Mosaea 25–28; Alma 36

Yangfala Alma

Wan Bigfala Jenis

King Mosaea i givim paoa long Alma blong lidim Jos long Sarahemla. Alma i bin tijim ol pipol blong sakem sin mo gat fet long Lod.

Mosaea 25:19–24; 26

Alma i gat wan boe we nem blong hem tu Alma. Yangfala Alma i no biliv long wanem we papa blong hem i tijim.

Mosaea 27:8

Mosaea i bin gat ol boe we olgeta tu oli no biliv long Lod. Oli fren wetem Yangfala Alma. Olgeta evriwan oli wantem ol pipol blong lego Jos. Alma mo ol boe blong Mosaea oli bin lidim plante pipol blong mekem ol samting we i no folem ol komanmen blong God.

Mosaea 27:9–10; Alma 36:6

Wan dei, Lod i sendem wan enjel blong stopem olgeta. Enjel i talem long olgeta blong oli stop blong stap traem blong spolem Jos. Alma mo ol boe blong Mosaea oli fraet tumas mo oli foldaon long graon.

Mosaea 27:11–18; Alma 36:6–9

Alma i no save toktok o muv blong tri dei mo tri naet. Hem i filim nogud tumas from evri rong samting we hem i bin mekem. Hem i wari tu from se hem i bin lidim plante pipol i gowe long Lod.

Mosaea 27:19; Alma 36:10–16

Alma i filim fulap harem nogud from ol sin blong hem. Afta hem i tingbaot papa blong hem we i stap tokbaot Jisas Kraes, Pikinini blong God.

Alma 36:17

Alma i prea long Jisas blong Hem i fogivim hem. Afta we hem i prea, hem i nomo save tingbaot harem nogud blong hem. Hem i save se Lod i bin fogivim hem. Hem i nomo filim nogud abaot ol sin blong hem bakegen. Be, Alma i filim glad tumas.

Mosaea 27:24, 28–29; Alma 36:18–22

Alma i karembak paoa blong hem. Hem mo ol boe blong Mosaea oli jusum blong sakem sin mo stretem evri harem nogud we oli bin mekem. Oli givim seves long Lod stat long taem ia i go taem oli stap helpem ol narawan blong sakem sin. Oli bin travel tru long graon we Mosaea i rul long hem mo tijim ol pipol abaot Jisas.

Mosaea 27:20–24, 32–37; Alma 36:23–26

Alma mo ol boe blong Mosaea oli wantem blong serem glad ia we ol tijing blong Jisas i karem i kam insaed long laef blong olgeta. Oli wokhad blong givim seves long Lod mo ol pipol. Ol boe blong Mosaea oli jusum blong aot mo tijim Ol Man blong Leman abaot Jisas. Alma i jusum blong stap mo gohed blong tijim Ol Man blong Nifae.

Mosaea 27:32–37; 28:1–10; 29:42–43