Minerva Teichert (1888-1976), Escape of King Limhi and His People [Pag-ikyas ni Hari Limhi ug sa Iyang Katawhan], 1949-1951, oil diha sa lawanit, 35 7/8 × 48 ka pulgada. Brigham Young University Museum of Art, 1969.

Mosiah 20–26: Kita Nakasulod ngadto sa usa ka Pakigsaad uban Kaniya

Mosiah 18–24

Ang asoy mahitungod ni Alma ug sa iyang katawhan diha sa Mosiah 18; 23–24 nagpakita kon unsay gipasabot sa “pag-ipon ngadto sa panon sa Dios” (Mosiah 18:8). Sa dihang gibunyagan ang katawhan ni Alma, mihimo sila og pakigsaad uban sa Dios nga “mag-alagad kaniya ug maghupot sa iyang mga sugo” (Mosiah 18:10). Samtang kini usa ka personal nga pasalig ngadto sa Dios, kini may kalabotan usab kon giunsa nila pagtagad ang usag usa. Oo, ang panaw balik ngadto sa Langitnong Amahan indibidwal, ug walay usa ang makahupot sa atong mga pakigsaad alang kanato, apan wala kana magpasabot nga kita nag-inusara. Nagkinahanglan kita sa usag usa. Isip mga miyembro sa Simbahan ni Kristo, nakigsaad kita sa pag-alagad sa Dios pinaagi sa pagtabang ug pag-alagad sa usag usa panahon sa panaw, “sa pagtambayayong sa usag usa nga mga alantoson” (Mosiah 18:8–10). Ang katawhan ni Alma sa tinuod adunay mga alantoson nga gipas-an, sama lamang nga kitang tanan aduna. Ug usa ka paagi nga ang Ginoo nagtabang kanato nga “makadaog sa [atong] mga alantoson uban sa kasayon” (Mosiah 24:15) mao ang paghatag kanato og komunidad sa mga Santos kinsa misaad nga magbangotan uban kanato ug sa paghupay kanato, sama lamang nga kita misaad sa pagbuhat niini alang kanila.

Ang Ginoo Miluwas sa Katawhan ni Limhi ug ni Alma | Mosiah 21-24

Ang katawhan ni Limhi ug Alma gidala sa pagkaulipon ug pagkabihag sa mga Lamanita. Pinaagi sa naglambo nga pagtuo ug pagpakigsaad giluwas sila sa Ginoo gikan sa pagkaulipon.

Mga Ideya alang sa Pagkat-on diha sa Panimalay ug sa Simbahan

Mosiah 18:1–17

Kon ako bunyagan, ako maghimo og pakigsaad ngadto sa Dios.

Ikonsiderar kon unsa ka lawom ang gibati sa mga tumutuo nga gihulagway diha sa Mosiah 18 mahitungod ni Jesukristo. Sila kinahanglang magpundok sa tinago-tago nga paagi, sa dakong risgo, aron makakat-on mahitungod Kaniya (tan-awa sa bersikulo 3). Ug sa dihang gihatagan og kahigayonan sa pagpakita sa ilang pasalig pinaagi sa pakigsaad sa bunyag, “sila namakpak sa ilang mga kamot tungod sa hingpit nga kalipay, ug misinggit: Kini mao ang tinguha sa among mga kasingkasing” (Mosiah 18:11).

Ang pagbasa niining mga bersikulo mahimong usa ka maayo nga oportunidad sa pagpamalandong kon unsa ka importante ang inyong pagkigsaad diha kaninyo. Samtang magtuon ka partikular na sa Mosiah 18:8–14, ikonsiderar ang mga pangutana nga sama niini:

• Unsay inyong nakat-onan gikan niini nga mga bersikulo mahitungod sa mga saad nga inyong gihimo sa bunyag? Usa man ang gisaad sa Dios diha kaninyo? (tan-awa sa mga bersikulo 10, 13).

• Sa unsang paagi nga ang pakigsaad sa pagserbisyo sa Dios may kalabotan sa atong mga paningkamot sa pagpangalagad ngadto sa usag usa (tan-awa sa mga bersikulo 8–9).

• Unsa ang gipasabot niini nganha kaninyo nga “mobarog ingon nga [usa ka saksi] sa Dios?” (bersikulo 9).

• Sa unsang paagi nga ang pagtuman sa inyong pakigsaad sa bunyag makatabang kaninyo nga mahimong “ingon nga puno uban sa Espiritu”? (Mosiah 18:14). Sa unsang paagi nga ang Espiritu motabang kaninyo sa pagtuman sa inyong pakigsaad?

