Hulyo 22–28: “Itanom kini nga Pulong sa Inyong mga Kasingkasing”

Alma 32–35

Alang sa mga Zoramite, ang pag-ampo naglakip sa pagbarog diin ang tanan makakita ug mobalik-balik pagsulti sa kawang, nagadayeg sa kaugalingon nga mga pulong. Ang mga Zoramite kulang sa hugot nga pagtuo diha ni Jesukristo—gani gilimod ang Iyang pagkaanaa—ug gilutos ang mga kabos (tan-awa sa Alma 31:9–25). Sa pagtandi, si Alma ug si Amulek mitudlo nga ang pag-ampo adunay mas dakong kalabotan sa unsay mahitabo sa atong mga kasingkasing kay sa diha sa publiko nga plataporma. Ug kon dili kita mopakita og kaluoy ngadto sa mga tawo nga nanginahanglan, ang atong pag-ampo “makawang, ug dili … mapahimuslan” (Alma 34:28). Labing importante, mag-ampo kita tungod kay kita adunay hugot nga pagtuo diha ni Jesukristo, kinsa nagtanyag og pagtubos pinaagi sa Iyang “walay kinutoban ug walay kataposan nga sakripisyo” (Alma 34:10). Ang ingon nga hugot nga pagtuo, mipasabot si Alma, naggikan sa pagkamapainubsanon ug usa ka “pagtinguha sa pagtuo” (Alma 32:27). Sa paglabay sa panahon, uban sa makanunayon nga pag-amuma, ang pulong sa Dios lig-on nga maestablisar sa atong kasingkasing hangtod nga kini mahimong “usa ka kahoy magtubo ngadto sa kinabuhi nga walay kataposan” (Alma 32:41).

Mga Ideya alang sa Pagkat-on diha sa Panimalay ug sa Simbahan

Alma 32:17–43

Nagpakita ako og hugot nga pagtuo diha ni Jesukristo pinaagi sa pagtanom ug pag-amuma sa Iyang pulong sa akong kasingkasing.

Samtang ikaw magbasa sa Alma 32:17–43, timan-i ang mga pulong ug mga pulongan nga nagtabang kanimo sa pagsabot kon unsaon sa pagpakita og hugot nga pagtuo diha ni Jesukristo. Unsa ang imong nakat-onan mahitungod sa kon unsa ang hugot nga pagtuo ug unsa ang dili?

Laing paagi sa pagtuon sa Alma 32 mao ang pagdrowing og mga hulagway nga nagrepresentar sa lainlaing hugna sa pagtubo sa binhi. Dayon butangi og ngalan ang matag hulagway gamit ang mga pulong gikan sa Alma 32:28–43 nga nagtabang kanimo sa pagsabot kon unsaon pagtanom ug pag-amuma sa pulong sa Dios diha sa imong kasingkasing.

Tan-awa usab sa Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101–4.

Alma 32:26–43

Mahimo akong masayod sa akong kaugalingon mismo.

Ngadto sa mga Zoramite nga dili pa segurado kabahin sa pagpamatuod ni Alma bahin ni Kristo, si Alma misugyot og “usa ka eksperimento” (tan-awa sa Alma 32:27). Ang mga eksperimento nagkinahanglan og tinguha, kakuryoso, buhat, ug labing menos gamayng pagtuo—ug kini mahimong mosangpot ngadto sa maanindot nga mga pagdiskobre! Hunahunaa ang mahitungod sa mga eksperimento nga imong nakita o giapilan. Sumala sa Alma 32:26–36, unsa nga matang sa eksperimento ang mosangpot ngadto sa hugot nga pagtuo ni Jesukristo?

Giunsa nimo “pag-eksperimento” ang pulong sa Dios ug nahimong nasayod nga “ang pulong maayo”? (Alma 32:28).

Mga Gilis ug mga Bidlisiw sa Kahayag

Si Elder Dushku nagtudlo kanato nga ang maanindot nga espirituhanong mga kasinatian talagsaon ug nga ang Ginoo sagad maghatag kanato og usa ka bidlisiw sa kahayag sa usa ka higayon.

Alma 33:2–11; 34:17–29

Makasimba ako sa Dios diha sa pag-ampo, bisan kanus-a ug bisan asa.

