2 Nifae 1–2

Lihae mo Saraea Tufala I Aot long Jerusalem

Woning blong Lod long wan famli

Lihae mo Saraea i bin stap laef long Jerusalem wetem ol pikinini blong tufala. Lihae i bin luk wan visen we i kam long Lod. Hem i bin luk se wan Sevya bae i kam long wol wan dei. Lod i bin soem long hem tu se Jerusalem bae oli prapa spolem gud.

1 Nifae 1:4–18

Lihae i bin talem long ol pipol abaot visen blong hem. Hem i bin talem se Jisas Kraes bae i kam wan dei blong sevem wol.

1 Nifae 1:18–19

Lihae i talem long ol pipol se Jerusalem bae oli prapa spolem gud. Hem i invaetem olgeta blong sakem sin.

1 Nifae 1:14, 18–19

Ol pipol oli bin kros. Lod i bin toktok long Lihae bakegen long wan drim. Lihae i lanem se bae hem mo famli blong hem bae oli sef sapos oli stap long Jerusalem. Oli mas aot.

1 Nifae 1:19–20; 2:1–2

Lihae mo Saraea tufala i bin obei long Lod. Oli bin aot long siti wetem famli blong tufala. Lihae mo Saraea tufala i gat fo boe we nem blong olgeta Leman, Lemyul, Sam, mo Nifae. Oli mas lego hom blong olgeta mo ol naesfala samting blong olgeta.

1 Nifae 2:3–5

Famli i bin travel long waelples narasaed long Red Si. Lihae i talem tangkyu long Lod blong save blesem famli blong hem. Hem i bin tijim famli blong hem blong folem Lod mo obei long ol komanmen blong Hem.

1 Nifae 2:5–10

Leman mo Lemyul tufala i bin komplen. Oli misin hom blong olgeta mo evri samting we oli bin lego i stap. Oli no andastanem from wanem Lod i bin askem olgeta blong aot. Oli no bin bilivim se wan bigfala siti olsem Jerusalem oli save prapa spolem gud.

1 Nifae 02:11–13

Leman mo Lemyul i bin ting se Lihae i stap mekemap ol visen blong hem. ?Wanem bae hapen sapos famli blong olgeta i lus insaed long waelples blong taem we i no save finis?

1 Nifae 2:11

Nifae i bin wantem save blong hemwan sapos wanem Lihae i talem i tru. Hem i bin prea mo askem Lod.

1 Nifae 2:16

Lod i sendem Tabu Spirit blong helpem Nifae blong bilivim ol toktok blong papa blong hem. Nifae i bin biliv long Lod mo i bin serem wanem hem i bin lanem wetem ol brata blong hem. Sam i bin lisin long Nifae mo bilivim hem, be Leman mo Lemyul, tufala i no lisin.

1 Nifae 02:16–18