Tu Taosen Yang Soldia, i kam long Arnold Friberg

19–25 Ogis: “God I Sevem Olgeta wetem Bigfala Paoa blong Hem”

Alma 53–63

Taem oli komperem wetem ol ami blong Ol Man blong Leman, “smol ami” blong Hileman(Alma 56:33) we i gat ol yang man, oli no save gat janis nomo blong stanap agensem olgeta. Olgeta, namba blong olgeta i smol, be ol soldia blong Hileman “evriwan oli yang tumas” mo “oli neva bin faet” (Alma 56:46–47). Long sam wei, situesen blong olgeta i semmak long yumi we, samtaem, yumi filim se namba blong yumi i smol, mo yumi harem se las dei faet ia agensem Setan mo ol paoa blong devel long wol, i bigwan tumas.

Be ami blong Hileman i bin gat sam samting we i gat moa paoa ova long Ol Man blong Leman, mo hemia i no namba o skil blong faet. Oli bin jusum Hileman, wan profet, blong lidim olgeta (luk long Alma 53:19); ol mama blong olgeta oli bin tijim olgeta, se sapos oli no gat tu tingting, oli strong fulwan, nao God bae i sevem olgeta” (Alma 56:47); mo “fet blong olgeta we i bigwan tumas long samting ia we ol mama blong olgeta i bin tijim olgeta blong bilif.” Olsem risal, oli bin kasem proteksen “from bigfala merikel paoa blong God” (Alma 57:26 So taem yumi stap fesem ol jalenj blong laef, yumi save gat strong paoa long tingting. Ami blong Hileman oli tijim yumi se “i gat wan God we i stret, mo eni man we i no gat tu tingting, God bae i sevem olgeta wetem bigfala paoa blong hem” (Alma 57:26).

Ol Tingting blong Stap Lan long Hom mo long Jos

Alma 53:10–22; 56:43–49, 55–56; 57:20–27; 58:39–40

Blong gat fet long Lod i helpem mi blong winim fraet.

Sapos i no bin fet blong olgeta, ol yang soldia blong Hileman bae oli bin gat wan gud risen blong filim se oli fraet. Be from fet blong olgeta, oli bin gat moa risen blong gat strong paoa long tingting blong olgeta. Taem yu stap rid abaot olgeta long Alma 53–58, lukaotem ol samting we oli helpem yu blong fesem ol fraet blong yu tru fet long Jisas Kraes. Tingting blong lukluk nomo long ol ves ia: Alma 53:10–22; 56:43–49, 55–56; 57:20–27; mo 58:39–40. Tebol ia bae i save helpem yu blong rekodemdaon wanem we yu faenem.

Ol fasin blong ol soldia blong Hileman:
Ol posibol risen we i mekem se fet blong olgeta long Kraes i bin stap strong:
Wanem we oli mekem blong eksasaesem fet blong olgeta long Kraes:
Olsem wanem God i blesem olgeta:

Blong winim ol faet blong yumi long saed blong spirit, yumi tu yumi nidim paoa blong Jisas Kraes. ?Olsem wanem nao yu save kasem paoa blong Hem? Lukaotem ol ansa long mesej blong Presiden Russell M. Nelson long “Pulum Paoa blong Jisas Kraes Insaed long Laef blong Yumi” (Liahona, Mei 2017, 39–42). Yu save komperem kaonsel blong hem wetem ol samting we ol soldia blong Hileman oli bin mekem.

Afta we yu stadi long ol samting ia, tingting long ol faet blong yuwan long saed blong spirit. Raetemdaon wanem yu filim insperesen blong mekem blong praktisim fet blong yu long Jisas Kraes.

Luk tu long Neil L. Andersen, “Ol Kil,” Liahona, Novemba 2018, 83–86; “Stap Tru long Fet,” Hym, namba 254; “Drawing upon the Power of God in Our Lives” (vidio), Gospel Laebri; Gospel Topik, “Fet long Jisas Kraes,” Gospel Laebri.

Oli No Bin Gat Tu Tingting, i kam long Joseph Brickey

Alma 58:1–12, 31–3761

Ol man blong folem Jisas Kraes oli no kwik blong harem nogud long wanem we ol man i mekem nogud long olgeta.

Hileman mo Pahoran tufala i gat risen blong harem nogud from man i mekem nogud long tufala. Hileman i no stap kasem sapot blong ol ami blong hem, mo Pahoran, hem, Moronae i rong mo stap poenem fingga long hem, se hem nao i stap holemtaet sapot ia (luk long Alma 58:4–9, 31–32; 60). ?Wanem nao i tajem yu abaot wanem oli bin mekem from hemia, we i stap long Alma 58:1–12, 31–37 mo Alma 61 ?Yu, yu ting se from wanem nao oli bin ansa long wei ia?

Elda David A. Bednar i poenem se Pahoran i wan eksampol blong gat fasin blong no stap flas mo i bin tijim se “ol eksampol blong wanem we i moa naes mo gat bigfala mining oli faenem long laef blong Sevya, Hemwan” (“Meek mo Lowly of Heart,” Liahona, Mei 2018, 32). Tingting hevi long wanem Sevya i mekem blong soem fasin blong no stap flas. Luk long eksampol, Matiu 27:11–26; Luk 22:41–42; Jon 13:4–17. ?Olsem wanem nao yumi save folem eksampol blong hem?

Alma 60:7–14

Mi gat responsabiliti blong leftemap ol pipol we oli stap raon long mi.

