Mga Hulagway sa Pagtuo
Tomicka Barnes
Alabama, USA
Human sa pagsimba, si Tomicka nalingaw nga nakigdula sa iyang bag-ong pag-umangkon nga lalaki, nga si Aiden, duha ka bulan ang edad niini nga litrato.
“Kon kamo nakigbisog ug dili ganahan nga mag-ampo o magbasa sa mga kasulatan o mosimba, buhata kini hangtud nga kamo ganahan,” miingon si Tomicka, kinsa ang modrowing aron mahupay ang kabug-at. “Makapaayo kaayo kini nga himoon.”
Sulod sa katuigan, si Tomicka mikanta og alto isip kabahin sa trio, mopasundayag diha sa simbahan ug sa mga kasal ug sa mga konserto sa lain-laing mga relihiyon bahin sa pagkahimugso sa Manluluwas. “Nagtuon ko og ukulele tungod kay gusto gyud nako nga makat-on sa pagpatukar og instrumento,” miingon siya. “Butang kini nga gipangandoy gyud nakong buhaton. Dili pa kaayo ko maayo niini, apan malingaw ko niini.”
Dili ang pagkahibalo mahitungod sa pagdili sa pagkapari ang hinungdan nga nakapaduda sa pagtuo ni Tomicka; ang espekulasyon kalabut niana nga restriksyon nga gihisgutan sa pipila ka mga Santos sa Ulahing mga Adlaw. Si Tomicka nag-atubang og pagpili: mopahilayo gikan sa Simbahan o manggunit sa puthaw nga gunitanan. Salamat sa Basahon ni Mormon, nanggunit siya og maayo.
Leslie Nilsson, Litratista
Ako nagtubo sa Simbahan. Mitambong ko sa Primary ug miagi sa programa sa Young Women. Ganahan ko niini. Ang akong labing suod nga mga higala mga Santos sa Ulahing mga Adlaw. Apan sa dihang mitambong na ako sa kolehiyo, ang akong kalihokan sa Simbahan nagkaminus.
Wala gayud ako magduha-duha nga ang ebanghelyo tinuod, apan human sa kolehiyo nagbasa ko mahitungod sa pagdili sa pagkapari ngadto sa Afrikano-Amerikano. Nagsugod kini sa paghasol kanako—dili kaayo bahin sa pagdili, apan sa unsay gisulti sa mga tawo nga mga rason sa pagdili.
Ang pipila ka tawo moingon og mga butang sama sa, “Wala kamo magmaisugon didto sa gubat sa langit” o, “Kamo dili intelehente o dili matinud-anon.” Kadto nga mga butang wala mahiuyon unsay akong nahibaloan nga tinuod gikan sa akong mama, gikan sa ubang itom nga mga miyembro sa Simbahan nga mga maayo nga ehemplo sa pagtuo, ug gani gikan sa matinud-anong itom nga mga tawo sa gawas sa Simbahan.
Diha koy higayon, nga nagkakrisis sa pagtuo, sa dihang ako naghunahuna sa pagpalayo sa Simbahan ug sa tanan niini. Apan nianang higayuna, naghunahuna ko, “Ang Basahon ni Mormon tinuod ba? Nagtuo ba ikaw nga kini tinuod?”
Ako makatubag, “Oo, walay anino sa pagduha-duha, ako nagtuo nga kini tinuod.” Dayon ang Espiritu misulti nako, “Nan, kon ang Basahon ni Mormon tinuod, nan ang tanan tinuod usab.”
Aduna koy impresyon nga ang ebanghelyo hingpit, apan ang mga tawo dili. Ug mao nga, kinahanglan nga akong pahinumduman ang akong kaugalingon pagbalik-balik nga ang mga tawo usahay mohimo og mga butang ug mosulti og mga butang nga dili haum sa unsay gisulti sa ebanghelyo kanato.
Ang pipila ka tawo sa Simbahan mosulti og mga butang nga sayop. Ang ebanghelyo hingpit, apan ang mga tawo dili. Ang Simbahan alang sa dili hingpit nga mga tawo. Naningkamot kita nga moabut didto, apan layo pa kaayo kita niini.
Usa ka higala prangkang nangutana kanako, “Nganong nagpabilin pa man ka nga matinud-anon sa Simbahan, nga nakahibalo ka niining tanan?” Miingon ko, “Tungod sa akong pagpamatuod sa Basahon ni Mormon.” Ako nagtuo nga kini tinuod. Dili, ako nasayud nga kini tinuod.
Kana mao ang rason nga ako nagpabilin.