“Alma long Ol Wota blong Momon,” Ol Stori blong Buk blong Momon (2023)
Alma long Ol Wota blong Momon
Stap Kam Ol Pipol blong God
Fastaem Alma hem wan pris blong wan king we nem blong hem Noa. Alma i bin traem blong sevem Abinadae, wan profet blong God, we Noa i wantem kilim hem i ded. Be Noa i kros long Alma mo i wantem blong kilim ded Alma tu. Alma i ronwe long Noa blong hem i stap sef. Long dei Alma i haed kolosap long wan ples we oli singaotem Ol Wota blong Momon.
Alma i bin bilivim wanem we Abinadae i bin tijim abaot Jisas Kraes. Hem i askem God blong i fogivim hem from ol sin mo mistek blong hem.
Alma i mit wetem ol pipol haed mo i tijim olgeta abaot Jisas. Hem i bin tijim evriwan we oli wantem lisin.
Plante pipol oli bilivim Alma. Oli bin go long Ol Wota blong Momon blong harem Alma i tij.
Olgeta we oli biliv oli wantem blong oli singaotem olgeta ol pipol blong God, blong helpem ol narawan long nid, mo talemaot long ol pipol abaot God. Mekem se Alma i invaetem olgeta blong kasem baptaes. Taem oli kasem baptaes, bae oli save mekem wan kavenan, o promes, wetem God blong givim seves long Hem mo kipim ol komanmen blong Hem. Mo afta, God bae i blesem olgeta wetem Spirit blong Hem.
Ol pipol oli glad tumas. Oli klapem ol han blong olgeta mo talem se oli wantem kasem baptaes. Alma i baptaesem wanwan long olgeta long Ol Wota blong Momon. Oli bin fulap wetem Spirit blong God mo oli bin filim lav blong God long olgeta. Oli bin kam ol memba blong Jos Ia blong Jisas Kraes.
Noa i luk se sam long ol pipol blong hem oli stap aot long graon blong hem. Hem i sendem ol wokman blong hem blong wajem ol pipol ia. Ol wokman oli luk se ol pipol oli stap go long graon blong Momon blong harem ol tijing blong Alma. Noa i kros tumas. Hem i sendem wan ami blong hem blong kilim ded Alma mo ol pipol we Alma i stap tijim olgeta.
God i bin givim woning long Alma abaot ami ia. Wetem help blong God, Alma mo ol pipol blong hem oli aot sef long graon ia. Ami ia i no save kasem olgeta. Oli wokbaot blong eit dei long draeples mo oli kam long wan naesfala graon. Oli mekem ol niu hom long ples ia. Alma i bin tijim ol pipol, mo oli bin kipim promes blong olgeta long God.