Woman, i kam long Jen Tolman, mo oli no save mekem kopi

29 Julae–4 Ogis: “Yu Luk long God mo Stap Laef”

Alma 36–38

Taem Alma i bin luk fasin nogud raon long hem, hem i filim “harem nogud we i hevi tumas,” mo “fulap trabol long tingting blong sol blong hem” (Alma 8:14). Taem hem i tokbaot Ol Man blong Soram, hem i talem: “ol nogud fasin olsem we oli stap long medel blong ol pipol ia, i mekem sol blong mi i harem nogud” (Alma 31:30). Hem i filim wan semmak samting afta we hem i kambak long misin blong hem long Ol Man blong Soram—hem i bin luksave hat blong plante long Ol Man blong Nifae se “hat blong ol pipol i stat blong kam strong, mo oli stat blong kros from we trutok ia i strong,” nao hat blong hem i “harem nogud tumas” (Alma 35:15). ?Wanem nao Alma i mekem abaot wanem hem i bin luk mo filim? Simpol nomo. Hem i no slakem tingting blong hem, o tingting blong hem i no kam fasfas from situesen we wol i stap long hem. Be, “hem i bin mekem se ol boe blong hem oli mas kam tugeta” mo i bin tijim olgeta “wok we hem i gat long saed blong ol samting blong stret mo gud fasin” (Alma 35:16). Hem i tijim olgeta se: “I no gat narafala rod o wei we bae God i sevem man, be nomo, long mo tru long Kraes. … Luk, hem i toktok blong trutok mo stret mo gud fasin” (Alma 38:9).

Ol Aedia blong Stap Tij long Hom mo long Jos

Alma 36; 38:5–6

Mi save bon long God.

Sam long yumi nomo bae oli gat ol bigfala eksperiens olsem hemia blong Alma we i bin jenisim laef blong hem. Be evriwan oli mas “bon long God,” nomata se i stap hapen sloslo (Alma 36:23; 38:6). Taem yu stap ridim Alma 36, tingting long wanem i minim blong bon long God. Eksampol. Long proses ia blong bon long God, ?wanem nao yu filim abaot sin? ?Abaot Jisas Kraes? ?Olsem wanem nao taem yu stap bon long God i save jenisim wanem we yu mekem olsem risal blong ol mistek blong yu? ?Wanem ol narafala jenis we i kamaot long ol bilif mo ol aksen blong yu? Tingting hevi long wanem yu stap go tru long hem taem yu stap fesem ol jenis ia.

Luk tu long Mosaea 5:7; 27:25–26; Alma 5:14; 22:15; Hileman 3:35; “Yangfala Alma I Jenisim Laef i go long Lod” (vidio), Gospel Laebri.

Alma 36:12–24; 38:8–9

Jisas Kraes i mekem glad i tekem ples blong harem nogud.

Samtaem ol pipol oli fraet blong sakem sin from se oli luk se fasin blong sakem sin i bigfala panismen blong sin. ?Wanem nao yu ting se Alma bae i talem abaot hemia? Blong faenemaot hemia, yu save lukluk wanem we i defren long laef blong Alma bifo we hem i sakem sin (luk long Alma 36:6–17) wetem wanem hem i tokbaot abaot hemwan afta we hem i sakem sin (luk long ol ves 18–27). Folem wanem we i stap long Alma 36:17–18, ?olsem wanem nao Alma i kasem fogivnes ia?

Luk tu long Matiu S. Holland, “Naesfala Presen Ia we Pikinini blong God I Givim,” Liahona, Novemba 2020, 45–47.

Alma 37

Olgeta skripja, oli bin holemtaet olgeta “from wan waes stamba tingting.”

!Tingting long hamas i gud tumas blong gat merikel ia mo blesing blong gat olgeta skripja tedei! Taem yu stap ridim Alma 37, lukaot ol blesing we oli kam from ol skripja we yumi gat tedei (luk long, eksampol, ol ves 7–10, 18–19, 44–45).

Long Alma 37:38–47, Alma i komperem “toktok blong Kraes” olsem Liahona. Taem yu stap tingting long wanem hem i komperem ia, tingting long samfala wei we yu bin kasem eksperiens long merikel mo paoa blong ol tijing blong Kraes “evri dei” (Alma 37:40).

Luk tu long D. Todd Christofferson, “Blesing blong Skripja,” Liahona, Mei 2010, 32–35; “As I Search the Holy Scriptures,” Hym, namba 277; “Alma Testifies to His Son Helaman” (vidio), Gospel Laebri.

Ol skripja oli tijim yumi olsem wanem blong folem God

Alma 37:1–14

“Tru long ol smol mo simpol samting, ol bigfala samting oli kam blong hapen.”

Samtaem, bae yumi filim se ol problem blong yumi oli bigwan tumas mo oli fasfas tumas, mekem se ansa blong olgeta i mas bigwan mo i mas fasfas tu. Be, oltaem hemia i no wei ia nomo blong Lod. Taem yu stap ridim Alma 37:1–14, wanem nao yu stap filim mo tingting long hem abaot olsem wanem Hem i stap mekem wok blong Hem. Afta, yu save tingting hevi mo raetemdaon ol wei we yu bin luk prinsipol ia long laef blong yu.

Sapos bae yu mas tijim prinsipol ia long wan narafala man, ?wanem ol eksampol blong neja o wanem we i hapen long evri dei laef, we bae yu save yusum blong soem hemia? Yu save faenem sam long ol mesej blong Presiden Dallin H. Oaks “Ol Smol mo Simpol Samting,” (Liahona, Mei 2018, 89–92).

