Ang Mahangturong Kaimportante sa Matarung nga mga Pagpili

Agosto 2019

Ang Mahangturong Kaimportante sa Matarung nga mga Pagpili

Ni Elder Quentin L. Cook

Sa Korum sa Napulog Duha ka mga Apostoles

Gikan sa debosyonal nga mga pakigpulong nga gihatag diha sa Brigham Young University–Hawaii niadtong Nobyembre 20, 2018, ug diha sa Utah Valley University niadtong Pebrero 1, 2019

Ang mga pagpili nga atong himoon importante—kini mao ang yawe sa atong umaabut ug sa kalipay.

Kita nagpuyo sa kalibutan nga naghatag og gibug-aton sa magkalain-lain kay sa panaghiusa. Daghan ang nagtuo nga imposible kaayo alang sa mga tawo nga gikan sa lain-laing mga kultura ug lain-laing mga kaagi nga magkahiusa sa komon nga mga tumong. Ang uban mipahayag, “Kulang kita sa nagkahiusa nga pagsabut sa pagpasabut unsaon sa daghang lain-laing kultura nga magkahiusa sa pagpuyo.”¹ Ang uban nagtuo nga “ang kalibutan gitino sa inyong usa lang ka talagsaong gigikanan. Ilang gihulagway ang katilingaban nga usa ka panggubatan” nga “nag-ugmad og walay pagsalig, panagbahin ug katig-a sa emosyon.”²

Ang nagkahiusa nga tubag niini nga mga pamahayag mao ang gipahiuli nga ebanghelyo ni Jesukristo. Ang pagkamatarung mao ang sukaranang baruganan nga makadala sa panaghiusa ug kalipay. Ganahan ko sa 2 Nephi kapitulo 9, nga adunay talagsaong panudlo mahitungod sa pagkat-on, kaalam, bahandi, paghago, ug nagdumili nga makakita o makadungog sa mga sangputanan sa sala. Kini naglakip sa makahuluganon nga doktrina nga nagtugot nato sa pagsunod sa mga dalan sa pagkamatarung nga paingon ngadto sa Manluluwas.

Ako mopakigbahin sa lima ka baruganan nga sa akong pagtuo makasalmot sa inyong malampusong pagpangita alang sa hugot nga pagtuo diha kang Jesukristo, sa pagkamatarung ug kahibalo. Kini nga mga tumong mahimong magkauyon ug makapabalanse. Sa praktikal nga lebel, daghan ninyo ang nag-andam alang sa kinabuhi sa pamilya ug sa mga paagi sa pagsuporta sa inyong pamilya. Pagtuo, pagkamatarung, ug kahibalo dako og ikatabang kaninyo niini nga mga bahin. Ang bisan unsa nga matinuoron nga pagtrabaho bililhon ug angay nga daygon. Ang trabaho nga naglakip sa mga mithi, katuyoan, ug bag-ong mga ideya ug nga nanalangin sa katawhan importante gayud.

1. Padayon sa Pagkat-on

Ang unang baruganan nga akong ipakigbahin mao ang pagpadayon sa madasigon ug matarung nga paagi sa inyong pagpangita sa kamatuoran. Usa sa akong mga bayani niini nga kategoriya mao si Paul Cox, usa ka aktibo nga miyembro sa Simbahan. Nakadawat siya og bachelor of science degree gikan sa Unibersidad sa Brigham Young sa botany ug nakaangkon og post-graduate nga mga degree. Nagmisyon siya didto sa Samoa ug sa kadugayan nagpuyo uban sa iyang pamilya didto sa Savai‘i, Samoa, sulod sa daghang mga tuig. Usa sa iyang gitutukan mao ang ethnomedicine, diin iyang gitun-an ang pipila ka tanom nga gigamit sa mga henerasyon nga mga inahan nga Samoan sa pagtambal sa mga problema sa panglawas. Kauban ang usa ka tagsulat, siya misulat sa Plants, People, and Culture: The Science of Ethnobotany.³

Daghan siya og nadiskobrehan nga bag-o sa pagtambal sa mga sakit. Samtang siya nakahimo og daghan nga mga butang sa iyang talagsaong pagpanarbaho, ang usa nga gusto nakong hisgutan nahitabo daghang mga tuig na ang nakalabay. Si Paul ug ang dako-dako nga Samoan, nga si Fuiono Senio, nagpahigayon og ethnobotanical nga pagsiksik sa balangay sa Falealupo, Western Samoa.

