Ol stori insaed long Alma 30–31 oli soemaot klia paoa blong ol toktok—we i mekem nogud, mo i mekem gud. “Ol swit toktok” mo “ol toktok we oli solap long selfis” blong wan giaman tija we nem blong hem i Koriho, kolosap i tekem “plante sol i go daon blong oli lus evriwan” (Alma 30:31, 47). Semmak, ol tijing blong wan Man blong Nifae we i agens, we nem blong hem i Soram, i lidim wan bigfala grup blong ol pipol blong foldaon long “ol bigfala rabis mistek,” mo i “prapa spolem gud ol wok blong Lod” (Alma 31:9, 11).
Komperem wetem hemia, Alma i gat wan fet we i no muvmuv olsem wef; hem i save se toktok blong God bae “i gat moa bigfala paoa long tingting blong ol pipol bitim naef blong faet, o eni narafala samting” (Alma 31:5). Alma i talemaot ol trutok we oli no save finis, mo i askem ol paoa blong Jisas Kraes blong oli sarem maot blong Koriho (luk long Alma 30:39–50), mo oli invaetem ol blesing blong Hem blong stap long olgeta we oli bin go wetem hem blong tekem Ol Man blong Soram oli kambak long trutok (luk long Alma 31:31–38). Hemia i ol nambawan eksampol blong ol man blong folem Kraes tedei, taem we i gat plante ol giaman mesej i stap olbaot. Yumi save faenem trutok taem yumi gat tras, olsem Alma i bin mekem, “paoa blong toktok blong God” (Alma 31:5
Ol Aedia blong Stap Lanem Samting long Hom mo long Jos
Enemi i traem blong giaman long mi wetem giaman tijing.
Long Alma 30, oli singaotem Koriho olsem “Man we i agensem Kraes” (ves 6). Wan man we i agensem Kraes, i eniwan o eni samting we i go agensem Jisas Kraes mo gospel blong Hem long wan wei we i open o long sikret. ?Wijwan ves long Alma 30:6–31 nao i soem se Koriho i stret wanem we oli tokbaot ia? Blong stap stadi long ol giaman tijing blong Koriho, i save helpem yu blong luksave mo no akseptem ol semmak tijing olsem. Ol aktiviti ia bae oli save helpem yu long stadi blong yu:
?Wanem nao ol samting blong yusum long lesen we yu save tingting long olgeta blong andastanem moa gud wanem i defren bitwin ol tijing blong Sevya mo ol giaman trik blong Setan? Sam eksampol hem i wan bet we oli yusum blong fising we i kalakala, giaman mane mo giaman notis abaot wan samting blong pulum tingting. ?Olsem wanem nao bae yu save luksave wan giaman samting? ?Olsem wanem nao yu save luksave trutok?
Tingting blong mekem wan lis blong ol giaman doktrin we Koriho i bin tijim insaed long Alma 30:6–31 ?Wijwan long ol tijing ia nao oli save pulum tingting blong man tedei? (luk long Alma 30:12–18, 23–28). ?Wanem ol nogud samting we oli save kam taem yumi akseptem ol kaen tingting ia? ?Wanem ol giaman mesej we enemi i stap yusum tedei blong traem blong giaman long yu?
?Wanem nao Alma i bin mekem blong toktok agensem ol tijing blong Koriho wetem trutok? (luk long Alma 30:31–54). ?Olsem wanem nao yu save yusum ol semmak prinsipol ia long laef blong yu?
Olsem Alma, ol profet blong tedei mo ol aposol oli helpem yumi blong save wanem i defren bitwin trutok mo ol giaman blong Setan. Wanem kaonsel nao yu save faenem insaed long ol mesej ia: Gary E. Stevenson, “Yu No Trikim Mi;” (Liahona, Nov. 2019, 00–00); Dallin H. Oaks “Blong Mekem Se Oli No Trikim Yufala,” (Liahona, Nov. 2004, 00).
Luk tu long Gospel Topik, “Lukaotem Trutok mo Stap Longwe long Ol Giaman,” Gospel Laebri; “Oh Say, What Is Truth?,” Hynm, namba 272.
Plante pipol tedei oli biliv se i no gat wan God. ?Wanem nao yu faenem long Alma 30:39–46 we oli helpem yu blong save se i tru, i gat wan God? ?Wanem nao i stopem yumi blong no save Hem? ?Wanem ol narafala testemoni we God i bin givim long yu se Hem i stap laef?
Enemi i no stap sapotem ol man we oli stap folem hem.
?Wanem nao yu lanem long Alma 30:56–60 abaot olsem wanem devel i stap tritim ol man we oli stap folem hem? ?Wanem nao yu save mekem blong protektem hom blong yu agensem paoa blong hem?
Toktok blong God i gat paoa blong lidim ol pipol i go long stret mo gud fasin.
Problem blong Ol Man blong Soram we i mekem oli seperet long Ol Man blong Nifae, samfala man bae oli luk se politik o ami nao i ansa blong stretem problem ia (luk long Alma 31:1–4). Be Alma i bin lanem blong trastem, “paoa blong toktok blong God” (Alma 31:5). ?Wanem nao yu lanem long Alma 31:5 abaot paoa blong God? (luk tu long Hibrus 4:12; 1 Nifae 15:23–24; 2 Nifae 31:20; Jekob 2:8; Hileman 3:29–30).
