“5–11 Ogis: ‘Bigfala Plan blong Hapines.’ Alma 39–42,” Kam Folem Mi—Blong Hom mo Jos: Buk blong Momon 2024 (2023)
“5–11 Ogis. Alma 39–42,” Kam Folem Mi—Blong Hom mo Jos: 2024 (2023)
Hem I Girap Finis, i kam long Del Parson
5–11 Ogis: “Bigfala Plan blong Hapines”
Alma 39–42
Sapos wan we yu lavem i mekem wan series mistek, bae i had blong save olsem wanem blong help o mekem samting. Wan samting we i mekem se Alma 39–42 i impoten tumas, hem i we i soemaot olsem wanem, we, Alma—wan disaepol blong Kraes, we long wan taem i bin gat ol bigfala mistek blong hem blong hem i sakem sin from—i bin handelem kaen situesen olsem. Boe blong Alma, Korianton i bin komitim sin long saed blong seks, mo Alma olsem we hem i bin lanem blong mekem long taem blong seves blong hem, i trastem paoa blong tru doktrin blong givim long boe hem wan lukluk we i no save finis mo leftemap tingting blong fasin blong sakem sin (luk long Alma 4:19; 31:5). Long ol japta ia, yumi luk we Alma i tok stret i no agri nating wetem sin, mo yumi luk fasin blong hem we i kaen mo lav blong hem long Korianton. Mo long en, yumi luksave we Alma i gat tras se Sevya “bae i kam blong tekemaot ol sin blong wol; yes, hem i kam talem gud nius blong fasin blong sevem man, long ol pipol blong hem” (Alma 39:15). Taem we Korianton, long en, i gobak long wok blong givim seves long God, (luk long Alma 49:30) hemia i save givim yumi hop blong kasem fogivnes mo fasin blong pemaot man taem yumi stap wari abaot ol sin blong yumiwan mo ol sin blong wan we yumi lavem (luk long Alma 42:29).
Luk tu long “Alma Counsels His Sons” (vidio), Gospel Laebri.
Ol Tingting blong Stap Lanem Samting long Hom mo long Jos
Mi save stap longwe long sin long saed blong seks.
Kaonsel blong Alma we i go long pikinini boe blong hem Korianton insaed long Alma 39 i givim wan bigfala janis blong lanem abaot ol nogud risal blong sin long saed blong seks, we i tekem tu, ponografi. Maet, wanem we i moa impoten i we hemia i save helpem yu andastanem fasin blong fogiv we Sevya i givim mo blong kam klin tru taem wan i sakem sin. Ol kwestin mo ol aktiviti ia oli save help:
-
?Wanem mistek nao i lidim Korianton blong brekem loa blong jastiti? (luk long Alma 39:2–4, 8–9). ?Wanem i ol risal blong ol aksen blong hem? (luk long ol ves 5–13). ?Wanem pruf nao yumi gat we i soem se Korianton i sakem sin? (luk long Alma 42:31; 49:30; 48:18). ?Wanem nao yu lanem abaot Sevya long eksperiens ia?
-
Ridim ol pej 19–20 blong Blong Ol Yut Oli Kam Strong: Wan Gaed blong Stap Mekem Ol Joes. Afta, raetem wanem tingting blong yu abaot wanem i ponografi, from wanem hem i denja tumas, wanem bae yu mekem taem yu fesem we yu no plan from. (Luk tu long Matiu 5:27–28 mo Doktrin mo Ol Kavenan 63:16.)
-
?Wanem nao bae yu talem long wan fren blong eksplenem from wanem yu jusum blong stap longwe long ponografi mo laef folem loa blong jastiti? ?Wanem ol niu tingting we yu save serem we i stap long “Bodi blong Yu I Tabu” long Blong Ol Yut Oli Kam Strong: Wan Gaed blong Stap Mekem Ol Joes (ol pej 22–29)?
-
Tingting blong wajem vidio “To Look Upon” (Gospel Laebri). Stopem vidio wanwan taem we Deved i save mekem wan defren joes. ?Olsem wanem nao ol joes blong Deved oli semmak long ol joes we maet yu stap fesem?
Stop smoltaem blong tingting hevi. Taem yu stap wajem wan vidio, long taem we yu stap tij o stadi blong yuwan, stopem vidio wanwan taem blong askem “?Wanem nao mi stap lanem?” Hemia i save invaetem ol niu lukluk we i kam tru long Tabu Spirit.
Luk tu long Bradley R. Wilcox, “Blong Stap Klin Inaf I No Minim se Yu Mas Klin Evriwan,” Liahona, Novemba 2021, 61–67; “Ponografi” long “Life Help” seleksen long Gospel Laebri.
?Wanem bae i hapen taem bae mi ded?
Korianton i gat sam kwestin abaot wanem bae i hapen afta long ded. Ol wari blong hem i lidim Alma blong tijim ol prinsipol we i stap long Alma 40–41. Taem yu stadi, mekem wan lis blong ol trutok we yu faenem abaot ol samting we oli olsem spirit wol. Laef bakegen long ded, mo jajmen. Tingting blong stap ridim ol japta ia wetem lukluk blong wan man we i olsem Korianton, i nidim blong sakem sin—from long en, hemia i tru blong yumi evriwan.
Mi save lukaotem ol ansa blong ol kwestin blong mi wetem fet long Jisas Kraes.
Samtaem, yumi save ting se ol profet oli save ansa long evri kwestin blong gospel. Be luk ol kwestin blong Alma we hem i no kasem ansa blong olgeta long japta 40. ?Wanem nao hem i bin mekem blong faenem ol ansa? ?Wanem nao hem i bin mekem taem hem i no kasem wan ansa? ?Olsem wanem nao eksampol blong Alma i save helpem yu?