Usa ka istorya sa BYU Magazine mi-report: “Ang balangay nagduha-duha sa pagbaligya sa katungod sa paggamit sa lasang ngadto sa kompaniya nga mamutol og mga kahoy [logging] aron makakuha og pundo sa pagtukod og eskwelahan, tungod kay miingon si Cox, ‘gibati nila nga sila kinahanglang mopili tali sa ilang mga anak ug sa ilang lasang, nga usa ka dili maayong desisyon alang kanila.’ Sa dihang nahibaloan niya ang kasabutan uban sa kompaniya nga mamutol og mga kahoy, si Cox misulti sa mga dako-dako nga siya personal nga mobayad sa pagtukod sa eskwelahan kon sila mopahunong sa pagpamutol sa mga kahoy” sa kalasangan.⁴

Mitukod siya sa eskwelahan uban sa tabang sa mga negosyante kinsa adunay mga koneksyon sa Samoa.⁵ Si Brother Cox nakadawat og daghang mga pasidungog ug mga ganti, lakip sa Goldman Environmental Prize tungod sa pagpakigtambayayong direkta ngadto sa mga tawo imbis sa dagko nga mga organisasyon. Siya nagrepresentar sa padayon nga pagpangita sa kahibalo sa pagpanalangin sa katawhan. Kini nga istorya nagpakita sa gugma sa pagkat-on ug sa gahum sa panaghiusa tungod sa kahibalo.

Si Presidente Russell M. Nelson, lain nakong bayani, usa ka pioneer sa kalamboan sa open-heart nga operasyon, nga nakapanalangin pag-ayo niadtong kinsa nagpakabuhi sa atong panahon. Pipila ka tuig na ang milabay, nangutana ko niya mahitungod sa talagsaong kasaysayan sa open-heart nga operasyon ug sa iyang importante nga tahas niini. Naghisgot kami niini og dugay-dugay, ug dayon mapainubsanon siyang mipahayag, “Pagkatalagsaon nga ang Ginoo, kinsa nasayud sa tanan, nagtugot kanato sa dakong kalipay sa pagdiskobre sa piho nga mga piraso sa kahibalo.”

Ang 2 Nephi 9:29 mabasa, “Apan ang pagkamakinaadmanon maayo kon sila mopatalinghug ngadto sa mga tambag sa Dios.” Ang kahibalo sa kanunay importante, ug karon kita ania sa sinugdanan sa daghang bag-o ug kulbahinam nga kalamboan sa siyentipiko ug teknolohiya. Sigurado, ang kadaghanan niini makahatag og dakong benepisyo alang sa Simbahan ug alang sa tanang katawhan. Ang kahibalo, kon gamiton sa matarung nga paagi, daan o bag-o man, importante.

