Conversion of Alma the Younger [Pagkakabig ni Alma nga Batan-on], ni Gary L. Kapp

Mayo 27–Hunyo 2: “Sila Gitawag og ang mga Katawhan sa Dios”

Mosiah 25–28

Human sa dul-an sa tulo ka henerasyon nga pagpuyo sa bulag nga kayutaan, ang mga Nephite nahimong usa ka katawhan pag-usab. Ang katawhan ni Limhi, ang katawhan ni Alma, ug ang katawhan ni Mosiah—bisan ang katawhan sa Zarahemla, nga wala magagikan ni Nephi—karon ang tanan “nalakip uban sa mga Nephite” (Mosiah 25:13). Daghan kanila gusto usab nga mahimong mga miyembro sa Simbahan sa Ginoo, sama sa pagkamiyembro sa katawhan ni Alma. Busa tanan niadtong kinsa ang “matinguhaon sa pagdala diha kanila sa ngalan ni Kristo” gibunyagan, “ug sila gitawag og ang mga katawhan sa Dios” (Mosiah 25:23–24). Human sa katuigan sa panagbangi ug pagkabihag, kini ingon og ang mga Nephite sa kataposan makatagamtam og panahon sa kalinaw.

Apan sa wala madugay, ang mga dili tumutuo misugod sa paglutos sa mga Santos. Unsay naghimo niini nga ilabi ka makapasakit mao nga daghan niining dili tumutuo kaugalingong mga anak sa mga tumutuo—ang “bag-o nga kaliwatan” (Mosiah 26:1), lakip sa mga anak nga lalaki ni Mosiah ug sa usa ka anak nga lalaki ni Alma. Ang asoy nagsulti bahin sa usa ka milagroso nga pagbisita sa usa ka anghel. Apan ang tinuod nga milagro niini nga istorya dili lang mahitungod sa mga anghel nga nagpakita ngadto sa badlongon nga mga anak. Ang pagkakabig mao ang usa ka milagro nga, sa usa ka paagi o sa lain, kinahanglang mahitabo kanatong tanan.

Mga Ideya alang sa Pagkat-on diha sa Panimalay ug sa Simbahan

Mosiah 26:1–6

Makatabang ako sa uban nga moduol ngadto ni Jesukristo.

Ang pagkakabig personal––dili kini mapasa sama sa usa ka kabilin ngadto sa atong mga anak. Samtang magbasa ka sa Mosiah 26:1–6, pamalandongi ang posible nga mga rason nga ang “bag-o nga kaliwatan” nahimulag, ug timan-i ang mga sangpotanan sa ilang pagkawalay pagtuo. Mahimo usab kamo nga maghunahuna mahitungod sa mga tawo nga gusto ninyong dad-on ngadto ni Kristo. Sa kinatibuk-an sa inyong pagtuon sa Mosiah 25–28, ang Espiritu mahimong mohunghong og mga butang nga inyong mahimo aron matabangan sila nga makapalambo og hugot nga pagtuo diha kang Jesukristo.

Mosiah 26:6–39

Ang matinud-anong mga sulugoon sa Dios nagtinguha sa pagbuhat sa Iyang kabubut-on.

Usahay kita lagmit maghunahuna nga ang usa ka lider sa Simbahan sama ni Alma kanunay nga eksaktong masayod sa unsay buhaton. Sa Mosiah 26 atong mabasa ang bahin sa usa ka problema sa Simbahan nga wala sukad nasagubang ni Alma. Unsay gihimo ni Alma niini nga sitwasyon? (tan-awa sa Mosiah 26:13–14, 33–34, 38–39). Unsa ang gisugyot sa kasinatian ni Alma mahitungod kon unsaon kaha ninyo sa pagsulbad ang malisod nga mga problema sa inyong pamilya o sa inyong pag-alagad sa Simbahan?

Unsay gitudlo sa Ginoo ngadto ni Alma diha sa Mosiah 26:15–32? Himatikdi nga ang pipila sa mga tubag sa Ginoo dili usa ka direktang tubag ngadto sa pangutana ni Alma. Unsa ang gisugyot niini mahitungod sa pag-ampo ug sa pagdawat og personal nga pagpadayag?

Ang mga Baroganan mahangtoron. Ikonsiderar kon sa unsa nga paagi ang mga istorya ug mga pagtulon-an sa mga kasulatan magamit sa inyong kinabuhi. Pananglitan, mahimo ka nga mangutana sa inyong kaugalingon, “Unsa nga mga kasinatian ang akong naagian nga susama kang Alma?” o “Unsa nga mga kamatuoran ang gitudlo ni Alma nga makatabang kanako?”

