“Mayo 13–19: ‘Usa ka Kahayag … Nga Dili Gayod Mahimo nga Mongitngit.’ Mosiah 11–17,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Mayo 13–19. Mosiah 11–17,” Dali, Sunod Kanako—Alang sa Panimalay ug sa Simbahan: 2024 (2024)
Abinadi before King Noah [Si Abinadi diha sa atubangan ni Hari Noah], ni Andrew Bosley
Mayo 13–19: “Usa ka Kahayag … Nga Dili Gayod Mahimo nga Mongitngit”
Mosiah 11–17
Ang dagko nga mga kalayo makasugod sa usa lamang ka kidlap. Si Abinadi mao lamang ang usa ka tawo nga nagpamatuod batok sa usa ka gamhanang hari ug sa iyang husgado. Ang iyang mga pulong gisalikway sa kasagarang bahin, ug siya gisilotan og kamatayon. Apan ang iyang pagpamatuod kabahin ni Jesukristo, kinsa mao ang “kahayag … nga dili gayod mahimo nga mongitngit” (Mosiah 16:9), mikidlap diha sa galamhan sa bata-ong pari nga si Alma. Ug kana nga kidlap sa pagkakabig sa hinay-hinay mitubo samtang si Alma midala og daghan pa ngadto sa paghinulsol ug hugot nga pagtuo diha ni Jesukristo. Ang nagdilaab nga kalayo nga nakapatay ni Abinadi sa kadugayan napalong, apan ang kalayo sa hugot nga pagtuo nga nahimo sa iyang mga pulong adunay malungtaron nga impluwensiya diha sa mga Nephite—ug sa mga tawo kinsa nagbasa sa iyang mga pulong karon. Kadaghanan kanato dili gayod kaayo mag-atubang sa unsay gihimo ni Abinadi tungod sa atong mga pagpamatuod, apan kitang tanan adunay mga higayon nga ang pagsunod ni Jesukristo usa ka pagsulay sa atong kaisog ug hugot nga pagtuo. Tingali ang pagtuon sa pagpamatuod ni Abinadi mopalig-on usab sa pagpamatuod ug kaisog sa inyong kasingkasing.
Tan-awa usab sa “Si Abinadi Nagpamatuod kang Jesukristo” (bidyo), Gospel Library.
Mga Ideya alang sa Pagkat-on diha sa Panimalay ug sa Simbahan
Mahimo akong mobarog alang ni Jesukristo, bisan kon ako mag-inusara.
Samtang magtuon ka sa Mosiah 11–13; 17, tan-awa ang mga hulagway ni Abinadi niini nga latid. Unsay inyong nakat-onan mahitungod sa pagbarog isip usa ka saksi ni Kristo? Sa partikular, mahimo ka nga inyong itutok ang inyong pagtuon diha sa mga tudling ug mga pangutana sama niini:
-
Unsaon ninyo paghulagway si Noah ug ang iyang mga katawhan? Ngano nga gikinahanglan man ang kaisog alang kang Abinadi sa pagpakigbahin sa mensahe sa Dios ngadto kanila? (tan-awa sa Mosiah 11:1–19, 27–29; 12:9–15).
-
Unsaon man ninyo sa paghulagway si Abinadi? Unsa man ang nasabtan ni Abinadi nga nakatabang kaniya nga magmaisogon diha sa iyang pagpamatuod? (tan-awa sa Mosiah 13:2–9, 28, 33–35; 17:8–10, 20).
Kanus-a ninyo nabati nga daw mibarog kamo nga nag-inusara sa pagdepensa sa Manluluwas ug sa Iyang ebanghelyo? Sa unsang paagi Siya nagtabang kaninyo nga mobati nga Siya nag-uban kaninyo? Samtang kamo mamalandong niini, mahimo ninyong basahon ang asoy ni Eliseo ug sa iyang batan-on nga sulugoon diha sa 2 Mga Hari 6:14–17. Unsa ang nakapadasig kaninyo mahitungod niining asoy?
Mahimo usab ninyong pangitaon diha sa mga pahina 31–33 sa Alang sa Kalig-on sa mga Kabatan-onan: Usa ka Giya sa Paghimo og mga Pagpili aron mangita og mga hugpong sa mga pulong nga makahatag kaninyo og kaisog sa pagdepensa sa kamatuoran. O mahimo usab ninyo kana diha sa mga liriko sa himno sama sa “Buhata Unsa ang Matarong” o “Magpadayon Tang Tanan” (Hymns, mga nu. 145, 150).