Prea i wan wei we yumi save faenem ol ansa long ol kwestin long saed blong gospel
Atonmen blong Jisas Kraes i mekem fasin blong pemaot man i posibol.
Korianton i bin biliv se panismen from ol sin, i no wan stret samting (luk long Alma 42:1 Long Alma 42, ?olsem wanem Alma i tokbaot wari blong hem? Yu save oganaesem ol paragraf long japta ia long tu grup: “God we i mekem samting i fea” mo “God we i gat bigfala sore.” ?Long wanem wei nao Atonmen blong Sevya i mekem jastis mo sore i posibol? Lukaotem sam moa niu lukluk insaed long vidio “The Mediator” (Gospel Laebri).
Luk tu long “How Great the Wisdom mo the Love,” Hym, 195.
Blong moa tingting, luk long ol namba blong manis ia Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Ol gudfala eksampol blong mi i save lidim ol narafala man oli kam long Kraes.
-
Kaonsel blong Alma i go long Korianton i save helpem ol pikinini blong yu blong oli andastanem hamas i impoten blong stap wan gudfala eksampol. Tingting blong ridim tugeta Alma 39:1. ?Long wanem wei nao brata blong Korianton, Siblon i bin wan gudfala eksampol? Askem ol pikinini blong faenem sam moa ansa long kwestin ia long Alma 38:2–4.
-
Yu save pleiplei long wan gem we yu mo ol pikinini blong yu i save gat janis blong stap folem o kopi wanwan long olgeta. Yusum gem ia blong soem olsem wanem ol aksen blong yumi i save helpem ol narawan blong mekem ol gud joes. Singsing tugeta “I Am like a Star” (Children’s Songbook, 163), mo helpem ol pikinini blong yu blong tingting long ol wei we oli save stap olsem ol gudfala eksampol.
-
Tekem wan tojlaet o pikja blong san, yu save komperem laet ia long paoa blong wan gud eksampol. Yu mo pikinini blong yu i save lukluk ol pikja blong Jisas we i stap mekem ol gudfala samting, mo tokbaot eksampol ia we Hem i putum blong yumi. Ol vidio “Shine Your Light So Others May See” mo “Lessons I Learned as a Boy”oli save helpem ol pikinini blong yu blong toktok raon long olsem wanem ol eksampol blong olgeta i save lidim ol pipol oli kam long Kraes.
From Jisas Kraes, mi save sakem sin taem mi mekem ol mistek.
-
Yu no tokbaot tumas long ditel se wanem i ol sin blong hem, be eksplenem se Korianton i bin mekem wan rong joes. ?Wanem nao bae yumi save talem long hem we bae i helpem hem? Tingting blong stap ridim Alma 39:9 long ol pikinini blong yu, mo helpem olgeta blong andastanem wanem sakem sin mo lego fogud i minim. Testifae se fasin blong sakem sin, i posibol tru long Jisas Kraes mo Atonmen blong Hem.
-
Hemia wan lesen we yu save yusum wan samting blong soem glad we i kam tru fasin blong sakem sin: Givim wan hevi samting long wan pikinini i holem, mo semtaem yu talem stori blong wan we i bin mekem wan nogud samting mo i harem nogud from. Talem long ol pikinini, se samting ia i olsem ol nogud filing we yumi gat taem yumi mekem wan mistek. Tekemaot hevi samting ia long pikinini ia, mo semtaem testifae se Papa long Heven mo Jisas Kraes, Tufala i save tekemaot hevi ia, nogud filing ia, mo Tufala i save helpem yumi blong kam moa gud taem yumi sakem sin.
Afta long ded, spirit blong yumi oli go long spirit wol, oli wet long Laef Bakegen long Ded mo Jajmen.
-
Hem i stret nomo blong stap askem yumiwan se wanem nao i hapen long yumi afta we yumi ded. ?Wanem nao yu save mekem blong helpem ol pikinini blong yu blong oli save faenem ol ansa we i kam tru long insperesen? Yu save raetem ded, spirit wol (paradaes mo spirit prisen), laef bakegen long ded, mo jajmen long ol seperet pis blong pepa. Helpem ol pikinini blong yu blong andastanem mining blong ol toktok ia. Taem yufala i ridim tugeta Alma 40:6–7, 11–14, 21–23, ol pikinini blong yu oli save putum long oda ol toktok ia olsem we i stap long ol ves ia.
-
Ol bigfala pikinini oli save lanem samting taem oli stap lukaotem ol ansa blong ol kwestin long Alma 40:6–7, 11–14, 21–23. Tingting blong stap askem ol kwestin long ol pikinini blong yu we ol ansa blong olgeta i stap long ol ves, olsem, “?Bodi blong mi bae i olsem wanem taem mi laef bakegen long ded?” Invaetem olgeta blong lukaotem ol ansa insaed long ol ves we oli stret.
Meri mo Lod we I Laef Bakegen long Ded, i kam long Harry Anderson
-
?Ol pikinini blong yu oli save wan we i ded finis? Maet yu save talem i sot stori blong man o woman ia. Serem testemoni blong yu se, bae wan dei, man o woman ia—mo evri narawan—bae oli laef bakegen long ded from Jisas Kraes. Sapos i nid, yusum aktiviti pej blong wik ia blong eksplenem se i minim wanem blong laef bakegen long ded.
Blong moa tingting, luk long namba blong manis ia Fren magasin.
Hem ia, Hem I Pikinini blong Mi, i kam long Elspeth Caitlin Young