Ang pagtubag niining mga pangutana tingali mogiya kaninyo sa pagpamalandong kon nganong ang mga pakigsaad ug mga ordinansa importante ngadto sa Dios. Mahimong makakita ka og mga salabotan diha sa mensahe ni Elder Gerrit W. Gong “Pagkasakop diha sa Pakigsaad” (Liahona, Nob. 2019, 80–83) o sa mensahe ni Presidente Jean B. Bingham “Ang mga Pakigsaad uban sa Dios Makalig-on, Makapanalipod, ug Makaandam Kanato alang sa Mahangtoron nga Himaya” (Liahona, Mayo 2022, 66–69). Nganong kamo mapasalamaton sa inyong mga pakigsaad? Unsay inyong gibuhat aron matuman ang inyong mga saad?

Tan-awa usab sa “Si Alma nga Tigulang Nagtudlo ug Namunyag diha sa Katubigan sa Mormon” (bidyo), Gospel Library.

Si Alma nga Tigulang Nagtudlo ug Namunyag diha sa Katubigan sa Mormon | Mosiah 15; 18

Si Alma nga Tigulang nagtuo ni propeta Abinadi ug nagtudlo mahitungod sa pag-anhi ni Jesukristo. Daghang mga tawo ang mituo sa pagpamatuod ni Alma ug mipili sa paghinulsol ug magpabunyag diha sa mga Katubigan sa Mormon.

Itudlo ang kamatuoran gikan sa mga kasulatan ug sa mga propeta sa ulahing mga adlaw. Samtang magtudlo ka—ug magkat on—hinumdomi nga ang usa sa labing maayo nga mga paagi sa pag-usbaw sa hugot nga pagtuo diha ni Kristo mao ang pagtutok sa mga kasulatan ug sa mga pulong sa mga propeta sa ulahing mga adlaw (tan-awa sa Mosiah 18:19).

Mosiah 18:17–30

Ang Dios nagsugo sa Iyang katawhan sa pagpundok, pag-organisar, ug maghiusa.

Ang ubang mga tawo naghunahuna, nganong nagkinahanglan man kita og simbahan? Siksika sa Mosiah 18:17–31, nga mangita sa bili nga nakaplagan sa mga tawo ni Alma diha sa panagpundok sa “ang simbahan ni Kristo” (Mosiah 18:17). Unsa nga mga pagkaparehas ang inyong nakita diha sa Simbahan ni Jesukristo sa kapanahonan ni Alma ug sa atong panahon?

Unsaon ninyo pagtubag ang usa ka higala o sakop sa pamilya nga wala motuo nga ang organisado nga simbahan gikinahanglan? Nganong mapasalamaton man ka nga nahisakop sa Simbahan ni Jesukristo?

Hunahunaa kon unsa ang inyong mabuhat aron matabangan ang mga miyembro sa inyong ward o branch nga mahimong “nabugkos diha sa pagkahiusa ug diha sa gugma” (Mosiah 18:21).

Tan-awa usab sa Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 24–26; “Maghigugmaay,” Hymns, nu. 196.

Mosiah 21–24

Ang Dios nagtabang kanako sa pagpas-an sa akong mga alantoson.

Ang katawhan ni Limhi ug ang katawhan ni Alma natumpawak ngadto sa pagkaulipon, bisan og sa managlahing mga kahimtang. Unsay inyong makat-onan pinaagi sa pagtandi sa mga asoy sa katawhan ni Limhi diha sa Mosiah 19–22 ug sa katawhan ni Alma diha sa Mosiah 18; 23–24? Samtang inyong buhaton, pangitaa ang mga mensahe nga magamit sa inyong kinabuhi. Pananglitan, unsa ang gipasabot sa “pag-uswag sa hinay-hinay”? (Mosiah 21:16). Sa unsang paagi magamit ninyo kini nga baroganan?

Mosiah 23:21–24; 24:8–17

Ako makasalig sa Ginoo.

Bisan og ilang gihinulsolan ang ilang mga sala, si Alma ug ang iyang katawhan nakita gihapon ang ilang mga kaugalingon nga anaa sa pagkaulipon. Ang ilang kasinatian nagpakita nga ang pagsalig sa Ginoo ug pagsunod sa atong mga pakigsaad dili kanunay motangtang sa atong mga hagit, apan kini makatabang kanato sa pagbuntog niini. Samtang kamo magbasa diha sa Mosiah 23:21–24 ug 24:8–17, timan-i ang mga pulong ug hugpong sa mga pulong nga makatabang kaninyo sa pagkat-on sa pagsalig diha sa Dios, sa walay pagsapayan sa inyong mga kahimtang.

