Ammon and King Lamoni [Ammon ug Hari Lamoni], ni Scott M. Snow

Hulyo 1–7: “Ako Mohimo og usa ka Himan Kaninyo”

Alma 17–22

Hunahunaa ang tanang mga rason nga tingali ihatag sa mga tawo sa dili pagpakigbahin sa ebanghelyo: “Wala kaayo koy nahibaloan” o “Dili ako segurado kon interesado ba sila” o tingali “Ako nahadlok nga ako balibaran.” Tingali makita nimo ang imong kaugalingon sa samang panghunahuna usahay. Ang mga Nephite adunay dugang nga mga rason nga dili mopakigbahin sa ebanghelyo ngadto sa mga Lamanite: sila gihulagway isip “usa ka luog ug magahi ug usa ka mabangis nga mga katawhan; usa ka mga katawhan kinsa nahimuot diha sa pagbuno sa mga Nephite” (Alma 17:14; tan-awa usab sa Alma 26:23–25). Apan ang mga anak nga lalaki ni Mosiah gani adunay mas lig-on nga rason kon nganong sila mibati nga sila kinahanglan gayod nga mopakigbahin sa ebanghelyo ngadto sa mga Lamanite: “Sila mga matinguhaon nga ang kaluwasan kinahanglan ipadayag ngadto sa matag nilalang, kay sila dili makatugot nga bisan usa ka kalag sa tawo malaglag” (Mosiah 28:3). Kini nga gugma nga midasig kang Ammon ug sa iyang mga igsoong lalaki makapadasig usab kanimo sa pagpakigbahin sa ebanghelyo ngadto sa imong pamilya, mga higala, ug mga kaila—bisan niadtong maingon og dili modawat niini.

Mga Ideya alang sa Pagkat-on diha sa Panimalay ug sa Simbahan

Alma 17:1–4

Ang yano, makanunayon nga mga buhat sa debosyon ngadto ni Kristo makatabang kanako nga makadawat sa Iyang gahom.

Unsa ang imong makat-onan gikan sa Alma 17:1–4 mahitungod sa unsaon pagpabiling lig-on sa imong pagpamatuod ug pasalig ngadto kang Jesukristo? Unsa ang gibuhat sa mga anak nga lalaki ni Mosiah, ug sa unsang paagi ang Ginoo mipanalangin kanila?

Samtang ikaw magbasa mahitungod sa mga kasinatian sa mga anak nga lalaki ni Mosiah diha sa Alma 17–22, timan-i giunsa pag-apekto sa ilang espirituhanong pagpangandam sa ilang serbisyo taliwala sa mga Lamanite (sama pananglit, tan-awa sa Alma 18:10–18, 34–36; 20:2–5; 22:12–16). Unsa ang imong gibati nga nadasig nga buhaton aron sa pagsunod sa ilang ehemplo?

Alma 17:6–12; 19:16–36

Ako mahimong usa ka himan diha sa mga kamot sa Dios.

Ang mga sugilanon sa pagkakabig nga atong mabasa diha sa mga kasulatan sa kasagaran makapatandog, apan sa kinahiladmang bahin niini sa kasagaran makakaplag kita og mga indibidwal kinsa adunay kaisog sa pagsulti ug sa pagpakigbahin sa ilang hugot nga pagtuo kang Jesukristo. Paghunahuna mahitungod niini samtang ikaw nagbasa kabahin ni Abish ug sa mga anak nga lalaki ni Mosiah karong semanaha.

Unsa kaha ang buot ipasabot sa pagkahimong usa ka himan diha sa mga kamot sa Dios? Tingali makatabang ang paghunahuna sa mga instrumento o mga himan nga mahimo nimong gamiton diha sa imong inadlaw-adlaw nga kinabuhi. Sa Alma 17:6–12, pangitaa unsay gihimo sa mga anak nga lalaki ni Mosiah aron sila mahimong mga himan diha sa mga kamot sa Dios. Unsaon nimo nga mahimong usa ka mas epektibo nga himan sa pagtabang sa uban nga moduol ngadto kang Kristo?

Unsay imong nagustohan mahitungod ni Abish sa Alma 19:16–36? Unsa ang imong nakat-onan gikan kaniya mahitungod sa pagtabang sa uban sa pagpalambo og hugot nga pagtuo kang Kristo? Sama pananglit, unsa sa imong paminaw ang makatabang sa mga tawo nga imong gimahal sa “pagtuo diha sa gahom sa Dios”? (Alma 19:17).

