Illustration of Alma and Amulek being delivered from prison [Paghulagway ni Alma ug Amulek nga giluwas gikan sa bilanggoan], ni Andrew Bosley

Hunyo 24–30: “Sulod ngadto sa Kapahulayan sa Ginoo”

Alma 13–16

Sa daghang mga paagi, ang kinabuhi sa Ammonihah namaayo alang ni Amulek ug ni Zeezrom. Si Amulek “usa ka tawo nga dili yano og dungog,” uban sa “daghan og mga kaliwatan ug mga kahigalaan” ug “daghan nga mga katigayonan” (Alma 10:4). Si Zeezrom usa ka batid nga manlalaban nga nagtagamtam og “daghan nga mga patigayon” (Alma 10:31). Dayon si Alma miabot nga adunay usa ka imbitasyon sa paghinulsol ug “mosulod ngadto sa kapahulayan sa Ginoo” (Alma 13:16). Alang nila ni Amulek, Zeezrom, ug sa uban, ang pagdawat niini nga pagdapit nagkinahanglan og sakripisyo ug gani misangpot ngadto sa hapit dili maantos nga kalisdanan.

Apan siyempre ang istorya wala motapos diha. Sa Alma 13–16, atong nahibaloan unsa gyod sa kataposan ang mahitabo sa mga tawo kinsa nagtuo “sa gahom ni Kristo ngadto sa kaluwasan” (Alma 15:6). Usahay adunay kaluwasan, usahay pagkaayo—ug usahay ang mga butang dili magkaanam og kasayon niini nga kinabuhi. Apan sa kanunay, “ang Ginoo midawat sa [Iyang katawhan] ngadto sa iyang kaugalingon, diha sa himaya” (Alma 14:11). Sa kanunay, ang Ginoo naghatag og “gahom, sumala sa [atong] hugot nga pagtuo nga anaa diha ni Kristo” (Alma 14:28). Ug sa kanunay, kanang hugot nga pagtuo naghatag kanato og “paglaom nga [kita] makadawat og kinabuhi nga dayon” (Alma 13:29). Samtang magbasa kamo niining mga kapitulo, mahimong mahupay kamo niini nga mga saad, ug kamo mahimong makasabot og mas maayo kon unsay gipasabot ni Alma sa dihang namulong siya mahitungod sa pagsulod ngadto sa “kapahulayan sa Ginoo” (Alma 13:16).

Mga Ideya alang sa Pagkat-on diha sa Panimalay ug sa Simbahan

Alma 13:1–19

Ang mga ordinansa sa pagkapari nagtudlo kanako ngadto ni Jesukristo alang sa katubsanan.

Ang mga pulong sa Alma 13 nagpadayag og gamhanang mga kamatuoran mahitungod sa gahom sa pagkapari sa Dios ug ang katuyoan niini––sa pag-andam kanato sa pagsulod ngadto “sa kapahulayan sa Ginoo,” o kinabuhi nga dayon (Alma 13:16). Tingali mahimo ninyong isulat ang usa ka labing ubos nga kamatuoran sa matag bersikulo diha sa Alma 13:1–19. Aniay pipila ka ideya aron kamo makasugod:

Bersikulo 1.Ang pagkapari gitawag usab og “ang kapunongan sa Anak sa [Dios]” (tan-awa usab diha sa Doktrina ug mga Pakigsaad 107:1–4).

Bersikulo 2.Ang Dios nag-orden og mga pari sa pagtabang sa mga tawo nga motan-aw ngadto sa Iyang Anak alang sa katubsanan.

Unsa pay lain nga inyong nakit-an? Unsay inyong gibati mahitungod sa pagkapari samtang kamo namalandong niini nga mga kamatuoran?

Nakahunahuna ba kamo sukad mahitungod sa mga ordinansa sa pagkapari isip usa ka gasa gikan sa Dios aron pagtabang kaninyo nga “magpaabot ngadto sa iyang Anak alang sa katubsanan”? (bersikulo 2; tan-awa usab sa bersikulo 16). Tingali makahimo kamo og usa ka lista sa mga ordinansa nga inyong nadawat, sama sa bunyag, pagkompirmar, sa sakramento, pag-set-apart alang sa usa ka calling, usa ka panalangin sa paghupay o pagkaayo, usa ka patriyarkal nga panalangin, ug mga ordinansa sa templo. Pamalandongi ang inyong mga kasinatian sa mga ordinansa nga sama niini. Ikonsiderar ang simbolismo nga naapil ug ang Espiritu nga inyong gibati. Sa unsa nga paagi nga kini nga mga ordinansa nagpunting ngadto ni Jesukristo alang sa katubsanan?

