“Abaot Buk blong Momon,” Ol Stori blong Buk blong Momon (2023)
Abaot Buk blong Momon
Jisas Kraes mo ol pipol blong Hem long Ol Amerika
Buk blong Momon i skripja. Hem i tijim long yumi abaot Lod Jisas Kraes mo visit blong Hem i go long Ol Amerika longtaem bifo. Yumi save lanem abaot gospel blong Jisas long Buk blong Momon. Hem i tijim yumi olsem wanem blong gat pis naoia mo olsem wanem yumi save laef wetem God mo Jisas sam dei bakegen.
Taetol pej blong Buk blong Momon; fas toktok blong Buk blong Momon; 3 Nifae 11
Ol profet blong God oli bin raetem Buk blong Momon. Oli bin raet long ol aean pej we oli singaotem ol plet. Ol stori mo testemoni blong olgeta oli helpem yumi blong gat fet long Jisas. Oli bin raet abaot plante grup blong ol pipol we oli bin laef long Ol Amerika long taem bifo.
Taetol Pej blong Buk blong Momon; fas toktok blong Buk blong Momon
Wan grup oli kam long Jerusalem i go long Ol Amerika samples 600 yia bifo Jisas i bon i kam long wol. Oli kam tu nesen we oli singaotem olgeta Ol Man blong Leman mo Ol Man blong Nifae.
Fas Toktok long Buk blong Momon; 1 Nifae 1:4
Fastaem bifo, wan narafala grup oli kam long Taoa blong Babel i go long Ol Amerika. Oli singaotem olgeta Ol Man blong Jared.
Fas Toktok long Buk blong Momon; Ita 1:33–43
Ol profet blong God oli bin tijim ol pipol. Taem ol pipol oli lisin mo obei long ol komanmen blong God, Hem i helpem olgeta. Ol profet oli bin tijim abaot Jisas mo talem se bae Hem i bon i kam long wol long Jerusalem. Ol Man Nifae mo Ol Man Leman oli bin lanem se bae Jisas i visitim olgeta afta we Hem i ded.
2 Nifae 1:20; 25:12–14; 26:1, 3, 9; Mosaea 3:5–11; Alma 7:9–13; Hileman 3
Jisas i bin kam olsem we ol profet oli bin talem. Afta we Jisas i bin ded mo i bin laef bakegen long ded, Hem i bin visitim ol pipol. Hem i letem wanwan man mo woman i tajem ol mak blong nil long ol han mo leg blong Hem. Oli bin save se Jisas i Pikinini blong God. Hem i bin tijim gospel blong Hem, mo ol pipol oli bin raetemdaon. Oli bin tokbaot visit blong Jisas blong plante yia.
3 Nifae 11:7–15, 31–41; 16:4; 4 Nifae 1:1–6, 13–22
Momon i bin wan profet we i laef sam handred yia afta we Jisas i bin visitim Amerika. Long taem blong laef blong Momon, ol pipol oli bin stop blong stap folem Lod. Momon i bin gat ol raeting blong ol profet we oli bin laef fastaem long hem. Hem i putum plante long ol raeting blong olgeta long wan set blong ol buk. Ol plet [buk] ia oli kam Buk blong Momon.
Fas Toktok long Buk blong Momon; Ol Toktok blong Momon 1:2–9; Momon 1:2–4, 13–17
Bifo Momon i ded, hem i bin givim ol buk i go long boe blong hem Moronae. Long taem blong laef blong Moronae, ol pipol oli bin stap mekem ol samting we i nogud tumas. Oli wantem kilimded eniwan we i biliv long Jisas. Moronae i bin wantem blong helpem ol pipol long fiuja, mekem se hem i raetem sam moa samting long ol buk mo i berem olgeta blong kipim olgeta i sef.
Fas Toktok long Buk blong Momon; Ol Toktok blong Momon 1:1–2; Momon 8:1–4, 14–16; Moronae 1
Plante yia afta, long 1823, Moronae i kam olsem wan enjel long Profet Josef Smit. Moronae i talem long Josef weaples blong faenem ol buk. Wetem help blong God, Josef i transletem wanem we oli bin raetem long ol buk ia.
Fas Toktok long Buk blong Momon; Josef Smit—Histri 1
God i sendem Tabu Spirit blong helpem yu blong save taem wan samting i tru. Taem yu ridim Buk blong Momon, yu save prea mo askem God sapos i tru. Long semmak wei ia, yu save save se Jisas i Sevya blong yu mo Hem i lavem yu.