“Alma, Amulek, mo Siesrom,” Ol Stori blong Buk blong Momon (2023)
Alma, Amulek, mo Siesrom
Stap jusum blong biliv mo obei long God
Alma i luk se plante long memba blong Jos oli no stap obei long ol komanmen blong God. Mekem se Alma i aot long wan siti i go long narawan blong stap tijim toktok blong God. Plante pipol oli bin sakem sin. Afta Alma i kam long wan siti we oli singaotem Amonaeha. Ol pipol long we oli no lisin long hem. Oli spet long hem mo ronemaot hem long siti.
Alma i harem nogud taem hem i stap aot long siti ia. Hem i wari long ol pipol ia. Afta, wan enjel i kam long hem. Enjel ia i talem se Alma i save hapi from se hem i bin obei long God. Enjel i talem long Alma blong gobak long siti ia mo wonem ol pipol ia. Sapos oli no sakem sin, bae oli prapa spolem olgeta. Alma i hariap i gobak.
Taem Alma i kam long siti ia, hem i hanggri tumas. Hem i bin lego kaekae blong plante dei. Alma i askem kaekae long wan man we nem blong hem Amulek.
Amulek i talem long Alma abaot wan visen we hem i bin luk. Long visen ia, wan enjel i bin talem long Amulek se Alma i wan profet blong God. Amulek i wantem blong helpem Alma.
Amulek i tekem Alma i go long haos mo givim kaekae long hem blong i kakae. Alma i stap long haos blong Amulek blong plante dei. God i blesem Amulek mo famli blong hem. Afta, God i talem long Alma mo Amulek blong talem long ol pipol long siti blong sakem sin. Alma mo Amulek tufala i obei. God i givim paoa blong Hem long tufala blong helpem tufala blong tij.
Wan long ol pipol we i bin harem tufala i stap tij, nem blong hem Siesrom. Hem i save fulap samting mo i wantem blong trikim Alma mo Amulek. Siesrom i talem long Amulek se bae hem i givim plante mane long hem sapos hem i talem se God i no tru. Hem i wantem Amulek blong i giaman mekem se bae ol pipol oli no bilivim wanem we Amulek mo Alma i bin stap tijim.
Alma 10:29–32; 11:21–25; 12:4–6
Be Amulek i no save giaman abaot God. Hem i talem se God i tru. Amulek mo Alma tufala i save ol tingting blong Siesrom. Siesrom i sapraes tumas mo askem plante kwestin long tufala. Tufala i tijim Siesrom se God i gat wan plan blong evri pipol. Siesrom i bin bilivim wanem we Alma mo Amulek i tijim abaot God mo Jisas Kraes.
Alma 11:23–46; 12:1–18, 24–34; 14:6–7; 15:6–7
Siesrom i sori tumas from ol nogud samting we hem i bin mekem. Hem i kam sik tumas. Alma mo Amulek i visitim hem. Alma i talem se Siesrom i save kam oraet from fet blong hem long Jisas. Alma i askem God blong i hilim Siesrom. Siesrom i jiam long ol leg blong hem. !Hem i kam oraet! Hem i kasem baptaes mo i tijim ol pipol long ful laef blong hem.