Minerva Teichert (1888–1976), Ammon diha sa atubangan ni Hari Limhi, 1949–1951, lana diha sa masonite, 35 15/16 × 48 ka pulgada. Brigham Young University Museum of Art, 1969.

Mayo 6–12: “Diha sa Gahom sa Ginoo”

Mosiah 7–10

Samtang ang katawhan ni Hari Mosiah nagtagamtam og “kanunay nga kalinaw” sa Zarahemla (Mosiah 7:1), nahunahunaan nila ang laing grupo sa mga Nephite, nga sa milabay nga daghang katuigan mibiya aron mopuyo sa yuta sa Lehi-Nephi. Mga henerasyon ang milabay, ug ang katawhan ni Mosiah wala na makadungog gikan kanila. Busa, si Mosiah mihangyo ni Ammon sa pagpangulo og usa ka pundok sa pagpangita sa mga Nephite kinsa mibiya. Ang pundok sa mga tigpangita nakakaplag nga kining mga Nephite, “tungod sa kadaotan” (Mosiah 7:24), nabihag sa mga Lamanite. Apan sa pag-abot ni Ammon ug sa iyang kaigsoonan, sa kalit dihay paglaom alang sa kaluwasan.

Usahay sama kita niining nabihag nga mga Nephite, nag-antos tungod sa atong mga sala, naghunahuna kon unsaon nato pagkakaplag og kalinaw pag-usab. Usahay sama kita ni Ammon, naaghat sa pagbati nga motabang ngadto sa uban ug sa kadugayan nasuta nga ang atong mga paningkamot nakadasig kanila sa “[pag]hangad [sa ilang] mga ulo, ug [mag]lipay, ug ibutang ang [ilang] pagsalig diha sa Dios” (Mosiah 7:19). Walay pagsapayan sa atong mga kahimtang, kitang tanan nagkinahanglan nga maghinulsol ug “mobalik ngadto sa Ginoo uban ang hingpit nga katuyoan sa kasingkasing,” uban sa hugot nga pagtuo nga “siya … moluwas [kanato]” (Mosiah 7:33).

Mga Ideya alang sa Pagkat-on diha sa Panimalay ug sa Simbahan

Mosiah 7:14–33

Si Jesukristo adunay gahom sa pagluwas kanako.

Ang pakighimamat kang Ammon nakahatag ni Hari Limhi og paglaom, ug gusto niyang ipasa kana nga paglaom ngadto sa iyang katawhan. Tingali ang iyang mga pulong makahatag usab kaninyo og paglaom. Alang sa konteksto, ikonsiderar ang pagrebyo sa sitwasyon sa katawhan ni Limhi diha sa Mosiah 7:20–25. Dayon pamalandongi kini nga mga pangutana samtang magbasa ka sa Mosiah 7:14–33:

• Unsa ang gisulti ni Limhi aron malig-on ang pagtuo ug paglaom sa iyang katawhan diha ni Kristo?

• Unsa nga hugpong sa mga pulong ang nakatabang ninyo nga mobati og paglaom? (tan-awa sa mga bersikulo 19, 33).

• Unsa nga mga kasinatian ang nakatabang kaninyo nga mosalig nga ang Dios makaluwas ug moluwas kaninyo?

Tan-awa usab sa: “Manunubos sa Israel,” Mga Himno, nu. 6.

Mosiah 7:26–27

Ako gilalang “pinasubay sa hulagway sa Dios.”

Sa Mosiah 7:26–27, si Limhi mipasabot og pipila ka kamatuoran nga gitudlo ni Abinadi. Unsa nga mga kamatuoran ang inyong matino gikan niining mga bersikulo? Sa unsang paagi nga kining mga kamatuoran nakaapekto sa paagi sa inyong pagtan-aw sa Dios ug sa inyong kaugalingon?

Tan-awa usab sa Russell M. Nelson, “Ang Inyong Lawas: Usa ka Talagsaong Gasa nga Angay Mahalon,” Liahona, Ago. 2019, 50–55.

Mosiah 8:13–19

Ang Ginoo naghatag og mga propeta, mga manalagna, ug mga tigpadayag alang sa kaayohan sa katawhan.

Sa dihang nadungog ni Limhi ang pagpamatuod ni Ammon nga ang Ginoo adunay usa ka manalagna, si Limhi “nalipay sa hilabihan, ug mihatag og pagpasalamat sa Dios” (Mosiah 8:19). Ngano kaha nga siya mibati nianang paagiha? Unsay inyong nakat-onan mahitungod sa mga manalagna gikan sa mga pulong ni Ammon diha sa Mosiah 8:13–19?

