“8–14 julio: “Maajo’q’e ke’xjalb’ehi rib’.” Alma 23–29,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“8–14 julio. Alma 23–29,” Kim, Taaqehin—Choq’ re li ochoch ut li iglees: 2024 (2023)
Eb’ laj Anti-Nefi-Lehi neke’xmuqeb’ lix k’anjeleb’aal re pleet sa’ li ch’och’, xb’aan laj Jody Livingston
8–14 julio: “Maajo’q’e ke’xjalb’ehi rib’”
Alma 23–29
Ma wan naq nakapatz’ ma naru chi yaal taajalaaq jun kristiaan? Maare yoo laa k’a’uxl chirix ma naru tatnumtaaq sa’ xb’een li ink’a’ us aab’aanuhom malaj li ink’a’ us k’aynaqat chixb’aanunkil, malaj maare juntaq’eet laa k’a’uxl chirixeb’ li raab’ileb’ aab’aan. Wi jo’kan, li seraq’ chirixeb’ laj Anti-Nefi-Lehi naru tatxtenq’a. Eb’ li tenamit a’in xik’ ke’ilok reheb’ laj Nefita. Naq eb’ li ralal laj Mosiah ke’xk’e xch’ool chixjultikankil li evangelio chiruheb’ laj Lamanita, eb’ laj Nefita “ke’xse’eheb’.” Ke’xk’oxla naq us wi’chik xkamsinkileb’ raj laj Lamanita chiru xjalb’aleb’ raj xch’ool. (Chi’ilmanq Alma 26:23–25.)
A’ut ke’jala laj Lamanita—rik’in lix wankilal li Jesukristo re jalok ch’oolej. Junxil ke’wan jo’ “jun li tenamit kawujenaqeb’ ut josq’eb’” (Alma 17:14), a’ut ke’ok chi “na’nookeb’ ru xb’aan x’anchalileb’ xch’ool chiru li Dios” (Alma 27:27). Relik chi yaal, “maajo’q’e ke’xjalb’ehi rib’” (Alma 23:6).
Maare wan laa k’oxlahom ut laa b’aanuhom tento taakanab’, malaj “li k’anjeleb’aal re xpo’jik aach’ool” li tento taatz’eq (Alma 23:7). Malaj ut maare ka’ajwi’ tento naq anchalaq chik b’ayaq aach’ool choq’ re li Dios. Maak’a’ naxye k’a’ru li jalaak aajel ru choq’ aawe, li aatin sa’ Alma 23–29 naru tixk’e aayo’onihom naq rik’in lix wankilal li Jesukristo re xtojb’al aawix, naru taa’uxq li jalaak chi junajwa.
Li na’leb’ re tzolok sa’ li ochoch ut sa’ li iglees
Lix jalajik inch’ool chirix li Jesukristo ut lix evangelio tixjal inyu’am.
Chanchan naq ink’a’ raj te’jalaaq xch’ooleb’ laj Lamanita, a’b’an ke’wan naab’al li ke’jala xch’ooleb’ rik’in sachb’a-ch’oolej xb’aan li Jesukristo. Eb’ laj Lamanita a’in aj Anti-Nefi-Lehi ke’xk’ab’a’i rib’.
Rilb’al Alma 23–25; 27 maare tatxk’e chixk’oxla lix jalajik aach’ool laa’at. K’e reetal chan ru naq ke’jala laj Anti-Nefi-Lehi—chan ru naq ke’jala xch’ool “choqʼ re li Qaawaʼ” (Alma 23:6). Re xtikib’ankil, naru nakawoksiheb’ li raqal a’in:
Chan ru naq li Jesukristo ut lix evangelio xe’xjal aach’ool? Jo’q’e xaweek’a naq nach’ wankat rik’in a’an? Chan ru nakanaw naq yoo chi jalaak aach’ool chirix li Jesukristo? K’a’ru naxye li Musiq’ej aawe naq taab’aanu anajwan?
Chi’ilmanq ajwi’ David A. Bednar, “Convertidos al Señor,” Liahona, noviembre 2012, 106–109; Dale G. Renlund, “Jun teneb’ank-ib’ rik’in li Jesukristo li ink’a’ natoqe’,” Jolomil ch’utub’aj-ib’ re octubre 2019.
Li Dios a’an aj uxtaan, jo’kan naq naxkuy inmaak naq ninjal ink’a’uxl.
Lix jalajikeb’ laj Anti-Nefi-Lehi moko re ta ka’ajwi’ lix b’aanuhomeb’—a’an b’an jun jalok re ch’oolej ki’alan rik’in li paab’aal chirix li Jesukristo ut li jalb’a-k’a’uxlej chi anchal ch’oolej. Maare naru nakataw jun na’leb’ chirix li jalb’a-k’a’uxlej sa’ li junjunq raqal sa’ Alma 24:7–19. K’a’ru neke’xk’ut li raqal a’in chirix li ruxtaan li Dios choq’ reheb’ li neke’xjal xk’a’uxleb’? K’a’ chik ru nakatzol sa’ Alma 26:17–22?