2. Matarung nga Pagpili Importante

Daghang mga tuig na ang milabay, si Elder Bruce C. Hafen, karon usa na ka emeritus nga sakop sa Seventy, mipakigbahin og kataw-anan nga ehemplo sa dili maayo nga pagpili atol sa usa ka pakigpulong nga gihatag didto sa New Zealand. Sa akong nahinumduman niini, ang Cookie Monster (usa ka inila nga Sesame Street nga karakter) nakadaog sa usa ka pasulit, ug siya makapili sa tulo ka mga kapilian alang sa iyang ganti. Una, siya makaangkon og bag-ong balay paglabay sa usa ka bulan. Ikaduha, siya makaangkon og bag-ong sakyanan paglabay sa usa ka semana. O ikatulo, siya makaangkon og talagsaong cookie—karon dayon! Unsa sa inyong hunahuna ang iyang gipili? Sakto kamo—iyang gipili ang cookie!⁶

Nangatawa kami niini, apan ang mga pagpili nga atong himoon importante—kini mao ang yawe sa atong umaabut ug sa kalipay. Hinumdumi, kon unsay atong dangatan kini gitino sa tanang mga desisyon nga atong gihimo. Kita nagpuyo sa usa ka panahon nga hapit ang tanang pagpili gidebatihan ug giutingkay. Daghang mga tawo mosupak dayon sa bisan unsa nga matarung nga sugyot o baruganan (tan-awa sa 2 Timoteo 4:3). Duol sa katapusan sa iyang kinabuhi, si propeta Lehi mitudlo:

“Kay kini gikinahanglan gayud, nga adunay katugbang sa tanan nga mga butang. …

“Busa, ang mga tawo gawasnon sumala sa unod; ug ang tanan nga mga butang gihatag kanila diin angay ngadto sa tawo. Ug sila gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa; kay siya nagtinguha nga ang tanan nga mga tawo unta mahimo nga mauyamot sama ngadto kaniya” (2 Nephi 2:11, 27).

Tungod kay nasayud kita sa gubat sa langit diha sa plano sa kaluwasan (tan-awa sa Abraham 3), dili ikasurprisa nga ang relihiyoso nga mga baruganan nga gitudlo niini, sa katapusan nga dispensasyon, giataki pag-ayo. Apan aron kita dili mawad-an og paglaum, hinumduman nato ang sangputanan sa gubat didto sa langit ug ang talagsaong sangputanan nga atong nahibaloan nga madala sa Ikaduhang Pag-anhi ni Jesukristo.

Ang mapintas nga kaaway sa maayong mga pagpili mao ang pagsulay sa pagtuo nga ang dili maayo nga pagpili maayo ra. Daghan ang makiglalis nga kita walay tulubagon sa atong mga pagpili. Apan tungod sa gipahiuli nga ebanghelyo ni Jesukristo, kita nasayud nga kita adunay tulubagon (tan-awa sa Doktrina ug mga Pakigsaad 72:3). Kita nasayud usab ngadto kang kinsa kita adunay tulubagon. Sa Manluluwas! (Tan-awa sa 2 Nephi 9:41; tan-awa usab sa Mga Buhat 4:12.)

Usahay ang importante nga mga pagpili may pagkayano. Isip batan-ong mga misyonaryo nga nag-alagad sa England, ang akong kompanyon ug ako adunay oportunidad sa pag-adto sa templo. Samtang naglakaw mi sa mga nataran sa templo, ang presidente sa templo, si Selvoy J. Boyer, naglakaw paingon kanamo. Nakakita sa among mga tsapa sa misyonaryo, gitudlo kami niya ug nangutana, “Mateo 5:48—nakahibalo ba kamo niana nga kasulatan?” Ang akong kompanyon misulti “Busa kamo kinahanglan magmahingpit, ingon nga hingpit ang inyong Amahan nga langitnon.” Si Presidente Boyer miingon, “Sakto kana. Mga elder, nagsunod ba kamo niana nga sugo?”

Nagkabunga-bunga kami, nasayud kami nga kami dili hingpit! Siya mitabang kanamo. Siya nangutana kanamo mahitungod kon unsay among gihimo sa miaging tulo ka adlaw. Siya nangutana mahitungod unsang orasa kami natulog, unsang orasa kami mimata, kon kami nagtuon ba sa kasulatan sa indibidwal ug isip kompanyon, ug kon kami nag-proselyte sa saktong oras. Dayon siya miingon, “Ako nakasiguro nga kamo dili hingpit, apan kamo nakahimo og hingpit nga mga pagpili sa miaging tulo ka adlaw, ug kana nagpasabut nga kamo nagpadulong sa sakto nga direksyon.” Siya mibiya namo nga naghunahuna mahitungod sa kaimportante sa unsay iyang gipangutana.

