Ang Inyong Lawas: Usa ka Talagsaong Gasa nga Angay Mahalon
Ni Presidente Russell M. Nelson
Ang inyong lawas talagsaon nga nilalang sa Dios.
Mga paghulagway ni Scotty Reifsnyder
Mas nagkadugay ko nga nagpakabuhi, mas nakaangkon ko og dugang kahibalo. Kana nga kahibalo nakatabang nako nga makasabut nga ang gasa sa atong pisikal nga mga lawas usa ka dili ordinaryo nga milagro. Usa ka talagsaon nga lawas gihatag sa matag usa kanato sa atong mahigugmaong Langitnong Amahan. Gilalang Niya kini isip usa ka tabernakulo alang sa atong mga espiritu, sa pagtabang sa matag usa nato sa atong pagpaningkamot nga makatuman sa hingpit sa atong katuyoan sa pagkalalang. Ang atong mga lawas motugot sa matag usa kanato sa pagsinati sa mahinungdanon nga plano sa kaluwasan nga Iyang giplano alang sa Iyang tanang bililhong mga anak. Siya gusto nga kita sa katapusan mahimong mas sama Kaniya ug mobalik sa pagpuyo uban Kaniya. Kanang importante nga panalangin dili posible kon kita wala pa makadawat og una sa pisikal nga lawas niining kahimtang sa pagsulay.
Ang Dios, ang Amahan sa atong mga espiritu,1 adunay nahimaya, hingpit nga lawas sa unod ug mga bukog.2 Nagpuyo kita uban Kaniya sa langit sa wala pa kita natawo.3 Ug sa dihang gilalang Niya kita sa pisikal, gilalang kita sama sa panagway sa Dios, matag usa adunay personal mortal nga lawas.4
Kabahin kita sa Iyang balaan nga katuyoan. “Ang akong buhat ug akong himaya,” miingon Siya, mao ang “pagpahinabo sa pagka-imortal ug sa kinabuhi nga dayon sa tawo.”5
Kita Adunay Duha ka Bahin
Ang matag kalag gilangkuban sa lawas ug sa espiritu,6 nga kining duha nagagikan sa Dios. Ang lig-ong pagsabut bahin sa lawas ug sa espiritu makaimpluwensya sa atong hunahuna ug binuhatan alang sa maayo.
Sa wala pa ang atong mortal nga pagpakabuhi dinhi, ang matag espiritu nga anak nga lalaki ug anak nga babaye nagpuyo uban sa Dios. Ang espiritu mahangturon; diha na kini sa kahimtang nga walay sala didto sa premortal nga kalibutan7 ug magpadayon human mamatay ang lawas.8 Ang espiritu naghatag sa lawas og kinabuhi ug personalidad.9 “Ang tanan nga espiritu mga butang, apan kini labaw nga dalisay o putli.”10
Ang kalamboan sa espiritu adunay mahangturong sangputanan. Ang mga kalidad nga kita pagahukman sa umaabut mao kadtong kabahin sa espiritu.11 Kini naglakip sa mga kalidad sa hiyas, kaligdong, kapuangod, gugma, ug uban pa.12 Ang inyong espiritu, nga nagpuyo sa inyong lawas, makahimo sa pagpalambo ug pagpadayag niini nga mga kalidad sa mga paagi nga importante sa inyong mahangturong kauswagan.13
Ang espiritu ug ang lawas, kon hiusahon, mamahimong buhi nga kalag nga may langitnong bili. “Ang espiritu ug ang lawas mao ang kalag sa tawo.”14 Pareho nga importante kaayo. Ang inyong pisikal nga lawas talagsaong nilalang sa Dios. Kini Iyang templo ingon man usab inyoha ug kinahanglan nga tagdon uban sa balaan nga pagtahud. Ang kasulatan namahayag:
“Unsa? wala ba kamo masayud nga ang inyong lawas templo sa Espiritu Santo nga nagapuyo sa sulod ninyo, ug nga kini inyong nabatonan gikan sa Dios, kamo dili na inyo sa inyong kaugalingon?
“Kay gipalit na kamo sa usa ka bili: busa himayaa ninyo ang Dios diha sa inyong lawas, ug sa inyong espiritu, nga ang tag-iya mao ang Dios.”15
“Ang inyong lawas, bisan unsa ang kinaiyanhon nga gasa, usa ka talagsaong nilalang sa Dios. Mao kini ang tabernakulo sa unod—usa ka templo alang sa inyong espiritu. Usa ka pagtuon sa inyong lawas nagpamatuod sa balaan nga plano niini.
Ang Inyong Lawas Usa ka Talagsaon nga Gasa
Ang milagro sa atong pisikal nga lawas sa kasagaran gibaliwala o wala kaayo pasalamati. Kinsa ang wala makasinati og mga pagbati nga ubos ang pagtan-aw sa kaugalingon tungod sa porma sa lawas o panagway? Daghang tawo ang nagtinguha nga ang ilang mga lawas mao unta sama sa ilang gusto. Ang uban nga dunay tul-id og buhok gusto nga kulungon kini. Ang uban nga natawo og kulungon og buhok gusto nga kini tul-id.