Mahimo usab nimong itandi ang kasinatian ni Abish ngadto sa mga baroganan nga gitudlo ni Elder Dieter F. Uchtdorf sa “Misyonaryo nga Buhat: Pagpakigbahin sa Unsay Anaa sa Inyong Kasingkasing” (Liahona, Mayo 2019, 15–18). Sa unsang paagi gipakita ni Abish ang “Lima ka Yano nga mga Sugyot” ni Elder Uchtdorf? Sulayi sa pagsulat ang pipila ka butang nga mahimo nimong isulti bahin ni Jesukristo. Sama pananglit, “Alang nako, si Jesukristo …” o “Ang Manluluwas motabang nako …”

Gamit og mga leksiyon nga naggamit og butang. Bisan kanus-a nga ang mga tawo makakita o makahikap og usa ka butang nga may kalabotan sa unsay ilang gikat-onan, lagmit nga mahinumdoman nila kini sa mas taas nga panahon. Kon nagtudlo ka kabahin sa Alma 17:11, sama pananglit, ikonsiderar ang pagpakita og mga instrumento sa musika o mga kahimanan sa pagsulat aron makatabang sa pagdasig og panaghisgotan mahitungod sa pagkahimong usa ka himan diha sa mga kamot sa Dios.

Alma 17–19

Kon kita mopakita og gugma alang sa uban, makatabang kita kanila nga modawat sa ebanghelyo ni Jesukristo.

Pangita og mga bersikulo diha sa Alma 17–19 nga nagpakita kon sa unsang paagi ang gugma ni Ammon alang sa mga Lamanite midasig sa iyang mga paningkamot sa pagpakigbahin sa ebanghelyo ni Jesukristo. Unsa nga mga kamatuoran mahitungod sa pagpakigbahin sa ebanghelyo ang imong makat-onan gikan sa iyang ehemplo?

Tan-awa usab sa “Si Ammon Nagserbisyo ug Nagtudlo ni Hari Lamoni” (bidyo), Gospel Library.

Si Ammon Nagserbisyo ug Nagtudlo ni Hari Lamoni | Alma 17–19

Si Ammon ug anak nga mga lalaki ni Mosiah mitudlo sa mga Lamanite sa pulong sa Dios. Si Ammon nahimong sulugoon ni Hari Lamoni ug miluwas sa iyang mga karnero. Si Ammon mitudlo ni Lamoni mahitungod sa Dios, ni Jesukristo, ug sa laraw sa katubsanan.

Minerva Teichert (1888–1976), Ammon Saves the King’s Flocks [Si Ammon Nagluwas sa mga Karnero sa Hari], 1949–1951, lana diha sa masonite, 35 15/16 × 48 ka pulgada. Brigham Young University Museum of Art, 1969.

Alma 19:36

Ang Ginoo motabang kanako sa paghinulsol.

Human sa subli nga pag-istorya sa pagkakabig ni Lamoni ug sa iyang katawhan, gi-summarize ni Mormon ang istorya uban sa usa ka obserbasyon mahitungod ni Jesukristo. Unsa ang gitudlo sa Alma 19:36 kanimo mahitungod sa kinaiya sa Ginoo? Unsa pa ang gitudlo sa istorya diha sa Alma 19:16–36 kanimo mahitungod Kaniya? Kanus-a nimo nabati ang bukton sa Ginoo nga gituyhad nganha kanimo?

Alma 20:23; 22:15–18

Ang pagkaila sa Dios takos sa bisan unsa nga sakripisyo.

Itandi kon unsa ang andam nga biyaan sa amahan ni Lamoni aron sa pagluwas sa iyang kinabuhi (tan-awa sa Alma 20:23) ngadto sa unsay sa wala madugay andam niya nga biyaan aron makadawat sa hingpit nga kalipay sa ebanghelyo ug aron makaila sa Dios (tan-awa sa Alma 22:15, 18). Pamalandongi kon unsay andam nimo nga isakripisyo aron mas hingpit nga makaila sa Dios.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 17:2–3

Ang akong pagpamatuod ni Jesukristo molambo kon mobasa ko sa mga kasulatan, mag-ampo, ug magpuasa.

• Sa unsang paagi ang mga ehemplo sa mga anak nga lalaki ni Mosiah makatabang sa inyong mga anak sa pagpalig-on sa ilang mga pagpamatuod ni Jesukristo? Makatabang ka sa inyong mga anak nga makapangita sa unsay gibuhat sa anak nga mga lalaki ni Mosiah aron sa pagpalig-on sa ilang espirituhanon nga kusog diha sa Alma 17:2–3. Dayon makadrowing sila og mga hulagway o makapangita og mga butang nga nagrepresentar niini nga mga butang. Tabangi sila sa pagplano kon unsa ang ilang buhaton aron sa pagpalig-on sa ilang mga pagpamatuod sa Manluluwas.