Si Lehi misangyaw mahitungod sa pagpili, nga gitudlo sa matag matarung nga amahan ug inahan ngadto sa ilang mga anak nga lalaki ug anak nga babaye: “Ako unta manghinaut nga kamo mosalig sa halangdon nga Tigpataliwala, ug mopatalinghug ngadto sa iyang mahinungdanon nga mga sugo; ug magmatinud-anon sa iyang mga pulong, ug mopili sa kinabuhi nga dayon, sumala sa kabubut-on sa Balaang Espiritu” (2 Nephi 2:28).

Kita kinahanglan nga makasabut nga adunay pagsupak sa tanang mga butang ug nga ang matarung nga mga pagpili nga atong himoon importante.

Sa bata pa ko, gitudloan ko og usa ka pamahayag ni Harry Emerson Fosdick, usa ka inila nga ministro sa protestante. Sa paghisgot sa mga pagpili, siya miingon: “Ang makalilisang nga mga dautan sa atong kinabuhi sa kasagaran dili tinuyo. Kita wala magsugod nianang dili maayo, sayon nga tumong. Kana nga tumong wala gayud sa among mga hunahuna. … Mao nga ngano nga ang dalan ngadto sa impyerno kanunay nga inubanan sa maayong mga intensyon, ug kana mao nga ngano ako wala magsaulog sa taas nga mga sumbanan, halangdon nga mga tumong, maayo nga mga katuyoan, dagko nga mga resolusyon, apan moingon hinoon nga usa sa labing makuyaw nga mga butang sa kalibutan mao ang pagdawat niini ug pagtuo nga ikaw nagtuo niini ug dayon nagbaliwala sa adlaw-adlaw nga mga paagi nga naggiya ngadto niini. Ah, akong kalag, tan-awa ang dalan nga imong gisubay! Siya kinsa nga nagpunit sa usa ka tumoy sa tukog nagpunit sa pikas tumoy. Siya kinsa nagpili sa sinugdanan sa dalan nagpili sa dapit nga padulngan niini. Kini mao ang paagi nga nagtino sa katapusan.”⁷

3. Kada Adlaw nga Gipahinungod nga Paningkamot

Ang matarung nga kada adlaw nga gipahinungod nga paningkamot mas maayo pa kay sa panagsang bayanihon nga mga paningkamot. Usa sa akong higala, si Jim Jardine, misulti sa usa ka pakigpulong sa Unibersidad sa Brigham Young nga sa dihang siya usa pa ka estudyante, siya naghunahuna “sa pagpahinungod sa [iyang] kinabuhi sa usa ka dako, bayanihon nga buhat” apan nakaamgo nga ang “pagpahinungod dili kausa nga hitabo sa kinabuhi, kini usa ka inadlaw-adlaw nga debosyon.”⁸

Sa dihang bata pa ko, ako usab gusto nga mopamatuod sa akong kaugalingon pinaagi sa pipila ka bayanihon nga buhat. Ang akong apohan sa tuhod nga si David Patten Kimball mao ang usa sa mga batan-ong lalaki kinsa miluwas ug mitabang sa pag-alsa sa mga miyembro sa grupo sa kariton ni Martin tabok sa Suba sa Sweetwater. Kana morag sama sa matang sa pagpahinungod nga akong gipangita. Dayon, samtang ako mibisita sa akong apohan nga si Crozier Kimball, siya mipasabut nga sa dihang si Presidente Brigham Young (1801–77) mipadala sa mga lalaki sa ilang misyon sa pagluwas, siya misugo nila sa pagbuhat sa tanan nga ilang mahimo sa pagluwas sa grupo sa kariton. Ang ilang pagpahinungod mao gayud ang “pagsunod sa propeta.” Ang akong apohan misulti nako nga ang makanunayon, matinud-anon, matarung nga pagpahinungod sa katungdanan o sa usa ka baruganan daygon pag-ayo.

