Alma 43–44

Kapten Moronae mo Serahemna

Wan faet mo wan promes blong laef long pis

Serahemna i lida blong ol ami blong Ol Man blong Leman. Hem i wantem blong rul ova long Ol Man blong Nifae mo mekem olgeta oli wok blong ol pipol blong hem. Serahemna i lidim ami blong hem blong faet agensem Ol Man blong Nifae.

Alma 43:3–8

Ol Man blong Nifae oli wantem blong protektem ol hom, famli, mo relijin blong olgeta. Oli save se bae oli no save wosipim Lod sapos Ol Man blong Leman oli rul ova long olgeta. Ol Man blong Nifae oli jusum blong faetem ol enemi blong olgeta.

Alma 43:9–10, 14–15

Wan man we nem blong hem Moronae i bin kapten blong ol ami blong Ol Man blong Nifae. Moronae i mekem sua se ol ami blong hem oli redi blong faet.

Alma 43:16–17

Ol soldia blong Moronae oli karem ol tul blong faet, mo Moronae i givim wan strong klos blong faet mo sil long olgeta blong protektem olgeta.

Alma 43:18–19

Moronae i tekem ol ami blong hem blong go faet agensem Ol Man blong Leman. Be taem Ol Man blong Leman oli luk Ol Man blong Nifae wetem ol klos blong faet mo sil blong olgeta, oli fraet blong faet. Ol Man blong Leman oli gat ol tintin klos nomo mo nogat klos blong faet blong protektem olgeta.

Alma 43:19–21

Ol Man blong Leman oli aot. Oli traem blong haed i go long wan defren graon blong Ol Man blong Nifae. Oli ting se Moronae bae i no save weaples oli go long hem.

Alma 43:22

Be taem Ol Man blong Leman oli aot, Moronae i sendem ol spae blong folem olgeta.

Alma 43:23

Afta Moronae i sendem wan mesej i go long profet Alma. Hem i wantem Alma blong askem Lod wanem nao Ol Man blong Leman oli stap plan blong mekem. Lod i talem long Alma se Ol Man blong Leman oli stap mekem plan blong faet long wan graon we i no strong, we oli singaotem Mantae. Moronae i lisin long Alma. Hem i lidim ol ami blong hem blong faet agensem Ol Man blong Leman.

Alma 43:23–33

Ol ami oli faet. Ol Man blong Leman oli strong mo oli kros tumas. Ol Man blong Nifae oli fraet long Ol Man blong Leman mo oli wantem blong ronwe. Be Moronae i rimaenem olgeta long ol famli mo fet blong olgeta, mekem se oli gohed blong faet.

Alma 43:34–37, 43–48

Ol Man blong Nifae oli prea long God from help. Lod i ansarem ol prea blong olgeta mo i givim bigfala paoa long olgeta. Naoia Ol Man blong Leman oli fraet. Oli fas mo oli no save ronwe. Taem Moronae i luk se Ol Man blong Leman oli fraet, hem i talem long ol soldia blong hem blong stop faet. Moronae i no wantem blong kilimded Ol Man blong Leman.

Alma 43:49–53; 44:1–2

Moronae i talem long Serahemna se Ol Man blong Leman oli save go sapos oli promes blong neva faet agensem Ol Man blong Nifae bakegen. Serahemna i kros mo i traem blong gohed blong faet, be hem i no save winim ol soldia blong Moronae. Afta Serahemna mo ol ami blong hem oli promes blong laef long pis, mo Moronae i letem olgeta oli go.

Alma 44:1–20