K’oxla chan ru naq li Dios a’an aj uxtaan sa’ laa yu’am. Chan ru naru tatb’antioxinq chiru a’an?
Xwotzb’al li evangelio naxk’e xsahil inch’ool.
Naru xtawb’al li aatin sahil ch’oolejil 24 sut sa’ Alma 23–29, jo’kan naq chaab’ileb’ li ch’ol a’in re xtzolb’al chan ru naru nakak’ul li sahil ch’oolej sa’ xyu’aminkil—ut xwotzb’al—lix evangelio li Kolonel. Naru nakawil Alma 26:12–22, 35–37; ut 29:1–17 re xk’eeb’al reetal k’a’ut naq laj Ammon, eb’ li ralal laj Mosiah, ut laj Alma ke’saho’ xch’ool. K’a’ru nakatzol sa’eb’ li raqal a’in li naru naxk’e xkomon chik lix sahil aach’ool sa’ laa yu’am?
Li Elder Marcus B. Nash kixye: “Xwotzb’al li evangelio naxloch xsahilal ut xyo’onihom li raam li nak’ehok jo’ ajwi’ li nak’uluk. … Xwotzb’al li evangelio, a’an li saho’k sa’ ch’oolej ut li yo’onink chi numtajenaq” (“Taqsihomaq lee saqen,” Jolomil ch’utub’aj-ib’ re octubre 2021). Ma wan aak’ulum sa’ laa yu’am naq xawotz li evangelio? K’a’ruheb’ li ch’a’ajkilal nakak’ul naq nakasik’ xwotzb’al li evangelio? Chan ru naq laa Choxahil Yuwa’ naru nakatxtenq’a chixq’axb’aleb’ ru li ch’a’ajkilal a’in?
Re xtawb’al li profeetil na’leb’ re chan ru xwotzb’al li evangelio—ut xtawb’al sahil ch’oolej rik’in xwotzb’al—naru nakawil li raatin li Awa’b’ej Dallin H. Oaks, “Xwotzb’al li evangelio k’ojob’anb’il wi’chik,” (Jolomil ch’utub’aj-ib’ re octubre 2016). K’a’ruheb’ li na’leb’ li naqataw sa’ li raatin?
Chi’ilmanq ajwi’ “La historia de la familia Bush,” “ Comparte tus creencias ,” “Compartir el Evangelio” (eb’ li video), Biblioteca del Evangelio.
Naru nakatz’iib’aheb’ li na’leb’ nakawaj xwotzb’al rik’in jun laa wamiiw chirix lix Hu laj Mormon. Yal xwotzb’al lix Hu laj Mormon rik’in li aplicacion re lix Hu laj Mormon.
Sik’eb’ li eetalil ut li jolomil na’leb’. Naq naqileb’ li loq’laj hu, naru naqataw xninqal ru na’leb’ rik’ineb’ li aatin, ch’ol aatin, malaj na’leb’ li k’iilasutinb’ileb’. Eb’ li na’leb’ a’an neke’tawman sa’eb’ li kok’ raqalil sa’ xtaq’ahil li junjunq perel re taak’eheb’ reetal sa’ junpaat.
Naru nintaw inmuheb’aal rik’in li Jesukristo ut lix evangelio.
Sa’ xq’ehil li q’olok, ch’utub’anb’il li trigo, a’an li q’olom, toja’ naq k’uulanb’il sa’eb’ li xokleb’aal. Sa’ Alma 26:5–7, tz’il rix k’a’ru neke’reetali li q’olom, li xokleb’aal, ut li kaq-sut-iq’ sa’ laa yu’am. Chan ru nakataw muheb’aal rik’in li Jesukristo?
Chi’ilmanq ajwi’ Russell M. Nelson, “Li santil ochoch ut laa musiq’ejil k’ojleb’aal,” Jolomil ch’utub’aj-ib’ re octubre 2021; David A. Bednar, “Honorablemente retener un nombre y una posición,” Liahona, mayo 2009, 97–100; “At Jesus, aj Rahonel,” Eb’ li B’ich, 56.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Li Qaawa’ ninrosob’tesi naq ninyal inq’e chixb’aanunkil li xinye re naq tinb’aanu.