Ang pipila sa mga tawo masayop sa pagtuo nga ang mga ordinansa—ug ang awtoridad sa pagkapari nga mohimo niini—wala kinahanglana. Unsaon ninyo pagtubag niini nga ideya? Ania ang duha ka mensahe sa kinatibuk-ang komperensiya nga makapahibalo sa inyong panghunahuna; pagpili og usa, ug isulat ang bisan unsa nga mga tubag nga moabot diha kaninyo: Russell M. Nelson, “Espirituhanon nga mga Bahandi,” Liahona, Nob. 2019, 76–79; Dale G. Renlund, “Ang Pagkapari ug ang Matubsanong Gahom sa Manluluwas,” Liahona, Nob. 2017, 64–67.

Tan-awa usab sa Doktrina ug mga Pakigsaad 84:19–22.

Ang mga ordinansa sa pagkapari nagtabang kanato sa pagtan-aw ngadto ni Jesukristo alang sa katubsanan.

Alma 13

Ang Ginoo nagdapit kanako sa pagsulod ngadto sa Iyang kapahulayan.

Ang imbitasyon nga “makasulod ngadto sa kapahulayan sa Ginoo” (Alma 13:16) gibalik-balik diha sa Alma 13. Tingali mahimo kamo nga mangita sa matag bersikulo diin ang pulong “kapahulayan” makita ug pamalandongi unsa ang gitudlo sa matag bersikulo diha kaninyo mahitungod sa unsa ang gipasabot “[sa] kapahulayan sa Ginoo”. Unsa man ang kalahian niini gikan sa pisikal nga pagpahulay? Unsaon man nato sa pagpangita niini?

Tan-awa usab sa Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 95–98; “Duol kang Jesus,” Mga Himno, nu. 66.

Alma 14

Sa mga panahon sa pag-antos, kinahanglan gayod nga kita mosalig sa Ginoo.

Tingali kamo mahibulong, sama sa kadaghanan, kon ngano nga ang makalilisang nga mga butang mahitabo ngadto sa mga tawo kinsa naningkamot sa pagpuyo nga matarong. Mahimong dili ninyo makita ang tanan nga mga tubag niining malisod nga pangutana sa Alma 14, apan adunay daghan nga makat-onan gikan sa paagi sa pagtubag nila ni Alma ug Amulek sa trahedya. Unsa ang gitudlo sa ilang mga pulong ug mga lihok diha kaninyo mahitungod kon ngano nga ang Ginoo usahay nagtugot nga mag-antos ang matarong nga mga tawo? Unsa nga tambag kaha ang ihatag nilang Alma ug Amulek kanato kon kita makasinati og malisod nga mga pagsulay?

Tan-awa usab sa Mga Taga-Roma 8:35–39; 1 Pedro 4:12–14; Doktrina ug mga Pakigsaad 122:5–9; Dale G. Renlund, “Makapungot nga Pagkadili Makiangayon,” Liahona, Mayo 2021, 41–45.

Pag-andam sa kanunay. Ang mga higayon sa pagtudlo molabay og dali, busa pahimusli kini kon kini moabot. Usa ka trahedya sa kalibotan, sama pananglitan, mahimo nga usa ka kahigayonan sa pagpakigbahin sa mga baroganan gikan sa Alma 14 mahitungod kon ngano nga ang Ginoo usahay motugot nga ang mga inosente mag-antos.

Ang Tanan nga mga Butang alang sa Atong Kaayohan

Si Elder Gong nagtanyag og pasalig nga diha sa plano sa atong Langitnong Amahan, bisan ang mga trahedya ug uban pang lisod nga mga pagsulay mahimong alang sa atong kaayohan.

Alma 15:16, 18

Ang pagkadisipulo nagkinahanglan og sakripisyo.

Makapaikag tingali ang paghimo og lista sa mga butang nga gibiyaan ni Amulek aron sa pagdawat sa ebanghelyo (tan-awa sa Alma 10:4–5; 15:16) ug itandi kini ngadto sa lista sa unsay iyang naangkon (tan-awa diha sa Alma 15:18; 16:13–15; 34:8). Unsa ang inyong andam nga isakripisyo aron mahimong mas matinud-anon nga disipulo ni Jesukristo?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Tungod kay karong Dominggo mao ang Ikalima nga Dominggo sa bulan, ang mga magtutudlo sa Primary giawhag sa paggamit sa mga kalihokan sa pagkat-on diha sa “Apendiks B: Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”

Alma 13:1–2, 16

Ang gahom sa pagkapari nagtabang kanako sa pagduol ngadto kang Kristo.

