Ablihi ang Inyong Kasingkasing ngadto sa Espiritu Santo

Ni Presidente Henry B. Eyring

Ikaduhang Magtatambag sa Unang Kapangulohan

Kinuha gikan sa “Kaninyo Ihatag Ko ang Akong Kalinaw,” Liahona, Mayo 2017, 15–18, ug “Ang Iyang Espiritu Magauban Kaninyo,” Liahona, Mayo 2018, 86–89.

Sa dihang si Jesus hapit na mobiya sa Iyang mga disipulo, Siya misulti kanila kon sa unsa nga paagi Siya mohatag kanila sa Iyang kalinaw:

“Ang Maghuhupay, nga mao ang Espiritu Santo, … magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo.

“Kaninyo ibilin ko ang kalinaw, kaninyo ihatag ko ang akong kalinaw. … Kinahanglan dili magkaguol ang inyong kasingkasing, ni magtalaw.” (Juan 14:26–27)

Ang mga pagbati sa Espiritu Santo mas bililhon kay sa bisan unsa nga atong makita o madungog. Usahay kini mabati nga sama sa gamay nga kainit sa atong kasingkasing. Alang kanako, kini sa kasagaran usa ka pagbati sa kahayag.

Sa dihang kamo nabunyagan ug nakumpirmahan nga usa ka miyembro sa Simbahan, kamo giingnan sa usa ka panalangin sa “pagdawat sa Espiritu Santo.” Nianang higayona, kamo nakabaton sa Espiritu Santo uban kaninyo. Apan kinahanglan gihapon nga kamo mopili sa paghangop Kaniya sa inyong kasingkasing ug hunahuna.

Ako nag-ampo nga kamo moabli sa inyong kasingkasing ngadto sa Espiritu Santo. Ako nag-ampo nga kamo mobati sa kalipay sa pagbaton Kaniya isip inyong kauban kanunay.

Unsay Anaa sa Iyang Kasingkasing Gipadayag Pinaagi sa Pagdrowing

Ang Espiritu Santo motabang nato nga mahinumdom. Sa dihang si Presidente Eyring gusto nga mahinumdom og butang, isulat kini niya sa iyang journal. Usahay magdrowing siya og litrato sa pagpakita unsay iyang gibati.

Una, maggamit siya og lapis. Dayon iyang dugangan og watercolor. Paughon niya kini ug modugang og laing watercolor.
Si Presidente Eyring ganahan magdrowing og mga barko ug sa iyang pamilya. Kini nga litrato nagpakita ni Sister Eyring sakay sa usa ka gamay nga barko sa dihang otso anyos pa siya.
Sa dihang usa sa iyang mga apo nagmisyon sa France, si Presidente Eyring nagdrowing og mga misyonaryo nga naglakaw sa dalan sa Paris.
Kini nga drowing sa iyang asawa, nga si Kathleen, ug duha sa ilang unom ka mga anak nagpahinumdom kaniya sa iyang gugma alang sa iyang pamilya.