Karon, atong gipaluyohan ang Unang Kapangulohan ug ang Korum sa Napulog Duha ka Apostoles isip mga propeta, mga manalagna, ug mga tigpadayag. Sa unsang paagi nga sila nahimong “usa ka mahinungdanon nga kaayohan” nganha kaninyo? (Mosiah 8:18). Unsa ang gitudlo nila diha kaninyo mahitungod ni Jesukristo?

Sa unsang paagi nga kamo, sama ni Ammon, maisogon nga mamulong mahitungod sa panginahanglan alang sa mga propeta, mga manalagna, ug mga tigpadayag? (tan-awa sa Mosiah 8:13–18). Pananglitan, unsa ang inyong ikapakigbahin sa inyong pamilya o diha sa social media mahitungod sa:

• Mga kamatuoran nga gipahiuli sa atong panahon pinaagi ni Joseph Smith ug sa uban nga mga propeta sa Ginoo (sama sa kinaiyahan sa Dios, sa atong balaan nga pagkatawo, o sa mahangtoron nga kinaiyahan sa pamilya). Usa ka rebyo bahin sa “Ang Pagpahiuli sa Kahingpitan sa Ebanghelyo ni Jesukristo” o “Ang Pamilya: Usa ka Pamahayag ngadto sa Kalibotan” (Gospel Library) tingali makatabang kaninyo sa paghunahuna og pipila niining mga kamatuoran.

• Mga panalangin sa kasugoan o mga ordinansa (sama sa Pulong sa Kaalam, sa balaod sa kaputli, o pagsilyo sa mga pamilya).

Sa miagi nga bulan, kita nakadungog sa mga propeta, mga manalagna, ug mga tigpadayag diha sa kinatibuk-ang komperensiya. Unsa nga mga mensahe ang nakapadasig kaninyo? Unsa ang inyong buhaton nga lahi base sa unsa ang inyong nakat-onan? Unsa ang gisulti sa mga manalagna sa Ginoo mahitungod sa “mga butang diin umaabot”? (Mosiah 8:17).

Mosiah 9–10

Ako makaatubang sa akong mga hagit “diha sa gahom sa Ginoo.”

Si Zeniff miangkon nga ang iyang kasaypanan mibutang sa iyang katawhan diha sa malisod nga kahimtang. Apan sa kaulahian, atol sa mga gubat batok sa mga Lamanite, siya mitabang sa iyang katawhan sa pag-atubang sa ilang mga hagit uban sa hugot nga pagtuo diha sa Ginoo. Samtang inyong basahon ang Mosiah 9–10, pangitaa kon unsay gibuhat sa katawhan ni Zeniff sa pagpakita sa ilang hugot nga pagtuo. Giunsa sila paglig-on sa Dios? Giunsa Niya sa paglig-on kaninyo? Unsay buot ipasabot niini nganha kaninyo sa pagpadayon “diha sa gahom sa Ginoo”? (Mosiah 9:17; 10:10–11).

Mosiah 10:11–17

Ang akong mga pagpili makaimpluwensiya og mga henerasyon.

Samtang magbasa ka sa Mosiah 10:11–17, ilha kon sa unsang paagi ang mga aksiyon ug mga kinaiya sa miagi nga mga henerasyon sa mga Lamanite nakaapekto sa mga henerasyon nga misunod. Unsa ang gisugyot niini mahitungod kon sa unsang paagi ang inyong mga pagpili mahimong makaapekto sa uban—alang sa maayo o dili maayo—lakip sa mga tawo nga wala pa matawo?

Paggamit og mga leksiyon nga mopakita og butang. Ang mga leksiyon nga mopakita og butang makapahimo sa pagkat-on nga makalingaw ug dili malimtan. Tingali ang usa ka linya sa mga domino makapakita kon sa unsang paagi ang mga pagpili sa mga tawo makaapekto sa ilang mga kaliwatan (tan-awa sa Mosiah 10:11–17).

Mga Ideya sa Pagtudlo sa mga Anak

Mosiah 7:19

Ang Dios mitabang sa mga tawo diha sa mga kasulatan, ug Siya makatabang kanako.

