Alma 14

Alma mo Amulek long kalabus

Fet long Lod long taem blong ol hadtaem

Alma mo Amulek i bin tijim gospel long siti blong Amonaea. Sam pipol oli bin biliv long Lod mo oli sakem sin. Be plante nara pipol oli bin kros long Alma mo Amulek mo oli wantem blong spolem tufala. Ol pipol ia we oli kros oli fasem Alma mo Amulek mo oli tekem tufala i go long jif jaj blong siti ia.

Alma 8:29–30; 14:1–4

Jif jaj i no bin bilivim se ol pipol blong hem oli nidim blong sakem sin. Ol pipol oli kros long Alma mo Amulek. Oli mekem ol pipol we oli biliv long wanem we Alma mo Amulek i tijim, blong oli aot long siti. Afta oli sakem ol woman mo pikinini we oli biliv long Lod, i go long faea.

Alma 14:3, 5–9, 14, 16

Amulek i harem nogud tumas taem hem i luk ol pipol oli stap harem nogud. Hem i askem Alma blong yusum paoa blong God blong sevem olgeta. Be Alma i talem se Spirit blong God i no letem hem blong mekem olsem. Hem i talem long Amulek se ol woman mo ol pikinini ia bae oli stap wetem Lod. Lod bae i jajem ol pipol we oli kilim ded olgeta.

Alma 14:9–11

Jif jaj i jikim Alma mo Amulek from Lod i no bin protektem ol woman mo ol pikinini. Hem i sendem Alma mo Amulek i go long kalabus.

Alma 14:14–17

Afta long tri dei, jif jaj i go long kalabus wetem ol giaman pris blong hem. Oli bin askem fulap kwestin. Be Alma mo Amulek oli no wantem ansarem ol kwestin ia.

Alma 14:18–19

Jif jaj mo ol pris blong hem oli bin mekem ol nogud samting long Alma mo Amulek. Oli no bin givim eni kaekae mo wota tu long Alma mo Amulek. Mo oli jikim wanem we Alma mo Amulek i bin stap tijim.

Alma 14:19–22

Alma mo Amulek oli bin safa blong plante dei. Jif jaj i kambak bakegen wetem ol pris blong hem. Hem i talem long Alma mo Amulek se sapos oli gat paoa blong God, bae oli brekem ol rop ia we oli fasem tufala long hem. Afta bae hem i bilivim tufala.

Alma 14:23–24

Alma mo Amulek i filim paoa blong God. Tufala i stanap. Alma i gat fet long Lod mo i askem paoa blong brekem ol rop.

Alma 14:25–26

Alma mo Amulek oli brekem ol rop. Jif jaj mo ol pris blong hem oli fraet. Oli traem blong ronwe, be afta graon i stat blong seksek.

Alma 14:26–27

Ol wol blong kalabus oli foldaon long jif jaj mo ol pris blong hem, mo oli ded. Be Lod i kipim Alma mo Amulek i sef. Taem ol pipol oli harem noes, oli ron blong go luk wanem i stap hapen. Alma mo Amulek nomo tufala i wokbaot i kamaot long kalabus. Ol pipol oli fraet tumas long Alma mo Amulek mekem se oli ronwe.

Alma 14:27–29