Alma 17–19

Makahimo ako sa pagpakigbahin sa ebanghelyo ni Jesukristo ngadto sa uban.

• Aron makakat-on mahitungod sa pagkahimong usa ka himan diha sa mga kamot sa Dios, sama sa anak nga mga lalaki ni Mosiah, ikaw ug ang inyong mga anak makatan-aw sa usa ka instrumento o himan ug maghisgot kon unsay gamit niini. Dayon mahimo nimong basahon ang Alma 17:11 ug maghisgot kon unsay buot ipasabot nga mahimong mga himan sa Langitnong Amahan aron sa pagtabang sa mga tawo nga makakat-on mahitungod ni Jesukristo.

• Ang pahina sa kalihokan niini nga semana adunay mga hulagway nga nagrepresentar sa mga kamatuoran nga gitudlo ni Ammon ngadto ni Hari Lamoni. Makatabang ka sa inyong mga anak sa pagpangita niini nga mga kamaturoan diha sa Alma 18:24–40. Ang inyong mga anak mahimong magpakaaron-ingnon nga mga misyonaryo ug mopakigbahin sa unsay ilang nahibaloan mahitungod niini nga mga kamatuoran.

• Human nimo mabasa ang mahitungod ni Abish ngadto sa inyong mga anak (tan-awa sa Alma 19:16–20, 28–29), mahimo silang magpakaaron-ingnon nga sama ni Abish pinaagi sa pagdagan diha sa gibarogan, pagpanuktok sa mga pultahan, ug pagsulti mahitungod sa unsay nahitabo diha sa Alma 19:1–17. Sa unsang paagi nga mahimo kitang sama ni Abish ug mopakigbahin sa unsay atong nahibaloan mahitungod ni Jesukristo ug sa Iyang ebanghelyo? Ang inyong mga anak makadrowing og mga hulagway sa ilang kaugalingon nga nagpakigbahin sa ebanghelyo ngadto sa usa ka tawo o manganta og dungan sa usa ka awit bahin sa pagpakigbahin sa ebanghelyo, sama sa “Gitawag sa Pagserbisyo” (Songbook sa mga Bata, 94–95).

Alma 17:21–25; 20:8–27; 22:1–3

Makatabang ko sa uban nga moduol kang Kristo pinaagi sa pagpakita sa akong gugma alang kanila.

• Sa sinugdanan, si Hari Lamoni ug ang iyang amahan adunay tig-a nga mga kasingkasing bahin sa ebanghelyo. Sa wala madugay, ang ilang mga kasingkasing nahumok, ug sila mituo kang Jesukristo. Sa unsa nga paagi kini nahitabo? Tabangi ang inyong mga anak sa pagdiskobre og mga tubag niini nga pangutana samtang imong rebyohon uban kanila ang mga kasinatian ni Ammon. Mahimo nilang idrama-drama ang “Kapitulo 23: Si Ammon: Usa ka Bantogan nga Sulugoon” ug “Kapitulo 24: Si Ammon Nakatagbo Sa Amahan Ni Haring Lamoni” (Mga Sugilanon sa ang Basahon ni Mormon, 64–68, 69–70). O tingali ang inyong mga anak ganahan nga magdrowing og mga hulagway sa lainlaing mga bahin sa istorya ug gamiton ang mga hulagway sa pagsaysay sa istorya. Unsa ang gibuhat ni Ammon aron sa pagtabang ni Lamoni ug sa iyang amahan sa pagbukas sa ilang mga kasingkasing ngadto sa ebanghelyo ni Jesukristo? (tan-awa sa Alma 17:21–25; 20:8–27; 22:1–3).

• Tingali ikaw ug ang inyong mga anak makahunahuna og usa ka tawo nga nanginahanglan nga mahibalo mahitungod ni Jesukristo. Tabangi sila sa paghunahuna og mga paagi nga sila mahimong maayo nga mga ehemplo ug mopakita og gugma ngadto niana nga tawo, sama sa gibuhat ni Ammon alang ni Lamoni ug sa iyang amahan.

Alang sa dugang nga mga ideya, tan-awa ang isyu karong bulana sa Higala nga magasin.

An illustration of Abish [Usa ka paghulagway ni Abish], ni Dilleen Marsh