Teaching True Doctrine [Pagtudlo sa Tinuod nga Doktrina], ni Michael T. Malm

Hunyo 17–23: Si Jesukristo Moanhi aron sa Pagtubos sa Iyang Katawhan

Alma 8–12

Ang buhat sa Dios dili mapakyas. Apan ang atong mga paningkamot sa pagtabang sa Iyang buhat usahay ingon og mapakyas—hinoon, dili dayon nato makita ang mga sangpotanan nga atong gilaoman. Tingali mobati kita og diyutay sama ni Alma sa dihang gisangyaw niya ang ebanghelyo didto sa Ammonihah—gisalikway, gilud-an, ug gipapahawa. Apan sa dihang usa ka anghel misugo kaniya sa pagbalik ug pagsulay pag-usab, si Alma maisogon nga “mibalik pagdali” (Alma 8:18), ug giandam sa Dios ang agianan diha sa iyang atubangan. Wala lamang Siya nakahatag ni Alma og makaon ug usa ka dapit nga kapuy-an, apan Siya miandam usab ni Amulek, kinsa nahimong isig ka mamumuo, usa ka maisog nga tigpanalipod sa ebanghelyo, ug usa ka matinud-anon nga higala. Kon kita makasinati og mga kapakyasan ug mga kasagmuyo samtang nag-alagad kita diha sa gingharian sa Ginoo, kita makahinumdom kon sa unsa nga paagi ang Dios misuporta ug migiya ni Alma, ug makasalig kita nga ang Dios mosuporta ug mogiya usab kanato, bisan sa malisod nga mga kahimtang.

Mga Ideya alang sa Pagkat-on diha sa Panimalay ug sa Simbahan

Alma 8

Ang akong mga paningkamot sa pagpakigbahin sa ebanghelyo ni Jesukristo mahimong magkinahanglan og pailob.

Nasulayan na ba ninyo sukad nga mopakigbahin sa ebanghelyo ni Jesukristo ngadto sa usa ka tawo, apan ang inyong imbitasyon gibalibaran? Si Alma nakasinati usab niana. Unsa ang inyong nakat-onan gikan kaniya diha sa Alma 8:13–16 mahitungod sa pagpakigbahin sa ebanghelyo bisan pa sa mga hagit ug oposisyon? Padayona ang pagbasa sa mga bersikulo 17–32, ug pangitaa ang hugpong sa mga pulong nga makapadasig kaninyo sa pagpakigbahin sa ebanghelyo, bisan kon kamo ingon og wala molampos.

Ang mga propeta ug mga apostoles mao ang espesyal nga mga saksi ni Kristo, busa sila adunay daghang dinasig nga mga tambag nga ikapakigbahin mahitungod sa pagpamatuod bahin Kaniya. Tan-awa unsa ang gisulti ni Elder Dieter F. Uchtdorf sa “Apan Unsaon kon Malisod Kini?” (usa ka seksiyon sa “Misyonaryo nga Buhat: Pagpakigbahin sa Unsa ang Anaa sa Inyong Kasingkasing,” Liahona, Mayo 2019, 18) o unsa ang gipakigbahin ni Elder Gary E. Stevenson diha sa “Paghigugma, Pagpaambit, Pagdapit,” (Liahona, Mayo 2022, 84–87). Unsa ang inyong makit-an dinhi nga makatabang sa usa ka tawo kinsa nagsugod sa pagbati og pagkawala og paglaom mahitungod sa pagpakigbahin sa ebanghelyo?

Unsaon ninyo pagpamubo ang tanang butang nga inyong natun-an dinhi nga mahimong usa o duha ka makapadasig nga mga pamahayag mahitungod sa pagpakigbahin sa ebanghelyo? Ikonsiderar ang paghimo og poster o meme nga makapadasig kaninyo (ug sa uban) sa pagpadayon og paningkamot.

Tan-awa usab sa “Giyahi Ko sa Pagtudlo,” Mga Himno, nu. 177; “Si Alma Gisugo sa usa ka Anghel sa Pagbalik sa Ammonihah” (bidyo), Gospel Library.

Si Alma Gisugo sa usa ka Anghel sa Pagbalik sa Ammonihah | Alma 8

Ang katawhan sa Ammonihah naglimud sa Dios. Giabug nila pagawas sa dakbayan si Alma nga Batan-on. Usa ka anghel nagsugo ni Alma nga Batan-on sa pagbalik ug pagsangyaw sa pulong sa Dios didto sa Ammonihah.

Alma 9:14–23

Moabot ang mga panalangin sa Dios inubanan sa dako nga responsibilidad.

