1 Nifae 17–18

Wan Sip blong Krosem Solwota

Stap rere blong go long graon blong promes

Baontiful i wan graon we i fulap wetem ol frut mo hani. Hem i wan naesfala ples blong laef long hem. Famli blong Lihae mo Saraea oli bin laef kolosap long solwota mo oli bin gat evri samting we oli nidim.

1 Nifae 17:5–6

Afta long plante dei, Lod i bin talem long Nifae blong go long wan maonten blong prea. Long ples ia, Lod i talem long Nifae blong bildim wan sip blong karem famli blong hem krosem solwota.

1 Nifae 17:7–8

Lod i bin soem long Nifae olsem wanem blong bildim sip. Be Nifae i no bin save weaples blong faenem aean blong mekem ol tul. Lod i soem long Nifae weaples blong faenem aean.

1 Nifae 17:8–10

Afta, Nifae i mekem wan faea blong mekem ol tul. Leman mo Lemyul oli wajem brata blong tufala Nifae. Tufala i no wantem helpem hem blong bildim sip. Tufala i ting se hem i no wan gudfala tingting blong traem blong krosem solwota.

1 Nifae 17:11, 16–18

Leman mo Lemyul oli no bilivim se Lod i bin talem long Nifae blong bildim wan sip. Nifae i askem tufala from wanem tufala i no gat fet yet long Lod. Hem i rimaenem ol brata blong hem se tufala i bin luk wan enjel mo tufala i save abaot paoa blong Lod. Laman mo Lemyul tufala i kros tumas mekem se tufala i wantem kilim Nifae.

1 Nifae 17:18–19, 45–48

Be Nifae i fulap long paoa blong God. Nifae i givim woning long Leman mo Lemyul blong tufala i no tajem hem. Tufala i bin fraet mo tufala i no traem nomo blong tajem Nifae blong plante dei. Afta Lod i bin talem long Nifae blong tajem ol brata blong hem. Taem Nifae i tajem tufala, paoa blong Lod i mekem tufala i seksek.

1 Nifae 17:48, 52–55

Leman mo Lemyul i wosipim Lod mo help blong bildim sip. Nifae i prea long Lod plante taem blong kasem help. Sip we famli blong Nifae i bildim i naes tumas. Afta long plante dei, oli bin finis blong bildim sip, mo oli bin luk se hem i gud. Famli blong Nifae i save se Lod i bin helpem olgeta.

1 Nifae 18:1–4