Tan-awa usab sa David A. Bednar, “Makadaog sa Ilang mga Alantoson uban sa Kasayon,” Liahona, Mayo 2014, 87–90.

Mga Ideya sa Pagtudlo sa mga Anak

Mosiah 18:7–17

Kon ako bunyagan, ako maghimo og pakigsaad ngadto sa Dios.

• Usa sa labing importanteng mga paagi sa pagtabang sa mga anak nga maandam alang sa bunyag mao ang pagtudlo kanila mahitungod sa pakigsaad nga ilang himoon kon sila bunyagan. Kini mahimong ingon ka yano sa pagpakita og litrato sa kataposan sa latid niining semanaha ug sa pagbasa mahitungod sa pakigsaad uban kanila diha sa Mosiah 18:9–10. Ikonsiderar ang pagdapit og usa ka anak kinsa nabunyagan na aron matudlo kini ngadto sa mas manghod nga mga bata. Ang inyong mga anak tingali malingaw nga makadungog mahitungod sa inyong bunyag. Sa unsang paagi nga ang pagtuman sa inyong mga pakigsaad ngadto sa Dios nakapanalangin sa inyong kinabuhi?

• Ang mga anak nga nabunyagan mahimong makagamit og kanunayng mga pahinumdom mahitungod sa mga pakigsaad nga ilang gihimo ug bag-ohon sa matag semana diha sa sakramento. Tingali ang inyong mga anak makatandi sa pakigsaad sa bunyag nga gihulagway diha sa Mosiah 18:8–10 uban sa mga pag-ampo sa sakramento (tan-awa sa Doktrina ug mga Pakigsaad 20:77, 79). Unsaon nato paghimo sa sakramento nga usa ka espesyal, matinahorong panahon, sama sa panahon sa atong bunyag?

Mohimo kita og pakigsaad ngadto sa Dios kon kita bunyagan.

Mosiah 18:17–28

Kon ako bunyagan, ako mahimong usa ka miyembro sa Simbahan ni Jesukristo.

• Nasayod ba ang inyong mga anak unsa ang gipasabot sa mahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw? Ikonsiderar ang pagtabang kanila sa pagpangita og mga litrato nga nagrepresentar og mga butang nga gibuhat sa mga miyembro sa Simbahan sa Mosiah 18:17–28. Pananglitan, ang mga litrato sa Pag-orden ngadto sa Pagkapari ug Pagbayad sa Ikapulo (Libro sa mga Hulagway sa Ebanghelyo, nus. 106, 113) tingali nagrepresentar sa mga bersikulo 18 ug 27–28. Sultihi sila nganong kamo mapasalamaton nga nahimong usa ka miyembro sa Simbahan ni Jesukristo.

• Ang pagtabang sa mga anak nga mobati nga “nabugkos diha sa pagkahiusa ug diha sa gugma” (Mosiah 18:21) makatabang kanila nga magpabilin nga konektado sa Simbahan sa tibuok nilang kinabuhi. Ikonsiderar ang pagdapit sa mga inyong mga anak sa pagbasa sa Mosiah 18:17–28. Unsa ang gibuhat sa mga miyembro sa Simbahan ni Kristo sa panahon ni Alma sa paghigugma ug pagserbisyo sa usag usa? Unsaon nato sa paghimo niini diha sa atong ward, branch, o kumunidad? Ang usa ka awit mahitungod sa gugma, sama sa “Mouban Ko ninyo” (Songbook sa mga Bata, 78), makaabag niini nga mensahe.

Mosiah 24:8–17

Ang Dios makahimo sa akong mga palas-anon nga magaan.

• Ang usa ka yano nga leksiyon nga naggamit og butang makapahimo sa pagkat-on nga mas halandomon. Ikonsiderar ang pagpuno sa usa ka bag sa bug-at nga mga butang (nga nagrepresentar sa mga palas-anon), ug dapita ang usa ka bata sa paggunit sa bag. Samtang magbasa kamo sa Mosiah 24:8–17 uban sa inyong mga anak, hangyoa sila sa pagtangtang sa butang gikan sa bag sa matag higayon nga ilang madungog ang butang mahitungod ni Alma ug sa iyang katawhan nga nagtinguha sa tabang sa Dios diha sa ilang mga palas-anon. Mahimo na dayon ka nga makig-istorya nila mahitungod sa paagi nga ang Langitnong Amahan makahimo sa atong mga palas-anon nga mas mogaan kon kita magtinguha sa Iyang tabang.

Alang sa dugang nga mga ideya, tan-awa ang isyu karong bulana sa Higala nga magasin.

Ang mga Katubigan sa Mormon, ni Jorge Cocco