Sama ka bayanihon alang ni David Patten Kimball sa pagtabang sa pagluwas sa mga pioneer, bayanihon usab kini karon ang pagsunod sa propeta pinaagi sa pagsunod sa iyang tambag sa pagpakunhod sa paggamit sa social media, pagtuon sa Basahon ni Mormon, ug ilabi na sa pagtabang sa nagkatibulaag nga Israel sa duha ka bahin sa tabil. Kon kita motabang sa pagpundok sa nagkatibulaag nga Israel, kita nagluwas sa mga kalag sa katawhan—sama sa akong apohan sa tuhod nga mitabang sa pagluwas sa mga kinabuhi sa grupo sa kariton.

Ang pipila ka mga miyembro sa Simbahan moingon nga sila mopasalig sa ilang kaugalingon uban ang kadasig nga kon hatagan og dagko nga balaan nga tawag [calling], apan wala sila magtuo nga ang pagpangalagad o pagkolekta og family history usa ka bayanihon nga buhat alang sa ilang padayon nga paningkamot.

4. Mahimong Malig-on ug Makanunayon Bahin sa Pagkamatarung

Pipila ka tuig ang milabay, si Elder Neal A. Maxwell (1926–2004) sa Korum sa Napulog Duha ka mga Apostoles naghisgot mahitungod sa pipila sa iyang personal nga mga higala kinsa dili kaayo aktibo sa Simbahan. Siya miingon nga siya nakaobserbar sa paglig-on ug pagkahuyang sa ilang pagtuo ug unsa ang sukaranan nga hinungdan. Si Elder Maxwell dayon namahayag:

“Usa ka bersikulo sa Basahon ni Mormon nagtanyag sa labing makatagbaw nga pagpasabut. Kini usa ka pangutana sa Mosiah 5:13: ‘Kay unsaon pagkasayud sa usa ka tawo sa agalon kinsa siya wala makaalagad, ug kinsa usa ka dili kaila ngadto kaniya, ug layo gikan sa mga lawom nga pagbati ug katuyoan sa iyang kasingkasing?’

“Kini naghulagway unsay kasagaran nga nahitabo: mga tawo nga sa kasagaran buotan nga yanong nakasinati sa mga problema sa kalibutan. Imbis nga magpaduol ngadto sa Manluluwas kita mahimong estranghero ngadto kaniya, dayon kita nahisalaag. Ang desente nga mga tawo nga nahitaboan niini wala makahimo og dagko nga kalapasan, isip usa ka lagda, apan nagpalayo sila sa ilang kaugalingon gikan sa Manluluwas, ug Siya nahimong estranghero ngadto kanila.”⁹

Importante nga kita mobutang sa atong pagtuo sa atong Ginoo ug Manluluwas nga si Jesukristo diha sa sentro sa atong kinabuhi. Usa ka talagsaon nga presidente sa misyon mipasag-ulo namong matag misyonaryo sa yanong pamahayag nga may kalabutan sa pagtuo ug pagkamatarung nga nagpabilin uban nako sa akong kinabuhi. Ako mosugyot niini kanimo:

Walay kahigayunan, walay kapalaran, walay dangatan
[Nga] makapugong o makababag o makakontrol
Sa lig-ong desisyon sa usa ka determinado nga kalag.10

Minahal kong mga higala, kinahanglan determinado kamo kon mahitungod sa pagpuyo sa matarung nga paagi!

