Alma 17–18

Amon

Wan wokman we tingting blong hem i stap daon

Amon mo ol brata blong hem oli wantem blong tijim Ol Man blong Leman abaot Lod. Oli go long graon we Ol Man blong Leman oli stap long hem. Long rod blong olgeta i go, oli bin lego kaekae mo prea blong askem Lod blong i help. Lod i bin kamfotem olgeta. Hem i talem long olgeta blong gat fasin blong save wet long taem mo stap olsem ol gudfala eksampol. Wanwan long olgeta i go long ol defdefren ples blong tij.

Mosaea 28:1–2; Alma 17:6–13

Amon i go long wan ples we oli singaotem Ismael. Ol pipol long we oli fasem hem mo tekem hem i go long King Lamonae. Amon i talem long Lamonae se hem i wantem stap wetem Ol Man blong Leman. Lamonae i laekem Amon mo i lego hem i go fri. Hem i wantem Amon blong maredem wan long ol gel blong hem, be Amon i jusum blong kam wan wokman blong Lamonae.

Alma 17:20–25

Lamonae i talem long Amon blong lukaot long ol animol blong hem. Wan dei, Amon mo sam nara wokman oli karem ol animol blong go drink wota. Taem ol animol oli stap drink, ol stilman oli kam mo mekem olgeta oli fraet mo oli ronwe. Ol nara wokman oli fraet se bae oli panisim olgeta from oli lusum ol animol blong Lamonae.

Alma 17:25–28; Alma 18:7

Amon i save se hem ia i janis blong soem paoa blong Lod. Hem i talem long ol nara wokman blong no wari mo i helpem olgeta blong faenem ol animol ia we oli lus.

Alma 17:29–32

Ol stilman oli kambak blong mekem ol animol oli fraet bakegen. Be long taem ia, Amon i talem long ol nara wokman blong stap mo holemtaet ol animol blong oli no ronwe.

Alma 17:33

Amon i go blong stopem ol stilman blong oli no mekem ol sipsip oli fraet. Ol stilman oli no fraet long Amon. Oli ting se oli moa strong bitim hem. Be oli no save se Lod i stap helpem Amon.

Alma 17:34–35

Amon i sakem ol ston long ol stilman wetem sling blong hem. Sam long olgeta oli ded. Hemia i mekem ol nara stilman oli kros, mo oli wantem blong kilim ded Amon. Oli bin sapraes from se oli no save kasem Amon wetem ol ston blong olgetawan. Oli no ting se bae hem i gat fulap paoa olsem.

Alma 17:36

Ol stilman oli traem blong kilim Amon wetem ol wud blong olgeta. Be evri taem oli traem, Amon i katemaot han blong olgeta wetem naef blong faet blong hem mekem se oli no save faet. I no long taem oli fraet tumas blong gohed blong stap faet mo oli ronwe.

Alma 17:37–39

Ol wokman ia oli talem olsem wanem Amon i bin sevem ol animol long Lamonae. Lamonae i sapraes tumas. Hem i ting se Amon i Bigfala Spirit Ia, we i gat bigfala paoa mo i save evri samting.

Alma 18:1–5, 18

Lamonae i wantem toktok long Amon, be hem tu i wari.

Alma 18:8–11

Amon i go blong luk Lamonae, be Lamonae i no save wanem blong talem. Lod i helpem Amon blong hem i save ol tingting blong Lamonae. Amon i talem se hem i no Bigfala Spirit Ia. Hem i talem long Lamonae se Bigfala Spirit Ia hem i God. Lamonae i wantem blong lanem moa abaot God.

Alma 18:12–28

Amon i talem se God i mekem wol mo evriwan insaed long hem. Afta Amon i talem long Lamonae se God i gat wan plan blong sevem man. Olsem pat blong plan ia, Jisas Kraes bae i kam. Lamonae i bilivim wanem we Amon i talem. Lamonae i prea mo askem God blong gat sore long hem mo ol pipol blong hem.

Alma 18:24–36, 39–42