Kon magbasa mahitungod sa paagi nga ang mga Nephite sa Ammonihah mitagad sa mga sulugoon sa Ginoo, kini sayon ang pagkalimot nga sila sa makausa nagsunod sa ebanghelyo, ug mga “pinalabi kaayo nga katawhan sa Ginoo” (Alma 9:20). Samtang kamo magbasa sa mahinungdanong mga panalangin nga gihatag sa Dios sa katawhan ni Nephi (tan-awa ilabi na sa Alma 9:14–23), pamalandongi ang mahinungdanon nga mga panalangin nga Iyang nahatag kaninyo. Unsa nga mga responsibilidad ang moabot uban niini nga mga panalangin? Unsay inyong gibuhat nga magpabilin nga matinuoron ngadto niini nga mga responsibilidad?

Tan-awa usab sa Doktrina ug mga Pakigsaad 50:24; 82:3; 93:39.

Alma 11–12

Ang plano sa Dios usa ka plano sa katubsanan.

Diha sa Alma 11–12, si Alma ug si Amulek mipasabot ngadto sa plano sa Dios isip ang plano sa katubsanan. Samtang kamo magbasa niini nga mga kapitulo, pamalandongi kon nganong ang pulong katubsanan mao ang gigamit sa paghulagway sa plano sa Dios. Ikonsiderar ang pagsulat og mubo nga summary sa unsa ang gitudlo nilang Alma ug Amulek mahitungod sa mosunod nga mga aspeto sa plano:

• Ang Pagkapukan

• Ang Manunubos

• Paghinulsol

• Kamatayon

• Pagkabanhaw

• Paghukom

Tan-awa ang epekto sa mga pulong ni Amulek diha sa katawhan (tan-awa sa Alma 11:46). Sa unsang paagi ang pagkahibalo sa plano sa Dios makaapekto kaninyo?

Tan-awa usab sa Dallin H. Oaks, “Ang Dako nga Laraw,” Liahona, Mayo 2020, 93–96; “Si Amulek Nagpamatuod kang Jesukristo” (bidyo), Gospel Library.

Si Amulek Nagpamatuod kang Jesukristo | Alma 10–11

Si Amulek nagtudlo og usa ka tawo nga ginganlan og Zeezrom ug nagsulti kaniya nganong ang Manluluwas moanhi sa yuta. Ang Pagkabanhaw ni Jesukristo maghimong posible alang sa tanan nga makabaton og imortal nga lawas. Si Zeezrom nagtuo ug naghinulsol.

Alma 12:8–18

Kon ako dili mopatig-a sa akong kasingkasing, ako makadawat og dugang pa nga pulong sa Dios.

Ang pipila ka mga tawo tingali matingala kon nganong dili ipahibalo sa Langitnong Amahan ang tanan ngari kanato. Sa Alma 12:9–14, Gipasabot ni Alma ang usa ka posible nga rason. Kini nga mga pangutana makatabang kaninyo sa pagpamalandong kon unsay iyang gitudlo:

• Unsa ang gipasabot sa pagpatig-a sa inyong kasingkasing? Unsa ang resulta sa pagbaton og tig-a nga kasingkasing? (tan-awa usab sa Alma 8:9–11; 9:5, 30–31; ug 10:6, 25).

• Unsa ang inyong mahimo aron idangop ang inyong kasingkasing ngadto sa Dios? (tan-awa sa Jeremias 24:7; Alma 16:16; Helaman 3:35).

• Unsay inyong mahimo aron maseguro nga ang pulong sa Dios “makit-an diha [kaninyo]”? (Alma 12:13). Kon kamo nakabaton sa pulong sa Dios diha kaninyo, unsa ang epekto niini sa inyong “mga pulong,” “mga binuhatan,” ug “mga hunahuna”? (Alma 12:14).

Unsa ang gitudlo sa kasinatian ni Amulek diha kaninyo mahitungod sa mga panalangin sa pagbaton og malumo nga kasingkasing? (tan-awa sa Alma 10:1–11).

Tan-awa usab sa “Si Alma Nagpasidaan ni Zeezrom” (bidyo), Gospel Library.

Si Alma Nagpasidaan ni Zeezrom | Alma 12–13

Si Alma nga Batan-on mitudlo kang Zeezrom mahitungod sa pagkabanhaw sa mga patay. Siya mipasidaan ni Zeezrom sa paghinulsol ug pagbaton og hugot nga pagtuo diha ni Jesukristo. Si Zeezrom mituo sa mga pagtulun-an ni Alma ug ni Amulek ug naghinulsol.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 8–10

Makahimo ako sa pagpakigbahin sa ebanghelyo ni Jesukristo.