Unsaon ninyo paggamit ang inyong nakat-onan gikan ni Abinadi?
Tan-awa usab sa Mga Taga-Roma 1:16; 2 Timoteo 1:7–8.
Pagtudlo pinaagi sa Espiritu. “Ang gamhanang pagtudlo sa ebanghelyo nagkinahanglan dili lamang sa pag-andam sa leksiyon apan sa pag-andam og maayo sa inyong kaugalingon sa espirituhanong paagi [aron] makadungog ug mosunod sa giya sa Espiritu samtang ikaw magtudlo” (Pagtudlo Sumala sa Pamaagi sa Manluluwas, 17).
Kinahanglan nakong andamon ang akong kasingkasing aron masabtan ang mga pulong sa Dios.
Ang mga pari ni Hari Noah pamilyar sa pulong sa Dios. Sila makakutlo sa mga tudling sa kasulatan ug nangangkon nga nagtudlo sa kasugoan. Ug gani, ang ilang mga kinabuhi ingon og wala maapektohi sa ebanghelyo sa Manluluwas. Ngano man?
Hunahunaa kini samtang kamo magbasa sa Mosiah 12:19–37. Unsa kaha ang buot ipasabot sa gamiton ang inyong kasingkasing sa pagsabot sa pulong sa Dios? Unsa nga mga pulong o hugpong sa pulong ang nakapadasig kaninyo aron mohimo og mga kausaban sa paagi sa inyong pagkat-on sa ebanghelyo?
Ang mga sugo sa Dios kinahanglang masulat diha sa akong kasingkasing.
Pamalandongi ang pag-obserbar ni Abinadi nga ang kasugoan “wala mahisulat [diha] sa mga kasingkasing” sa mga pari (Mosiah 13:11). Unsa kaha ang gipasabot niini nga hugpong sa mga pulong? Samtang magbasa ka sa Mosiah 13:11–26, ikonsiderar kon kini nga kasugoan nahisulat ba diha sa inyong kasingkasing.
Tan-awa usab sa Jeremias 31:31–34; 2 Mga-Taga Corinto 3:3.
Si Jesukristo nag-antos alang kanako.
Sa Mosiah 14–15, tan-awa ang mga pulong ug mga hugpong sa mga pulong nga naghulagway sa Manluluwas ug unsa ang Iyang giantos alang kaninyo. Hain nga mga bersikulo ang nakatabang nga mapalawman ang inyong gugma ug pagpasalamat ngadto Kaniya?
Sa unsa nga paagi nga si Jesukristo mao ang Amahan ug Anak?
Gitudlo ni Abinadi nga ang Dios nga Anak—si Jesukristo—mao ang mahimong Manunubos (tan-awa sa Mosiah 15:1), nagpuyo diha sa unod, nahimong tawo ug Dios (mga bersikulo 2–3). Hingpit Niyang gitugyan ang Iyang Kaugalingon ngadto sa kabubut-on sa Dios nga Amahan (mga bersikulo 5–9). Tungod niini, si Jesukristo mao ang Anak sa Dios ug ang hingpit nga yutan-ong representasyon sa Dios nga Amahan (tan-awa diha sa Juan 14:6–10).
Si Jesukristo mao usab ang Amahan sa pasabot nga kon kita modawat sa Iyang katubsanan, kita mahimo nga “iyang binhi” ug “mga manununod sa gingharian sa Dios” (Mosiah 15:11–12). Sa laing pagkasulti, kita mahimong matawo pag-usab sa espirituhanong paagi pinaagi Kaniya (tan-awa sa Mosiah 5:7).
Sa inyong pamati nganong importante nga masayod niining mga kamatuoran mahitungod sa Langitnong Amahan ug ni Jesukristo? Sa unsang paagi ang pagpamatuod ni Abinadi makapalig-on sa inyong pagtuo diha Kanila?
Mga Ideya sa Pagtudlo sa mga Anak
Mahimo akong mobarog alang ni Jesukristo, bisan kon ako mag-inusara.