Palandunga ang katalagsaon sa unsay inyong nakita kon kamo motan-aw sa salamin. Ibaliwala ang talumtom, ang dili mahapsay nga buhok, o ang mga depekto, ug tan-awa lapas niini aron makita ang tinuod nimo nga pagkatawo—usa ka anak sa Dios, gilalang Niya subay sa Iyang imahe.
Kon mokanta mo og “Ako Anak sa Dios,”16 hunahunaa ang Iyang gasa sa inyong pisikal nga lawas. Ang daghang kahibulongang mga hiyas sa inyong lawas nagsaksi sa inyong “diosnong kinaiya.”17
Ang matag organ sa inyong lawas talagsaon nga gasa gikan sa Dios. Kada mata dunay lente nga makatutok. Ang kaugatan ug kaunuran nagkontrol sa duha ka mata nga makahimo og tulo ka dimensyon nga imahe. Konektado ang mata sa utok, nga nagrekord sa mga nakita.
Ang inyong kasingkasing usa ka talagsaon nga makina.18 Kini adunay upat ka balbula nga nagkontrol sa padulngan sa dugo. Kining mga balbula moabli ug mosira sobra sa 100,000 ka higayon kada adlaw—36 milyon kada tuig. Gani, gawas kon mausab pinaagi sa sakit, kini makasugakod og kakapoy nga walay kinutuban.
Hunahunaa ang sistema sa depensa sa lawas. Aron mapanalipdan gikan sa kadaut, mobati kini og sakit. Agig tubag sa impeksyon, makamugna kini og pangontra. Ang panit naghatag og proteksyon. Nagpasidaan kini sa kadaut dala sa grabeng kainit ug kabugnaw.
Ang lawas mobag-o sa daan nga mga cell. Ang lawas moayo sa samad, bun-og, ug bali nga mga bukog. Ang kapasidad sa pagpasanay lain nga sagradong gasa sa Dios.
Ang lawas kanunay nga nagkontrolar sa mga lebel sa daghang mga elemento, sama sa asin, tubig, asukar, protena, oxygen, ug carbon dioxide. Ang mga pagkontrol gidumala nga wala kita makahibalo niining talagsaong mga reyalidad.
Palihug hibaloi: Ang perpekto nga lawas wala magkinahanglan nga makaangkon og usa ka balaan nga padulngan. Sa pagkatinuod, ang ubang pinakamalumong mga espiritu anaa sulod sa huyang nga mga bayanan. Dakong espirituhanong kalig-on sagad mapalambo sa mga tawo nga adunay pisikal nga mga hagit—tungod kay nahagit gayud sila. Ang ingon niana nga mga indibidwal may katungod sa tanang panalangin nga giandam sa Dios alang sa tanan Niyang matinud-anong mga anak.19
Ang matag mortal nga kinabuhi tapuson sa kamatayon. Sa katapusan moabut ang panahon nga ang matag “espiritu ug … lawas paghiusahon pag-usab … sa iyang hingpit nga kahimtang; ug ang mga lutahan mapahiuli sa iyang tukma nga bayanan.”20 Dayon, salamat ni Jesukristo ug sa Iyang Pag-ula, kita mahimong hingpit diha Kaniya.21 Bisan kinsa nga nagtuon sa mga lihok sa lawas sa tawo siguradong “nakakita sa Dios nga naglihok sa iyang pagkahalangdon ug gahum.”22
Ang Atong mga Espiritu Kinahanglan nga Mao ang Magdumala sa Atong mga Lawas
Bisan og talagsaon kaayo ang inyong lawas, ang nag-unang katuyoan niini, sumala sa gipahayag na sa sayo pa, labihan pa gani ka mahinungdanon—nga magsilbi nga lawas sa inyong mahangturon nga espiritu.
Ang inyong espiritu nakaangkon og lawas ug nahimong buhi nga kalag nga magpuyo sa mortalidad ug sa kauban nga mga pag-antus ug pagsulay. Ang usa ka bahin niini nga pagsulay mao ang pagtino kon ang inyong lawas pagadumalahon ba sa espiritu nga nagpuyo niini.
Kon nakasabut kita sa atong kinaiya ug sa atong katuyoan dinhi sa yuta, ug nga ang atong mga lawas pisikal nga mga templo sa Dios, atong maamguhan nga usa ka pagpasipala ang pagpasulod sa lawas og bisan unsa nga makahugaw niini. Sa pagkatinuod walay balaan nga pagtahud ang pagpatan-aw sa atong bililhong mata o ang mga balatian sa atong paghikap o pangdungog nga mohatud ngadto sa utok og mga handumanan nga dili limpyo o takus. Atong mahalon ang atong kaputli ug likayan ang “binuang ug makadaut nga mga pangibug, nga nagaunlod [kanato] ngadto sa kamatayon ug pagkalaglag.”23 Kita “mopahilayo niining tanan; maningkamut sa pagkamatarung, pagkadiosnon, pagtuo, paghigugma, pagkamapainubsanon, [ug] pagkaaghup”24—mga hiyas nga makaayo sa tibuok kalag.