• Ang pahina sa kalihokan niining semanaha makatabang kaninyo sa pagpamubo sa mga panghitabo diha sa Alma 8–10 alang sa inyong mga anak. Tingali gusto ninyo nga motabang kanila sa pagpangita sa mga baroganan nga nakapahimo ni Alma ug Amulek nga maayong mga misyonaryo. Pananglitan, sila wala miundang (tan-awa sa Alma 8:8–13), mipamatuod sila kang Kristo (tan-awa sa Alma 9:26–27), ug sila nagtinabangay (tan-awa sa Alma 10:12).

• Usa ka kanta mahitungod sa misyonaryo nga buhat, sama sa “Gusto Ko Karon nga Mamisyonaryo” (Songbook sa mga Bata, 90) makahatag sa inyong mga anak og mga ideya mahitungod sa mga paagi sa pagpakigbahin sa ebanghelyo ngadto sa ilang mga higala. Dapita sila sa paglista og mga ideya nga ilang makit-an ug mga tawo nga ilang mapakigbahinan sa ebanghelyo. Mahimo pa gani nga inyo silang tugotan nga idrama-drama ang unsay ilang isulti o buhaton.

Pagdasig og partisipasyon. Samtang mag-andam kamo sa pagtudlo, imbis magplano sa mga butang nga isulti, pangutan-a ang inyong kaugalingon, “Unsa man ang buhaton sa mga bata aron makat-on?” Ang mga bata makakat-on og mas maayo ug mas makahinumdom og dugay kon sila aktibong moapil.

Alma 11–12

Ang plano sa Dios usa ka plano sa katubsanan.

• Tingali ang inyong mga anak makadrowing og usa ka hulagway nga nagrepresentar sa mga baroganan sa plano sa katubsanan, sama sa Pagkapukan ni Adan ug Eva, sa Pag-ula ni Jesukristo, paghinulsol, kamatayon, pagkabanhaw, ug paghukom. Dayon makatabang kamo nila nga itukma ang ilang mga hulagway ngadto sa mga bersikulo sa Alma 11–12 nga nagtudlo mahitungod niini nga mga baroganan.

Alma 8:18–22

Mahimo ako nga maayong higala.

• Mahimo kamo nga magdapit og usa ka bata nga kunohay siya si Amulek ug ang lain kunohay si Alma samtang kamo mosugilon sa istorya diha sa Alma 8:18–22. Sa unsang paagi si Amulek maayo nga higala kang Alma? Dayon ang inyong mga anak mahimong mopakigbahin kon sa unsang paagi nga nahimo nilang higala ang usa ka tawo ug unsa ang ilang gibati bahin niana nga kasinatian.

• Tingali makahimo kamo og usa ka friendship puzzle: pangita o pagdrowing og usa ka hulagway nga nagrepresentar og panaghigalaay ug guntinga kini nga mahimong mga piraso sa puzzle. Sa luyo sa matag piraso, isulat ang butang nga atong mahimo aron mahimong usa ka maayo nga higala, lakip sa mga butang nga gibuhat ni Alma ug Amulek. Mahimong magpuli-puli ang inyong mga anak sa pagpili og usa ka piraso ug idugang kini ngadto sa puzzle samtang magbasa kamo sa unsay gisulat diha sa luyo. Kinsa ang nagkinahanglan sa atong pakighigala?

Mahimo kitang maayong mga higala ngadto sa uban.

Alma 11:43–44

Tungod ni Jesukristo, ako mabanhaw.

• Ikonsiderar ang usa ka leksiyon nga naggamit og butang, sama niining usa sa pagtudlo mahitungod sa Pagkabanhaw: ang inyong kamot nagrepresentar sa inyong espiritu, ug ang gwantes mahimong magrepresentar sa inyong lawas. Hulbota ang inyong kamot gawas sa gwantis aron makita nga ang atong mga espiritu ug mga lawas magkabulag atol sa kamatayon. Dayon isulod og balik ang inyong kamot sa gwantis aron ipakita nga ang atong mga espiritu ug mga lawas maghiusa pag-usab sa Pagkabanhaw. Tugoti ang inyong mga anak nga magpuli-puli sa pagsul-ob sa gwantis ug pagtangtang niini kon mobasa kamo sa Alma 11:43 ngadto kanila. Ipakita ang hulagway sa nabanhaw nga Manluluwas (tan-awa sa Libro sa mga Hulagway sa Ebanghelyo, nu. 59), ug ipamatuod nga si Jesukristo mihimo niining posible alang sa tanan nga mabanhaw.

Alang sa dugang nga mga ideya, tan-awa ang isyu karong bulana sa Higala nga magasin.

Paghulagway ni Alma nga nagkaon uban ni Amulek, ni Dan Burr