Blong Ol Man blong Soram, prea i minim blong stanap long ples ia we evri wan i save luk olgeta mo stap ripriptim ol toktok we oli emti mo ol toktok we i blong leftemap olgetawan bakegen. Ol Man blong Soram oli no gat fet long Jisas Kraes—oli iven talem se hem i no laef—mo oli mekem i no gud long ol puaman (luk long Alma 31:9–25). Be long narasaed, Alma mo Amulek tufala i bin tijim se prea i go moa wetem wanem i stap hapen insaed long hat blong yumi, be i no long wan pablik ples. Mo sapos yumi no soem sore mo lav long ol pipol we oli stap long nid, ol prea blong yumi oli “blong nating nomo mo i no gat yus” (Alma 34:28). Moa impoten long hemia, yumi prea from se yumi gat fet long Jisas Kraes, we i givim fasin blong pemaot man tru long “wan sakrifaes we i no gat en mo i no save finis” (Alma 34:10). Kaen fet olsem, Alma i eksplenem, i stat taem man i gat tingting i stap daon, mo i “wantem blong biliv” (Alma 32:27). Blong oltaem stap fidim yumiwan wetem toktok blong God, sloslo bae rus blong hem i gro insaed long hat blong yumi kasem taem we i save kam “wan tri we i gro i kam antap we i lid i go long laef we i stap oltaem” (Alma 32:41).
Ol Aedia blong Stap Lanem Samting long Hom mo long Jos
Mi praktisim fet long Jisas Kraes taem mi planem mo fidim hat blong mi wetem toktok blong Hem.
Taem yu stap ridim Alma 32:17–43, raetemdaon ol toktok, mo ol sentens we i helpem yu blong andastanem olsem wanem blong praktisim fet long Jisas Kraes. ?Wanem nao yu lanem abaot wanem hem i fet, mo wanem i no fet?
Wan nara wei blong stadi long Alma 32 i blong droem ol pikja we oli stap ripresentem ol defren taem blong wan sid we i stap gro. Afta, putum nem blong wanwan pikja wetem ol toktok we oli kamaot long Alma 32:28–43 we i helpem yu blong andastanem olsem wanem oli planem mo stap fidim hat blong yu wetem toktok blong God.
Long olgeta Man blong Soram we oli no save yet abaot testemoni blong Alma long Jisas Kraes, Alma i givim wan tingting “blong go traem,” (luk long Alma 32:26). Fasin blong go traem i nidim blong gat wan strong tingting we i kam long hat, tingting blong wantem save tumas, tekem aksen mo tu gat wan smol fet—!mo olgeta samting ia i save lid i go blong faenemaot ol naesfala samting! Tingbaot ol samting we yufala i traem mekem we yufala i bin luk mo tekpat long hem. Folem wanem we i stap long Alma 32:26–36, ?wanem samting we yufala i save traem blong mekem we i lid i go blong gat fet long Kraes?
?Olsem wanem nao yu bin “traem blong mekem wan samting” abaot toktok blong God mo kam blong save se “toktok ia i gud”? (Alma 32:28).
Mi save wosipim God long prea, long eni taem, mo long eni ples.
Kaonsel blong Alma mo Amulek abaot fasin blong wosip mo prea i blong stretem evri smosmol samting we Ol Man blong Soram oli bin gat. Tingting blong lisin long olgeta (luk long Alma 31:13–23). Nara samting long lis ia i we, yu save mekem wan lis blong ol trutok abaot prea insaed long Alma 33:2–11 mo 34:17–29. ?Olsem wanem nao ol samting we yu lanem aot long ol ves ia oli save jenisim wei we yu stap prea mo wosip?
Yu save faenem tu ol niufala tingting long wan hym abaot prea, olsem “Sweet Hour of Prayer” (Hym, namba 142).
Luk hamas taem Amulek i yusum ol toktok ia i no gat en mo i no save finis blong tokbaot atonmen mo sakrifaes blong Sevya Alma 34:9–14. ?From wanem hem i impoten blong save se Atonmen blong Sevya bae i no gat en mo i no save finis? Lukaotem ol toktok o paragraf long ol ves ia we oli tokbaot tu Atonmen blong Sevya: Hibrus 10:10; 2 Nifae 9:21; Mosaea 3:13.
Iven we yumi save se paoa blong Jisas blong sevem man, i no gat en mo i no save finis, maet samtaem bae yumi gat tu tingting se hemia i blong yumi—o blong wan we i bin mekem sin agensem yumi. Elda David A. Bednar, long wan taem i bin tokbaot ol pipol we “oli gat fet long Sevya, be oli no biliv long ol promes blesing we i stap blong oli kasem” (“Sapos Yu Bin Save M,” Liahona, Novemba 2016, 104). ?Wanem nao i save stap blokem yumi blong no stap kasem paoa blong Sevya we i fulwan? Tingting hevi long olsem wanem yu save save se Atonmen blong Jisas Kraes i no gat en mo i no save finis.
