Alma 53; 56–57

Wan Yang Ami

Ol boe we oli trastem God

Ol Man blong Nifae oli stap long wo wetem Ol Man blong Leman mo oli nidim help. Ol Antae-Nifae-Lihae oli wantem blong help. Be oli bin mekem wan promes long Lod blong no faet. Tu taosen blong ol yang boe blong olgeta oli no bin mekem promes ia. Be, ol boe ia oli promes blong faet blong protektem ol famli blong olgeta. Ol boe ia oli singaotem olgeta ol yang soldia.

Alma 53:8, 13–18, 22; 56:1–8

Ol yang soldia ia oli jusum profet Hileman blong lidim olgeta. Oli wan smol grup nomo taem yu komperem olgeta wetem bigfala ami blong Ol Man blong Leman. Be Hileman i save se ol yang soldia ia oli ones, oli no fraet, mo oli fetful. Wetem Hileman we i stap lidim olgeta, oli go blong helpem Ol Man blong Nifae.

Alma 53:19–22; 56:9–10, 17, 19

Ol soldia blong Ol Man blong Nifae oli taet. Be taem ol yangfala soldia oli kam, Ol Man blong Nifae oli hapi. Yangfala ami ia i givim hop mo paoa long olgeta. Tugeta, oli rere blong faet agensem Ol Man blong Leman. Ol papa mo mama blong ol yangfala soldia ia oli help tu blong karem ol kaekae mo ol samting we oli nidim i kam long olgeta.

Alma 56:16–17, 19–20, 22, 27

Ol Man blong Leman oli bin holemtaet plante siti mo oli kipim ol ami blong olgeta long hem. Ol lida blong Ol Man blong Nifae oli wantem mekem Ol Man blong Leman oli aot mo lego wan long ol siti ia. Oli mekem wan plan mo askem ol yangfala soldia blong help.

Alma 56:18–30

Ol yang soldia oli priten blong stap karem ol kaekae i go long Ol Man blong Nifae we oli stap long wan siti we i stap kolosap. Taem Ol Man blong Leman oli luk smol grup ia, oli lego siti blong olgeta mo ronem ol yang soldia ia. Ol Man blong Leman oli ting se bae i isi blong kasem ol soldia ia.

Alma 56:30–36

Ol yang soldia oli ronwe long Ol Man blong Leman. Afta wan ami blong Ol Man blong Nifae i stat blong ronem Ol Man blong Leman. Ol Man blong Leman oli wantem kasem ol yang soldia bifo Ol Man blong Nifae i kasem olgeta. Ol Man blong Nifae oli luk se ol yang soldia oli stap long problem, mekem se oli maj moa hariap blong helpem olgeta.

Alma 56:36–41

Afta long sam taem, ol yang soldia oli no save luk Ol Man blong Leman. Oli stat blong tingting sapos Ol Man blong Nifae oli bin kasem Ol Man blong Leman mo oli stap faet.

Alma 56:42–43

Hileman i wari. Hem i ting se maet Ol Man blong Leman oli stap traem blong blokem olgeta. Hem i askem ol yang soldia blong hem sapos oli save go faet agensem Ol Man blong Leman.

Alma 56:43–44

Ol yang soldia ia oli tingbaot wanem ol mama blong olgeta oli bin tijim long olgeta. Ol mama blong olgeta oli bin tijim olgeta blong trastem God mo blong no gat tu tingting, from se bae Hem i kipim olgeta i sef. Ol boe ia oli biliv long God mo wantem kipim promes blong olgeta blong protektem ol famli blong olgeta. Oli talem long Hileman se oli rere blong go mo faet.

Alma 56:46–48

Hileman i sapraes tumas long strong tingting blong olgeta. Hem i lidim olgeta i gobak blong faet agensem Ol Man blong Leman.

Alma 56:45, 49

Ol yang soldia oli luk Ol Man blong Leman mo Nifae oli stap faet. Ol Man blong Nifae oli taet. Kolosap oli stap lus nao taem ol yangfala soldia ia oli kam.

Alma 56:49–52

Ol yang soldia oli faet wetem paoa blong God. Ol Man blong Leman oli fraet long olgeta mo oli stop blong faet. !Ol yang soldia oli bin help blong winim faet ia!

Alma 56:52–54, 56

Long faet ia, plante Man blong Nifae mo Leman oli bin ded. Hileman i wari se maet sam long ol yangfala soldia blong hem oli bin ded tu. Be afta long faet, Hileman i kaontem olgeta evriwan. Hem i glad tumas blong luk se i nogat wan long ol yang soldia ia oli kilim ded hem. God i bin protektem olgeta.

Alma 56:55–56

Plante moa boe oli joenem ol yang soldia. Oli gohed blong stap helpem Ol Man blong Nifae blong faet. Long ol nara faet ia, evri yang soldia ia i kasem kil, be i nogat wan i ded. Oli bin tingbaot wanem we ol mama blong olgeta oli bin tijim long olgeta. Oli bin trastem God, mo Hem i bin protektem olgeta.

Alma 57:6, 19–27; 58:39–40