Ang tambag ni Alma ug ni Amulek mahitungod sa pagsimba ug pag-ampo gituyo aron sa pagkorihir og piho nga mga sayop nga mga pagsabot sa mga Zoramite. Ikonsiderar ang pag-lista niini (tan-awa sa Alma 31:13–23). Tupad niini nga lista, ikaw makahimo og lista sa mga kamatuoran mahitungod sa pag-ampo diha sa Alma 33:2–11 ug diha sa 34:17–29. Sa unsang paagi nga ang mga butang nga imong nakat-onan gikan niini nga mga bersikulo makaapekto sa paagi sa imong pag-ampo ug pagsimba?

Makakaplag usab ka og mga panabot gikan sa usa ka himno mahitungod sa pag-ampo, sama sa “Tam-is nga Takna sa Pag-ampo” (Mga Himno, nu. 142).

Alma 34:9–16

Ako nagkinahanglan ni Jesukristo ug sa Iyang Pag-ula.

Bantayi kon kapila gigamit ni Amulek ang mga pulong nga walay kinutoban ug walay kataposan sa paghulagway sa maulaon nga sakripisyo sa Manluluwas diha Alma 34:9–14. Nganong importante nga masayod nga ang Pag-ula sa Manluluwas walay kinutoban ug walay kataposan? Pangita og mga pulong ug mga hugpong sa mga pulong niini nga mga bersikulo nga naghulagway usab sa Pag-ula sa Manluluwas: Mga Hebreo 10:10; 2 Nephi 9:21; Mosiah 3:13.

Bisan kon kita nasayod nga ang gahom ni Jesus sa pagluwas walay kinutoban ug walay kataposan, kita usahay magduhaduha kon kini magamit kanato—o ngadto sa usa ka tawo nga nakasala batok kanato. Si Elder David A. Bednar kausa namulong bahin sa katawhan kinsa “ingon og aduna silay [hugot nga] pagtuo sa Manluluwas, apan dili sila motuo nga ang gisaad Niya nga mga panalangin maanaa para nila” (“Kon Nakaila Pa Kamo Kanako,” Liahona, Nob. 2016, 105). Unsa kaha ang makapugong kanato nga hingpit nga makadawat sa gahom sa Manluluwas? Pamalandongi kon sa unsang paagi ikaw masayod nga ang Pag-ula ni Jesukristo walay kinutoban ug walay kataposan.

Aron sa pagpamalandong kon unsa ka dako ang imong panginahanglan sa Pag-ula sa Manluluwas, tingali makatabang nga maghunahuna sa usa ka butang nga imong gikinahanglan kada adlaw. Pangutan-a ang imong kaugalingon, “Unsa kaha ang akong kinabuhi kon wala kini?” Dayon, samtang magtuon ka sa Alma 34:9–16, pamalandong kon unsa kaha sama ang imong kinabuhi kon wala si Jesukristo. Makakaplag ka og ubang mga panabot sa 2 Nephi 9:7–9. Unsaon nimo sa pag-summarize ang Alma 34:9–10 sa usa ka kapahayag?

Tan-awa usab sa Michael John U. Teh, “Atong Personal nga Manluluwas,” Liahona, Mayo 2021, 99–101.

Alma 34:30–41

“Karon mao ang takna ug adlaw sa inyong kaluwasan.”

Hunahunaa nga ikaw gusto nga moapil sa usa ka lumba sa dagan [marathon] o sa usa ka pasundayag sa musika. Unsa ang mahitabo kon maghulat ka hangtod sa adlaw sa kalihokan aron mangandam? Sa unsang paagi nga kini nga ehemplo may kalabotan sa mga pasidaan ni Amulek diha sa Alma 34:32–35? Unsa ang peligro sa paglangay sa atong mga paningkamot mga maghinulsol ug mag-usab?

Ang bersikulo 31 adunay mensahe usab alang sa mga tawo kinsa tingali mabalaka nga naglangay na sila pag-ayo o ulahi na kaayo nga maghinulsol. Unsa kaha kana nga mensahe para ninyo?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 32:1–16

Ang Ginoo makatudlo kanako kon mopili ko nga magmapainubsanon.