Blong tingting hevi long hamas yu nidim Atonmen blong Sevya, bae i help blong tingting long wan samting we yu nidim evri dei. Askem yuwan se “?laef blong mi bae i olsem wanem, sapos i no gat hemia?” Afta, taem yu stadi long Alma 34:9–16, tingting se laef blong yu bae i olsem wanem sapos i no gat Jisas Kraes. Yu save faenem ol narafala niu lukluk insaed long 2 Nifae 9:7–9. ?Olsem wanem nao bae yu talem i sot stori long Alma 34:9–10 long wan sentens?
Luk tu long Michael John U. Teh, “Sevya blong Yumi Wanwan,” Liahona, Mei 2021, 99–101; Gospel Topik, “Atonmen blong Jisas Kraes,” Gospel Laebri; “Reclaimed” (video), Gospel Laebri.
Pikjarem long maen blong yu se bae yu tekpat long wan maraton resis o wan so blong miusik. ?Wanem bae i hapen sapos yu bin wet kasem dei we samting ia bae i hapen mo yu jes stap rere from? ?Olsem wanem eksampol ia i go wetem ol woning blong Amulek we i stap long Alma 34:32–35 ?Wanem i denja ia we yumi stap putum yumi long hem blong stap pusumbak dei mo paoa blong yumi blong sakem sin mo jenisim laef blong yumi?
Ves 31 tu i gat wan mesej blong ol pipol we maet oli wari se oli bin wet longtaem tumas mo i let finis blong sakem sin. ?Wanem nao bae yu talem abaot wanem we mesej ia i stap talem?
Lod i save tijim mi sapos mi jusum blong putum tingting blong mi i stap daon.
Alma mo Amulek i bin gat sakses blong stap tijim Ol Man blong Soram we oli gat tingting we i stap daon. ?Hem i minim wanem blong putum tingting i stap daon? Helpem pikinini blong yu blong faenem wan mining blong tingting i stap daon long Gaed long Ol Skripja. ?Wanem nao ol nara wei blong talem mining blong ol toktok ia we yumi save faenem insaed long Alma 32:13–16? Invaetem ol pikinini blong yu blong komplitim wan sentens olsem “mi mi gat tingting i stap daon taem we mi .”
Testemoni blong mi abaot Jisas Kraes i stap gro taem mi fidim testemoni ia.
Ol sid, ol tri, mo ol frut oli ol samting we ol pikinini oli save gud we i save helpem olgeta blong oli andastanem ol samting we yumi no save tajem, olsem fet mo testemoni. Askem ol pikinini blong yu blong holem wan sid taem yu stap ridim Alma 32:28. Afta, yu save askem olgeta blong helpem yu blong tingting long ol wei blong stap mekem testemoni i gro long Jisas Kraes i olsem wan blong planem mo stap lukaot long mo givim kaekae long wan sid (luk long “Japta 29: Alma I Tijim Abaot Fet Mo Toktok Blong God,” Ol Stori long Buk blong Momon, 81). Maet yu save tokbaot sid blong yu olsem wanem yu nidim blong helpem wan sid—o wan testemoni blong—gro.
Wan pikja blong wan tri i stap long aotlaen ia; yu save yusum blong soem ol toktok blong Alma insaed long Alma 32:28–43. O yufala i save go wokbaot aotsaed blong faenem ol plan we oli stap gro long long ol defdefren level blong gro mo ridim ol ves long Alma 32 we i komperem wan plan we i stap gro olsem testemoni blong yumi. O ol pikinini blong yu oli save droem wan tri long bod mo ademap wan lif o wan frut evri taem we oli tingting long wan samting we oli save mekem blong helpem testemoni blong olgeta long Jisas Kraes i gro.
Yu save askem ol pikinini blong yu blong traem blong planem wan sid (we i ripresentem toktok blong God) i go long wan ston (we i ripresentem wan hat we i gat hae tingting) mo i go long graon (we i ripresentem wan hat we i putum tingting i stap daon). Tugeta, ridim Alma 32:27–28. Tokbaot wanem i minim blong “save akseptem” (ves 27) toktok blong God insaed long hat blong yufala.
Droem ol pikja. Sam pipol oli lanem samting moa gud taem oli droem wan pikja blong wanem we oli stap lanem. Ol pikinini blong yu oli save droem wan sid we i gro i kam wan tri taem oli stadi long Alma 32.
Mi save prea long Papa long Heven eni taem, abaot eni samting.
Helpem ol pikinini blong yu blong faenem ol paragraf we ol tokbaot ol ples we yumi prea long olgeta (long Alma 33:4–11) mo ol samting we yumi save prea from (long Alma 34:17–27). Maet oli save droem ol pikja blong olgetawan bakegen we oli stap prea long ol ples ia. Serem ol eksperiens wetem olgeta wanwan long taem we Papa long Heven i harem ol prea blong yu. Yufala i save singsing wan singsing tu abaot prea, olsem “A Child’s Prayer” (Children’s Songbook, 12–13).
Blong kasem moa aedia, luk long magasin blong manis ia Fren magasin.
Pikja
frut antap long wan tri
“Mo from hadwok wetem strong tingting blong yufala, mo fet blong yufala, mo fasin blong yufala blong save wet longtaem wetem trutok ia blong givim gudfala kaekae long hem, … luk, i no longtaem bae yufala i save tekem frut blong hem, we praes blong hem i gudgudfala” (Alma 32:42).