“Ismael mo Famli blong Hem,” Ol Stori blong Buk blong Momon (2023)
Ismael mo Famli blong Hem
Stap joenem wokbaot we i go long graon blong promes
Famli blong Lihae mo Saraea oli bin laef olgetawan long waelples. Wan dei, Lod i bin talem long Lihae blong sendem ol boe blong hem Leman, Lemyul, Sam, mo Nifae, i go long Jerusalem. Oli sendem olgeta blong askem Ismael mo famli blong hem blong joenem olgeta. Tugeta, bae ol famli blong tufala oli save resemap ol pikinini long graon blong promes.
Ismael mo famli blong hem oli wantem blong folem Lod. Oli biliv se Lod i wantem olgeta blong joenem famli blong Lihae mo Saraea. Oli bin jusum blong aot long Jerusalem mo mitim Lihae long waelples.
Long rod blong olgeta, sam pipol oli nomo wantem blong obei. Oli wantem blong gobak hom. Nifae i askem olgeta blong gat fet long Lod.
Nifae i talem se Lod bae i save mekem eni samting sapos oli gat fet. Be Leman mo Lemyul, tufala i kros. Tufala i fasem Nifae mo wantem blong lego hem long waelples.
Nifae i bin prea from help. Ol rop oli slak, mo Nifae i stanap. Be Leman mo Lemyul, oli wantem yet blong kilim hem. Wan long ol gel blong Ismael i stanap from Nifae. Mama blong hem mo sam long ol brata blong hem oli stanap from Nifae tu. Laman mo Lemyul oli go lisin long olgeta mo stop blong traem blong kilim Nifae.
Leman mo Lemyul tufala i filim sore abaot wanem tufala i bin mekem. Tufala i askem Nifae blong fogivim tufala. Nifae i fogivim ol brata blong hem. Afta Leman mo Lemyul oli prea mo askem Lod blong i fogivim tufala.
Olgeta evriwan oli gohed long wokbaot blong olgeta mo oli bin kasem tenet blong Lihae mo Saraea. Long en, tufala famli i stap tugeta. Oli talem tangkyu long Lod mo wosipim Hem.