• Si Alma ug Amulek nagmalamposon sa pagtudlo sa mga Zoramite kinsa mapainubsanon. Unsa ang buot ipasabot nga magmapainubsanon? Tabangi ang inyong mga anak nga mangita og kahulogan sa mapainubsanon diha sa Giya ngadto sa mga Kasulatan. Unsa ang laing mga ilhanan mahitungod sa kahulogan niini nga mga pulong ang atong makita diha sa Alma 32:13–16? Dapita inyong mga anak sa pagkompleto sa usa ka kapahayag sama sa “Ako nagmapainubsanon kon ako .”

Alma 32:28–43

Ang akong pagpamatuod ni Jesukristo motubo samtang ako moamuma niini.

• Ang mga liso, mga kahoy, ug prutas pamilyar nga mga butang nga makatabang sa mga bata sa pagsabot sa mga tulukibon nga mga baroganan sama sa hugot nga pagtuo ug pagpamatuod. Paguniti sa inyong mga anak ang usa ka binhi samtang imong basahon ang Alma 32:28. Dayon mahimo nimo silang hangyoon sa pagtabang kanimo sa paghunahuna og mga paagi nga ang pagpalambo og pagpamatuod ni Jesukristo sama sa pagtanom ug pag-amuma sa usa ka binhi (tan-awa sa “Kapitulo 29: Si Alma Nagtudlo mahitungod Sa Hugot Nga Pagtuo ug sa Pulong Sa Dios,” Mga Sugilanon sa ang Basahon ni Mormon, 81). Tingali ikaw makatanom sa imong binhi ug maghisgot kabahin sa unsay gikinahanglan sa pagtabang sa usa ka binhi—o sa usa ka pagpamatuod—nga motubo.

• Usa ka hulagway sa kahoy nag-uban niini nga latid; mahimo nimong gamiton kini sa paghulagway sa mga pulong ni Alma sa Alma 32:28–43. O mahimo kang molakaw aron mangita og mga tanom sa nagkalainlain nga yugto sa pagtubo ug basaha ang mga bersikulo gikan sa Alma 32 nga nagtandi sa nagtubo nga tanom ngadto sa atong pagpamatuod. O tingali ang inyong mga anak makadrowing og usa ka kahoy diha sa pisara ug magdugang og usa ka dahon o usa ka prutas sa matag higayon nga sila makahunahuna og usa ka butang nga ilang mabuhat sa pagtabang sa ilang pagpamatuod ni Jesukristo nga molambo.

• Mahimo ninyong pasulayon ang inyong mga anak sa pagduso sa usa ka binhi (nagrepresentar sa pulong sa Dios) ngadto sa usa ka bato (nagrepresentar sa usa ka mapagarbohon nga kasingkasing) ug ngadto sa humok nga yuta (nagrepresentar sa usa ka mapainubsanon nga kasingkasing). Basaha og dungan ang Alma 32:27–28. Paghisgot mahitungod sa unsay gipasabot sa “[pag]hatag og luna” (bersikulo 27) alang sa pulong sa Dios diha sa atong mga kasingkasing.

Pagdrowing og mga hulagway. Ang ubang mga tawo mas makakat-on kon sila magdrowing og hulagway sa unsay ilang gikat-onan. Mahimong malingaw ang inyong mga anak sa pagdrowing og usa ka binhi nga nagtubo ngadto sa usa ka kahoy samtang magtuon sila sa Alma 32.

Alma 33:2–11; 34:17–27

Makaampo ko ngadto sa Langitnong Amahan bisan kanus-a, mahitungod sa bisan unsa nga butang.

• Tabangi ang inyong mga anak sa pagpangita og mga hugpong sa mga pulong nga naghulagway og mga dapit nga kita makaampo (diha sa Alma 33:4–11) ug sa mga butang nga mahimo natong iampo (diha sa Alma 34:17–27). Tingali makadrowing sila og mga hulagway sa ilang kaugalingon nga nag-ampo diha niini nga mga dapit. Ipakigbahin sa usag usa ang mga kasinatian sa dihang gidungog sa Langitnong Amahan ang inyong mga pag-ampo. Mahimo usab kang mokanta sa usa ka awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6–7).

Alang sa dugang nga mga ideya, tan-awa ang isyu karong bulana sa Higala nga magasin.

“Ug tungod sa inyong kakugi ug sa inyong hugot nga pagtuo ug sa inyong pailob uban ang pulong sa pag-alima niini, … tan-awa, dili madugay kamo mopupo sa bunga niini, diin bililhon kaayo” (Alma 32:42).