Taem yu stadi long Alma 31, ?wanem nao ol narafala trutok blong gospel we yu save faenem we oli go stret wetem ol eksperiens blong laef blong yu? Eksampol:
?Wanem nao yu bin luk abaot toktok God we i lidim ol pipol blong mekem ol gudfala samting? (luk long ves 5).
Komperem ol fasin blong Alma, ol filing, mo ol aksen we i go wetem ol narawan (luk long ol ves 34–35) blong ol Ol Man blong Soram (luk long ol ves 17–28). ?Olsem wanem nao bae yu save kam moa olsem Alma?
?Wanem nao yu faenem long Alma 31:30–38 we i save helpem ol pipol we oli stap harem nogud from ol sin blong ol narawan?
Eniwan wan i save jenisim laef tru long Jisas Kraes.
Luksave ol pipol we Alma i bin tekem olgeta wetem hem blong oli go tijim gospel long Ol Man blong Soram (luk long Alma 31:6). ?Wanem nao yu lanem abaot laef blong ol pipol ia long Mosaea 27:8–37; 28:4; Alma 10:1–6; 11:21–25; 15:3–12. ?Wanem mesej nao i stap long ples ia we i blong yu tru long ol eksperiens blong olgeta?
Buk blong Momon i givim woning long yumi agensem ol giaman tijing.
Tingting blong soem sam aetem (olsem mane o kaekae) mo ol pleiplei trik blong ol aetem ia. Hemia i save mekem evriwan i stat blong toktok raon long olsem wanem blong save wanem i defren bitwin ol tru samting mo ol giaman samting. Afta, yu save helpem ol pikinini blong yu poenemaot long ol trik mo ol giaman tijing long Alma 30:12–18 we Koriho i bin tijim abaot God. Long Alma 30:32–35, ?wanem nao ol toktok blong Alma we i go agensem ol giaman ia? ?Wanem nao yumi lanem aot long eksampol blong hem?
Alma i tokbaot olsem wanem ol samting long skae mo wol oli testifae se God i stap laef. Sapos i posibol, yu mo ol pikinini blong yu i save go wokbaot aotsaed o stanap long windo taem yu stap ridim Alma 30:44. Askem olgeta blong poenem ol samting we oli luk we i helpem olgeta blong save se i tru, i gat wan God mo we Hem i lavem olgeta. Oli save dro ol pikja blong ol samting we oli faenem (luk long aktiviti pej blong wik ia).
Taem yu mo ol pikinini blong yu i singsing long “My Heavenly Father Loves Me” (Children’s Songbook, 228–29), pasem wan balong o wan samting i go raon. Wanwan taem, stopem miusik mo askem pikinini we i holem balong o nara samting ia, blong talem wan samting we Papa long Heven i bin krietem, we hem i wantem talem tangkyu from.
Ol pikinini oli lanem samting tru long wanem we oli luk. Yusum ol samting we ol pikinini oli save luk blong oli save andastanem samting moa gud mo tingbaot longtaem wanem we oli bin tijim long olgeta. Plante long ol aktiviti blong ol pikinini long aotlaen ia i givim ol samting we yu save yusum. Tingting blong stap soem ol semmak samting ia bakegen long ol narafala taem we i stap kam blong helpem ol pikinini blong yu blong tingbaot wanem we oli bin lanem.
?Olsem wanem nao yu save helpem ol pikinini blong yu blong andastanem se toktok blong God i gat moa paoa bitim “eni nara samting?” (Alma 31:5). Tingting blong stap askem long olgeta blong tingting long wan samting o wan man o woman we i gat bigfala paoa, o soem ol pikja blong sam samting we oli gat bigfala paoa. ?Wanem nao i mekem se oli gat bigfala paoa? Ridim tugeta Alma 31:5 mo askem ol pikinini blong talem wanem ol ves ia i stap minim. Serem wan eksperiens blong wan taem we toktok blong God i bin gat strong paoa long yu.
Talem i sot stori blong Alma mo Ol Man blong Soram, mo stap yusum ol ves long Alma 31:8–35 (luk tu long “Japta 28: Ol Man blong Soram mo Ramiamtam,” Ol Stori long Buk blong Momon, 78–80). Helpem ol pikinini blong yu blong faenemaot ol samting we Ol Man blong Soram oli bin stap talem long prea blong olgeta (luk long Alma 31:15–18) long semtaem we oli stap helpem yu blong bildim wan Ramiamtam taoa wetem ol pleiplei brikis o ol ston. Eksplenem se hemia i no wei we yumi mas prea. Taem yu mo ol pikinini blong yu i tokbaot olsem wanem yumi mas prea, letem olgeta oli karemaot wanwan taem, ol pleiplei brikis o ston. Ating oli save putum wan ston long saed blong bed blong olgeta olsem wan samting we i save mekem olgeta oli tingbaot blong prea evri moning mo naet. Oli save gat wan gudtaem blong stap flasem ol ston blong olgeta.
Blong kasem moa aedia, luk long magasin blong manis ia Fren magasin.
Pikja
Wan Man blong Soram i stap prea antap long Ramiamtam
Hat blong Ol Man blong Soram, “oli bin leftemap long bigfala fasin blong tok flas” (Alma 31:25).