?Wanem ol smol mo simpol samting we oli save mekem yu kam moa kolosap long Papa long Heven mo Jisas Kraes?

Oltaem, ol “smol mo simpol” joes blong yumi i stap mekem ol bigfala jenis long laef blong yumi. Tingting blong jusumaot wan topik long Blong Ol Yut Oli Kam Strong: Wan Gaed blong Stap Mekem Ol Joes mo stap askem long yuwan ol kwestin olsem: ?Olsem wanem nao ol joes blong mi abaot hemia i jenisim mi mo ol pipol we oli stap raon long mi? ?Wanem ol smol mo ol simpol jenis we mi save mekem we bae i lidim mi blong kasem bigfala pis mo glad?

Luk tu long Michael A. Dunn, “Wan Pesen Gud Moa,” Liahona, Novemba 2021, 106–8; Gospel Topik “Fridom blong Mekem Joes,” Gospel Laebri.

Yusum ol smol mo simpol samting. Semmak olsem plante narafala samting long laef, blong stap tijim mo lanem gospel i save hapen tru long ol smol mo simpol aksen. Eksampol, ?Olsem wanem yu save yusum smol sol o is blong tijim paoa blong ol smol mo simpol samting? (luk long Matiu 5:13; 13:33).

Alma 37:35–37

“Askem advaes long Lod.”

Long Alma 37:35–37, lukaotem invitesen blong Alma we i go long pikinini boe blong hem Hileman. ?Wijwan long ol invitesen ia we yu filim spirit i talem long yu blong tekem aksen folem? Eksampol, yu save tingting hevi long wanem i minim blong “askem advaes long Lod” (ves 37). ?Wanem i hapen taem yu mekem hemia? ?Long wanem wei nao Hem i bin givim daereksen long yu blong mekem gudfala samting?

Alma 38

Blong stap serem testemoni blong mi abaot Jisas Kraes i save mekem ol pipol we mi lavem olgeta oli kam strong.

Ol toktok blong Alma we i go long pikinini boe blong hem Siblon i givim wan gudfala eksampol blong olsem wanem yumi save mekem i kam strong mo leftemap tingting blong ol pipol we yumi lavem olgeta taem yumi stap laef folem gospel. Blong stap stadi long Alma 38 bae i save givim sam aedia long yu blong stap helpem ol memba blong famli mo ol fren blong faenem paoa tru long Jisas Kraes. Raetemdaon wanem yu bin faenem.

Blong kasem moa aedia, luk long magasin blong manis ia Liahona mo Blong Ol Yut Oli Kam Strong .

Sam Aedia blong Tijim Ol Pikinini

Alma 36:6–24

Fasin blong sakem sin i mekem mi mi stap glad long Jisas Kraes.

• Blong helpem ol pikinini blong yu blong andastanem se fasin blong sakem sin i givim glad, yu save givim wan pis pepa long olgeta we i gat wan hapi fes long wan saed mo wan fes we i harem nogud long narafala saed. Askem olgeta blong lisin taem yu ridim o talem i sot Alma 36:13, 17–20 mo leftemap wan long tufala fes ia blong soem wanem we Alma i stap filim. Ol bigfala pikinini oli save raetemdaon ol toktok o ol paragraf we i tokbaot olsem wanem we Alma i bin filim. ?Wanem i mekem Alma i harem nogud, mo wanem i mekem hem i glad? Afta, yu save talem long olgeta abaot glad we yu bin filim taem yu sakem sin.

Alma 37:6–7

“Tru long ol smol mo simpol samting, ol bigfala samting oli kam blong hapen.”

• Ol pikinini blong yu oli save glad taem oli stap faenem ol smol aetem we oli save mekem ol bigfala samting oli hapen. Ol aetem olsem, wan batri, ki blong trak, o iven wan pleiplei doli we i givim kamfot long olgeta, oli save stap olsem ol eksampol. Yu save ridim tugeta Alma 37:6–7 mo tingting long sam smol mo simpol samting we God i wantem yumi blong mekem. ?Wanem nao ol bigfala samting we oli save hapen taem yumi obei ol smol o simpol komanmen ia?

• Ol pikinini blong yu oli save traem mekem wan samting olsem ia: stat blong fulumap wan kap wetem wanwan drop blong wota nomo. ?Olsem wanem hemia i go wetem Alma 37:6–7? Afta, yu save tokbaot olsem wanem ol “smol mo simpol samting” blong Lod,” olsem blong ridim ol skripja evri dei, oli olsem wanwan drop blong wota insaed long wan kap.

• Helpem ol pikinini blong tingting long ol wei we olgetawan oli bin mekem ol gudfala samting i hapen long hom, skul o jos. Singsing ia “‘Give,’ Said the Little Stream” (Children’s Songbook, 236) i soem tu prinsipol ia.

Alma 37:38–47

Ol skripja oli save helpem mi evri dei.

• ?Long wanem wei nao yu save helpem ol pikinini blong yu blong developem lav blong olgeta long toktok blong God, olsem we Alma i bin mekem blong Hileman? Tingting blong soem long olgeta wan pikja blong Liahona (olsem long Gospel Art Buk, namba 68) o invaetem olgeta blong droem wan mo stap serem wanem oli save abaot hemia (luk long Alma 37:38–47; 1 Nifae 16:10, 28–29). ?Long wanem wei nao ol skripja oli olsem Liahona?

Blong kasem moa aedia, luk long magasin blong manis ia Fren magasin.

Wan Enjel i Kamkamaot long Alma mo Ol Boe blong Mosaea, i kam long Clark Kelley Price