“Ol Saen blong taem we Jisas Bae I Bon I Kam long Wol,” Ol Stori blong Buk blong Momon (2023)
Ol Saen blong taem we Jisas Bae I Bon I Kam long Wol
Fet long tijing blong wan profet
Hem i kolosap faef yia stat long taem we profet Samuel i bin tijim abaot ol saen blong taem we Jisas bae i bon. Plante pipol oli bin biliv mo stap lukaotem ol saen ia. Ol nara pipol oli talem se Samuel hem i rong mo taem blong ol saen ia i bin pas finis. Oli jikim olgeta we oli biliv mo talem se Jisas bae i no kam.
Olgeta we oli biliv oli wari, be oli gat fet. Oli gohed blong stap lukaotem ol saen ia. Wan saen hem i we, wan naet bae ples i no tudak. Bae ples i delaet olsem dei taem iven afta we san i draon finis. Naet ia we i nogat tudak long hem, bae hem i wan saen se Jisas bae i bon i kam long wol long nekis dei long wan nara graon.
Ol pipol we oli no biliv oli bin mekem wan plan. Oli jusum wan dei mo talem se sapos saen i no hapen long dei ia,bae oli kilim ded olgeta we oli biliv.
Wan man we nem blong hem Nifae, i bin wan profet long taem ia. Hem i harem nogud tumas se sam pipol oli wantem blong kilim ded olgeta we oli biliv.
Nifae i bo daon long graon blong prea long God from olgeta we oli biliv, we oli wantem kilim ded olgeta from fet blong olgeta. Hem i prea ful dei.
Olsem ansa long prea blong hem, Nifae i harem voes blong Jisas. Jisas i talem se saen bae i hapen long naet mo afta bae Hem i bon i kam long wol long nekis dei.
Long naet ia, i no bin gat tudak nomata we san i draon finis. Ol pipol we oli no biliv long ol toktok blong Samuel oli sapraes tumas i mekem se oli foldaon long graon. Oli bin fraet from se oli no bin biliv. Oli no kilim ded ol pipol we oli biliv.
Long nekis dei, san i girap bakegen mo skae i delaet nomo i stap. Evri pipol oli save se hemia i dei we Jisas bae i bon i kam long wol long hem.
Ol pipol oli luk wan nara saen. Wan niu sta i kamaot long skae. Evri saen we Samuel i bin tokbaot oli hapen. Plante moa pipol oli biliv long Jisas mo oli kasem baptaes.