1 Nifae 4–5

Nifae mo Ol Buk we Oli Wokem long Bras

Stap lanem blong folem Spirit

Leman, Lemyul, Sam, mo Nifae oli gobak long Jerusalem long naet. Nifae i go long haos blong Leban mo ol brata blong hem oli haed aotsaed long siti.

1 Nifae 4:4–5

Nifae i letem Spirit i lidim hem. Hem i no bin save wanem blong mekem, be hem i save se bae Lod i helpem hem blong karem ol buk we oli wokem long bras ia.

1 Nifae 4:6

Taem Nifae i go kolosap long haos blong Leban, hem i faenem Leban i stap slip long graon. Leban i drong. Nifae i luk naef blong faet blong Leban mo i pikimap.

1 Nifae 4:7–9

Taem Nifae i lukluk naef blong faet, Spirit i talem long hem blong kilimded Leban. Be Nifae i no wantem blong kilimded hem. Spirit i talem long Nifae se hem i moa gud blong Leban blong i ded, bitim blong famli blong Nifae blong oli nogat ol skripja ia. Oli nidim ol komanmen blong God we oli bin raetem long ol buk we oli wokem long bras.

1 Nifae 4:10–11, 13–17

Nifae i save se Leban i bin traem blong kilimded hem. Leban i bin stilim tu ol propeti blong olgeta mo i no wantem blong obei ol komanmen blong God.

1 Nifae 4:11

Spirit i talem bakegen long Nifae blong kilimded Leban. Nifae i bin save se Lod bae i rere long wan wei blong hem i karem ol buk we oli wokem long bras. Hem i bin jusum blong obei long Spirit. Nifae i kilimded Leban mo i werem ol klos blong Leban.

1 Nifae 4:12–13, 17–19

Nifae i bin go long ples blong mane blong Leban mo i mitim wokman blong Leban, Soram. Nifae i mekem aksen mo toktok olsem Leban nomo.

1 Nifae 4:20–23, 35

Nifae i talem long Soram se hem i nidim ol buk we oli wokem long bras. Afta hem i talem long Soram blong folem hem. Soram i ting se Nifae hem i Leban, mekem se hem i givim wanem we Nifae i wantem.

1 Nifae 04:24–26

Taem Nifae mo Soram i kamaot long siti, Leman, Lemyul, mo Sam oli ting se Nifae hem i Leban. Oli fraet mo oli stat blong ronwe.

1 Nifae 4:28

Nifae i singaot i go long ol brata blong hem. Taem oli save se hem i Nifae, oli stop blong ron. Be afta Soram i fraet mo i traem blong gobak long Jerusalem.

1 Nifae 04:29–30

Nifae i stopem Soram. Hem i talem long Soram se Lod i bin komandem olgeta blong go karem ol buk we oli wokem long bras. Hem i invaetem Soram blong go wetem olgeta long graon blong promes. Soram i save se bae hem i save kam wan fri man, no wan wokman, mo i promes blong go wetem Nifae mo famli blong hem.

1 Nifae 04:31–37

Oli bin travel i gobak long Lihae mo Saraea. Lihae mo Saraea oli glad tumas blong luk ol boe blong tufala. Saraea i bin ting se ol boe blong hem oli ded. From se Lod i bin kipim ol boe blong hem oli sef, naoia hem i trastem se Lod i bin komandem famli blong olgeta blong aot long Jerusalem. Famli blong Lihae mo Saraea oli bin givim ol sakrifaes blong talem tangkyu long Lod.

1 Nifae 4:38; 5:1–9

Lihae i stap ridim ol buk we oli wokem long bras. Hem i luk se ol buk ia oli gat ol tijing blong ol profet. Hem i bin lanem tu se wan long ol bubu blong hem i Josef, we ol brata blong hem oli salem hem i go long Ijip longtaem bifo. Lihae i bin save se ol buk we oli wokem long bras oli impoten tumas. Hem i bin save se bae Lod i wantem famli blong hem blong gat ol komanmen.

1 Nifae 5:10–22