Ang mga butang sama sa alkohol, tabako, ug makadaot nga drugas gidili sa Ginoo. Kita gipasidan-an usab mahitungod sa kadautan sa pornograpiya ug dili maayo nga mga hunahuna. Ang mga gana niining imoral nga mga impluwensya mahimong makaadik. Sa katapusan, ang pisikal o mental nga pagkaadik moulipon sa lawas ug sa espiritu. Ang paghinulsol gikan sa maong mga kadena kinahanglan mahimo niini nga kinabuhi samtang kita aduna pay tabang sa usa ka mortal nga lawas sa pagtabang nato nga makapalambo sa pagkontrolar sa kaugalingon.
Ang atong tiglalang mibutang sa mga gana diha sa atong lawas aron magpadayon ang kaliwat sa tawo ug motuman sa Iyang mahinungdanong plano sa kalipay. Sa ingon, kita adunay gana alang sa pagkaon, alang sa tubig, ug alang sa gugma.
Si Satanas nakahibalo sa gahum sa atong mga gana. Mao nga, siya motintal kanato sa pagkaon sa mga butang nga dili angay natong kan-on, sa pag-inom sa mga butang nga dili angay natong imnon, ug sa pagsupak sa labing suod nga mga pagpadayag sa gugma pinaagi sa paggamit niini gawas sa mga talikala sa kaminyoon.
Kon kita sa pagkatinuod nakahibalo sa atong balaan nga kinaiyahan, kita gusto nga mokontrolar sa maong mga gana. Ug kita motutok sa atong mga mata diha sa mga panan-awon, sa atong mga dalunggan diha sa mga tingog, ug sa atong mga alimpatakan diha sa mga hunahuna nga tinubdan sa dungog sa atong pisikal nga pagkalalang isip usa ka templo sa Dios. Sa inadlaw-adlaw nga pag-ampo, kita mapasalamaton nga moila Kaniya isip atong Tiglalang ug magpasalamat Kaniya alang sa katalagsaon sa atong kaugalingong pisikal nga templo. Atimanon nato kini ug mahalon ingon nga kini ang atong kaugalingong personal nga gasa gikan sa Dios.
Sunda ang Manluluwas
Sa pagkab-ot sa inyong labing taas nga kapalaran, sunda ang Manluluwas. Siya mipahayag: “Unsa nga matang sa mga tawo kamo angay nga mahisama? … … Gani sama nga Ako mao.”25 Ang atong labing halangdon nga paglaum mao nga molambo diha sa espiritu ug makakab-ot “sa sukod sa gidak-on sa kahupnganan ni Kristo.”26
Hinumdumi, nga walay panahon sa inyong kinabuhi nga walay tintasyon, pagsulay, o kasakit, sa espirituhanon man o sa pisikal. Apan samtang kamo mainampoong mopalambo og pagkontrolar sa kaugalingon, ang mga tinguha sa unod mahimong mapaubos sa inyong espirituhanong pagkontrolar. Ug kon kana makab-ot na, kamo makabaton sa kalig-on sa pagtugyan ngadto sa kabubut-on sa inyong Langitnong Amahan. Hinumdumi, si Jesus miingon “Dili ang akong pagbuot maoy matuman kondili ang imo.”27
Kon ang grabing mga pagsulay moabut kaninyo, nga kini sa tinuod moabut gayud, hinumdumi kining mahimayaon nga saad sa Manluluwas: “Ang magmadaugon pagatugutan ko sa paglingkod sa akong trono uban kanako,maingon nga ako usab nagmadaugon ug milingkod uban sa akong Amahan diha sa iyang trono.”28
Hinaut nga kita mapasalamaton kanunay sa dili katuohan nga panalangin sa usa ka talagsaon nga pisikal nga lawas, sa labing mahinungdanon nga gilalang sa atong mahigugmaong Langitnong Amahan. Sama ka halangdon sa atong lawas, dili kini mao ang katapusan. Hinoon, importante kini nga bahin sa mahinungdanong plano sa Dios sa kalipay alang sa atong mahangturong kauswagan. Kon kita motahud niini sumala sa gi-orden sa Dios, kita magpabilin diha sa “higpit ug pig-ot nga dalan nga nagpadulong ngadto sa kinabuhing dayon.”29
Si Jesukristo mao ang atong mahinungdanon nga Ehemplo. Ako mopahayag, isip Iyang espesyal nga saksi, nga Siya mao ang Anak sa Dios. Siya “mao ang kinabuhi ug ang kahayag sa kalibutan.”30
Kita mga anak nga lalaki ug mga anak nga babaye sa Makagagahum nga Dios. Siya ang atong Amahan. Kita Iyang mga anak. Ang atong balaan nga kabilin mao ang katalagsaon sa katawhan. Ang atong kabilin sagrado. Walay limit ang atong potensyal. Hinaut nga kita motahud kanunay sa Iyang mga gasa ug niana nga kabilin sa atong tanang pagabuhaton ug isulti.