5. Angkuna ang Inyong Kabilin pinaagi sa Matarung nga mga Pagpili

Usa sa importante nga mga istorya sa basahon ni Mormon mao ang tambag ni Alma ngadto sa iyang tulo ka mga anak nga lalaki—Helaman, Shiblon, ug Corianton. Si Alma mao ang anak ni Alma, ang propeta. Siya nakasinati og milagroso nga pagkakabig isip usa ka batan-ong lalaki. Siya nahimong labaw nga maghuhukom sa nasud ug ang halangdon nga pari ug propeta sa Simbahan. Duha sa iyang mga anak nga lalaki nakahimo og maayo nga mga pagpili. Apan ang usa ka anak nga lalaki nakahimo og dautan kaayo nga mga pagpili. Alang nako ang labing importante sa tambag ni Alma mao nga siya naghatag niini isip usa ka amahan alang sa iyang kaugalingong mga anak. Ang iyang unang gihunahuna mao nga sila adunay pagpamatuod sa Dios nga Amahan, ni Jesukristo, ug sa Espiritu Santo.

Nagsugod si Alma sa kapitulo 36 pinaagi sa pagsulti kang Helaman sa iyang milagroso nga pagkakabig. Usa ka anghel misulti ni Alma nga siya malaglag kon siya magpadayon sa pagbatok sa Simbahan. Siya mipamatuod nga ang kahibalo nga iyang gipakigbahin wala magagikan sa iyang kaugalingong kaalam apan gipadayag ngadto kaniya gikan sa Dios. Siya gusto nga si Helaman magbaton og pagpamatuod.

Daghan kaninyo, kon dili ang kadaghanan, adunay pagpamatuod. Matag usa kanato nagkinahanglan og personal nga pagpamatuod. Si Presidente Joseph F. Smith (1838–1919) miingon, “Usa ka sayop nga kinahanglan nga likayan sa mga Santos, batan-on ug tigulang, mao ang kalagmitan nga magpakabuhi sa hinulam nga kahayag [ug] sa pagtugot … sa kahayag nga anaa kanila nga modan-ag, kay sa orihinal.”¹¹

Si Presidente Heber C. Kimball (1801–68), usa ka magtatambag ngadto ni Presidente Young, miingon:

“Moabut ang panahon diin wala nay lalaki o babaye ang makahimo sa paglahutay sa hinulaman nga kahayag. Ang matag usa kinahanglan nga magiyahan sa kahayag nga anaa sulod sa iyang kaugalingon. Kon wala kamo niini, unsaon man ninyo sa pagsugakod? …

“… Kon kamo wala niini dili kamo makabarug; busa tinguhaa ang pag-angkon og pagpamatuod kang Jesus ug hupti kini, nga kon moabut man ang panahon sa pagsulay dili kamo mapandol ug mapukan.”¹²

Ang ika-76 nga seksyon sa Doktrina ug mga Pakigsaad naghulagway sa tulo ka mga ang-ang sa himaya ug nagtandi sa celestial nga himaya ngadto sa adlaw. Dayon kini nagtandi sa terrestrial nga gingharian ngadto sa bulan ug sa telestial nga gingharian ngadto sa mga bitoon (tan-awa usab sa 1 Mga Taga-Corinto 15:41).

Makapaikag nga ang adlaw aduna sa iyang kaugalingon nga kahayag, apan ang bulan usa ka misanag nga kahayag o “hinulaman nga kahayag.” Naghisgot niadtong kinsa makapanunod sa terrestrial nga gingharian, ang bersikulo 79 namahayag, “Kini mao sila kinsa dili maisug diha sa pagpamatuod ni Jesus.” Dili kita makaangkon sa celestial nga gingharian ug magpuyo uban sa Dios nga Amahan sa hinulaman nga kahayag.