Mosiah 26:15–31

Ang Dios gawasnon nga mopasaylo kanako kon ako maghinulsol ug mopasaylo sa uban.

Ang paghinulsol ug pagpasaylo mao ang mga tema nga nagbalik-balik diha sa Mosiah 26–27. Pangitaa ang mga pulong ug hugpong sa mga pulong nga nagtudlo mahitungod sa paghinulsol ug kapasayloan diha sa Mosiah 26:22–24, 29–31; 27:23–37.

Ang pipila ka mga tawo mahimong maghunahuna kon ang Dios mopasaylo ba gayod kaha kanila. Sa unsang paagi nga inyong mahanduraw si Alma nga Tigulang nga motambag sa usa ka miyembro sa Simbahan didto sa Zarahemla kinsa aduna niana nga problema? Unsay nakat-onan ni Alma gikan sa Ginoo diha sa Mosiah 26:15–31 nga mahimong makatabang niining miyembro sa Simbahan? (tan-awa usab sa Moroni 6:8; Doktrina ug mga Pakigsaad 19:16–18; 58:42–43).

Mosiah 27:8–37; 28:1–4

Pinaagi ni Jesukristo, ako mahimong mag-usab alang sa mas maayo.

Tataw kadto nga si Alma nga Batan-on nagkinahanglan og usa ka espirituhanong pagkatawo og usab. Siya ug ang mga anak nga mga lalaki ni Mosiah “ang labing daotan sa mga makasasala” (Mosiah 28:4). Apan sa wala madugay human sa iyang pagkakabig, si Alma mipamatuod nga ang pagkakabig mahinungdanon—alang sa tanan: “Ayaw pagkahibulong,” miingon siya, “nga ang tanan nga katawhan … kinahanglan matawo pag-usab” (Mosiah 27:25; pagpasabot gidugang).

Samtang magbasa ka mahitungod sa kasinatian ni Alma sa Mosiah 27:8–37, ikonsiderar ang pagbutang sa inyong kaugalingon diha sa iyang istorya. Makahunahuna ka ba og mga butang mahitungod sa inyong kaugalingon nga gikinahanglang usbon? Kinsa, sama sa amahan ni Alma, lagmit mahimong nag-ampo alang kaninyo “uban ang [dakong] hugot nga pagtuo”? Unsa nga mga kasinatian ang nakatabang sa “pagdani kaninyo sa gahom ug pagtugot sa Dios”? (Mosiah 27:14). Unsa nga “mahinungdanong mga butang” ang nabuhat sa Ginoo alang kaninyo ug sa inyong pamilya nga kinahanglan ninyong “hinumdoman”? (Mosiah 27:16). Unsa ang inyong nakat-onan gikan sa mga pulong ug mga lihok ni Alma nga Batan-on mahitungod kon unsay gipasabot sa matawo pag-usab? Unsa nga mga ehemplo ang inyong nakita?

Paggahin og higayon sa pagrekord og pipila ka mga paagi sa Manluluwas nga nagtabang ninyo sa pag-usab—o matawo pag-usab—bisan kon ang inyong mga kasinatian dili ingon ka talagsaon o ingon ka kalit sama ni Alma. Aduna bay usa ka himno nga inyong makanta o mapaminaw nga magpahayag sa inyong mga pagbati, sama sa “Ako Nagpabilin nga Natingala”? (Mga Himno, nu. 114). Kinsa kaha ang makabenepisyo gikan sa pagdungog mahitungod sa inyong mga kasinatian?

Si Elder David A. Bednar mitandi sa pagkatawo pag-usab ngadto sa proseso sa usa ka pipino nga mahimong usa ka atsara (tan-awa sa “Kinahanglan Matawo Kamo Pag-usab,” Liahona, Mayo 2007, 19–22). Unsa ang gitudlo niining pagtandi diha kaninyo mahitungod sa pagkakabig?

Tan-awa usab sa “Si Alma nga Batan-on Nagpamatuod nga Siya Natawo Pag-usab sa Dios” (bidyo), Gospel Library.

Si Alma nga Batan-on Nagpamatuod nga Siya Natawo Pag-usab sa Dios | Mosiah 27; Alma 36

Si Alma nga Batan-on nakamata ug misulti sa iyang pamilya nga ang Manluluwas, si Jesukristo, mikuha sa iyang mga sala. Natawo na siya pag-usab. Si Alma nga Batan-on nagsugod sa pagsangyaw sa ebanghelyo ni Jesukristo ug mipaambit sa iyang kasinatian.