• Usa ka paagi sa pagtabang sa inyong mga anak nga makita kon sa unsang paagi ang gahum sa pagkapari nagpunting kanato ngadto ni Kristo mao ang pagpakita ngadto kanila og mga hulagway bahin sa mga paagi nga gigamit ang gahom sa pagkapari (tan-awa sa Libro sa mga Hulagway sa Ebanghelyo, mga nu. 103–110). Ang inyong mga anak makatabang kaninyo sa paghunahuna og mga paagi nga gigamit ni Jesus ang Iyang gahom (tan-awa, pananglitan sa, Mateo 26:26–28; Marcos 5:22–24, 35–43; Libro sa mga Hulagway sa Ebanghelyo, nu. 38–41). Dayon mahimo ninyong basahon ang Alma 13:2 nga mag-uban ug maghisgot kon sa unsang paagi ang gahom sa pagkapari nagtabang kanato nga “magpaabot ngadto … sa Anak [sa Dios]” ug mamahimong mas mahisama kaniya.

  
  

• Ngano nga ang Dios mihatag kanato sa mga ordinansa sa pagkapari? Tabangi ang inyong mga anak sa pagpangita og usa ka tubag diha sa Alma 13:16. Kon nagkinahanglan sila og tabang aron masayod kon unsa ang usa ka ordinansa, adunay mga lista diha sa Kinatibuk-an nga Tamdanan nga Basahon, 18.1 ug 18.2. Tingali kamo ug ang inyong mga anak makahisgot mahitungod sa inyong mga kasinatian sa pagdawat niining mga ordinansa. Sa unsang paagi sila makatabang kanato nga “molantaw ngadto [kang Jesukristo] alang sa kapasayloan sa [atong] mga sala”? Usa ka kanta sama sa “Kon Ako Bunyagan” (Songbook sa mga Bata, 53) makatabang sa inyong mga anak sa paghunahuna og lain nga mga rason aron mahimong mapasalamaton alang sa mga ordinansa sa pagkapari.

Alma 13:10–12

Si Jesukristo makahimo kanako nga limpyo.

• Human magbasa og dungan niining mga bersikulo, ikonsiderar ang mga paagi sa pagtabang sa inyong mga anak nga makapanglantaw unsa ang iyang gitudlo. Tingali mag-uban kamo nga manghugas ug mga butang. Unsay atong bation kon kita hugaw? Unsay atong bation kon kita malimpyo pag-usab? Sa unsa nga paagi kini nga mga pagbati susama sa unsay atong gibati kon kita makasala ug dayon maghinulsol ug malimpyo pinaagi sa Pag-ula sa Manluluwas?

Alma 14:18–29

Ang Langitnong Amahan molig-on kanako kon ako magbaton og hugot nga pagtuo diha ni Jesukristo.

• Kining pahina sa kalihokan niining semanaha makatabang kaninyo—o sa inyong mga anak—sa pagsugilon sa istorya diha sa Alma 14:18–29 (tan-awa usab sa “Kapitulo 22: Ang Misyon ni Alma ngadto sa Ammonihah,” Mga Sugilanon sa Basahon ni Mormon, 58–63). Hatagi og gibug-aton nga sila si Alma ug Amulek gihatagan og kusog tungod sa ilang “hugot nga pagtuo nga anaa kang Kristo” (Alma 14:26). Mahimo usab ninyong hisgotan ang mahitungod sa panahon sa dihang ang Dios mihatag kaninyo og kusog “sumala sa [inyong] hugot nga pagtuo.” Unsaon nato nga mahimong matinud-anon sama nilang Alma ug Amulek?

  Chapter 22: Alma’s Mission to Ammonihah

Alma 15:3–12

Si Jesukristo makausab og mga kasingkasing.

• Ang kausaban sa kasingkasing ni Zeezrom pinaagi ni Jesukristo makapadasig. Ikonsiderar ang pagrebyo uban sa inyong mga anak kon unsa ang ilang nakat-onan sa miagi nga semana mahitungod ni Zeezrom. Dayon makadungan kamo sa pagbasa sa Alma 15:3–12 aron sa pagdiskobre kon giunsa niya sa pag-usab. Unsa ang atong makat-onan gikan sa kasinatian ni Zeezrom mahitungod sa gahom sa Ginoo? (tan-awa sa “Si Zeezrom Naayo ug Gibunyagan” [bidyo], Gospel Library).

  Si Zeezrom Naayo ug Gibunyagan | Alma 15

  Si Zeezrom nakaikyas gikan sa mga lider sa Ammonihah ug grabe ang pagkasakit. Si Zeezrom nagtuo nga si Alma nga Batan-on ug si Amulek namatay tungod sa iyang kadautan. Si Alma ug si Amulek nag-ayo ni Zeezrom, ug gibunyagan siya.

Alang sa dugang nga mga ideya, tan-awa ang isyu karong bulana sa Higala nga magasin.

Alma and Amulek in Prison [Alma ug Amulek sa Bilanggoan], ni Gary L. Kapp