-
Adunay higayon sa atong mga kinabuhi, kitang tanan mag-atubang og pagpamugos sa paghimo og mga pagpili nga batok sa atong hugot nga pagtuo diha ni Jesukristo. Unsa ang makat-onan sa inyong mga anak gikan ni Abinadi mahitungod sa pagbarog isip usa ka saksi ni Jesukristo, bisan kon kini dili inila? Ang artwork niining latid o “Kapitulo 14: Si Abinadi ug si Hari Noah” (sa Mga Sugilanon sa Basahon ni Mormon, 38–42) makatabang nila sa paghanduraw sa asoy diha sa Mosiah 11–13; 17. Pangutan-a sila kon unsa ang ilang nagustohan mahitungod ni Abinadi.
-
Ang inyong mga anak lagmit malingaw nga idrama-drama ang mga tipik sa istorya ni Abinadi. Dayon sila mahimong modrama-drama og tinuod nga mga sitwasyon sa kinabuhi aron mapraktis kon unsa kaha ang ilang buhaton kon ang uban gusto nga mopabuhat nila og sayop nga butang. O mahimo silang mopakigbahin og mga kasinatian sa dihang sila nagmaisogon sa pagsunod ni Jesukristo. Giunsa sa pagsunod ni Abinadi si Jesukristo? (tan-awa sa Mosiah 13:2–9; 17:7–10). Nganong wala mobuhat si Hari Noah sa unsay iyang nahibaloan nga husto? (tan-awa sa Mosiah 17:11–12).
Kinahanglang mosunod ko sa Napulo ka mga Sugo.
-
Ang mga pari ni Hari Noah nasayod sa kasugoan apan kini wala “mahisulat sa [ilang] mga kasingkasing” (Mosiah 13:11). Unsaon ninyo sa pagtabang sa inyong mga anak nga makahibalo sa mga kasugoan ug higugmaon kini? Tingali ilang masulat ang mga kasugoan gikan sa Mosiah 12:33–36 ug 13:11–24 diha sa mga piraso sa papel nga giporma og kasingkasing. Samtang ilang buhaton, pakig-istorya kanila mahitungod sa unsa ang gipasabot niini nga kasugoan ug unsaon sa pagsunod niini. Unsaon man nato sa pagsulat kini nga mga kasugoan diha sa atong mga kasingkasing?
-
Mahimo usab kamong mag-uban sa pagkanta og usa ka awit mahitungod sa mga kasugoan sama sa “Sunda ang Kasugoan” (Songbook sa mga Bata, 68–69). Unsa nga mga panalangin ang nagagikan sa pagtuman sa mga kasugoan?
Ang mga kasulatan nagtudlo kanato sa mga sugo sa Dios.
Ang Langitnong Amahan mipadala ni Jesukristo sa paggiya kanako balik ngadto Kaniya.
-
Bisan og kini usa ka mubo nga kapitulo, ang Mosiah 14 adunay pipila ka mga pulong ug hugpong sa mga pulong nga naghulagway ni Jesukristo. Tingali kamo ug ang inyong mga anak makalista niini samtang kamo mag-uban sa pagbasa niini. Dayon kamo mahimong maghisgot mahitungod sa unsay inyong gibati mahitungod sa Manluluwas samtang kamo magtuon niining mga pulong ug hugpong sa mga pulong.
-
Sa pagtudlo mahitungod ni Jesukristo, si Abinadi mikutlo ni propeta Isaias, kinsa mitandi kanato ngadto sa nawala nga karnero. Tingali ang inyong mga anak mahimong mopakigbahin og mga kasinatian sa dihang sila nawad-an og usa ka butang o sila mismo ang nawala. Unsa ang ilang gibati? Unsay ilang gihimo? Dayon mahimo kamong mag-uban sa pagbasa sa Mosiah 14:6 ug 16:4–9. Sa unsang paagi kita sama sa karnero nga nahilayo gikan sa Dios? Sa unsang paagi si Jesukristo motabang kanato nga makabalik?
Alang sa dugang nga mga ideya, tan-awa ang isyu karong bulana sa Higala nga magasin.
His Face Shone with Exceeding Luster.[Ang Iyang Nawong Mihayag sa Tumang Kasanag], ni Jeremy Winborg