Moronae i bin raetem se God bae i mekem se Pahoran bae i responsibol long aksen blong hem sapos Pahoran i save se hem i no lukluk long ol nid blong ol ami blong Ol Man blong Nifae. ?Wanem nao yu lanem long Alma 60:7–14 abaot fasin blong givhan long ol pipol we oli stap long nid? ?Wanem nao yu save mekem blong luksave mo givhan long ol nid blong ol narawan?

Alma 62:39–51

Sapos mi gat tingting i stap daon, ol jalenj blong laef oli save tanem hat blong mi i go long God.

Putum wan eg mo wan poteto we i no tan long wan wota we i stap boel blong helpem olgeta blong tingbaot olsem wanem yu save jusum blong hat blong yu i “sofsof” o “i kam strong” tru ol hadtaem blong yu. Taem we eg mo poteto blong yu i stap kuk yet, stadi long Alma 62:39–51, mo luksave olsem wanem ol pipol oli tingting long seves blong Hileman afta long longfala wo blong olgeta wetem Ol Man blong Leman. Afta, yu save komperem hemia wetem olsem wanem oli bin tingting long tijing blong hem, 13 yia bifo (luk long Alma 45:20–24). ?Olsem wanem nao Ol Man blong Nifae oli jenis tru long ol semmak hadtaem? Taem we eg mo poteto tufala i tan fulwan, brekem eg mo katem poteto. ?Olsem wanem nao wota we i boel i jenisim tufala i defren? ?Wanem nao yu stap lanem abaot olsem wanem yumi save jusum blong tekem aksen folem ol hadtaem? ?Olsem wanem nao yu save tanem yu i go long God long taem blong ol hadtaem blong yu?

Tekem ol eksperiens insaed long hom. Sapos yu tijim wan klas long Jos, askem ol memba blong klas ia blong serem wanem oli bin lanem long hom. Eksampol, faenemaot wanem oli bin lanem abaot ol hadtaem mo fasin blong putum tingting i stap daon olsem eg we oli boelem mo ol poteto.

Blong moa tingting, luk long ol namba blong manis ia Liahona mo Blong Ol Yut Oli Kam Strong magasin.

Sam Tingting blong Tijim Ol Pikinini

Alma 53:20–21; 56:47–48

Mi save stap fetful long God olsem ol yang soldia blong Hileman.

• Yu save yusum plante risos blong serem stori blong ol soldia blong Hileman, we i tekem tu ol pikja long aotlaen ia mo “Japta 34: Hileman mo 2,000 Yang Soldia” (Ol Stori long Buk blong Momon, 93–94). Aktiviti pej blong wik ia i save helpem ol pikinini blong yu tingting long ol wei oli save kam olsem ol ami blong Hileman. Tingting blong serem sam long ol kwaliti blong ol yang soldia long Alma 53:20–21 blong mekem oli stat. Yu save singsing tu tugeta “We’ll Bring the World His Truth” (Children’s Songbook, 172–73).

Alma 56:45–48; 57:21

Mi save stap fetful long wanem we papa mo mama blong mi tufala i tijim folem stret mo gud fasin.

• Ol yang soldia blong Hileman oli bin lukluk long fet blong mama blong olgeta taem oli bin fesem wan bigfala jalenj. Maet yu save ridim Alma 56:46–48 wetem ol pikinini blong yu mo invaetem olgeta blong lisin long wanem ol mama blong ol yang man oli tijim abaot fet. Yu save askem olgeta long wanem oli bin lanem long papa mo mama blong olgeta—o ol narafala adalt we oli stap fetful—long Sevya. ?From wanem hem i impoten blong obei “stret gud”? (Alma 57:21).

• ?Olsem wanem nao yu save—olsem ol mama blong ol yang man—i mekemsua se ol pikinini blong yu oli save fet blong yu long God? Wan wei blong serem olsem wanem fet blong yu i bin jenisim laef blong yu. Eksampol, long wanem wei nao Hem i bin “mekem yu kam fri” taem we yu “no gat tu tingting”?

Sid blong Fet, i kam long Jay Ward

Alma 53:10–18

Mi save kipim ol kavenan blong mi wetem Papa long Heven.

• Maet ol pikinini blong yu oli save tokbaot wan taem we wan i bin mekem wan promes wetem olgeta. ?Wanem nao oli filim taem oli kipim promes blong olgeta? Yu save ridim Alma 53:10–18 mo invaetem ol pikinini blong lukaotem olsem wanem nao Hileman, ol pipol blong Amon, oli bin mekem mo kipim ol promes blong olgeta, o ol kavenan blong olgeta. Yu save serem olsem wanem Papa long Heven i blesem yu taem yu kipim ol kavenan blong yu.

Alma 61:3–14

Mi save jusum blong mi no kros.

Tingting blong stap invaetem ol pikinini blong yu blong tingbaot wan taem wan i poenem fingga long olgeta from wan samting we i no olgeta oli mekem. Talem long olgeta olsem wanem hemia i hapen long Pahoran (luk long Alma 60–61; luk tu long “Japta 35: Kapten Moronae mo Pahoran,” Ol Stori long Buk blong Momon, 95–97). Blong lanem abaot wei we Pahoran i mekem, wanwan i ridim wan ves aot long Alma 61:3–14 ?Wanem nao Pahoran i bin mekem taem Moronae i bin poenem fingga long hem? (luk long Alma 61:2–3, 8–9). ?Wanem nao yumi lanem abaot fasin blong fogiv long eksampol blong Sevya? (luk long Luk 23:34).

Blong moa tingting, luk long namba blong manis ia Fren magasin.

Hem i tru, Sir, Evriwan I Stap mo Oli Kaontem Olgeta Evriwan, i kam long Clark Kelley Price.