berem ol tul blong faet blong olgeta, i kam long Dan Burr