-
Maare taawulaq chiruheb’ laa kok’al xmuqb’aleb’ “lix k’anjeleb’aal re pleet” jo’ ke’xb’aanu laj Anti-Nefi-Lehi. Naru nekeril wiib’ oxib’ li raqal sa’ Alma 24:6–24 re xk’utb’al chiruheb’ laa kok’al k’a’ru ke’xyeechi’i laj Anti-Nefi-Lehi naq te’xb’aanu re xtaaqenkil li Kolonel. Naru neke’xk’oxla k’a’ru te’xjal re te’xtaaqe, te’xtz’iib’a chiru li perel re kok’ k’anjel re li xamaan a’in, ut te’xk’utb’esi naq yookeb’ chixb’ekb’al jun li jul ut chixmuqb’aleb’ lix k’anjeleb’aal re pleet.
-
Laa kok’al naru neke’ril Alma 24:15–19 re xk’eeb’al reetal k’a’ru ke’xb’aanu laj Anti-Nefi-Lehi re “ch’olob’ank xyaalal chiru li Dios.” Chirix a’an taak’ut chiruheb’ chan ru naq li qasumwank naru “taach’olob’anq xyaalal chiru li Dios” (raqal 18). Kanab’eb’ laa kok’al chixyeeb’al chan ru naq te’xk’ut chiru li Dios li rajomeb’ chixtaaqenkil. Xb’ichankil jun li b’ich jo’ “Tinpaab’ li evangelio” (B’ichleb’aal choq’ reheb’ li Kok’al, 72) naru tixmusiq’aheb’.
Alma 24:7–10; 26:23–34; 27:27–30
Naru ninjal ink’a’uxl.
-
Re xtenq’ankileb’ laa kok’al chixk’eeb’al reetal chan ru nokoxtenq’a li Jesukristo chi jalaak naq naqajal qak’a’uxl, naru taak’ut chiruheb’ resileb’ laj Anti-Nefi-Lehi. Re xb’aanunkil a’in, naru taaxok wiib’ li sek’, “rub’elaj” taaye re li jun, ut “chirix” taaye re li jun chik. Chirix a’an, eb’ laa kok’al naru te’ril Alma 17:14–15 ut 27:27–30, te’xtz’iib’a chiru hu chan ruheb’ laj Lamanita rub’elaj ut chirix naq ke’xjal xk’a’uxl, ut te’xk’e li hu sa’ li sek’ naxk’uli rib’ rik’in li tz’iib’ahom. Jo’ naxye sa’ Alma 24:7–10, k’a’ru kitenq’ank reheb’ chixjalb’aleb’ xk’a’uxl? Chan ru naru naqak’ut chiru li Dios naq naqab’antioxi li ruxtaan?
Li Jesukristo naxk’e xsahil inch’ool, ut naru ninwotz li sahil ch’oolejil a’an.
-
Maare taawulaq cheru xyiib’ankileb’ xjalam-uuch li k’a’aq re ru nak’ehok sahil ch’oolej sa’ lix evangelio li Jesukristo. K’ut li jalam-uuch xayiib’ chiruheb’ laa kok’al, ut waklesi xch’ooleb’ chixwotzb’al xjalam-uucheb’ rik’in jun kristiaan re xtenq’ankil chi saho’k sa’ xch’ool.
-
Tenq’aheb’ laa kok’al chixtawb’aleb’ li aatin sahil ch’oolejil ut eb’ li jalan jalanq xtz’iib’ankil li aatin saho’k ch’oolej sa’ Alma 26 ut 29. K’a’ru kixk’e chi saho’k sa’ xch’ooleb’ laj Ammon ut laj Alma? Li patz’om a’in naru nekexxtenq’a chi aatinak chirix li sahil ch’oolej li nachal rik’in xyu’aminkil malaj xwotzb’al lix evangelio li Jesukristo.
Naru nintenq’aheb’ li wamiiw chixyu’aminkil lix evangelio li Jesukristo.
-
Laa kok’al naru neke’ril Alma 27:22–23 re xk’eeb’al reetal k’a’ru ke’xb’aanu laj Nefita re xtenq’ankileb’ laj Anti-Nefi-Lehi chixpaab’ankil li sumwank ke’ok wi’ naq maajo’q’e chik te’pleetiq. Chan ru naru naqatenq’aheb’ li qamiiw chixb’aanunkil li k’a’ru neke’xyeechi’i? Laa kok’al naru neke’xk’utb’esi chan raj ru te’xb’aanu a’an. Qayehaq, k’a’ru naru naqaye re junaq qamiiw li naraj tik’ti’ik malaj naraj rahob’tesink ch’oolej?
Re xtawb’al xkomon chik li na’leb’, chi’ilmanq li hu Amigos re li po a’in.
Xjalam-uucheb’ laj Anti-Nefi-Lehi naq ke’xmuqeb’ lix k’anjeleb’aal re pleet, xb’aan laj Dan Burr