Pagmapasalamaton kon kamo adunay matarung nga mga ginikanan kinsa adunay mga pagpamatuod ug mitudlo kaninyo sa ebanghelyo. Apan, kamo nagkinahanglan sa inyong kaugalingong pagpamatuod. Ang tigpangatarungan nga si Goethe misulat, “Unsay gipasa nga panulundon sa inyong amahan, inyo gyud kining kugihan aron kini maangkon!”¹³

Ang matag indibidwal adunay responsibilidad sa paghimo og matarung nga mga pagpili ug seryosong mamalandong sa lima ka mga bahin sa tambag nga akong gihatag. Ang inyong importanting tumong mao ang pagtukod sa inyong personal nga pagtuo. Ang kahimtang sa kalibutan mas nagkinahanglan og lig-on nga pagkakabig sa indibidwal ug makapalig-on nga pagtuo ngadto sa Langitnong Amahan ug ni Jesukristo ug sa Iyang Pag-ula.

Nakaandam alang sa mga Panahon nga Malisud

Ang Simbahan nakahimo og talagsaong paningkamot sa paghatag kaninyo og mapa sa dalan aron sa pagtabang kaninyo sa paghimo og matarung nga mga pagpili. Ang Ginoo miandam kanato, lagda ibabaw sa lagda, alang sa “mga panahon nga malisud” (2 Timoteo 3:1) nga atong giatubang karon. Usa ka mubo nga lista sa mga buhatunon nga gihatag sa Unang Kapangulohan ug sa Korum sa Napulog Duha ka mga Apostoles sa pagsangkap niini nga mapa sa dalan naglakip sa mosunod:

Pagtahud sa adlaw nga Igpapahulay ug sa sagradong ordinansa sa sakrament nga gihatagan na usab og gibug-aton sulod sa miaging lima ka tuig.
Ubos sa direksyon sa bishop, ang gipalig-on nga mga korum sa mga elder ug mga Relief Society nagpunting sa katuyoan ug sa balaanong gipili sa Simbahan nga mga responsibilidad sa Simbahan ug sa pagtabang sa mga miyembro nga mohimo ug motuman sa sagradong mga pakigsaad.
Ang pagpangalagad sa mas halangdon ug mas balaan nga paagi malipayong gihangup.
Samtang kita magsugod nga maghunahuna sa katapusan, ang mga pakigsaad sa templo ug pagserbisyo sa family history nahimong dunay katuyoan nga bahin sa dalan sa pakigsaad.

Dugang nga mga kausaban aron makab-ot ang bag-ong pagbalanse sa unsay nahitabo sa simbahan ug sa panimalay gipresentar atol sa kinatibuk-ang komperensya niadtong Oktubre 2018. Ang mga kausaban gipresentar aron makab-ot ang nakasentro sa panimalay, gisuportahan sa Simbahan nga paningkamot sa Igpapahulay. Sa pakigpulong nga akong gihatag, nga giaprobahan sa Unang Kapangulohan ug sa Korum sa Napulog Duha, among gipahayag nga ang mga katuyoan ug mga panalangin nga may kalabutan niini nga kausaban ug uban sa bag-o nga mga kausaban naglakip sa mosunod:

Paglig-on sa pagkakabig ngadto sa Langitnong Amahan ug sa Ginoong Jesukristo ug paglig-on sa pagtuo diha Kanila.
Paglig-on sa mga indibidwal ug mga pamilya pinaagi sa nakasentro sa panimalay, gisuportahan sa Simbahan nga kurikulum nga makatampo sa malipayong pagsunod sa ebanghelyo.
Pagtahud sa adlaw nga Igpapahulay, uban ang pagpunting sa ordinansa sa sakrament.
Pagtabang sa tanang anak sa Langitnong Amahan sa duha ka bahin sa tabil pinaagi sa misyonaryo nga buhat ug pagdawat sa mga ordinansa ug mga pakigsaad ug mga panalangin sa templo.¹⁴

Matarung nga pagpatalinghug sa tambag nga gihatag makapanalangin kaninyo karon ug sa inyong tibuok kinabuhi.