Mosiah 27:8–24

Ang Dios nakadungog sa akong mga pag-ampo ug motubag niini sumala sa Iyang kabubut-on ug panahon.

Tingali imoha nang naagian ang sitwasyon ni Alma nga Tigulang uban sa usa ka sakop sa pamilya nga naghimo og makadaot nga mga pagpili. Unsa ang inyong nakaplagan sa Mosiah 27:8–24 nga naghatag kaninyo og paglaom? Sa unsa kaha nga paagi kini nga mga bersikulo nakaimpluwensiya sa inyong mga pag-ampo alang sa uban?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Mosiah 26:30–31

Ang Ginoo gusto nga ako mopasaylo.

• Sa pagtabang sa inyong mga anak sa pagdiskobre unsa ang gitudlo sa Ginoo kang Alma mahitungod sa kapasayloan, mahimo ninyo silang dapiton sa pagbasa sa Mosiah 26:29–31 ug ihapa kon kapila ka higayon ang pulong “mopasaylo” makita. Unsa ang gitudlo niini nga mga bersikulo mahitungod sa pagpasaylo sa uban? (Tan-awa usab sa: “Tabangi Ko, Mahal nga Amahan,” Songbook sa mga Bata, 52.)

• Sa paghatag og pagpasabot sa ehemplo sa Manluluwas bahin sa kapasayloan, mahimo ka nga mopakita og usa ka litrato Kaniya diha sa krus ug mag-uban sa pagbasa sa Lucas 23:33–34. Unsa ang gihangyo ni Jesus sa Langitnong Amahan nga buhaton alang sa mga tawo kinsa mibutang Kaniya diha sa krus? Human niini nga panaghisgotan, ang inyong mga anak mahimong magdrama-drama sa pagpasaylo sa usag usa.

• Usahay lisod ang pagpasaylo sa atong kaugalingon kon kita makahimo og kasaypanan. Sa unsang paagi ang mga pulong sa Dios ngadto kang Alma makatabang? Hangyoa ang inyong mga anak nga nakig-istorya kunohay ngadto sa usa ka tawo kinsa wala nagtuo nga ang Dios makapasaylo gayod kanila. Dapita ang inyong mga anak sa pagpangita og butang diha sa Mosiah 26:22–23, 29–30 nga lagmit makatabang niana nga tawo.

Mosiah 27:8–37

Si Jesukristo motabang kanako nga mahimong mas mahisama Kaniya.

• Ang pagkakabig ni Alma nga Batan-on ug ang mga anak nga mga lalaki ni Mosiah makapakita sa inyong mga anak nga, tungod sa gahom sa Manluluwas, si bisan kinsa mahimong mausab. Ikaw o ang inyong mga anak makagamit og mga painting niini nga latid, sa pahina sa kalihokan niining semanaha, ug pipila ka importanteng mga kasulatan gikan sa Mosiah 27:8–37 sa pagsugilon sa istorya (tan-awa usab sa “Kapitulo 18: Si Alma nga Batan-on Naghinulsol,” sa Mga Sugilanon sa Basahon ni Mormon, 49–52). Hatagi og espesyal nga pagpasabot ang bersikulo 24, sa pagtudlo nga si Alma naghinulsol ug si Jesukristo mitabang kaniya nga mausab. Ipadrama-drama sa inyong mga anak ang istorya kon ganahan sila.

His Father Rejoiced [Ang Iyang Amahan Nagmaya], ni Walter Rane

Mosiah 27:8–24

Ako makaampo ug makapuasa aron ang Dios mopanalangin sa mga tawo nga akong gimahal.

• Mag-uban sa pagbasa sa Mosiah 27:8–24, ug hangyoa ang inyong mga anak sa pag-ila kon unsay gibuhat ni Alma ug sa iyang katawhan aron sa pagtabang ni Alma nga Batan-on. Nakasulay ka ba sukad nga mipuasa ug nag-ampo alang sa usa ka tawo? Ipakigbahin ang inyong kasinatian ngadto sa inyong mga anak, ug tugoti sila nga mopakigbahin sa ilang kasinatian.

• Ikaw ba o ang inyong mga anak nakaila og tawo kinsa nagkinahanglan og tabang sa Dios? Sa pagsunod sa ehemplo ni Alma, tingali mahimo kamo nga mag-uban sa pag-ampo alang niana nga tawo ug, kon ang inyong mga anak makahimo, pagpuasa alang usab kanila.

Alang sa dugang nga mga ideya, tan-awa ang isyu karong bulana sa Higala nga magasin.

Paghulagway sa usa ka anghel nga nagpakita ngadto ni Alma nga Batan-on, ni Kevin Keele