• Sa dihang ang iyang katawhan anaa sa kalisod, si Hari Limhi mipakigbahin og mga kasulatan aron sa paglig-on sa ilang patuo. Pangutan-a ang inyong mga anak mahitungod sa mga istorya sa kasulatan o mga karakter nga makatabang kanila nga makabaton og hugot nga pagtuo. Dayon mahimo ninyong basahon ang Mosiah 7:19 ngadto nila ug moribyo sa mga istorya nga nahisgotan niini nga bersikulo (tan-awa “Ang Pagpalabay” ug “Ang mga Israelite sa Kamingawan” sa Mga Istorya sa Daang Tugon, 69–74). Tingali ang inyong mga anak ganahan nga idrama-drama kini. Giunsa sa Ginoo pagtabang ang mga tawo niini nga mga istorya? Sa unsang paagi Siya makatabang kanato?

• Alang sa dugang pa nga mga ehemplo kon giunsa sa Ginoo pagtabang kanato, pagpili og pipila ka mga bersikulo sa “Mga Istorya sa Basahon ni Mormon” o sa “Ang Kaisog ni Nephi” (Songbook sa mga Bata, 62, 64–65) nga kantahon uban sa inyong mga anak. Tabangi sila sa pag-ila kon giunsa pagtabang sa Ginoo ang katawhan diha sa Basahon ni Mormon—ug sa unsang paagi Siya makatabang kanato.

Mosiah 8:16–18

Ang Dios mihatag kanato og mga propeta, mga manalagna, ug mga tigpadayag.

• Usa ka paagi sa pagtudlo mahitungod sa mga manalagna mao ang pagkomparar kanila ngadto sa mga butang nga makatabang kanato nga makakita og mas maayo, sama sa mga antipara, teleskopyo, o usa ka microscope. Dayon samtang inyong basahon ang Mosiah 8:17 ngadto sa inyong mga anak, mahimo nilang ibutang ang ilang mga kamot sa ilang mga mata nga kunohay nagteleskopyo sa matang higayon nga ilang madungog ang pulong “manalagna” (tan-awa usab sa Moises 6:35–36). Pakig-istorya kanila mahitungod sa mga butang nga ang Ginoo nagtabang sa mga propeta nga “makakita” nga dili nato makita. Unsa ang gipadayag kanato sa atong mga propeta o mga manalagna, sama ni Joseph Smith?

• Human sa pagbasa sa Mosiah 8:16–18 uban sa inyong mga anak, makatabang kamo nila sa paghunahuna og mga paagi sa pagkompleto sa usa ka kapayahag [sentence] sama sa Ang manalagna sama sa usa ka … kinsa motabang kanato sa … . Pananglitan, ang usa ka manalagna sama sa usa ka timaan sa trapiko nga mopunting kanato ngadto ni Jesus.

• Makahimo usab kamo og papel nga mga tunob sa tiil ug dapita ang inyong mga anak sa pagdrowing og mga litrato diha kanila kabahin sa mga butang nga gitambag sa mga propeta, mga manalagna, ug mga tigpadayag ngari kanato. Ibutang ang mga tunob sa tiil diha sa dalan libot sa kwarto, ug palakawa ang inyong mga anak niini nga mga tunob sa tiil. Sa unsang paagi ang usa ka manalagna mahimong “usa ka mahinungdanon nga kaayohan” ngari kanato? (tan-awa sa Mosiah 8:17–18).

Mosiah 9:14–18; 10:10–11

Kon ako huyang, ang Ginoo makapalig-on kanako.

• Kon ang mga anak mag-atubang og mga hagit, usahay mobati sila nga huyang ug walay mahimo. Unsaon ninyo sa pagtabang ang mga anak nga mosalig sa kalig-on sa Ginoo? Mahimo ninyo silang pangutan-on kon unsa ang atong mahimo aron mahimong kusgan sa pisikal nga paagi. Unsay gipasabot nga adunay “kusog sa mga tawo”? (tan-awa sa Mosiah 10:11). Unsay gipasabot nga adunay “gahom sa Ginoo”? (tan-awa sa Mosiah 9:17–18; 10:10). Unsaon nato pagdawat ang kusog sa Ginoo? Ang inyong mga anak mahimong magdrowing og usa kahulagway sa mga butang nga makatabang kanila nga makadawat sa gahom sa Ginoo.

Alang sa dugang nga mga ideya, tan-awa ang isyu karong bulana sa Higala nga magasin.

Vision to Joseph Smith [Panan-awon ni Joseph Smith], ni Clark Kelley Price